Amatie 20

Tõntõnɩba yɔɔrɔ makrɛ

1Azezi le yetɩ: «Nawẽnnɛ so'olʋm ãn wʋ yidãana n yese bulika yʋ'ʋŋɔ yʋ'ʋŋɔ, sẽŋɛ ka dɩkɛ tõntõnɩba tɩ ba tõm a va'am. 2La a tɔgɛ kʋ la tõntõnɩba la tɩ ẽŋa wʋn yɔ ba lag-kõbrɛ ayɩla daarɛ pʋam, dee tõm ba a va'am na tɩ ba ka tõm. 3Tɩ wʋntɛɛŋa bɩ fẽe, tɩ a le yese yẽ nẽrba basɛba n ze da'am ka tõnna, 4tɩ a yele ba yetɩ: ‹Ya mẽ sẽŋɛ mam va'am na ka tõm, tɩ mam wʋn yɔ ya lan masɛ se'em.› 5Tɩ ba isge sẽŋɛ va'am na. Tɩ a le yese wʋntɛɛŋa zuu-tẽŋasʋka, la wẽngɛlŋa le ẽŋɛ bɛla. 6Tɩ a le yese wẽnnɛ n we'esɩ lua, le yẽ nẽrba basɛba n ze, tɩ a soke ba yetɩ: ‹Bẽm ĩyã tɩ yãma zɛ kalam daarɛ la wuu pʋam ka ɩta sɛla sɛla?› 7Tɩ ba lerge yetɩ: ‹Nẽra nẽra ka dɩkɛ tõma tõoma.› Tɩ a yele ba yetɩ: ‹Ya mẽ sẽŋɛ m va'am na ka tõm.›

8Tɩ wẽnnɛ kẽ, tɩ va'am na dãana yele sɛka n bɩsrɩ a tõoma la yelle yetɩ: ‹Wi tõntõnɩba la tɩ ba wa'am tɩ fʋ yɔ ba. Dẽŋɛ yɔ sɛba n sẽŋɛ poorʋm na ka paagɛ sɛba n dẽŋɛ sẽŋɛ la.› 9Tɩ sɛba n sẽŋɛ wẽnnɛ n we'esɩ lua la wuu to'ose lag-kõbrɛ ayɩla ayɩla. 10Tɩ sɛba n dẽŋɛ sẽŋɛ la tẽ'esra tɩ bãma wʋn to'ose gãnna sɛba n wa'am poorʋm na. La ba wuu to'ose la lag-kõbrɛ ayɩla ayɩla wʋ sɛba n sẽŋɛ poorʋm na n to'ose se'em na. 11La sɛba n dẽŋɛ sẽŋɛ la n to'ose lag-kõbrɛ ayɩla ayɩla la, ba yõnnɩ yidãana la mɛ, 12yetɩ: ‹Sɛba n wa'am poorʋm na tõm na karf-ayɩla mã'a, la fõn basɛ tɩ ba to'ose zõna la tõma sɛba n tõm halɩ daarɛ la wuu pʋam nãmsɛ la wʋntɛɛŋa la.› 13Tɩ a lebe yele ba nẽra ayɩla yetɩ: ‹M sɩrɛ, mam ka ẽŋɛ fʋ sɛla n ka masɛ. Tɩ tɔgɛ kʋ, tɩ fʋ sakɛ tɩ fõn wʋn to'oge la lag-kõbrɛ ayɩla. 14To'oge fʋ yɔɔrɔ sẽŋɛ fõrgɛ. La de la mam n boorɩ tɩ m yɔ sɛba n wa'am poorʋm na zõna la fõn. 15Mam ka tarɩ nõorɛ tɩ m dɩkɛ m bõnɔ ẽŋɛ sɛla tɩ mam boorɩ? Bɩɩ mam n ẽŋɛ sõŋa la ĩyã tɩ fõn ɩta sũure?› 16Bɛla, nẽŋam dõma wʋn lebge poorʋm dõma, tɩ poorʋm dõma lebge nẽŋam dõma.»

Azezi le tɔgɛ a kũm, la a vo'ore yelle

(Amarkɩ 10:32-34, Aluki 18:31-34)

17Azezi daan we'esɩ la Zerizalɛm welge a karẽnbiisi pia la ayi la mã'a, yele ba yetɩ: 18«Ya yẽ ya, tɩ we'esɩ la Zerizalɛm, bilam ba wʋn dɩkɛ Nẽrsaala Dayʋa la mɛ ka ẽŋɛ kãabgɔ kẽma nẽŋadõma, la lɔɔ karẽnsãandõma nu'usum, tɩ ba wʋn tɔgɛ a yelle kʋ yetɩ, a masɛ la kũm. 19La ba wʋn dɩkɛ ẽ ẽŋɛ la bu-zãŋsɩ nu'usum, tɩ ba la ẽ, wẽ ẽ na ka'asa, dee ka ẽ dɔ-puurŋa zuo kʋ. La dabsa atã daarɛ a wʋn vo'oge.»

