Amatie 23

Azezi tɔgɛ lɔɔ karẽnsãandõma, la Farisi dõma yelle

(Amarkɩ 12:38-40, Aluki 11:37-54;20:45-47)

1Tɩ Azezi yele nẽr-kʋʋŋɔ, la a karẽnbiisi la yetɩ: 2«Lɔɔ karẽnsãandõma, la Farisi dõma n sɔɔgɛ Amoyisi zẽ'a. 3Bɛla, ban zãsnɩ ya se'em na, ya ɩta bɛla, dee da ɩta bãma n ɩtɩ se'em na. Se'ere n soe la, bãma n zãsnɩ se'em na, ba ka ɩtɩ bɛla. 4Ba zãsŋɔ la ãn wʋ ze-tɩbsa tɩ ba lʋ zelge nẽrba, la ba mẽŋa ka boorɩ tɩ ba kalʋm ba la ba nu'ubiire. 5Ba tõnnɩ ba tõoma la wuu tɩ nẽrba n bɩsra ba, bɛla tɩ ba dɩkɛ gãna gʋlsɛ Nawẽnnɛ yetɔga ba pʋam dɩkɛ lʋ ba dĩa bɩɩ ba kẽnkãnsɩ. Dee pɛ fu-wogro ẽŋɛ bisa tɩ ba wɔgɛ tɩ nẽrba nã'asra ba. 6Ba nõŋɛ la nã'asgɔ zẽ'esɩ dia zẽ'esʋm, la ba wẽndeto pʋam. 7Ba nõŋɛ tɩ nẽrba n pʋ'ʋsra ba da'asɩ pʋam, dee bɔɔra tɩ ba wi'ira ba yetɩ: ‹Karẽnsãama.› 8La yãma da basɛ tɩ ba wi'ira ya tɩ karẽnsãama. Se'ere n soe la, yãma tarɩ la karẽnsãama ayɩla mã'a, la ya wuu de la sɔbiisi la taaba. 9Da wi'ira-ya nẽra tɩ sɔ dũnia wã zuo Nawẽnnɛ sore la doosgo ĩyã. Se'ere n soe la, ya tarɩ la Sɔ ayɩla mã'a n boe saazuum. 10La ya da basɛ tɩ nẽra wi'ira ya tɩ nẽŋadãana. Se'ere n soe la, ya tarɩ la nẽŋadãana ayɩla mã'a n de Krisi. 11Sɛka n de nẽr-keko ya pʋam, a dɛna ya tõntõnna. 12Sɛka n zẽkɛ a mẽŋa, Nawẽnnɛ wʋn sike ẽ. La sɛka n sike a mẽŋa, Nawẽnnɛ wʋn zẽkɛ ẽ.

13Yãma Farisi dõma, la lɔɔ karẽnsãandõma, pʋlibsum dõma wã, ya wʋn yẽ toogo. Se'ere n soe la, yãma gu'uri la nẽrba tɩ ba da kẽ Nawẽnnɛ so'olʋm pʋam. Ya ka kẽ'erɩ ya mẽŋa, dee mẽ ka basra nẽr-sɛba n boorɩ tɩ ba kẽ la sore tɩ ba kẽ.

[ 14Yãma Farisi dõma, la lɔɔ karẽnsãandõma, pʋlibsum dõma wã, ya wʋn yẽ toogo, se'ere n soe la, ya to'osrɩ la pɔkõpa n tarɩ sɛla la wuu, dee pʋ'ʋsra Nawẽnnɛ pʋ'ʋs-wogro tɩ nẽrba bɩsra ya. Ya wʋn yẽ sɩbgrɛ gãnna wuu].

15Yãma lɔɔ karẽnsãandõma, la Farisi dõma, pʋlibsum dõma wã, ya wʋn yẽ toogo, se'ere n soe la, ya kaarɩ la dũnia zẽ'esɩ wuu ɛɛra tɩ ya yẽ nẽra ayɩla tɩ a sakɛ dɔla ya sore la. La ya sãn yẽ nẽra ayɩla, ya basɛ tɩ a lebge la tõon-be'ero dãana gãnna ya mẽŋa nõorɛ ayi, wʋn sẽŋɛ bug-tẽŋa.

