Amatie 22

Naba dayʋa pɔgdire kibsa makrɛ

(Aluki 14:15-24)

1Azezi daan le makɛ la makrɛ yele ba yetɩ: 2«Nawẽnnɛ so'olʋm ãn wʋ naba n ẽŋɛ a dayʋa pɔgdire kibsa, 3tõm a tõntõnɩba yetɩ, ba sẽŋɛ ka wi nẽr-sɛba tɩ ẽŋa daan wi la. Tɩ nẽrba la ka bɔɔra tɩ ba wa'am. 4Tɩ a le tõm tõntõnɩba basɛba yetɩ: ‹Sẽŋɛ-ya ka yele sɛba tɩ mam daan wi la yetɩ, mam mãasʋm sɛla woo mɛ, mam kʋ la lɔlsɩ, la dũnsi n nõbɛ, mãasʋm sɛla woo ze'ele, ba wa'am kibsa la.› 5Tɩ ba sẽŋɛ ka wi ba, tɩ ba zagsɛ, dee sẽŋɛ ba sẽnnɛ. Tɩ ayɩla sẽŋɛ a va'am, tɩ ayẽma sẽŋɛ a koosgo zẽ'am. 6Tɩ basɛba la yõgɛ tõntõnɩba la nãmsɛ ba dee kʋ ba. 7Tɩ naba la sũure yĩige, tɩ a tõm a zɛbzɛbrɩba tɩ ba sẽŋɛ ka kʋ nẽr-kʋʋrba la, dee yõ ba tẽŋa la. 8La a yele a tõntõnɩba la yetɩ: ‹Kibsa la sɛla woo mãasʋm ba'asɛ mɛ, la mam n daan wi sɛba la ka masɛ tɩ ba di kibsa la. 9Bɛla, sẽŋɛ-ya sorɔ-puursi zuto ka wi nẽr-sɛba wuu tɩ ya wʋn yẽ tɩ ba wa'am pɔgdire kibsa la zẽ'am.› 10Tɩ tõntõnɩba la sẽŋɛ sorɔ-puursi zuto ka wi nẽr-sɛba wuu tɩ ba yẽ, nẽr-sõma la nẽr-bɛ'ɛsɩ. Tɩ nẽrba wa'am wa pɩrɛ kibsa la zẽ'am.

11Tɩ naba la sẽŋɛ tɩ a bɩsɛ nẽrba la, yẽ tɩ nẽra n boe mĩ ka yɛ pɔgdire kibsa la fuugo. 12Tɩ a yele ẽ yetɩ: ‹M sɩrɛ, la ẽŋɛ la wãne tɩ fõn wa'am kibsa la, dee ka yɛ a fuugo?› Tɩ a ka yãŋɛ lerge se'ere. 13Tɩ naba la yele a tõntõnɩba yetɩ, ba lʋ a nu'usi, la a nãma lobe ẽ basɛ yẽŋa lika pʋam. Bilam tɩ nẽrba wʋn ka kɛlla, dee dɩkɛ ba nu'usi gɩ nõorʋm. 14La de la nẽrba pãɩ tɩ ba wi, la fẽe tɩ ba tũ'use.»

Lampo yʋa yelle

(Amarkɩ 12:13-17, Aluki 20:20-26)

15Tɩ Farisi dõma sẽŋɛ ka bãm bãma n wʋn ẽŋɛ se'em botɩ Azezi tɔgɛ tuuge tɩ ba yẽ sore yõkɛ ẽ. 16Bɛla tɩ ba daan tõm ba karẽnbiisi, la naba A'erɔdɩ nẽrba tɩ ba sẽŋɛ Azezi zẽ'am ka yele ẽ yetɩ: «Karẽnsãama, tõma mi tɩ fõn de la sɩra dãana, dee zãsna nẽrba Nawẽnnɛ sore yɛla la sɩra. Fõn ka fablɩ nẽrba n tɔgrɩ fõn yelle se'em na, la fõn ka tũ'usri nẽrba. 17Yele to fõn tẽ'esrɩ se'em. Sore boe tɩ tɩ yɔ lampo bɔ Rom na-keko bɩɩ, sore ka boe?» 18Tɩ Azezi bãŋɛ ba pʋtẽ'e-be'ero la, yele ba yetɩ: «Pʋlibsum dõma wã, bẽm tɩ ya bẽta mam? 19Pa'alɛ-ya ma lag-sɛka tɩ ba tarɩ yɔɔra lampo la.» Tɩ ba dɩkɛ lag-kõbrɛ pa'alɛ ẽ. 20Tɩ a soke ba yetɩ: «Ãne yinyisŋa, la ãne yʋ'ʋrɛ n gʋlsɛ a zuo?» 21Tɩ ba lerge yetɩ: «La de la Rom na-keko la.» Tɩ Azezi yele ba yetɩ: «La sãn dɛna bɛla, bɔ-ya na-keko la ẽŋa n soe bõn-sɛka, dee bɔ Nawẽnnɛ ẽn soe bõn-sɛka.» 22Ban wõm bɛla la, tɩ la di'ige ba, tɩ ba basɛ ẽ dee fõrgɛ.

