Mako 13

Yesu olaŵila va kucenekeka kwa Ngʼanda ya Mulungu

(Mt 24:1-2; Lk 21:5-6)

1Yesu penzofuma mu Ngʼanda ya Mulungu, yumo wa asambili ŵake emuwuzya kuti, “Wonani, Asambizyi! Kuwama kwa myala iyi na vimango ivi!” 2Yesu eŵawuzya kuti, “Kansi muwona vimango ivi vikulu teti? Pakaŵelini mwala weka umo palulu pa mwala uyakine; yonse azeayiwundule.”

Matamano na manzunzo

(Mt 24:3-14; Lk 21:7-19)

3Pa vuli pake Yesu enkhala pansi, pa Lupili ya Olivi kuloleshana na Ngʼanda ya Mulungu. Tetyo, Petulo, Yakobe, Yohane na Andeleya emukonsha pa ŵeka, elaŵila kuti, 4“Tiwuzyeni luweme, vamene ivi, vizecitike lini? Tizeziŵe tyani kuti vonse vili pafupi kucitika?”

5Yesu etatika kuŵawuzya kuti, “Ŵani celu kuti aliyense osati akupumvyeni. 6Cikomo ŵanthu anyinji akawele mu zina yangu nolaŵila kuti, ‘Newo nine Kristu Mesiya.’ Azeapumvye ŵanthu anyinji. 7Koma mukazokumvwa va nkhondo, keno mbili ya nkhondo, osati muzecite wowa. Ivi vuwamila kucitika, koma niyelini kusila kwa calo yayi. 8Pakuti mtundu uzewukilane na mtundu uyakine, na ufumu uzewukilane na ufumu uyakine. Kukaŵe vivomezi na njala vitwa vonse. Ivi vizaŵe ngani kuŵaŵa kotatika powona mwana.

9“Koma ŵani menso. Pakuti azeamutwaleni ku maumba ŵa apinguzi, na kuti azemuniyateni mu makacisi ŵa Ayuda. Muzepaname pa menso pa akulu–akulu ŵa boma na mafumu cikomo ca newo, kutwala umboni pa menso pawo pakuti mwewo munikonkha. 10Ikaliyofwika nsita yosilizya Malizu Aweme opangwika kuŵilizyiwa ku mitundu yonse. 11Tetyo, azemukateni, nomtwalani ku ngʼanda ya milandu, osaŵa na nkhawa nolingilila kuti, ‘Kansi tilaŵile vinji?’ Yayi mwewo mukayingolaŵila vatiakakuwuzyeni Mulungu pa nsita iyo. Pakuti ŵatiakalaŵile ni mwewolini yayi, koma ni Mzimu Mtuŵa.”

12“Mkwawo akotwala mkwawo kuti akapayiwe, nipo awisi akotwala ŵana ŵawo. Ŵana akowukila avyazi ŵawo, kufwikila kuŵapayisha. 13Ŵanthu wonse azemtinkheni cikomo ca newo. Koma ŵala ŵatiazetangʼilile kufwikila ku nsilililo, niye ŵatiazepulumushiwe.”

Coceneka ca maloza

(Mt 24:15-28; Lk 21:20-24)

14 Yesu epitilizya kulaŵila kuti, “Mukawone kuti Coceneka ca maloza cala, capanama pa malo pa cuwamilalini kuŵapo. (Wewo uŵelenga umvwishishe luweme.) Pamene apo mwewo muli mu Yudeya muzewutukile ku malupili. 15Ŵala wonse ali palulu pa ngʼanda asaloŵe mu mangʼanda ŵawo kutola kanthu kalikonse. 16Ŵala wonse ali ku munda osati akawelele ku ngʼanda kuti akatole mikhanjo. 17Ali na shamu anakazi ŵatiakaŵe na pakati, na ŵala ŵatiakonyonsha ŵana pa nsita iyo. 18Lombani kwa Mulungu kuti ivi osati vikawoneke pa nsita ya mphepo, 19cikomo manzunzo ŵatiazewoneke pa nsita iyo, akaliyowonekapo kufuma pa cilengelo ca calo ca pansi, kufwika lomba vikawonekepolini soti. 20Tetyo, Asikulu akaleka kuŵacefya masiku ŵa manzunzo, paliye munthu cukanga yumo angapulumushiwe. Koma yeve eŵacefya cikomo ca ŵanthu ŵecisalula.

21“Pa nsita iyo, muyakine akazomuwuzyani kuti, ‘Ali pano Kristu wala,’ keno kuti, ‘Uyo ali apo,’ osati muzemucetekele. 22Pakuti akristu ŵa wenye na aneneli ŵa wenye akawele nakuzocita viziŵikilo vikulu na vokanganisha, nakuzopumvya cukanga na wosaluliwa ŵa Mulungu. 23Koma mwewo ŵani menso. Newo nakuwuzyilantoni pavikaliyocitika vonse.

Kuwela kwa Mwana wa Munthu

(Mt 24:29-31; Lk 21:25-28)

24 “Mu masiku awo manzunzo akayosila,

Zuŵa ikafipe,

mwezi ukaleke kutuŵa.

25Nyenyezi zizezipone kufuma kululu,

nipo mphamvu ya kululu izeisungʼuzyiwe.

26 “Pamene apo Mwana wa Munthu akawonekele akuza mu mikumbi, na mphamvu zikulu na ulemelelo. 27Tetyo, azeatume angelo ŵake, azeawunganishe wosalulika ŵake kufuma ku vitwa vonse va calo ca pansi.”

Sambilo ya mkuyu

(Mt 24:32-35; Lk 21:29-33)

28Yesu epitilizya kulaŵila kuti, “Sambililankoni ku mkuyu. Mukawona kuti misambo yatatika kumela nipo vitepo viyakine vatatika kutumba, muziŵe kuti mainza afwika. 29Tetyo, mukazowona vala vanalaŵila vucitika muzemuziŵe kuti Mwana wa Munthu ali pafupi, ali pa mulyango pene–pene. 30Nukuwuzyani vyendi kuti vonse ivi vizewoneke ŵanthu ŵa luko ino akaliyomwalila wonse. 31Kululu na calo ca pansi vikasile, koma malizu ŵangu akasilelini mphamvu.”

Nsiku yosilizya yuziŵikalini

(Mt 24:36-44)

32“Koma nsiku yake keno nsita yake, paliye oyiziŵa – cukanga angelo ŵa Kululu, keno Mwana, koma Atata ŵeka mphela. 33Tetyo, ŵani menso, ŵani celu pakuti muziŵalini nsita pa itiyikakwanile. 34Pakuti cili ngani asikulu wamene akuya pa ulwendo, kufuma ku ngʼanda kwake. Osiya vinthu vonse mu manja mwa anyanchito ŵake, nipo owuzya malonda wa pa mulyango kuti aŵekuŵa menso.

35“Tetyo na mwewo soti mwakuŵa celu, pakuti muziŵalini nsita mwine wa ngʼanda yatiakawelelemo, keno ni mcingulo, keno ni pakati pa usiku, keno ni kombwe wotatika, keno ku matemwakuca. 36Angawele movundumukizya, tetyo osati akamfwaneni muli mtulo. 37Ivi vanulaŵila nuwuzyalini mwewo mweka yayi, koma nuwuzya ŵanthu wonse kuti, ‘Ŵani celu.’”

Currently Selected:

Mako 13: GMN

Highlight

Copy