Amatie 21

Azezi kẽ'erɩ Zerizalɛm la na'am

(Amarkɩ 11:1-11, Aluki 19:28-40, Azã 12:12-19)

1Azezi la a karẽnbiisi la daan sẽŋɛ ka lɛm na Zerizalɛm, paagɛ tẽŋa yʋ'ʋrɛ n de Betɩfaazɩ, Oliivi tãŋa sɩa. Tɩ Azezi tõm a karẽnbiisi bayi 2yele ba yetɩ: «Sẽŋɛ-ya tẽŋa la n boe ya nẽŋa la pʋam, tɩ ya wʋn yẽ bõŋ-yã'aŋa n lʋ zɛ la a biire, lorge-ya ẽ tarɩ ba wa'am wa bɔ ma. 3Nẽra sãn yele ya se'ere, ya yele ẽ yetɩ: ‹Zuudãana la n boorɩ ba›, tɩ a wʋn basɛ tɩ ya tarɩ ẽ wa'am tɔtɔ.»

4La ẽŋɛ la bɛla tɩ Nawẽnnɛ nõtɔ'ɔsa la n yʋʋn tɔgɛ se'em na ẽŋɛ. 5A yʋʋn yetɩ:

«Yele-ya Siyõ tẽŋa nẽrba yetɩ:

‹Ya naba la n wãna n sẽm.

A sike a mẽŋa bã la bõŋa,

la a biire sẽna.› »

6Tɩ karẽnbiisi la sẽŋɛ ka ẽŋɛ Azezi n yele ba se'em na, 7tarɩ bõŋ-yã'aŋa la a biire wa'am, wa dɩkɛ ba futo paglɛ ba zuto tɩ Azezi bã. 8Tɩ nẽr-kʋʋŋɔ zozo'e yɛrgɛ ba futo sore zuo, tɩ sɛba kɔ tɩɩsɩ võorɔ yɛrgɛ sore zuo. 9Tɩ nẽr-sɛba n daan boe a nẽŋa, la sɛba n boe a poorʋm na wuu tĩi tɔgra yetɩ:

«Ozaana, naba Adavidi yɩɩŋa.

Pẽgɛ-ya nẽr-sɛka n sẽm na

Zuudãana Nawẽnnɛ yʋ'ʋrɛ la.

Ozaana! Nã'asɛ-ya Nawẽnnɛ n boe saazuum.»

10Ban daan sẽnnɩ kẽ'era Zerizalɛm na, tẽŋa la wuu dãm mɛ, tɩ ba sɔkra taaba yetɩ: «Ãne n de ẽna?» 11Tɩ nẽr-kʋʋŋɔ la lerge ba yetɩ: «La de la Nawẽnnɛ nõtɔ'ɔsa Azezi n ze'ele Nazarɛtɩ n boe Galile so'olʋm na.»

Azezi dige nẽrba n koosrɩ Wẽnde-kãtʋm na

(Amarkɩ 11:15-19, Aluki 19:45-48, Azã 2:13-22)

12Azezi daan kẽ la Wẽnde-kãtɛ la zẽnzakam digra sɛba wuu n koosrɩ, la sɛba n da'arɩ la, tɩ ba yɛsra, dee zã'agɛ sɛba n teerɩ ligri taablɩdõma, la sɛba n koosrɩ na'adawɛma kʋgsɩ lʋbɛ. 13Dee yele ba yetɩ: «La gʋlsɛ Nawẽnnɛ gõŋɔ pʋam tɩ Nawẽnnɛ yetɩ: ‹Ba wʋn wi'ira mam deego la tɩ pʋ'ʋsgɔ deego.› La yãma dɩkɛ ẽ ẽŋɛ la nayigba lagsgɔ zẽ'a.»

14Tɩ fɔɔsɩ, la wɔbsɩ wa'am a zẽ'am Wẽnde-kãtʋm na, tɩ a botɩ ba yẽ ĩmã'asʋm. 15La kãabgɔ kẽma nẽŋadõma, la lɔɔ karẽnsãandõma n yẽ tõon-yãlma la tɩ Azezi tõnnɩ, la kɔma n malɩn tĩi tɔgra Wẽnde-kãtʋm na yɛta tɩ: «Ozaana! Pẽgɛ-ya naba Adavidi yɩɩŋa» la, ba sũure n daan yĩige. 16Tɩ ba yele Azezi yetɩ: «Fõn wõm ban yetɩ se'em na?» Tɩ a lerge yetɩ: «Ẽe, mam wõm ya. Yãma nãn ka karẽŋɛ Nawẽnnɛ gõŋɔ la yetɔg-ẽna n yetɩ: ‹Fõn botɩ kɔma, la bilɛɛsɩ n nã'asra fõn.› » 17La Azezi basɛ ba bilam, dee sẽŋɛ la Betani ka gã'arɛ.