Kũm vo'ore yelle

(Amarkɩ 12:18-27, Aluki 20:27-40)

23Daar-ẽŋa tɩ Saduse dõma n yetɩ nẽra sãn ki a kãn vo'oge la, bãma nẽrba basɛba n wa'am Azezi zẽ'am wa soke ẽ yetɩ: 24«Karẽnsãama, Amoyisi daan gʋlsɛ yetɩ, bʋraaga sãn ki dee ka tara bia, a sɔbia di pɔkõorɛ la dɔgɛ kɔma bɔ sɛka n ki la.

25Bʋraasɩ bayopɔɩ n daan boe tõma pʋam dɛna sɔbiisi, tɩ pɔspɔsɩ dãana la di pɔka ki dee ka dɔgɛ bia. 26Tɩ bʋyi dãana la di pɔkõorɛ la mẽ ki dee ka dɔgɛ bia. Tɩ bʋtã dãana la mẽ ẽŋɛ bɛla, la bãma bayopɔɩ la wuu ẽŋɛ la bɛla. 27Tɩ pɔka la mẽ yãŋa ki. 28Bɛla, ba sãn wa vo'oge kũm vo'ore daarɛ, bãma bayopɔɩ la pʋam, ãne n wʋn sɔna pɔka la, bãma wuu n lagɩm di ẽ na?» 29Tɩ Azezi lerge ba yetɩ: «Ya tuuge mɛ, yãma n ka mi Nawẽnnɛ gõŋɔ n yele se'em võorɛ, la Nawẽnnɛ pãŋa n ãn se'em na ĩyã. 30Kũm vo'ore daarɛ, bʋraasɩ ka diti pɔgsɩ, la pɔgsɩ mẽ ka ellɩ sɩrba. Ba wʋn ãna wʋ malɛkadõma n boe Nawẽnnɛ yire la. 31La sãn dɛna kũm vo'ore yelle, yãma nãn ka karẽŋɛ Nawẽnnɛ n yele ya a gõŋɔ la pʋam se'em yetɩ: 32‹Mam de la Abraham, la A'izakɩ, la Azakɔbɩ Nawẽnnɛ› na? La pa'alɛ tɩ bãma wuu vɔa mɛ Nawẽnnɛ zẽ'am. Se'ere n soe la, Nawẽnnɛ dagɩ sɛba n ki Nawẽnnɛ, a de la nẽr-sɛba n vɔa Nawẽnnɛ.» 33Nẽr-kʋʋŋɔ la n daan wõm a zãsŋɔ la, la di'ige ba mɛ.

Nawẽnnɛ n bɔ nõorɛ tɩ ba ɩta se'em na, bõn-kãna n gãnnɩ?

(Amarkɩ 12:28-34, Aluki 10:25-28)

34Farisi dõma n daan wõm tɩ Azezi lerge Saduse dõma, tɩ ba ka le tã'agɛ ya'agɛ nõorɛ la, tɩ ba lagsɛ a zẽ'am. 35Tɩ ba nẽra ayɩla n de lɔɔ karẽnsãama bɔɔra tɩ a di a yɛm bɩsɛ, soke ẽ yetɩ: 36«Karẽnsãama, Nawẽnnɛ n bɔ nõorɛ tɩ ba ɩta se'em na, bõn-kãna n gãnnɩ wuu?» 37Tɩ a lerge ẽ yetɩ: « ‹Nõŋɛ fʋ Zuudãana Nawẽnnɛ la fʋ sũure wuu, la fʋ sɩa wuu, la fʋ yɛm wuu.› 38Ẽna n de Nawẽnnɛ nõorɛ la pɔspɔsɩ dãana, ẽŋa n gãnnɩ wuu. 39La bʋyi dãana n ãn wʋ ẽŋa n wãna n yetɩ: ‹Nõŋɛ fʋ tadãana wʋ fõn nõŋɛ fʋ mẽŋa se'em na.› 40Amoyisi lɔɔ la wuu, la Nawẽnnɛ nõtɔ'ɔsrɩba n gʋlsɛ sɛla la wuu boe la nõ-bãma bayi pʋam.»

Krisi de la naba Adavidi Zuudãana

(Amarkɩ 12:35-37, Aluki 20:41-44)

41Farisi dõma n lagsɛ taaba la, tɩ Azezi soke ba yetɩ: 42«Yãma tẽ'esrɩ la bẽm la Krisi yelle: Ãne yɩɩŋa n de ẽ?» Tɩ ba lerge yetɩ: «A de la naba Adavidi yɩɩŋa.» 43Tɩ a yele ba yetɩ: «La ẽŋɛ la wãne tɩ Nawẽnnɛ Sɩa daan botɩ Adavidi wi ẽ tɩ Zuudãana yetɩ:

44‹Zuudãana Nawẽnnɛ yele mam Zuudãana yetɩ,

zĩ'ire m zʋʋgɔ bɔba halɩ tɩ m wa ẽŋɛ fʋ bɛ'ɛba tɩ ba bɔna fʋ nãma tẽŋa.›

45Adavidi sãn wi ẽ yetɩ, Zuudãana, la wʋn ẽŋɛ la wãne tɩ a dɛna Adavidi yɩɩŋa?» 46Tɩ nẽra nẽra ka yãŋɛ lerge ẽ se'ere. Lan pɔsɛ daar-ẽŋa, nẽra ka le saagɛ soke ẽ sokre.

Currently Selected:

Amatie 22: gurDBL

Highlight

Copy