Amatie 24

Wẽnde-kãtɛ la sã'aŋɔ, la dũnia ba'asgɔ toogo

(Amarkɩ 13:1-23, Aluki 17:22-24;21:5-24)

1Azezi daan ze'ele la Wẽnde-kãtɛ la pʋam yese fõrgra. Tɩ a karẽnbiisi la lɛm ẽ pa'alɛ ẽ tɩ a bɩsɛ Wẽnde-kãtɛ la n mẽ sõŋa se'em. 2Tɩ a yele ba yetɩ: «Yãma yẽ bõn-bãna wã wuu? Mam yetɩ ya la sɩra, tɩ ba wʋn lʋbɛ ba wuu mɛ saam saam, tɩ kugre baa ayɩla kãn weege a tadãana zuo.»

3La a daan sẽŋɛ ka zẽa la Oliivi tãŋa zuo, tɩ a karẽnbiisi la mã'a sẽŋɛ a zẽ'am ka yele ẽ yetɩ: «Yele to wakat-sɛka tɩ bõn-bãma wuu wʋn ẽŋɛ, la sɛla n wʋn pa'alɛ fõn lemŋo, la dũnia ba'asgɔ wakatɛ.» 4Tɩ a yele ba yetɩ: «Guuse ya mẽŋa tɩ nẽra da pã'asɛ ya tɩ ya tuuge. 5Nẽrba zozo'e n wʋn dɩkɛ mam yʋ'ʋrɛ wa'am wa pã'asra ya, tɩ ba nẽra woo yetɩ: ‹Mam n de Krisi la.› La ba wʋn botɩ nẽrba zozo'e tuuge mɛ. 6Ya wʋn wa wõm zɛbrɛ yelle, la zɛbrɛ dãmnɛ. La da basɛ-ya tɩ dabeem tarɩ ya. Dẽnɩ tɩ bõn-bãma ẽŋɛ, la, la nãn dagɩ dũnia ba'asgɔ. 7Buuri ayɩla nẽrba wʋn isge zɛbra la buuri ayẽma nẽrba, tɩ so'olʋm ayɩla isge zɛbra la so'olʋm ayẽma, la kɔm, la tẽn-mĩiŋo wʋn bɔna zẽ'esɩ zozo'e. 8La bõn-bãma nãn de la toogo la sẽŋrɛ, la ãn wʋ pɔka virgre toogo n nãn sẽŋrɩ la. 9Ba wʋn yõgɛ ya mɛ tarɩ ka bɔ tɩ ba nãmsɛ ya, kʋ ya, la buuri wuu wʋn sisra ya mam yʋ'ʋrɛ ĩyã. 10Nẽrba zozo'e wʋn basɛ sɩra sore, dee ɩta taaba zãmɔ, dee sisra taaba. 11La nẽrba zozo'e wʋn isge parɩm yetɩ bãma de la Nawẽnnɛ nõtɔ'ɔsrɩba pã'asɛ nẽrba zozo'e tɩ ba tuuge. 12Tõon-be'ero wʋn wa pa'asɛ mɛ halɩ tɩ nẽrba zozo'e nõŋrɛ ba'asɛ. 13La nẽr-sɛka n wʋn mõrgɛ ze'ele kãŋkãŋɛ ka paagɛ ba'asgɔ wʋn yẽ fãarɛ. 14Nawẽnnɛ so'olʋm kõ-yẽlga wʋn mõolɛ dũnia wuu mɛ, tɩ buuri wuu wõm, dee tɩ dũnia ba'asgɔ yãŋa paagɛ.

15Ya wʋn wa yẽ sɛka n de bõn-be'ego n sã'anɩ sɛla woo la, sɛka tɩ Nawẽnnɛ nõtɔ'ɔsa Adanɩyɛlɩ yʋʋn tɔgɛ a yelle la, tɩ a boe Nawẽnnɛ zẽ'e-sõŋɔ la.» Sɛka n karẽŋrɩ mõrgɛ wõm a võorɛ.

