Mako 14

Kaupo kopangana vopaya Yesu

(Mt 26:1-5; Lk 22:1-2; Yh 11:45-53)

1Kwenze kwisala tyala masiku aŵili kuti cifwike cisangalalo ca Pasaka na cisangalalo ca mkate uliye cofufumishila. Akulu ŵa Ansembe na Asambizyi ŵa Matetulo enzopangwa njila yofisika yakuti amukatilemo Yesu nomupaya. 2Koma emvwana kuti, “Tisacite voteti pa nsita ya cisangalalo, pangazocitika vyongo pa winji wa ŵanthu.”

Mwanakazi muyakine oŵilikizya Yesu ku Betaniya

(Mt 26:6-13; Yh 12:1-8)

3Nsiku iyakine Yesu enze ku Betaniya, mu ngʼanda ya Simoni woyitiwa wa Mambombo. Penzokulya kwiwela mwanakazi muyakine enze na nsupa ya mafuta onunkhila ŵa nada ŵa mtengo ngako. Mwanakazi wala efwaya nsupa yala nozoleka mafuta ŵala pa mutu pa Yesu.

4Ŵanthu ayakine pamene apo eyipilwa nolaŵila kuti, “Cikomo ni cinji kuceneka mafuta onunkhila teti? 5Mafuta aŵa sembe esitishiwa pa mtengo wa ndalama za siliva zokwanila makumi kumi atatu (300)#14:5 ndalama… za siliva Pa Cigiliki malizu aŵa olaŵila kuti “Denalius” otanthauza malipilo ŵa nsiku imo ku munthu wa ganyu. , nakupa ndalama izi ku ŵanthu wozingwa.” Nipo ŵanthu ŵala emukalipila mwanakazi wala.

6Koma Yesu elaŵila kuti, “Mulekeni mwanakazi uyu. Mumsawushilanji? Pakuti wacita cinthu ciweme ngako kwa newo. 7Ŵanthu wozingwa muli nawo nsita zonse. Tetyo, pamupangwa kuŵacitila va lusungu mungaŵacitile. Koma newo muzenkhalelini nane nsita zonse. 8Uyu wacita venzowamila kucita. Wazolekelatu muŵili wangu na mafuta onunkhila, kuti auŵamyiletu paukaliyoyikiwa mu manda. 9Nulaŵila vyendi kuti kulikonse kwatiakoŵilizyiwa Malizu Aweme aŵa calo conse, cawacita cukoŵilizyiwa, kuti ŵanthu akomukumbukila.”

Yudasi opangana na Akulu ŵa Ansembe votwala Yesu

(Mt 26:14-16; Lk 22:3-6)

10Pa vuli pake, Yudasi Isikaliyoti, yumo mwa asambili kumi na aŵili, eluta kwa Akulu ŵa Ansembe kuti akamutwale Yesu kwa ŵeve. 11Akulu ŵa Ansembe pecimvwa ivi ekondwela ngako nipo emulayizya kuti azemupe ndalama. Tetyo, yeve etatika kusakila mpata wakuti amutwalilemo kwa ŵeve.

Yesu ocita cisangalalo ca Pasaka na asambili ŵake

(Mt 26:17-25; Lk 22:7-14; Yh 13:21-30)

12Pa nsiku yotatika ya cisangalalo ca mkate uliye cofufumishila, ŵanthu penzopaya ŵana ŵa mbelele ocitila cisangalalo ca Pasaka, asambili ŵa Yesu ecizomukonsha kuti, “Kansi tikakuwamyileni kuni malo olyelako cisangalalo ca Pasaka?”

13Yesu etuma asambili aŵili, noŵawuzya kuti, “Nkhoyani mu mzinda. Mukakumane na mwanalume alutwike nongo ya manzi. Mukamukonkhe. 14Mu ngʼanda mwatiakaloŵe, mukamuwuzye mwine wa ngʼanda kuti, ‘Asambizyi okonsha kuti, cipinda ca alwendo cakuti Asambizyi azelyelemo cisangalalo ca Pasaka na asambili ŵake cili kuni?’ 15Yeve akakuwonesheni cipinda cikulu ca palulu, mwawamyiwa vonse vupangwika. Umo niye mwamutimukawamyile vakulya.”

16Asambili ŵala esiya Yesu noloŵa mu mzinda wala nipo efwana ngani mweciŵawuzyila Yesu. Nipo ewamya malyelelo ŵa Pasaka.

17Pekwifipa Yesu ewela na asambili ŵake ŵala kumi na aŵili. 18Wonse pecinkhala pansi notatika kulya, Yesu elaŵila kuti, “Nulaŵila vyendi kuti yumo wa mwewo wanikulya naye anitwale kwa alwani ŵangu.”

19Asambili ŵala ecimvwa citinthi, etatika kumukonsha kuti, “Kansi ni newo?”

