Aluki 20

Ãne n bɔ Azezi nõorɛ tɩ a tõnna?

(Amatie 21:23-27, Amarkɩ 11:27-33)

1Daarɛ ayɩla Azezi boe la Wẽnde-kãtʋm na zãsna nẽrba, dee mõola kõ-yẽlga la bɔ'ɔra ba. Tɩ kãabgɔ kẽma nẽŋadõma, la lɔɔ karẽnsãandõma, la tẽŋa la kẽma 2wa'am wa yele ẽ yetɩ: «Yele to, fõn yẽ nõorɛ la bɛ ɩta bõn-bãna, bɩɩ ãne n bɔ fõn nõorɛ tɩ fõn ɩta?» 3Tɩ a lerge ba yetɩ: «Mam mẽ wʋn soke ya sokre ayɩla tɩ ya lerge ma: 4Azã n daan misri nẽrba ko'om pʋam na, la de la Nawẽnnɛ n tõm ẽ bɩɩ, la de la nẽrsaalba?» 5Tɩ ba bãm na taaba yetɩ: «Tɩ sãn yetɩ la de la Nawẽnnɛ n tõm ẽ, a wʋn yetɩ, bẽm ĩyã tɩ tõma ka sakɛ ẽ? 6La tɩ sãn yetɩ la de la nẽrsaalba, nẽrba la wuu wʋn lobe tɩ la kuga kʋ, se'ere n soe la, nẽrba la sakɛ tɩ Azã daan de la Nawẽnnɛ nõtɔ'ɔsa.» 7Tɩ ba koŋe lerge ẽ yetɩ: «Tõma ka mi sɛka n tõm ẽ.» 8Tɩ Azezi yele ba yetɩ: «Bɛla, mam mẽ kãn yele ya mam n yẽ nõorɛ la zẽ'e-sɛka ɩta bõn-bãna wã.»

Nẽrba n bɩsrɩ va'am makrɛ

(Amatie 21:33-46, Amarkɩ 12:1-12)

9Tɩ Azezi makɛ makrɛ ẽna bɔ nẽrba la yetɩ: «Bʋraaga n daan kɔ a va'am sele tɩɩsɩ yʋ'ʋrɛ n de viinye, dɩkɛ va'am na bɔ nẽrba tɩ ba bɩsra, dee sẽŋɛ tẽŋa n zãagɛ ka yuuge.

10Tɩ viinye la biɛ go'osgo wakatɛ paagɛ, tɩ a tõm a tõntõnna tɩ a sẽŋɛ sɛba n bɩsrɩ va'am na zẽ'am ka to'oge a pʋrɛ wa'am wa bɔ ẽ. Tɩ sɛba n bɩsrɩ va'am na wẽ ẽ, dee botɩ a lebe kule zãŋa. 11Tɩ a le tõm a tõntõnna ayɩla ba zẽ'am, tɩ ba wẽ ẽ, dee yaalɛ ẽ, botɩ a mẽ lebe kule zãŋa. 12Tɩ a le malɩn tõm ayɩla bʋtã pʋam, tɩ ba wẽ ẽ pɔglʋm, dee dige ẽ va'am na pʋam. 13Tɩ va'am na dãana la tẽ'esɛ yetɩ: ‹Mam wʋn ẽŋɛ la wãne? M yãŋa wʋn tõm na m mẽŋa bi-nõŋrɛ, tã tɩ ba wʋn nã'asɛ ẽŋa.› 14La sɛba n bɩsrɩ va'am na n yẽ va'am na dãana mẽŋa dayʋa la, tɩ ba bãm na taaba yetɩ: ‹Ẽna n wʋn wa sɔɔgɛ sɔna a sɔ bõntarsõm na, basɛ-ya tɩ tɩ kʋ ẽ tɩ bõntarsõm na lebge tõma bõnɔ.› 15Tɩ ba yõkɛ ẽ ve'ege yese va'am na kẽnkɛrŋa ka kʋ ẽ.

Bɛla, va'am na dãana yãŋa wʋn ẽŋɛ nẽr-bãna la wãne? 16A wʋn wa'am wa kʋ nẽrba la mɛ, dee to'oge va'am na bɔ nẽrba basɛba tɩ ba bɩsra.»

