Aluki 21

Pɔkõorɛ bɔ'a yelle

(Amarkɩ 12:41-44)

1Azezi daan boe la Wẽnde-kãtʋm na, bɩsɛ yẽ bõntatba n tarɩ ba bɔ'a ɩta ligri daka pʋam, 2dee yẽ pɔkõorɛ n de nasa n ẽŋɛ lig-kõb-pɩgsɩ bayi mã'a. 3Tɩ Azezi yetɩ: «Mam yetɩ ya la sɩra, tɩ pɔkõorɛ ẽna n de nasa la ẽŋɛ zo'oge gãnna ba wuu mɛ. 4Bãma wuu looge la bõntarsõm sɛba tɩ ba tarɩ zo'oge la pʋam wa'am wa ẽŋɛ mĩ. La ẽŋa n de nasa la, dɩkɛ la a dia ligri wuu wa ẽŋɛ mĩ.»

Dũnia ba'asgɔ nãmsgɔ, la Zerizalɛm sã'aŋɔ yelle

(Amatie 24:1-28, Amarkɩ 13:1-23)

5La nẽrba basɛba n daan tɔgɛ Wẽnde-kãtɛ la yelle yetɩ, ba dɩkɛ la kug-sõma mẽ ẽ, dee dɩkɛ bɔ'a tɩ ba bɔ Nawẽnnɛ malgɛ ẽ, tɩ a ãna sõŋa sõŋa. 6Tɩ Azezi yele ba yetɩ: «Wakatɛ sẽm mɛ tɩ ba wʋn lʋbɛ bõn-sɛba tɩ ya yẽtɩ wã wuu saam saam, tɩ kugre baa ayɩla kãn weege a tadãana zuo.»

7Tɩ ba soke ẽ yetɩ: «Karẽnsãama, bõn-bãna wʋn ẽŋɛ la dabʋrɛ? La bẽm wʋn pa'alɛ tõma tɩ tɩ bãŋɛ tɩ bõn-bãna wʋn ẽŋɛ?» 8Tɩ Azezi lerge ba yetɩ: «Guuse-ya tɩ nẽra da pã'asɛ ya tɩ ya tuuge. Nẽrba zozo'e n wʋn dɩkɛ mam yʋ'ʋrɛ wa'am wa pã'asra ya, tɩ ba nẽra woo yetɩ: ‹Mam n de Krisi›, bɩɩ ba wʋn yetɩ: ‹Wakatɛ lɛm mɛ.› Da doose-ya nẽr-bãma. 9La ya sãn wõm zɛbrɛ, la tẽn-dãmŋɔ yɛla, da basɛ-ya tɩ dabeem yõkɛ ya, dẽnɩ tɩ bõn-bãma dẽŋɛ ẽŋɛ, la, la nãn ka de dũnia ba'asgɔ.»

10Dee yele ba yetɩ: «Buuri ayɩla wʋn isge zɛbra la buuri ayẽma, tɩ so'olʋm ayɩla dõma isge zɛbra la so'olʋm ayẽma, 11la tẽŋa wʋn tĩi mĩim mɛ, la kɔm, la bã'a-loŋrɩsɩ n wʋn wa'am zẽ'esɩ zozo'e, la yel-kãra n kẽ'esrɩ nẽrba dabeem, la bõn-yãlma n wʋn ẽŋɛ saazuum.

12La, lan dẽŋɛ bõn-bãna wã n wʋn ẽŋɛ, ba wʋn yõgɛ ya mɛ, nãmsɛ ya, tarɩ ya sẽŋɛ ka sãm ba wẽndetʋm sarɩyaditba zẽ'am, tɩ ba yʋ ya, la ba wʋn botɩ ya ze'ele na'adõma, la gɔmnadõma nẽŋam mam yʋ'ʋrɛ ĩyã. 13La wʋn doose la bɛla tɩ ya yẽ folle tɔgɛ mam yelle pa'alɛ ba. 14Bɛla, ẽŋɛ ya sũurum tɩ la dagɩ ya fabla yan wʋn lerge se'em po'oge ya mẽŋa. 15Mam mẽŋa wʋn bɔ ya yɛm tɩ ya tɔgɛ tɩ ya bɛ'ɛba kãn yãŋɛ lerge sɩ'ɩsɛ ya yetɔga. 16Baa la ya sɔdõma, la ya madõma, la ya sɔbiisi, la ya sɩrdõma wʋn yõgɛ ya sẽŋɛ ka bɔ, tɩ ba kʋ ya nẽrba basɛba. 17Nẽrba wuu wʋn sise ya mam ĩyã. 18La ya zomto baa ayɩla kãn bɔɩ. 19Ya sãn ze'ele kãŋkãŋɛ, ya wʋn yẽ vɔm Nawẽnnɛ zẽ'am.