20Yesu eŵayasuka kuti, “Ni yumo wa mwewo otoŵela nane mu mbale imo. 21Mwana wa Munthu akuyopayiwa kulingana na mwakulaŵilila Malembo pa va yeve. Koma ali na shamu munthu watiakatwale Mwana wa Munthu. Cenze ciweme kuti munthu woteti aliyovyalike.”

Cakulya cosilizya ca Asikulu

(Mt 26:26-30; Lk 22:15-20; 1Ak 11:23-25)

22Ŵeve penzokulya, Yesu etola mkate, notembezya Mulungu, nowusuna–suna, noyaŵila asambili ŵake, nipo elaŵila kuti, “Aneni; uyu ni muŵili wangu.”

23Nipo etola nthumo, notembezya Mulungu, noŵapa asambili ŵake, nipo wonse ecimwa.

24Nipo eŵawuzya kuti, “Uyu ni mlopa wangu wosimikizyila cipangano ca Mulungu, wotiliwila wonse. 25Nukuwuzyani vyendi kuti nizamwelini soti vinyu kufwikila pa nsiku yatinizamwe wa lomba mu Ufumu wa Mulungu.”

26Peciyimba nzimbo efuma nakuya ku Lupili ya Olivi.

Yesu olaŵililatu kuti Petulo azeamukane

(Mt 26:31-35; Lk 22:31-34; Yh 13:36-38)

27 Pa vuli pake Yesu eŵawuzya asambili ŵake kuti, “Mwewo monse muniwutuke nonisiya neka. Pala Malembo olaŵila kuti,

‘Nipaye ciŵeta,

kuti mbelele zikamwazyike.’

28Koma nikazowukishiwa, nizenikutagulileni ku Galileya.”

29Petulo elaŵila kuti, “Cukanga wonse awutuke nokusiyani, newo neka yayi.”

30Yesu emuwuzya kuti, “Nukuwuzya vyendi kuti lelo yamene na usiku wamene uno, kombwe akaliyolila ka ciŵili, unikane katatu kuti uniziŵalini.”

31Petulo elaŵila soti mosimikizyila kuti, “Cukanga nikafwile namwe pamo, nikakukanenilini!” Asambili ayakine wonse ŵala elaŵila cimozi–mozi.

Yesu olomba ku Gesemani

(Mt 26:36-46; Lk 22:39-46)

32Yesu na asambili wake eciya ku malo ayakine, oyitiwa Gesemani. Tetyo, eŵawuzya asambili ŵala kuti, “Mwewo nkhalani pano. Newo nikuyolomba.” 33Etola Petulo, Yakobe na Yohane. Yesu ekatiwa na citinthi novutika mu mtima. 34Eŵawuzya kuti, “Mu mtima mwangu muli citinthi cikulu ngako cakufwa naco. Nkhalani pano, nipo ŵani menso.”

35Eluta pa nthangu patontho, nolipoza pansi, notatika kulomba. Elaŵila kuti, “Keno ni cozomelezyewa nsita yoyofya ino inipitilile.” 36Elaŵila soti kuti, “Abba, Atata, mwewo mungacite ciliconse; munifumyilepo ceso ici ca matamano. Koma mucite camupangwa mwewo, osati canupangwa newo.”

37Peciwelela kwa asambili ŵala eŵafwana ali mtulo. Nipo, ekonsha Petulo kuti, “Simoni, kansi uli mtulo na wewo? Kansi wakangiwa kuŵa menso pa kansita katontho teti? 38Ŵani menso mwewo mwakulomba, kuti mungapone mu mayezyelo. Mtima upangwisisha, koma muŵili ni wovupa.”

39Efumapo soti na kuyolomba na malizu wala. 40Peciwelela soti, eŵafwana ali mtulo, cikomo vikope vawo venze vovupa na tulo. Tetyo, ŵeve esoŵa coyasuka.

41Peciwelela ka citatu, elaŵila kuti, “Kansi mukalilele nopumula? Kwasila. Koma lomba, nsita yala yafwika. Mwana wa Munthu otwaliwa ku ŵanthu wocimwa. 42Ukani, tiyeni takuya. Wala wonitwala wafwika.”

Yesu okatiwa

(Mt 26:47-56; Lk 22:47-53; Yh 18:2-12)

43Yesu akalulaŵila teti, nsita yamene iyo niye pecifwika Yudasi, yumo wa asambili wake kumi na aŵili wala. Ewela na winji wa ŵanthu alutakule vingwandali na nkholi. Efuma kwa Akulu ŵa Ansembe, Asambizyi ŵa Matetulo, na akulu ŵa mpingo.

44Lomba wala wakuzomutwala enze eŵapa ciziŵikilo cakuti “Watinikafyomfyone, niye watimukakate. Mukamukate nakuya naye, osamutaya.” 45Peciwela Yudasi, eyingofwikila pa Yesu, nolaŵila kuti, “Asambizyi!” Pecicita tetyo emumfyomfyona. 46Ŵala ŵanthu emukata Yesu nomumanga. 47Koma muyakine wa asambili esolola cingwandali notema nyanchito wa Mkulu wa Ansembe, mpaka nomutenda kwatu.

