Aluki 22

Azudaasɩ boorɩ tɩ a botɩ Zifdõma nẽŋadõma yõkɛ Azezi

(Amatie 26:1-5,14-16, Amarkɩ 14:1-2, Amarkɩ 14:10-11, Azã 11:45-53)

1Borborɩ n ka tarɩ dãbɩllɛ kibsa yʋ'ʋrɛ n de Zɔɔg-basɛ la daan dee la fẽe la a paagɛ. 2Tɩ kãabgɔ kẽma nẽŋadõma, la lɔɔ karẽnsãandõma la ɛɛra bãma n wʋn ẽŋɛ se'em kʋ Azezi, dee zɔta nẽrba la dabeem.

3Tɩ Asũtãana kẽ Azudaasɩ tɩ ba wi'iri Iskariyo n de Azezi karẽnbiisi pia la ayi la nẽra ayɩla sũurum. 4Tɩ a sẽŋɛ kãabgɔ kẽma nẽŋadõma, la Wẽnde-kãtɛ la gu'urba nẽŋadõma zẽ'am, ka yele ba ẽŋa n wʋn ẽŋɛ se'em botɩ ba yõkɛ Azezi. 5Tɩ ba sũure ẽŋɛ yẽlʋm, tɩ ba yetɩ bãma wʋn bɔ ẽ ligri, 6tɩ Azudaasɩ sakɛ, ɛɛra sore tɩ a botɩ ba yõkɛ Azezi tɩ nẽr-kʋʋŋɔ la da bãŋɛ.

Azezi diti Zɔɔg-basɛ kibsa la a karẽnbiisi

(Amatie 26:17-30, Amarkɩ 14:12-26, Azã 13:21-30, 1 Korẽntɩ 11:23-25)

7Borborɩ n ka tarɩ dãbɩllɛ kibsa la daarɛ tɩ ba kʋʋrɩ pebilsi dita Zɔɔg-basɛ kibsa la n daan paagɛ. 8Tɩ Azezi tõm Apɩyɛɛrɩ la Azã yetɩ: «Sẽŋɛ-ya ka mãasʋm kibsa la dia tɩ tɩ wa'am wa di.» 9Tɩ ba soke ẽ yetɩ: «Bɛ tɩ tɩ wʋn sẽŋɛ ka mãasʋm?» 10Tɩ Azezi yele ba yetɩ: «Selse-ya, ya sãn ka kẽ'era tẽŋa la pʋam, ya wʋn tʋ'ʋsɛ bʋraaga n tʋ yoore la ko'om, ya doose ẽ kẽ yi-sɛka tɩ a wʋn kẽ la pʋam. 11La ya sãn kẽ, ya yele yidãana la yetɩ: ‹Karẽnsãama la yetɩ, de-sɛka tɩ ẽŋa la a karẽnbiisi la wʋn di Zɔɔg-basɛ kibsa la boe la bɛ?› 12A wʋn pa'alɛ ya de-kãtɛ n boe ayẽma zuo, tɩ lɔgrɔ wuu bɔna mĩ. Mãasʋm-ya bilam gu'ura to.» 13Tɩ ba sẽŋɛ ka yẽ sɛla woo wʋ Azezi n yele ba se'em na, tɩ ba mãasʋm Zɔɔg-basɛ kibsa la.

14Tɩ wakatɛ la paagɛ, tɩ Azezi zĩ'ire la a karẽnbiisi pia la ayi la tɩ ba di. 15Tɩ a yele ba yetɩ: «Mam ba bɔɔra mɛ la m sũure wuu tɩ mam na yãma di Zɔɔg-basɛ kibs-ẽna wã dee tɩ m yãŋa nãmsɛ. 16La mam yetɩ ya mɛ tɩ, mam kãn le di Zɔɔg-basɛ kibsa halɩ tɩ a võorɛ wa ẽŋɛ ba'asɛ Nawẽnnɛ so'olʋm pʋam.» 17Dee dɩkɛ bõn-yũula pʋ'ʋsɛ Nawẽnnɛ, dee yetɩ: «To'oge-ya bãna wã pʋɩ taaba yũ. 18La mam yetɩ ya mɛ tɩ lɛɛlɛ wã kɔ'ɔn wɛ'ɛsa wuu, mam kãn le yũ viinye biɛ bõn-yũula wã halɩ ka paagɛ wakat-sɛka tɩ Nawẽnnɛ wʋn wa'am wa dita na'am nẽrba tẽŋasʋka.» 19Dee dɩkɛ borborɩ pʋ'ʋsɛ Nawẽnnɛ, dee fiise bɔ ba yetɩ: «Ẽna de la mam ĩyã tɩ mam dɩkɛ bɔ yãma ĩyã. Ɩta-ya wãna tẽra mam yelle.» 20La ban di kɩ'ɩlɩm na, a dɩkɛ la bõn-yũula yetɩ: «Bõn-yũul-bãna pa'alɩ tɩ Nawẽnnɛ bĩŋe la nõor-paalga, mam zɩɩm n wʋn yese saagɛ bɔ yãma la ĩyã. 21La bɩsɛ-ya, sɛka n yetɩ a botɩ ba yõkɛ mam na lagɩm na mam kalam dita. 22Nẽrsaala Dayʋa la wʋn ki wʋ Nawẽnnɛ n boorɩ tɩ la ẽŋɛ se'em na. La nẽr-sɛka n wʋn botɩ ba yõkɛ ẽ na wʋn yẽ toogo.» 23Tɩ karẽnbiisi la sɔkra taaba tɩ ba bãŋɛ nẽr-sɛka n de ẽ bãma pʋam n yetɩ a ẽŋɛ bɛla.