16Yãma sɛba n de nẽŋadõma de la fɔɔsɩ, ya wʋn yẽ toogo, se'ere n soe la, yãma yetɩ, nẽra sãn pɔɩ Wẽnde-kãtɛ la, la de la zãŋa. La sɛka sãn pɔɩ sãlma la n boe Wẽnde-kãtɛ la pʋam na, dẽnɩ tɩ a ẽŋɛ ẽn pɔɩ tɩ a ẽŋɛ se'em na. 17Yãma ka wõnnɩ sɛla võorɛ, dee ãna wʋ fɔɔsɩ la. Bẽm n gãnnɩ? Sãlma la bɩɩ, Wẽnde-kãtɛ la n botɩ sãlma la dɛna Nawẽnnɛ tʋʋlʋm bõnɔ na n gãnnɩ? 18Ya ken yetɩ, nẽra sãn pɔɩ Nawẽnnɛ kãabgɔ bĩmbĩnne na, la de la zãŋa. La nẽra sãn pɔɩ sɛla tɩ ba dɩkɛ kãabɛ bĩŋe bĩmbĩnne na zuo la, dẽnɩ tɩ a ẽŋɛ ẽn pɔɩ tɩ a ẽŋɛ se'em na. 19Fɔɔsɩ, bẽm n gãnnɩ? Sɛla tɩ ba dɩkɛ kãabɛ la bɩɩ, kãabgɔ bĩmbĩnne na n botɩ sɛla tɩ ba dɩkɛ kãabɛ la dɛna Nawẽnnɛ tʋʋlʋm bõnɔ na n gãnnɩ? 20Bɛla, sɛka n pɔɩ kãabgɔ bĩmbĩnne na, a po pɔɩ la sɛla n boe a zuo la wuu. 21La sɛka n pɔɩ Wẽnde-kãtɛ la, a po pɔɩ la Nawẽnnɛ n boe mĩ na. 22La sɛka n pɔɩ Nawẽnnɛ yire, a pɔɩ la Nawẽnnɛ na'am bĩmbĩnne na, la sɛka n zĩ a zuo la.

23Yãma lɔɔ karẽnsãandõma, la Farisi dõma, pʋlibsum dõma wã, ya wʋn yẽ toogo. Se'ere n soe la, yãma bɔ'ɔrɩ Nawẽnnɛ zẽvõorɔ buuri wuu pia pʋrɛ mɛ, baa ba sãn ãna pɩka pɩka, dee basra yel-sɛba n de kãŋkãŋɛ lɔɔ la pʋam na, ka ɩta. La de la sɛla n masɛ, la ninbãal-zʋa, la sakrɛ. La de la bõn-bãna tɩ ya wʋn dẽŋɛ ɩta, dee yãŋa ɩta sɛla tɩ ya ɩtɩ la pa'asɛ. 24Yãma nẽŋadõma de la fɔɔsɩ, yãma yoorɩ ya bõn-yũula mɛ yɛsra lislima basra, dee vɔlla yʋgma.

25Yãma lɔɔ karẽnsãandõma, la Farisi dõma, pʋlibsum dõma wã, ya wʋn yẽ toogo. Yãma peerɩ ya laasɩ, la ya wama pɔa mɛ tɩ ba ãna sõŋa, dee tɩ ba pʋam pɩrɛ la nayigum, la be'ero bõnɔ. 26Yãma Farisi dõma, ya de la fɔɔsɩ! Peege-ya ya laasɩ la pʋam pɔspɔsɩ, tɩ ba poore la mẽ wʋn ãna sõŋa.