48Yesu eŵakonsha ŵala ŵanthu kuti, “Cikomo ni cinji mwacitonitolela vingwandali na nkholi, ngani kuti nine nyankapondo? 49Nsiku na nsiku nenze namwe mu ngʼanda ya Mulungu nosambizya, mwewo muliyowele kuti munikate? Koma ivi vucitika teti kuti vitweshele Malembo mwecinenela.” 50Pamene apo asambili ŵake ŵala wonse ewutuka nomusiya yeka.

51Mulumbwana muyakine enzokonkha Yesu, enze evwinikila nyula yeka, aliye covwala ciyakine. Ŵanthu ŵala epangwa kumukata. 52Koma yeve eyingoyikolopola nyula yala nowutuka cinthaku.

Yesu ku Kaupo Kakulu ka Ayuda

(Mt 26:57-68; Lk 22:54-55,63-71; Yh 18:13-14,19-24)

53Tetyo, ŵala ŵanthu eluta naye Yesu kwa Mkulu wa Ansembe. Kwamene kwala kwiwungana wonse Akulu ŵa Ansembe, Akulu ŵa Ayuda, na Asambizyi ŵa Matetulo. 54Petulo enzomukonkhelela Yesu patali, mpaka kunja kwa ngʼanda ya Mkulu wa Ansembe wala. Enkhala pansi pamo na amalonda enzoyota nawo mulilo.

55Akulu ŵa Ansembe ŵala na wonse ŵa mu Kaupo Kakulu ka Ayuda enzosakila umboni wonenela Yesu kuti amupaye, koma aliyowufwane. 56Ŵanthu anyinji enzomulaŵilila va wenye, umboni wawo uliyokatizyane.

57Ayakine epanama notatika kumulaŵilila va wenye. 58Elaŵila kuti, “Uyu munthu sewo timumvwa kulaŵila kuti, ‘Newo nizenipasule Ngʼanda iyi ya Mulungu, yomangiwa na ŵanthu tyala nipo pakayopita masiku atatu nizenimange iyakine yosamangiwa na ŵanthu.’” 59Koma cukanga ni tetyo volaŵila vawo venzelini vokatizyana.

60Mkulu wa Ansembe wonse epanama pa menso pawo, nomukonsha Yesu kuti, “Kansi uliye coyasuka? Ni vinji aŵa ŵanthu vakukulaŵilila?” 61Yesu eyingokuŵa celele, osayasuka kanthu.

Pamene apo Mkulu wa Ansembe wala emukonsha soti kuti, “Kansi ni wewo cendi Mesiya, Mpulumushi Wolayizyiwa, Mwana wa Mulungu ocinzikiwa?”

62Yesu eyasuka kuti, “Eee, ni newo. Nipo muzemuwone Mwana wa Munthu ali nkhezi ku kwanja kwendi kwa Mulungu wa mphamvu zonse. Muzemumuwone akuza mu mikumbi.”

63Tetyo, Mkulu wa Ansembe wala ekezula vovwala vake, na kuti, “Kansi tingapangwe soti umboni wotyani? 64Mwazimvwila mweka mitafu yake. Mulingilila tyani?”

Wonse elamula kuti owamila kupayiwa. 65Ayakine etatika kumutila mata, nomuvwinikila ku menso, nomunyata mbama, nolaŵila kuti, “Nenela, ni ŵani wakunyata?” Amalonda ŵala nawo etatika kumunyata.

Petulo okana Yesu

(Mt 26:69-75; Lk 22:56-62; Yh 18:15-18,25-27)

66Petulo enze pa luŵanza. Msimbi muyakine nyanchito wa Mkulu wa Ansembe efwika pamene apo. 67Peciwona Petulo oyota mulilo, emulolesha, nolaŵila kuti, “Na mwewo mwenze na Yesu wa ku Nazaleti.”

68Koma Petulo ekana kuti, “Vamene ivo newo nuviziŵalini, nipo nuzimvwishalini.” Kusonkha msonkho kwa Kayisala Nipo efuma nakuya ca ku mulyango. Pamene apo kombwe elila.

69Koma msimbi wala emuwona, nowuzyako enze pamene apo kuti, “Uyu naye enze mu umba imo.” 70Koma Petulo ekana soti.

Pepepita kansita, ŵanthu enze pamene apo emuwuzya Petulo kuti, “Ni cendi nawe soti niwe wa umba yamene yala. Kansi kwanu wewo ni ku Galileyalini?”

71Koma Petulo etatika kulishamika nolapa, “Numuziŵalini uyu munthu.”

72Nsita yamene iyo, kombwe elila ka ciŵili. Tetyo, Petulo ekumbuka malizu ŵala ŵa Yesu olaŵila kuti, “Kombwe akaliyolila ka ciŵili, unikane katatu kuti uniziŵalini.” Pamene apo Petulo etatika kulila.

Currently Selected:

Mako 14: GMN

Highlight

Copy