Aluki 19

Azezi la Azase yelle

1Azezi daan dolɩ la Zeriko tẽŋa pʋam tɔlla, 2tɩ bʋraa bɔna mĩ tɩ a yʋ'ʋrɛ dɛna Azase. A de la lampo-tɔ'ɔsrɩba naba, dee dɛna bõntarsa. 3A daan boorɩ tɩ a bãŋɛ la Azezi n de nẽr-sɛka. A de la nẽr-gɩlga, la nẽrba la n zo'oge la ĩyã, a ka tã wʋn yẽ Azezi. 4Tɩ a zoe tole nẽŋam sẽŋɛ Azezi n we zẽ'am bɔba la ka zom kẽnkãŋa tɩ a bɩsɛ Azezi. 5Tɩ Azezi sẽŋɛ ka paagɛ zẽ'e-ẽŋa, gorge bɩsɛ kẽnkãŋa la zuo yẽ ẽ, yele ẽ yetɩ: «Azase, sige tɔtɔ, se'ere n soe la, dẽnɩ tɩ mam gã'arɛ fõn yire zĩna.» 6Tɩ Azase sige tɔtɔ, to'oge ẽ sẽŋɛ a yire la sũ-yẽlga.

7La nẽrba la n yẽ bɛla la, ba wuu yõnnɩ mɛ yetɩ: «A sẽŋɛ ka kẽ tɩ a bɔna la tõon-be'ero dãana la yire.» 8Tɩ Azase zɛ Azezi nẽŋam, yele ẽ yetɩ: «M Zuudãana, mam wʋn dɩkɛ m bõntarsõm pʋsʋka pʋɩ bɔ nasdõma. La mam sãn pã'asɛ nẽrba to'oge ba sɛla, mam wʋn lebse bɔ ba nõor-anaasɩ.» 9Tɩ Azezi yele ẽ yetɩ: «Zĩna yi-ẽna dõma yẽ fãarɛ, se'ere n soe la, ẽna mẽ sɩrɩ de la Abraham yɩɩŋa. 10Nẽrsaala Dayʋa la wa'am dũnia zuo tɩ a ɛ la nẽr-sɛba n bɔɩ la, fãagɛ ba.»

Nabia, la a tõntõnɩba makrɛ

(Amatie 25:14-30)

11Nẽrba la n daan selsrɩ Azezi yetɔga la, tɩ a makɛ makrɛ bɔ ba, se'ere n soe la, a daan lɛm na Zerizalɛm, tɩ nẽrba la tẽ'esra tɩ wakat-ẽŋa tɩ ba wʋn yẽ tɩ Nawẽnnɛ diti na'am ba tẽŋasʋka. 12Bɛla tɩ a makɛ bɔ ba yetɩ: «Nabia n yʋʋn yetɩ a sẽŋɛ tẽŋa n zãagɛ ka di na'am leme wa'am. 13Ẽn yʋʋn yetɩ a sẽŋɛ la, a wi la a tõntõnɩba pia bɔ ba sãlma lag-kõbrɛ ayɩla ayɩla, yele ba yetɩ: ‹Dɩkɛ-ya ligri la lɛɛbra, tɩ m sẽŋɛ dee leme wa'am.› 14La a so'olʋm na nẽrba nifo kẽ ẽ mɛ, tɩ ẽn fõrgɛ la, tɩ ba tõm tõntõnɩba tɩ ba babsɛ ẽ ka yetɩ, bãma ka boorɩ tɩ a dɛna bãma naba.