20Ya sãn wa yẽ tɩ sʋdaasɩ gilgri Zerizalɛm, ya bãŋɛ tɩ a sã'aŋɔ lɛm mɛ. 21Bɛla, nẽr-sɛba n boe Zude tẽŋa zoe zom tãnsɩ zuto, tɩ nẽr-sɛba n boe Zerizalɛm pʋam na yese zoe, la sɛba n boe vatʋm na da kẽ tẽŋa pʋam. 22Dabsa bãma de la tõon-be'ero sɩbgrɛ dabsa tɩ bõn-sɛba wuu n gʋlsɛ Nawẽnnɛ gõŋɔ pʋam na wʋn ẽŋɛ. 23Wakat-ẽŋa, la wʋn dɛna la toogo bɔ pɔg-sɛba n tarɩ pʋa, la sɛba n tarɩ bilɛɛsɩ tɩ ba mõgra la. Se'ere n soe la, nãmsgɔ kãtɛ n wʋn wa'am tẽŋa wã pʋam, la Nawẽnnɛ sũure wʋn yĩige mɛ la tẽŋa wã nẽrba. 24Ba wʋn kʋ basɛba mɛ la sʋkɔbrɔ, la ba wʋn yõgɛ basɛba mɛ tarɩ sẽŋɛ bu-zãŋsɩ tẽnsʋm ka ẽŋɛ yamsɩ. Bu-zãŋsɩ wʋn sã'am Zerizalɛm mɛ, halɩ tɩ ba wakatɛ wʋn wa ba'asɛ.»

Azezi n de Nẽrsaala Dayʋa la lemŋo

(Amatie 24:29-35,42-44, Amarkɩ 13:24-31)

25«Bõn-yãlma n wʋn ẽŋɛ wẽntulle, la wõrga, la wõrbiɛ pʋam. La dũnia nẽrba buuri wuu wʋn fabla mɛ zɛ yɛrɩ, ko-kãtɛ ko-mĩ'isi n wʋn tĩi wẽ'era ɩta voole la ĩyã. 26La nẽrba wʋn tẽ'esra la bõn-sɛka n wʋn ẽŋɛ dũnia wuu zuo la, tɩ dabeem wʋn botɩ ba palẽŋa ẽkɛ tɩ ba yɛm bɔɩ, se'ere n soe la, bõn-sɛba n boe saazuum wʋn mĩim mɛ. 27Wakat-ẽŋa ba wʋn yẽ tɩ Nẽrsaala Dayʋa la boe wara pʋam sẽna la pãn-kãtɛ, tɩ a na'am pãŋa peelem nẽegɛ. 28La ya sãn yẽ tɩ bõn-bãna pɔsɛ ɩta, gorge-ya bɩsɛ saazuum, tɩ ya fãarɛ lɛm mɛ.»

29Azezi makɛ la makrɛ bɔ ba yetɩ: «Bɩsɛ-ya kẽnkãŋa, la tɩɩsɩ wuu. 30Ya sãn yẽ tɩ ba võorɔ pusra, ya mẽŋa mi tɩ sigre lɛm mɛ. 31Bɛla mẽ, ya sãn yẽ tɩ bõn-bãna ɩta, ya bãŋɛ tɩ wakatɛ lɛm mɛ tɩ Nawẽnnɛ wʋn di na'am nẽrba tẽŋasʋka. 32Mam yetɩ ya la sɩra, tɩ bõn-bãna wʋn ɩta mɛ dee tɩ zamãan-ẽna yãŋa tole. 33Saazuum la tẽŋa wʋn tole mɛ, la mam yetɔga la kãn malɩn tole.

34Guuse ya mẽŋa tɩ ya yɛm da yɔɔra la di tɩgɛ, la dã-yũure, la dũni-ẽna vɔm yɛla, tɩ Nẽrsaala Dayʋa la lemŋo daarɛ da wa di'ige ya 35wʋ bẽrgɔ la. Se'ere n soe la, daarɛ ẽŋa wʋn wa di'ige nẽrba wuu n boe tẽn-gõŋɔ wã zuo mɛ. 36Bɛla, da gĩsra-ya, pʋ'ʋsra-ya Nawẽnnɛ wakatɛ wuu, tɩ ya wʋn yẽ pãŋa tã'agɛ põsɛ bõn-sɛba wuu n wʋn wa ẽŋɛ la, dee tã'agɛ ze'ele Nẽrsaala Dayʋa la nẽŋam.»

37Azezi daan ẽn zãsna la nẽrba Wẽnde-kãtʋm na wʋntɛɛŋa, tɩ yʋ'ʋŋɔ tɩ a ẽn yese tẽŋa la pʋam sẽŋɛ ka gã'arɛ Oliivi tãŋa la zuo. 38La nẽrba wuu lagsrɩ la a zẽ'am Wẽnde-kãtʋm na bulika yʋ'ʋŋɔ yʋ'ʋŋɔ sɛlsra a yetɔga.

Currently Selected:

Aluki 21: gurDBL

Highlight

Copy