Kẽnkãŋa n ka tarɩ biɛ yelle

(Amarkɩ 11:12-14,20-24)

18Beere n daan wiige bulika, tɩ Azezi lɛbra Zerizalɛm, tɩ a kɔm dõnna. 19Tɩ a yẽ kẽnkãŋa n ze sore nõorʋm, sẽŋɛ tɩ a ka bɩsɛ, la a paagɛ yẽ la võorɔ mã'a. Tɩ a yele kẽnkãŋa la yetɩ: «Fʋ kãn le malɩn wɔm biɛ.» La bilam mẽŋa tɩ kẽnkãŋa la kʋɩ. 20La a karẽnbiisi la n yẽ bɛla la, la di'ige ba mɛ, tɩ ba yetɩ: «La ẽŋɛ la wãne tɩ kẽnkãŋa wã darɛ kʋɩ wãna?» 21Tɩ Azezi lerge ba yetɩ: «Mam yetɩ ya la asɩra, tɩ ya sãn bɔ Nawẽnnɛ sɩra dee ka sẽ'ena, ya mẽ wʋn tã'agɛ ẽŋɛ wʋ mam n ẽŋɛ tɩ-ẽna se'em wã, la, la dagɩ bɛla mã'a, ya wʋn tã'agɛ yele tãn-ẽna yetɩ: ‹Võogɛ ka lui mõgrɛ pʋam›, la a wʋn ẽŋɛ bɛla. 22La ya sãn sose Nawẽnnɛ sɛla dee bɔ ẽ sɩra, ya wʋn to'oge.»

Ãne n bɔ Azezi nõorɛ tɩ a tõnna?

(Amarkɩ 11:27-33, Aluki 20:1-8)

23Azezi daan kẽ la Wẽnde-kãtʋm na zãsna nẽrba, tɩ kãabgɔ kẽma nẽŋadõma, la tẽŋa la kẽma wa'am wa soke ẽ yetɩ: «Fõn yẽ nõorɛ la bɛ ɩta bõn-bãna? La ãne n bɔ fõn nõorɛ tɩ fõn ɩta?» 24Tɩ Azezi lerge ba yetɩ: «Mam wʋn soke ya sokre ayɩla, tɩ ya sãn lerge mam, mam mẽ wʋn yele ya nõor-sɛka tɩ mam tarɩ ɩta bõn-bãna. 25Yele-ya ma, Azã n daan misri nẽrba ko'om pʋam na, la de la Nawẽnnɛ n tõm ẽ bɩɩ, la de la nẽrsaalba?» Tɩ ba bãm na taaba yetɩ: «Tɩ sãn yetɩ la de la Nawẽnnɛ n tõm ẽ, a wʋn yetɩ, bẽm ĩyã tɩ tõma ka sakɛ ẽ? 26Tɩ mẽ ka tã wʋn yetɩ, la de la nẽrsaalba n tõm ẽ, dẽnɩ tɩ zɔta nẽrba la, se'ere n soe la, ba wuu sakɛ tɩ Azã de la Nawẽnnɛ nõtɔ'ɔsa.» 27Tɩ ba koŋe lerge ẽ yetɩ: «Tõma ka mi.» Tɩ a mẽ yele ba yetɩ: «Mam mẽ kãn yele ya mam n yẽ nõorɛ zẽ'e-sɛka ɩta bõn-bãna.»

Dayɔɔsɩ bayi makrɛ

28Azezi daan le yele ba yetɩ: «Pa'alɛ-ya ma yãma n tẽ'esrɩ se'em: Bʋraa n daan boe tarɩ a dayɔɔsɩ bayi, yele pɔspɔsɩ dãana la yetɩ: ‹M dayʋa, sẽŋɛ ka tõm m va'am na zĩna.› 29Tɩ a dayʋa la lerge ẽ yetɩ: ‹Mam kãn sẽŋɛ.› Tɩ la ẽŋɛ fẽe, tɩ a teege yɛm sẽŋɛ. 30Tɩ a sẽŋɛ a dayʋa bʋyi dãana la zẽ'am ka yele ẽŋa mẽ yetɩ, a sẽŋɛ ka tõm a va'am na. Tɩ a yele ẽ yetɩ: ‹M sɔ, mam wʋn sẽŋɛ.› La a yele bɛla dee ka sẽŋɛ. 31Bãma bayi, ãne n ẽŋɛ a sɔ la n boorɩ se'em na?» Tɩ ba lerge yetɩ: «Pɔspɔsɩ dãana la.» Tɩ Azezi yele ba yetɩ: «Mam yetɩ ya la sɩra sɩra, tɩ lampo-tɔ'ɔsrɩba, la pɔg-yalsɩ dõma wʋn dẽŋɛ ya nẽŋa kẽ Nawẽnnɛ so'olʋm pʋam. 32Se'ere n soe la, Azã wa'am wa pa'alɛ ya la sore tɩ ya wʋn doose masɛ Nawẽnnɛ zẽ'am, la ya ka bɔ ẽ sɩra. La lampo-tɔ'ɔsrɩba, la pɔg-yalsɩ dõma n bɔ ẽ sɩra. La baa yãma n yẽ bɛla la, ya ken ka teege yɛm bɔ ẽ sɩra.»