27Yãma lɔɔ karẽnsãandõma, la Farisi dõma, pʋlibsum dõma wã, yãma ãn wʋ yɔɔrɔ tɩ ba takɛ tɩ ba zuum pelge ãna sõŋa sõŋa, dee tɩ ba pʋam pɩrɛ la kõba, la põ'osgɔ wuu. 28Yãma mẽ ãn na bɛla. Yãma botɩ nẽrba bɩsra ya tɩ ya ãna wʋ nẽrba n ɩtɩ sɛla n masɛ, dee tɩ ya pʋam pɩrɛ la pʋlibsum, la tõon-be'ero.

29Yãma lɔɔ karẽnsãandõma, la Farisi dõma, pʋlibsum dõma wã, ya wʋn yẽ toogo. Ya mẽtɩ la Nawẽnnɛ nõtɔ'ɔsrɩba yɔɔrɔ, dee malgra nẽr-sɛba n ẽŋɛ sɛla n masɛ yɔɔrɔ tɩ ba ãna sõŋa. 30Dee yetɩ, yãma daan sãn boe nɩ yãma yaabdõma wakatɛ la, yãma daan kãn po lagɩm na ba kʋ Nawẽnnɛ nõtɔ'ɔsrɩba la. 31Ya mẽŋa n bɔ'ɔrɩ ya mẽŋa kaseto tɩ yãma de la sɛba n yʋʋn kʋ nõtɔ'ɔsrɩba la yɩɩsɩ. 32Tɔ. Ken sẽŋɛ-ya nẽŋa ẽŋɛ ya yaabdõma la n daan ẽŋɛ sɛla la ba'asɛ. 33Bõnsɛ'ɛdõma wã! Kãmpẽesɩ buuri! Yãma wʋn ẽŋɛ la wãne põsɛ sarɩyadia tɩ ba kãn kẽ'esɛ ya bug-tẽŋa? 34Bɛla tɩ mam yɛta ya tɩ mam wʋn tõm m nõtɔ'ɔsrɩba, la yɛm dõma, la lɔɔ karẽnsãandõma. La ya wʋn kʋ sɛba, dee ka basɛba dɔ-puursi zuto kʋ, wẽ sɛba la ka'asa ya wẽndeto pʋam, dee dɔla ba nãma tẽŋa tẽŋa nãmsra ba. 35Bɛla tɩ pʋpeelem dõma la wuu tɩ ba kʋ dũnia zuo la taalɛ wʋn bɔna ya zuto, lan pɔsɛ la Abɛlɩ kʋa halɩ wa paagɛ Abarakɩ dayʋa Azakari tɩ ya kʋ Wẽnde-kãtɛ zẽ'e-sõŋɔ, la kãabgɔ bĩmbĩnne na tẽŋasʋka la. 36Mam yetɩ ya la sɩra sɩra, tɩ bõn-bãna taalɛ wʋn bɔna zamãan-ẽna nẽrba wuu zuto.»

Azezi sũure sã'am Zerizalɛm dõma ĩyã

(Aluki 13:34-35)

37Azezi daan yetɩ: «Zerizalɛm nẽrba, Zerizalɛm nẽrba, yãma kʋʋrɩ la Nawẽnnɛ nõtɔ'ɔsrɩba, dee lɔbra sɛba tɩ Nawẽnnɛ tõm ba ya zẽ'am na kuga kʋʋra. Nõorɛ faa tɩ mam boorɩ tɩ m lagsɛ ya wʋ nõ-yã'aŋa n lagsrɩ a kɔma ũna a kempagsɩ pʋam se'em na, tɩ ya ka bɔɔra. 38Bãŋɛ-ya tɩ Nawẽnnɛ wʋn basɛ ya tẽŋa la tɩ a lebge la daboto. 39Mam yetɩ ya tɩ ya kãn le malɩn yẽ mam, halɩ tɩ ya wʋn wa yetɩ: ‹Pẽgɛ-ya sɛka n sẽm na Zuudãana Nawẽnnɛ yʋ'ʋrɛ la.› »

Currently Selected:

Amatie 23: gurDBL

Highlight

Copy