16«Ya sãn wa yẽ bɛla, nẽr-sɛba n boe Zude zoe zom tãnsɩ zuto. 17La nẽr-sɛka n boe gɔsgɔ da sige bɔɔra tɩ a kẽ deem dɩkɛ sɛla. 18La nẽr-sɛka n boe va'am da kãn lebe kule yire tɩ a dɩkɛ a fuugo. 19Dabs-bãma, la wʋn dɛna la toogo bɔ pɔg-sɛba n tarɩ pʋa, la sɛba n tarɩ kɔma tɩ ba mõgra la. 20Sose-ya Nawẽnnɛ tɩ ya zʋa la wakatɛ da dɛna ɔɔrɔ wakatɛ, bɩɩ vo'osgo daarɛ. 21Se'ere n soe la, wakat-ẽŋa, la wʋn dɛna la toogo halɩ zozo'e tɩ ba nãn ka yẽ halɩ dũnia n pĩ'ilum wa paam wakat-ẽŋa, la toog-ẽŋa buuri kãn le malɩn wa'am. 22Nawẽnnɛ sãn ka bo'oge nɩ dabs-bãma sõorɛ, nẽra nẽra ka boe n wʋn põsɛ. La nẽr-sɛba tɩ a looge la ĩyã tɩ a bo'oge dabs-bãma sõorɛ.

23La nẽr-sɛka sãn yele ya yetɩ: ‹Bɩsɛ-ya, Krisi la boe la kalam›, bɩɩ ‹bɩsɛ-ya, a boe la ke›, ya da sakɛ. 24Nẽrba wʋn wa'am wa parɩm tɩ bãma n de Krisi, la nẽrba wʋn wa'am wa parɩm tɩ bãma n de Nawẽnnɛ nõtɔ'ɔsrɩba tõnna tõon-yãlma, la yel-kɩrsɩ, bɔɔra tɩ ba sãn tã'agɛ, ba botɩ nẽr-sɛba tɩ Nawẽnnɛ looge la tuuge. 25Mam dẽŋɛ yele ya mɛ tɩ la nãn ka paam. 26Bɛla, ba sãn yele ya yetɩ: ‹Bɩsɛ-ya, a boe la weem›, da sẽŋɛ-ya. Bɩɩ, ba sãn yetɩ: ‹A boe la deem›, ya da sakɛ. 27Nẽrsaala Dayʋa la lemŋo wʋn ãna wʋ saaga n ẽn yãkɛ dapoore bɔba nẽegɛ ka paagɛ zanõa bɔba la. 28Bõn-kɩ'ɩsɩ n boe zẽ'e-sɛka la, zõa lagsrɩ taaba la bilam.»

Azezi n de Nẽrsaala Dayʋa la lemŋo

(Amarkɩ 13:24-37, Aluki 17:26-36;21:25-33)

29«Toogo dabsa la poorʋm, wẽntulle wʋn sobge mɛ, tɩ wõrga kãn le nẽera a peelem, tɩ wõrbiɛ wʋn ze'ele saazuum lui. La bõn-sɛba n boe saazuum wʋn mĩim mɛ. 30La sɛla n pa'alɩ Nẽrsaala Dayʋa la lemŋo la wʋn puke saazuum. Tɩ dũnia nẽrba buuri wuu wʋn kaasra fabla. La ba wʋn yẽ Nẽrsaala Dayʋa la n boe sawara pʋam sẽna la pãŋa, tɩ a na'am pãŋa peelem nẽegɛ zozo'e. 31La a wʋn tõm na a malɛkadõma, tɩ benkonne peebe, tɩ ba sẽŋɛ dũnia zʋʋgɔ, la gɔbga, la dapoore, la zanõrɛ ka lagsɛ nẽr-sɛba tɩ Nawẽnnɛ looge la, halɩ ka paagɛ dũnia tɛka wuu.

32Dɩkɛ-ya makrɛ la kẽnkãŋa bãŋɛ zãsŋɔ la võorɛ. Kẽnkãŋa wila sãn wa pusra võ-paala, ya mi tɩ sigre lɛm mɛ. 33Bɛla, ya mẽ sãn wa yẽ tɩ bõn-bãna wuu ɩtɩ, ya bãŋɛ tɩ Nẽrsaala Dayʋa la lɛm mɛ, a boe la zanõrʋm. 34Mam yetɩ ya la sɩra, tɩ bõn-bãna wuu wʋn ɩta mɛ, dee tɩ zamãan-ẽna yãŋa tole. 35Saazuum la tẽŋa wʋn tole mɛ, la mam yetɔga la kãn malɩn tole.

