Amatie 19

Pɔka lebsgo yelle

(Amarkɩ 10:1-12)

1Azezi n daan tɔgɛ bɛla kɩ'ɩlɩm na, a yese Galile sẽŋɛ la Zude so'olʋm Zʋrdẽ doone ke bɔba. 2Tɩ nẽr-kʋʋŋɔ zozo'e doose ẽ, tɩ a botɩ ba bã'adõma yẽ ĩmã'asʋm.

3Tɩ Farisi dõma basɛba wa'am a zẽ'am tɩ ba di a yɛm bɩsɛ, soke ẽ yetɩ: «Sore boe tɩ bʋraa lebse a pɔga n wen ẽŋɛ bõn-sɛka woo mɛ bɩɩ?» 4Tɩ Azezi lerge yetɩ: «Yãma ka karẽŋɛ Nawẽnnɛ gõŋɔ la? Pĩ'iluŋo wakatɛ, Nawẽnnɛ n nãam nẽrsaalba la, a nãam na bʋraa la pɔka. 5Bɛla ĩyã tɩ a yetɩ, bʋraaga basɛ a sɔ, la a ma, dee lagɩm na a pɔga, tɩ bãma bayi lebge ayɩla. 6Bɛla, ba ka le dɛna nẽrba bayi, ba yãŋa lebge la ayɩla. Bɛla, sɛla tɩ Nawẽnnɛ lagɩm na taaba, nẽrsaala da welge ba.»

7Tɩ Farisi dõma la soke ẽ yetɩ: «La bẽm ĩyã tɩ Amoyisi yʋʋn bɔ nõorɛ yetɩ, bʋraa sãn yetɩ a lebse a pɔga, a bɔ ẽ pɔgdire lebsgo gõŋɔ, dee tarɩ ẽ ka lebse?» 8Tɩ Azezi lerge yetɩ: «La de la ya sũure n kɛ tɩ ya ka sakɛ pa'algɔ la ĩyã, tɩ Amoyisi yʋʋn sakɛ tɩ ya lebse ya pɔgba. Pĩ'iluŋo wakatɛ, la yʋʋn ka ãn wãna. 9La mam yetɩ ya tɩ, bʋraaga sãn lebse a pɔga tɩ la sãn dagna tɩ a gã la bʋraasɩ, a sãn le di pɔka ayẽma, a ẽŋɛ la be'em wʋ nẽra n gã'arɛ la a tadãana pɔga.»

10Tɩ a karẽnbiisi la yele ẽ yetɩ: «Bʋraaga la a pɔga yelle sãn dɛna bɛla, bʋraaga sãn ka di pɔka n sõɩ.» 11Tɩ a yele ba yetɩ: «La dagɩ nẽrba wuu n wʋn yãŋɛ to'oge yetɔg-ẽna, sãn dagna sɛba tɩ Nawẽnnɛ sõŋɛ ba tɩ ba to'oge. 12Nẽrba basɛba n boe tɩ ba dɔgɛ ba tɩ ba ãna wʋ ba fɔ ba mɛ na, ka dita pɔgsɩ. Tɩ nẽrba mẽ fɔ bʋraasɩ basɛba. Tɩ Nawẽnnɛ so'olʋm ĩyã, tɩ sɛba mẽ ka dita pɔgsɩ. Sɛka n tã wʋn yãŋɛ to'oge yetɔg-ẽna, a to'oge.»

Azezi pʋ'ʋsɛ Nawẽnnɛ bɔ kɔm-pɩgsɩ

(Amarkɩ 10:13-16, Aluki 18:15-17)

13Tɩ nẽrba tarɩ kɔm-pɩgsɩ wa'am Azezi zẽ'am tɩ a dɩkɛ nu'usi paglɛ ba zuto pʋ'ʋsɛ Nawẽnnɛ bɔ ba. Tɩ a karẽnbiisi la zɛbɛ nẽrba la. 14Tɩ Azezi yele yetɩ: «Basɛ-ya kɔm-pɩgsɩ la tɩ ba wa'am mam zẽ'am, da gu'ura-ya ba. Se'ere n soe la, Nawẽnnɛ so'olʋm de la nẽr-sɛba n ãn wʋ kɔma wã bõnɔ.» 15La a dɩkɛ la a nu'usi paglɛ ba zuto pʋ'ʋsɛ Nawẽnnɛ bɔ ba, dee fõrgɛ.