15La baa la bɛla a di na'am na mɛ, lebe kule ka basɛ tɩ ba wi tõntõn-sɛba tɩ a daan bɔ ba ligri la, tɩ ba wa'am tɩ a soke ba bãŋɛ, nẽra woo n leebe yẽ yõorɔ se'em. 16Tɩ pɔspɔsɩ dãana la yele ẽ yetɩ: ‹M zuudãana, mam dɩkɛ fʋ sãlma lag-kõbrɛ la leebe yẽ la yõorɔ sãlma lig-kõba pia pa'asɛ.› 17Tɩ a yele ẽ yetɩ: ‹Fʋ ẽŋɛ sõŋa, fʋ de la tõntõn-sõŋɔ! Fõn ẽŋɛ sɩra la bõnɔ fẽe la ĩyã, fʋ wʋn sɔna tẽnsɩ pia bɩsra.› 18Tɩ bʋyi dãana la mẽ wa'am wa yele ẽ yetɩ: ‹M zuudãana, mam dɩkɛ fʋ sãlma lagfɔ la leebe yẽ la yõorɔ sãlma lig-kõba banuu pa'asɛ.› 19Tɩ a yele ẽ mẽ yetɩ: ‹Fõn wʋn sɔna tẽnsɩ banuu bɩsra.› 20Tɩ ayẽma mẽ wa'am wa yetɩ: ‹M zuudãana, fʋ lagfɔ la n wãna, mam vile ẽ na tãnnɛ sʋgɛ, 21mam zotɩ fõn mɛ, se'ere n soe la, fõn de la nẽra yelle n tɔɩ. Fõn to'orɩ la bõn-sɛba tɩ fʋ mẽŋa ka tõm na yõorɔ, dee lagsra bõnkɔɔl-sɛba tɩ fõn ka bʋrɛ.› 22Tɩ a yele ẽ yetɩ: ‹Fʋ de la tõntõn-be'ego, mam wʋn dɩkɛ la fʋ nõorɛ yetɔga la di fʋ sarɩya. Fõn mi tɩ mam de la nẽra yelle n tɔɩ, tɔ'ɔra bõn-sɛba tɩ mam ka tõm na yõorɔ, dee lagsra bõnkɔɔl-sɛba tɩ mam ka bʋrɛ la, 23bẽm ĩyã tɩ fʋ ka tarɩ m ligri la ka bĩŋe bãnkɩ pʋam, tɩ m sãn leme wa'am tɩ m to'oge m ligri la, la yõorɔ?› 24Dee yele sɛba n boe bilam na yetɩ: ‹To'oge-ya lagfɔ la bɔ sɛka n tarɩ ligri pia la.› 25Tɩ ba yele ẽ yetɩ: ‹Zuudãana, a põn tarɩ la ligri pia.› 26Tɩ a lerge ba yetɩ: ‹Mam yetɩ ya tɩ sɛka woo n tarɩ, a wʋn to'oge pa'asɛ. La sɛka woo n ka tarɩ, a wʋn koŋe sɛla fẽe tɩ a tarɩ la. 27La sãn dɛna mam bɛ'ɛba la n ka boorɩ tɩ mam di na'am na, tarɩ-ya ba wa'am wa kʋ ba mam nẽŋam.› »

Azezi kẽ'erɩ Zerizalɛm la na'am

(Amatie 21:1-11, Amarkɩ 11:1-11, Azã 12:12-19)

28La Azezi n daan tɔgɛ bɛla ba'asɛ la, a tole la nẽrba la nẽŋa tɩ ba wɛ'ɛsa Zerizalɛm. 29La ẽn daan sẽŋɛ ka lɛm Betɩfaazɩ, la Betani n boe Oliivi tãŋa zẽ'am na, a tõm na a karẽnbiisi bayi 30yetɩ: «Sẽŋɛ-ya tẽn-sɛka n boe nẽŋa la pʋam. Ya sãn paagɛ mĩ, ya wʋn yẽ bõn-biire tɩ ba lʋ ze'ele, tɩ nẽra nẽra nãn ka bã ẽ. Ya lorge ẽ tarɩ wa'am. 31La nẽra sãn soke ya yetɩ: ‹Wãne tɩ ya lɔrgra ẽ?›, ya lerge yetɩ: ‹Zuudãana la n boorɩ ẽ.› »