La nẽrba la n wõm bɛla la, ba yetɩ: «La kãn ẽŋɛ bɛla baa fẽfẽe.» 17Tɩ Azezi bɩsra ba, dee yetɩ: «La bɛla võorɛ de la bẽm tɩ ba gʋlsɛ Nawẽnnɛ gõŋɔ pʋam yetɩ:

‹Kug-sɛka tɩ tõnmẽtba zagsɛ la,

lebge la kugre n botɩ deego la tara pãŋa›?

18La nẽr-sɛka n lui kug-ẽŋa zuo, a wʋn kɔ kɔ mɛ, la kugre la sãn lui nẽr-sɛka zuo, a wʋn mẽrgɛ ẽ mɛ.»

19Tɩ lɔɔ karẽnsãandõma, la kãabgɔ kẽma nẽŋadõma la ɛɛra sore wakat-ẽŋa tɩ ba yõkɛ ẽ, se'ere n soe la, ba bãŋɛ mɛ tɩ la de la bãma ĩyã tɩ a makɛ makrɛ la. La ba zotɩ la nẽrba la.

Lampo yʋa yelle

(Amatie 22:15-22, Amarkɩ 12:13-17)

20Tɩ lɔɔ karẽnsãandõma, la kãabgɔ kẽma nẽŋadõma la pigra Azezi. Bɛla tɩ ba tõm nẽrba n ãn wʋ ba de la nẽr-sõma la tɩ ba sẽŋɛ ka bẽrɛ Azezi la yetɔga, tɩ a sãn tɔgɛ tuuge, tɩ ba yẽ sore yõkɛ ẽ sẽŋɛ ka ẽŋɛ gɔmna n soe nõorɛ nu'usum. 21Tɩ nẽrba la sẽŋɛ ka soke Azezi yetɩ: «Karẽnsãama, tõma mi tɩ fõn tɔgrɩ se'em na, la fõn zãsnɩ se'em na masɛ mɛ, la fõn ka tũ'usri nẽrba, dee zãsna nẽrba Nawẽnnɛ sore yɛla sɩra sɩra. 22Bɛla, lɔɔ la bɔ sore tɩ tɩ yɔ lampo bɔ Rom na-keko bɩɩ, a ka bɔ sore?»

23Tɩ a bãŋɛ ba yɛmkẽgsɩga la, yele ba yetɩ: 24«Tarɩ-ya lagfɔ ayɩla wa'am.» Tɩ ba tarɩ wa'am. Tɩ a soke ba yetɩ: «Ãne yinyisŋa, la ãne yʋ'ʋrɛ n gʋlsɛ a zuo?» Tɩ ba lerge yetɩ: «La de la Rom na-keko la.» 25Tɩ Azezi yele ba yetɩ: «Bɔ-ya na-keko la ẽŋa n soe bõn-sɛka, dee mẽ bɔ Nawẽnnɛ ẽŋa n soe bõn-sɛka.»

26Azezi n daan tɔgɛ se'em nẽrba la nẽŋam na, ba ka tã'agɛ yõkɛ ẽ, a lergre la di'ige ba mɛ, tɩ ba sĩna.

Kũm vo'ore yelle

(Amatie 22:23-33, Amarkɩ 12:18-27)

27Saduse dõma n daan yetɩ nẽra sãn ki a kãn vo'oge la, bãma nẽrba basɛba n wa'am Azezi zẽ'am wa 28soke ẽ yetɩ: «Karẽnsãama, Amoyisi yʋʋn gʋlsɛ yetɩ: ‹Sɛka sɔbia sãn tara pɔga, ki dee tɩ a ka tara bia, a di a pɔkõorɛ la dɔgɛ kɔma bɔ sɛka n ki la.› 29La bʋraasɩ bayopɔɩ n daan boe dɛna sɔbiisi, tɩ pɔspɔsɩ dãana la di pɔga tɩ a ka dɔgɛ, dee tɩ a ki, 30tɩ bʋyi dãana la mẽ di pɔkõorɛ la ki, dee tɩ a ka dɔgɛ. 31Tɩ bʋtã dãana la mẽ ẽŋɛ bɛla. La bãma bayopɔɩ la wuu lagɩm di pɔkõorɛ la mɛ ki, tɩ ba nẽra nẽra ka dɔgɛ bia. 32Bɛla poorʋm tɩ pɔka la mẽ ki. 33Bɛla, bãma bayopɔɩ la wuu n di pɔka la, ba sãn wa vo'oge kũm vo'ore daarɛ, ãne n wʋn sɔna pɔka la?»