36Nẽra nẽra ka mi daar-sɛka la wakat-sɛka tɩ Nẽrsaala Dayʋa la wʋn leme wa'am, baa malɛkadõma n boe Nawẽnnɛ yire, bɩɩ Dayʋa la mẽŋa ka mi, sãn dagna Sɔ Nawẽnnɛ mã'a. 37Nẽrsaala Dayʋa la lemŋo, la wʋn ãna wʋ Anoe wakatɛ n yʋʋn ãn se'em na. 38Se'ere n soe la, lan dẽŋɛ sã'aŋɔ sa-kãtɛ la, nẽrba yʋʋn diti mɛ dee yũura, tɩ bʋraasɩ dita pɔgsɩ, tɩ pɔgsɩ ɛlla sɩrba, dee tara ba pɔyɔɔsɩ sɩɩra, halɩ wa paagɛ daar-sɛka tɩ Anoe kẽ õorŋ-kãtɛ la pʋam na. 39Ba yʋʋn ka bãŋɛ tɩ yelle boe, halɩ tɩ saaga wa ni, tɩ ko'om pe'ege nẽrba la wuu. La mẽ wʋn ãna la bɛla Nẽrsaala Dayʋa la lemŋo wakatɛ. 40Daar-ẽŋa bʋraasɩ bayi wʋn bɔna va'am, tɩ ba dɩkɛ ayɩla, dee basɛ ayẽma. 41Tɩ pɔgsɩ bayi wʋn bɔna nẽerʋm, tɩ ba dɩkɛ ayɩla, dee basɛ ayẽma. 42Bɛla, guuse ya mẽŋa, se'ere n soe la, ya ka mi daar-sɛka tɩ ya Zuudãana la wʋn leme wa'am. 43Bãŋɛ-ya tɩ yidãana sãn mina nayiga n wʋn wa'am yʋ'ʋŋɔ wakat-sɛka wa zũ ẽ, a wʋn gu'ura a yire mɛ, a kãn basɛ tɩ nayiga la kẽ zũ ẽ. 44Bɛla, mãasʋm-ya gu'ura, tɩ Nẽrsaala Dayʋa la sẽm na wakat-sɛka tɩ ya ka tẽ'esrɩ tɩ a wʋn wa'am na.»

Tõntõn-sõŋɔ, la tõntõn-be'ego makrɛ

(Aluki 12:41-48)

45Azezi le yetɩ: «Ãne n de tõntõn-sõŋɔ n tarɩ yɛm? La de la ẽŋa tɩ a zuudãana wʋn yetɩ a bɩsra a yire yelle, bɔ'ɔra a tõntõnɩba dia wʋ lan masɛ, dee sẽŋɛ sore. 46Zuudãana la sãn leme wa yẽ tɩ tõntõnna la tõm wʋ ẽŋa n yele ẽ se'em na, tõntõnna la tarɩ zu-yẽlga. 47Mam yetɩ ya la sɩra, tɩ a zuudãana la wʋn dɩkɛ ẽŋa n tarɩ sɛla la wuu bɔ ẽ mɛ tɩ a bɩsra.

48La a sãn dɛna tõntõn-be'ego, tẽ'esɛ yetɩ ẽŋa zuudãana la yuuri mɛ ka kulna, 49yãŋa wẽ'era a tõntõn-taaba la, dita dee yũura la dã-yũuriba, 50a zuudãana la wʋn kulum na daar-sɛka tɩ a ka tẽ'esrɩ tɩ a wʋn wa'am, la wakat-sɛka tɩ a ka mi, wa di'ige ẽ. 51La a wʋn dige ẽ mɛ botɩ a lagɩm na pʋlibsum dõma yẽ sɩbgrɛ. Zẽ'e-ẽŋa tɩ ba wʋn kɛlla, dee dɩkɛ ba nu'usi gɩ nõorʋm.»

Currently Selected:

Amatie 24: gurDBL

Highlight

Copy