32La ẽŋa n tõm sɛba la sẽŋɛ ka paagɛ, yẽ sɛla woo wʋ ẽn yele ba se'em na. 33Tɩ ba lorge bõn-biire la, tɩ bõŋa la dõma soke ba yetɩ: «Bẽm tɩ ya lɔrgra bõŋa la?» 34Tɩ ba lerge ba yetɩ: «Zuudãana la n boorɩ ẽ.» 35Tɩ ba tarɩ bõŋa la sẽŋɛ Azezi zẽ'am, ka dɩkɛ ba futo paglɛ a zuo, tɩ Azezi bã. 36La ẽn daan we la, nẽrba la yɛrgɛ la ba futo sore la zuo. 37Ẽn daan lɛm Zerizalɛm na, a dolɩ la Oliivi tãŋa sore la sigra, tɩ nẽr-kʋʋŋɔ la wuu n de a karẽnbiisi la ɩta sũ-yẽlga zẽkɛ ba kõosɩ pẽgra Nawẽnnɛ ke'enke'em, a tõon-yãlma tɩ ba yẽ la ĩyã, 38yɛta tɩ:

«Pẽgɛ-ya na-sɛka n sẽm na

Zuudãana Nawẽnnɛ yʋ'ʋrɛ la.

Sũ-mã'asʋm boe la Nawẽnnɛ yire,

nã'asɛ-ya Nawẽnnɛ n boe saazuum.»

39La Farisi dõma basɛba n boe nẽrba la pʋam yele Azezi yetɩ: «Karẽnsãama, tãsɛ fʋ karẽnbiisi la tɩ ba sĩna.» 40Tɩ a lerge ba yetɩ: «Mam yetɩ ya mɛ tɩ ba sãn sĩna, kuga wʋn kaasɛ tagurga.»

Azezi kellɩ Zerizalɛm nẽrba ĩyã

41Azezi n daan lɛm Zerizalɛm yẽ tẽŋa la, a kellɩ mɛ tẽŋa la nẽrba ĩyã, 42yetɩ: «Ya sãn mi ni zĩna wã bõn-sɛka n wʋn bɔ ya sũ-mã'asʋm, la wʋn ãn nɩ sõŋa! La, la sʋgɛ mɛ, tɩ ya nini ka yẽta ẽ. 43La wakatɛ sẽm mɛ, tɩ ya bɛ'ɛba wʋn wa'am wa mẽ lalga gilge ya tẽŋa wã wuu gu, tɩ ya nẽrba kãn tã'agɛ yese. 44Ba wʋn sã'am tẽŋa la wuu mɛ, dee kʋ yãma sɛba wuu n boe a pʋam na. Ba wʋn sã'am ẽ saam saam mɛ, tɩ kugre kãn weege a tadãana zuo. Bõn-bãna n wʋn ẽŋɛ la, de la yan ka bãŋɛ wakat-sɛka tɩ Nawẽnnɛ wa'am tɩ a fãagɛ ya la ĩyã.»

Azezi dige leebdõma Wẽnde-kãtʋm na

(Amatie 21:12-17, Amarkɩ 11:15-19, Azã 2:13-22)

45Azezi n tɔgɛ bɛla ba'asɛ la, a kẽ la Wẽnde-kãtɛ la zẽnzakam digra sɛba n koosrɩ la tɩ ba yɛsra, 46dee yele ba yetɩ: «La gʋlsɛ Nawẽnnɛ gõŋɔ pʋam tɩ Nawẽnnɛ yetɩ: ‹Mam deego wã wʋn dɛna la pʋ'ʋsgɔ deego.› La yãma dɩkɛ ẽ ẽŋɛ la nayigba lagsgɔ zẽ'a.»

47La daarɛ woo a boe la Wẽnde-kãtʋm na zãsna nẽrba Nawẽnnɛ yetɔga. Tɩ kãabgɔ kẽma nẽŋadõma, la lɔɔ karẽnsãandõma, la tẽŋa la nẽrzuto daan ɛɛra sore tɩ ba kʋ ẽ. 48La ba ka mi ba wʋn ẽŋɛ se'em, se'ere n soe la, nẽrba la wuu daan ãn na sɛlɩ sɛlsra a yetɔga la.

Currently Selected:

Aluki 19: gurDBL

Highlight

Copy