Nẽrba n bɩsrɩ va'am makrɛ

(Amarkɩ 12:1-12, Aluki 20:9-19)

33Azezi daan le yele ba yetɩ: «Selse-ya makrɛ ayɩla. Yidãana ayɩla n daan kɔ a va'am sele tɩɩsɩ yʋ'ʋrɛ n de viinye, mẽ lalga kaagɛ ẽ, tũ boko tɩ ba wẽkra viinye la biɛ, dee mẽ de-woko tɩ ba zɔnna bɩsra a va'am na, yãŋa dɩkɛ nẽrba tɩ ba bɩsra va'am na, dee sẽŋɛ sore. 34Tɩ viinye la biɛ go'osgo wakatɛ paagɛ, tɩ a tõm a tõntõnɩba tɩ ba sẽŋɛ sɛba n bɩsrɩ va'am na zẽ'am, ka to'oge a viinye la biɛ wa bɔ ẽ. 35Tɩ sɛba n bɩsrɩ va'am na yõgɛ tõntõnɩba la wẽ ayɩla, kʋ ayɩla, dee lobe ayẽma la kuga kʋ. 36Tɩ a le tõm tõntõnɩba basɛba n zo'oge gãnna pɔspɔsɩ dõma la. Tɩ ba le ẽŋɛ bãma mẽ bɛla. 37Tɩ a yãŋa tõm a mẽŋa dayʋa sɛba n bɩsrɩ va'am na zẽ'am, dee tẽ'esra yetɩ: ‹Ẽna n de mam mẽŋa dayʋa la, ba wʋn nan ẽ.› 38La sɛba n bɩsrɩ va'am na n yẽ ẽ na, ba yele taaba yetɩ: ‹Ẽna n wʋn wa sɔɔgɛ sɔna a sɔ bõntarsõm na. Basɛ-ya tɩ tɩ kʋ ẽ, dee tɩ bõntarsõm na lebge tõma bõnɔ.› 39Tɩ ba yõkɛ ẽ ve'ege yese va'am na kẽnkɛrŋa ka kʋ ẽ.

40Bɛla, va'am na dãana sãn wa'am, a wʋn ẽŋɛ sɛba n bɩsrɩ va'am na la wãne?»

41Tɩ ba lerge yetɩ: «A wʋn nãmsɛ nẽr-bɛ'ɛsɩ bãna mɛ halɩ kʋ ba, dee dɩkɛ va'am na bɔ nẽr-sɛba n wʋn bɔ ẽ a viinye la biɛ ba go'osgo wakatɛ, tɩ ba bɩsra.»

42Tɩ Azezi yele ba yetɩ: «Yãma nãn ka karẽŋɛ Nawẽnnɛ gõŋɔ la n yetɩ:

‹Kug-sɛka tɩ tõnmẽtba zagsɛ la

n lebge kugre n botɩ deego la tara pãŋa.

La de la Zuudãana Nawẽnnɛ n ẽŋɛ bõn-ẽna,

tɩ la dɛna yel-di'iŋa bɔ tõma.›

43Bɛla, mam yetɩ ya tɩ Nawẽnnɛ wʋn to'oge a so'olʋm ya zẽ'am dɩkɛ bɔ buur-sɛba n wʋn tõm Nawẽnnɛ so'olʋm tõoma. [ 44La kug-sɛka tɩ tõnmẽtba zagsɛ la, nẽr-sɛka woo n lui kug-ẽŋa zuo, a wʋn kɔ kɔ mɛ. La kugre la sãn lui sɛka zuo, a wʋn mẽrgɛ ẽ.]»

45La kãabgɔ kẽma nẽŋadõma, la Farisi dõma n wõm makrɛ la, ba bãŋɛ tɩ a tɔgrɩ la bãma yelle. 46Tɩ ba bɔɔra tɩ ba yõkɛ ẽ, dee zɔta nẽrba la, se'ere n soe la, ba sakɛ tɩ Azezi de la Nawẽnnɛ nõtɔ'ɔsa.

Currently Selected:

Amatie 21: gurDBL

Highlight

Copy