34Tɩ Azezi lerge ba yetɩ: «Dũni-ẽna nẽrba diti pɔgsɩ mɛ dee ɛlla sɩrba, 35la nẽr-sɛba tɩ Nawẽnnɛ bɩsɛ tɩ ba masɛ tɩ ba vo'oge kẽ dũnia sɛka n sẽm pʋam na ka diti pɔgba, la ba ka ellɩ sɩrba. 36La ba ka tã wʋn le ki, se'ere n soe la, ba ãn wʋ malɛkadõma la. Ba de la Nawẽnnɛ kɔma, ban vo'oge dee basɛ kũm na ĩyã. 37La Amoyisi yʋʋn põn pa'alɛ tɩ nẽr-sɛba n ki la wʋn vo'oge mɛ, zẽ'e-sɛka n tɔgrɩ tũntuugo n diti bugum yelle la, Amoyisi yetɩ Zuudãana Nawẽnnɛ n de Abraham, la A'izakɩ, la Azakɔbɩ Nawẽnnɛ. 38Bɛla pa'alɛ tɩ bãma vɔa mɛ, se'ere n soe la, Zuudãana Nawẽnnɛ dagɩ sɛba n ki Nawẽnnɛ, a de la nẽr-sɛba n vɔa Nawẽnnɛ. Nawẽnnɛ zẽ'am nẽrba la wuu vɔa mɛ, baa la sɛba n ki la.»

39Tɩ lɔɔ karẽnsãandõma basɛba lerge ẽ yetɩ: «Karẽnsãama, fʋ tɔgɛ sõŋa.» 40La ba daan ka le saagɛ soke ẽ sɛla sɛla.

Krisi de la naba Adavidi Zuudãana

(Amatie 22:41-46, Amarkɩ 12:35-37)

41Tɩ Azezi yele ba yetɩ: «Wãne tɩ ba yetɩ Krisi de la Adavidi yɩɩŋa? 42Dee tɩ Adavidi yʋʋn põn dẽŋɛ yele yõoma gõŋɔ pʋam yetɩ:

‹Zuudãana Nawẽnnɛ yele

mam Zuudãana yetɩ,

zĩ'ire m zʋʋgɔ bɔba,

43halɩ tɩ m ẽŋɛ fʋ bɛ'ɛba la

tɩ ba bɔna fʋ nãma tẽŋa.›

44La Adavidi mẽŋa sãn wi ẽ yetɩ ‹Zuudãana›, la wʋn ẽŋɛ la wãne tɩ a dɛna Adavidi yɩɩŋa?»

Azezi yele a karẽnbiisi tɩ ba guuse da ãna wʋ lɔɔ karẽnsãandõma

(Amatie 23:1-36, Amarkɩ 12:38-40)

45La nẽrba la wuu n selsrɩ Azezi la, tɩ a yele a karẽnbiisi la yetɩ: 46«Guuse ya mẽŋa la lɔɔ karẽnsãandõma n eerɩ gilgra la fu-wogro, bɔɔra tɩ nẽrba pʋ'ʋsra nã'asra ba da'asʋm, dee bɔɔra nã'asgɔ zẽ'esɩ wẽndeto pʋam, la dia zẽ'esʋm tɩ ba zẽa la. 47Ba to'osrɩ la sɛla wuu tɩ pɔkõpa tarɩ, dee pʋ'ʋsra Nawẽnnɛ pʋ'ʋs-wogro tɩ nẽrba bɩsra ba. Ba wʋn yẽ sɩbgrɛ gãnna wuu.»

Currently Selected:

Aluki 20: gurDBL

Highlight

Copy