Ãne n gãnnɩ?

24Karẽnbiisi la daan wẽ'erɩ la nõke'ene bɔɔra tɩ ba bãŋɛ bãma pʋam nẽr-sɛka n masɛ tɩ a dɛna nẽr-keko gãnna. 25Tɩ Azezi yele ba yetɩ: «Dũni-ẽna na'adõma soe nẽrba la pãŋa, la sɛba n tarɩ ke'eŋo la botɩ nẽrba wi'ira ba tɩ: ‹Sõm-ɩtba›. 26La yãma pʋam, la kãn dɛna bɛla. Sɛka n de nẽr-keko yãma pʋam, a ãna wʋ bõn-pɩka la, la sɛka n de nẽŋadãana ãna wʋ tõntõnna. 27La ãne n de nẽr-keko gãnna, sɛka n zĩ dita la bɩɩ, sɛka n tõnnɩ bɔ'ɔra ẽ na? La dagɩ sɛka n zĩ dita la? La mam boe ya pʋam wʋ tõntõnna la.

28Yãma de la nẽrba n mõrgɛ weege bɔna la mam, yel-sɛba n paagɛ mam na pʋam. 29Bɛla mam wʋn bɔ ya so'olʋm, wʋ mam Sɔ Nawẽnnɛ n bɔ mam so'olʋm se'em na, 30tɩ ya wʋn wa zĩ'ire mam so'olʋm pʋam dita dee yũura la mam, dee zĩ'ire na'am bĩmbĩna zuto di Ɩsrayɛlɩ dõma buuri pia la ayi la sarɩya.»

Azezi yetɩ Apɩyɛɛrɩ wʋn sɩ'ɩsɛ ẽŋa

(Amatie 26:31-35, Amarkɩ 14:27-31, Azã 13:36-38)

31La Azezi yele Asimõ-pɩyɛɛrɩ yetɩ: «Asimõ, Asimõ, bãŋɛ tɩ Asũtãana sose la sore tɩ a makɛ ya bɩsɛ, wʋ nẽra n yeele si yɛsra urgo la. 32La mam pʋ'ʋsɛ Nawẽnnɛ mɛ bɔ fɔ, tɩ fõn bɔ mam sɩra la, fʋ da basɛ. La fʋ sãn wa leme wa dɔla mam, fʋ bɔ fʋ sɔbiisi la bʋraanɛ tɩ ba ze'ele kãŋkãŋɛ.» 33Tɩ Apɩyɛɛrɩ lerge ẽ yetɩ: «Zuudãana, mam sakɛ mɛ tɩ m kẽ yʋ'a deem la fõn, bɩɩ m ki la fõn.» 34Tɩ Azezi yele ẽ yetɩ: «Apɩyɛɛrɩ, mam yetɩ fʋ mɛ tɩ yʋ'ʋŋɔ ẽna wã, fʋ wʋn sɩ'ɩsɛ la nõorɛ atã tɩ fõn ka mi mam, dee tɩ nõ-rɔɔgɔ kaasɛ.»