Budib-polle n de bõntarsa yelle

(Amarkɩ 10:17-31, Aluki 18:18-30)

16Tɩ bʋraaga wa'am Azezi zẽ'am wa soke ẽ yetɩ: «Karẽnsãama, mam wʋn tõm na tõon-sõŋɔ kãna yẽ vɔm n ka ba'asrɩ?» 17Tɩ a lerge ẽ yetɩ: «Bẽm tɩ fʋ sɔkra ma sɛla n ãn sõŋa yelle? Nawẽnnɛ mã'a n ãn sõŋa. Fʋ sãn bɔɔra tɩ fʋ yẽ vɔm n ka ba'asrɩ, fʋ sakɛ Nawẽnnɛ n bɔ a nõorɛ se'em na.» 18Tɩ a soke yetɩ: «Nawẽnnɛ nõorɛ yetɔg-bãna?» Tɩ Azezi lerge ẽ yetɩ: «Da kʋ nẽra, da gã'arɛ la fʋ tadãana pɔga, da zũ, da tɔgɛ põmpɔrŋɔ kaseto, 19nanna fʋ sɔ, la fʋ ma, la fʋ nõŋɛ fʋ tadãana wʋ fʋ mẽŋa.» 20Tɩ budib-polle la yele ẽ yetɩ: «Mam põn sakra bõn-bãna wuu mɛ, bẽm n deege?» 21Tɩ Azezi yele ẽ yetɩ: «Fʋ sãn bɔɔra tɩ fʋ masɛ sɛla woo pʋam, sẽŋɛ ka koose fõn tarɩ sɛla la wuu dɩkɛ bɔ nasdõma, tɩ fʋ wʋn yẽ bõntarsõm Nawẽnnɛ yire, dee wa'am wa dɔla mam.» 22Budib-polle la n wõm bɛla la, a fõrgɛ mɛ la sũ-sã'aŋɔ, se'ere n soe la, a tarɩ la bõntarsõm zo'oge.

23Tɩ Azezi yele a karẽnbiisi la yetɩ: «Mam yetɩ ya la sɩra sɩra, tɩ la tɔ mɛ bɔ bõntarsa tɩ a kẽ Nawẽnnɛ so'olʋm pʋam. 24La mam le yɛta ya tɩ, la de la nãana tɩ yʋgnɛ doose fupĩim yoko pʋam yese, gãnna bõntarsa n wʋn kẽ Nawẽnnɛ so'olʋm pʋam.» 25La a karẽnbiisi la n wõm bɛla la, tɩ la di'ige ba halɩ zozo'e, tɩ ba yetɩ: «La sãn dɛna bɛla, ãne n wʋn tã'agɛ yẽ fãarɛ?» 26Tɩ Azezi bɩsra ba, dee yetɩ: «Nẽrsaala ka tã wʋn ẽŋɛ bõn-ẽna, la Nawẽnnɛ tã sɛla woo ɩta mɛ.»

27Tɩ Apɩyɛɛrɩ yele Azezi yetɩ: «Tõma basɛ sɛla woo mɛ, dee dɔla fõn. Bẽm tɩ tõma wʋn yẽ?» 28Tɩ Azezi yele ba yetɩ: «Mam yetɩ ya la sɩra sɩra, tɩ wakat-sɛka tɩ sɛla woo wʋn lebge paalsɩ la, Nẽrsaala Dayʋa la n wʋn zĩ'ire a na'am bĩmbĩnne zuo la, yãma sɛba n dolɩ mam na mẽ wʋn zĩ'ire na'am bĩmbĩna pia la ayi zuto, di Ɩsrayɛlɩ buuri pia la ayi la sarɩya. 29La sɛba wuu n basɛ ba yiɛ, bɩɩ ba kẽendõma, la ba yɩbsɩ, bɩɩ ba sɔdõma, bɩɩ ba madõma, bɩɩ ba kɔma, bɩɩ ba vatɔ mam yʋ'ʋrɛ ĩyã, ba wʋn to'oge bãma n basɛ sɛla la nõorɛ kɔbga, dee yẽ vɔm n ka ba'asrɩ. 30La nẽŋam dõma zozo'e wʋn lebge poorʋm dõma, tɩ poorʋm dõma zozo'e lebge nẽŋam dõma.»

Currently Selected:

Amatie 19: gurDBL

Highlight

Copy