Azakɩ la Azã ma sosgo

(Amarkɩ 10:35-45, Aluki 22:24-27)

20Tɩ Azebede pɔga daan doose la a dayɔɔsɩ paagɛ Azezi zẽ'am ka dũma tẽŋa a nẽŋam tɩ a sose ẽ tɩ a ẽŋɛ sɛla bɔ ẽ. 21Tɩ Azezi soke ẽ yetɩ: «Fõn boorɩ tɩ m ẽŋɛ la bẽm bɔ fɔ?» Tɩ pɔka la lerge yetɩ: «Bɔ nõorɛ tɩ fʋ sãn wa dita fʋ na'am na, tɩ m dayɔɔsɩ bayi wã ayɩla zĩ'ire fʋ zʋʋgɔ, tɩ ayɩla zĩ'ire fʋ gɔbga.» 22Tɩ Azezi lerge ba yetɩ: «Ya ka mi yãma n sosrɩ sɛla. Ya wʋn tã'agɛ nãmsɛ nãmsgɔ sɛka tɩ mam wʋn nãmsɛ wã?» Tɩ ba yetɩ: «Tɩ wʋn tã'agɛ ẽŋɛ bɛla.» 23Tɩ Azezi yele ba yetɩ: «Ya wʋn sɩrɩ nãmsɛ nãmsgɔ sɛka tɩ mam wʋn nãmsɛ la. La, la dagɩ mam n wʋn looge sɛka n wʋn zĩ'ire mam zʋʋgɔ bɩɩ mam gɔbga. Mam Sɔ Nawẽnnɛ mãasʋm zẽ'e-bãma tɩ a bɔ la nẽr-sɛba tɩ a yetɩ a bɔ la.»

24La karẽnbiisi pia la n wõm bɛla la, ba sũure n isge la ba tadãandõma bayi la. 25Tɩ Azezi wi ba wuu yetɩ: «Ya mi tɩ dũnia wã na'adõma soe ba nẽrba la pãŋa, dee tɩ kɛ'ɛndõma pẽrgra nẽrba tɩ ba ɩta bãma n boorɩ se'em. 26La yãma pʋam, la kãn dɛna bɛla. Nẽr-sɛka n boorɩ tɩ a lebge nẽr-keko ya pʋam, la masɛ mɛ tɩ a dɛna ya tõntõnna. 27La nẽr-sɛka n mẽ boorɩ tɩ a dɛna nẽŋadãana ya pʋam, la masɛ mɛ tɩ a dɛna ya yamŋa wʋ Nẽrsaala Dayʋa la. 28Nẽrsaala Dayʋa la ka wa'am tɩ nẽrba tõm bɔ ẽ, a wa'am tɩ a tõm mɛ bɔ, dee dɩkɛ a vɔm bɔ tɩ nẽrba zozo'e yẽ fãarɛ.»

Azezi botɩ fɔɔsɩ bayi nini yẽta

(Amarkɩ 10:46-52, Aluki 18:35-43)

29Azezi daan ze'ele la Zeriko tẽŋa pʋam yɛsra, tɩ nẽr-kʋʋŋɔ zozo'e dɔla ẽ. 30Tɩ fɔɔsɩ bayi zẽa sore nõorʋm wõm tɩ Azezi n tollɩ, tɩ ba tĩi tɔgra yetɩ: «Zuudãana, Adavidi yɩɩŋa, zoe tɩ ninbãalga.» 31Tɩ nẽr-kʋʋŋɔ la tãsɛ ba yetɩ, ba sĩna. Tɩ ba malɩn tĩi tɔgra gãnna bɛla yetɩ: «Zuudãana, Adavidi yɩɩŋa, zoe tɩ ninbãalga.» 32Tɩ Azezi ze'ele dee wi ba, soke ba yetɩ: «Yãma boorɩ tɩ m ẽŋɛ la bẽm bɔ ya?» 33Tɩ ba lerge yetɩ: «Zuudãana, tõma boorɩ la tɩ nini yẽta.» 34Tɩ Azezi zoe ba ninbãalga, kalʋm ba nini, tɩ ba nini na yẽta bilam mẽŋa, tɩ ba dɔla ẽ.

Currently Selected:

Amatie 20: gurDBL

Highlight

Copy