Azezi yele a karẽnbiisi tɩ ba mãasʋm tɩ nãmsgɔ n wʋn wa'am

35La Azezi soke a karẽnbiisi la yetɩ: «Mam n daan tõm yãma tɩ ya sẽŋɛ ka mõolɛ Nawẽnnɛ yetɔga, tɩ yãma ka dɩkɛ pʋtmãanɛ, la tãmpɔkɔ, la tagra la, sɛla daan pɔ'ɔgɛ ya mɛ bɩɩ?» Tɩ ba lerge yetɩ: «Ayɛɩ.» 36Tɩ a yele ba yetɩ: «Lɛɛlɛ wã, la ka le dɛna bɛla. Sɛka n tarɩ pʋtmãanɛ, a dɩkɛ, la sɛka n mẽ tarɩ tãmpɔkɔ, a dɩkɛ. La sɛka n ka tarɩ sʋkɔbgɔ, a koose a fuugo da sʋkɔbgɔ. 37Se'ere n soe la, la gʋlsɛ Nawẽnnɛ gõŋɔ pʋam yetɩ: ‹Ba dɩkɛ ẽ naagɛ la tõon-be'ero dõma›. Mam yetɩ ya tɩ la de la mam tɩ bõn-ẽŋa wʋn ẽŋɛ. Asɩra, bõn-sɛka n gʋlsɛ tɔgra mam yelle la, yãŋa wʋn ẽŋɛ mɛ.» 38Tɩ ba yetɩ: «Zuudãana, bɩsɛ sʋkɔbrɔ bayi n wãna.» Tɩ a yele ba yetɩ: «Basɛ-ya tɩ la seke ya.»

Azezi pʋ'ʋsɛ Nawẽnnɛ Oliivi tãŋam

(Amatie 26:36-46, Amarkɩ 14:32-42)

39Tɩ Azezi yese sẽŋɛ Oliivi tãŋam wʋ ẽŋa ẽn ɩta se'em na, tɩ a karẽnbiisi la doose ẽ. 40La ẽn paagɛ mĩ na, a yele ba yetɩ: «Pʋ'ʋsɛ-ya Nawẽnnɛ tɩ yelle da paagɛ ya tɩ ya lui.» 41Dee basɛ ba sẽŋɛ zãagɛ fẽe masɛ wʋ nẽra n wʋn lobe kugre se'em, ka ka dũma tẽŋa pʋ'ʋsra Nawẽnnɛ yetɩ: 42«M Sɔ, fʋ sãn bɔɔra, basɛ tɩ nãmsgɔ ẽna tole dee basɛ ma. La, da kãn ẽŋɛ mam n boorɩ se'em, ẽŋɛ fõn boorɩ se'em.» [ 43Tɩ malɛka ze'ele saazuum wa'am wa pa'asɛ ẽ pãŋa. 44Tɩ Azezi sũure ba sã'am halɩ, tɩ a malɩn tĩi pʋ'ʋsra tɩ a mõrgrɛ tɔgra tẽŋa wʋ zɩɩm na.] 45Ẽn daan pʋ'ʋsɛ kɩ'ɩlɩm na, a lebe ka paagɛ a karẽnbiisi la zẽ'am, tɩ ba gĩsri mɛ, ba sũure n sã'am ĩyã, 46tɩ a soke ba yetɩ: «Bẽm tɩ yãma gĩsra? Isge-ya pʋ'ʋsɛ Nawẽnnɛ tɩ yelle da paagɛ ya tɩ ya lui.»

Ba yõkɛ Azezi

(Amatie 26:47-56, Amarkɩ 14:43-50, Azã 18:3-11)

47Azezi n daan ken tɔgra la, tɩ nẽrba zozo'e sẽnna paana. Tɩ Azudaasɩ n de a karẽnbiisi pia la ayi la nẽra ayɩla bɔna ba nẽŋa, sẽŋɛ lɛm Azezi tɩ a kɔkɛ ẽ, pʋ'ʋsɛ ẽ. 48Tɩ Azezi yele ẽ yetɩ: «Azudaasɩ, fõn yetɩ fʋ kɔkɛ Nẽrsaala Dayʋa la mɛ botɩ ba yõkɛ ẽ?»

49Tɩ a karẽnbiisi la n ze a zẽ'a, yẽ lan yetɩ la ẽŋɛ se'em na yetɩ: «Zuudãana, tɩ dɩkɛ tɩ sʋkɔbrɔ la zɛbɛ bɩɩ?» 50Tɩ ba nẽra ayɩla dɩkɛ a sʋkɔbgɔ sɛ kãabgɔ kẽma nẽŋadãana tõntõnna zʋʋgɔ tʋbrɛ fiige. 51Tɩ Azezi yetɩ: «Basɛ-ya bɛla.» Dee kalʋm bʋraaga la tʋbrɛ la, tɩ a lebe tablɛ. 52Dee yele kãabgɔ kẽma nẽŋadõma, la Wẽnde-kãtɛ la gu'urba nẽŋadõma, la kẽma n yetɩ ba yõkɛ ẽ na yetɩ: «Yãma tarɩ la sʋkɔbrɔ, la dasa sẽna tɩ ya yõkɛ mam wʋ mam de la fãara la? 53Mam daan boe la ya lɛ mɛ Wẽnde-kãtʋm na daarɛ woo, tɩ ya ka yõkɛ mam. La wakat-ẽna wã ya tã wʋn ẽŋɛ yan boorɩ se'em, se'ere n soe la, la de la lika pãŋa dãana wakatɛ.»

Apɩyɛɛrɩ sɩ'ɩsɛ tɩ ẽŋa ka mi Azezi

(Amatie 26:57-58,69-75, Amarkɩ 14:53-54,66-72, Azã 18:12-18,25-27)

54La ba yõkɛ Azezi mɛ tarɩ ẽ sẽŋɛ ka kẽ kãabgɔ kẽma nẽŋadãana yire, tɩ Apɩyɛɛrɩ bɔna zãazãarɛ li'isra dɔla. 55La ba tʋʋrɛ la bugum yire la zẽnzaka tẽŋasʋka lagsɛ zẽa, tɩ Apɩyɛɛrɩ mẽ lagɩm na ba zẽa. 56Tɩ tõntõn-pɔka ayɩla yẽ Apɩyɛɛrɩ n zĩ bugum na zẽ'am, bɩsra ẽ zĩi dee yetɩ: «Bʋra-ẽna mẽ dolɩ la Azezi.» 57Tɩ Apɩyɛɛrɩ sɩ'ɩsɛ yetɩ: «Pɔka, mam ka mi ẽ.» 58Tɩ la le ẽŋɛ fẽe, tɩ nẽra ayẽma le yẽ ẽ yetɩ: «Fõn mẽ de la ba nẽra ayɩla.» Tɩ Apɩyɛɛrɩ yetɩ: «Bʋraaga, mam dagɩ ba nẽra.» 59Tɩ la le ẽŋɛ fẽe masɛ wʋ karf-ayɩla, tɩ nẽra ayɩla le yetɩ: «Asɩra, bʋra-ẽna ẽn dɔla ẽ mɛ, a mẽ de la Galile nẽra.» 60Tɩ Apɩyɛɛrɩ yetɩ: «Bʋraaga, mam ka bãŋɛ fõn tɔgɛ se'em na võorɛ.» La ẽn ken bɔna mĩ tɔgra la, tɩ nõ-rɔɔgɔ kɔ'ɔn kaasɛ. 61Tɩ Zuudãana la gelge bɩsɛ Apɩyɛɛrɩ. Tɩ Apɩyɛɛrɩ tẽegɛ Zuudãana n yele ẽ yetɩ: «Fʋ wʋn sɩ'ɩsɛ mam nõorɛ atã mɛ zĩna, dee tɩ nõ-rɔɔgɔ kaasɛ la.» 62Tɩ Apɩyɛɛrɩ yese yẽŋa ka kɛlla la sũ-sã'aŋɔ zozo'e.

Ba la Azezi mɛ, dee wẽ ẽ

(Amatie 26:67-68, Amarkɩ 14:65)

63Bʋra-sɛba n gu'uri Azezi la daan la ẽ mɛ, dee wẽ ẽ, 64dɩkɛ fuugo vile a nẽŋa wẽ ẽ, dee yele ẽ yetɩ: «Bãŋɛ pa'alɛ tɔ sɛka n wẽ fɔ.» 65La ba tʋ ẽ na tʋʋrɛ basɛba zozo'e pa'asɛ.

Ba tarɩ Azezi sẽŋɛ Zifdõma sarɩyaditba zẽ'am

(Amatie 26:59-66, Amarkɩ 14:55-64, Azã 18:19-24)

66La beere n daan wiige, tɩ Zifdõma kẽma, la kãabgɔ kẽma nẽŋadõma, la lɔɔ karẽnsãandõma wuu lagsɛ tɩ ba tarɩ Azezi sẽŋɛ ba sarɩyadia zẽ'am, dee yele ẽ yetɩ: 67«Fʋ sãn sɩrɩ dɛna la Krisi tɩ Nawẽnnɛ bĩŋe nõorɛ tɩ a wʋn wa'am na, fʋ yele to.» Tɩ a lerge ba yetɩ: «Mam sãn yele ya, ya kãn sakɛ, 68la mam sãn soke ya sokre, ya mẽ kãn lerge mam. 69La lɛɛlɛ wã kɔ'ɔn wɛ'ɛsa wuu, Nẽrsaala Dayʋa la wʋn zĩ'ire Nawẽnnɛ n de pãn-kãtɛ dãana la zʋʋgɔ.» 70Tɩ ba wuu soke ẽ yetɩ: «Bɛla fõn sɩrɩ de la Nawẽnnɛ Dayʋa?» Tɩ a lerge ba yetɩ: «Yãma n yele se'em na, mam de la bɛla.» 71Tɩ ba yetɩ: «Tɩ le ɛɛra la bẽm kaset-dõma? Tõma mẽŋa wõm a nõorɛ yetɔga mɛ.»

Currently Selected:

Aluki 22: gurDBL

Highlight

Copy