Mako 12

Linganizyo ya anyanchito olima mu munda wa mphesa

(Mt 21:33-46; Lk 20:9-19)

1Yesu etatika kulaŵila nawo mu malinganizyo. Elaŵila kuti, “Munthu muyakine ekomola mphesa mu munda mwake, nomanga mpanda kuzunguluka munda wake, ekumba nkhuti yowamyilamo mphesa, nomanga tala yopokela munda. Pa vuli pake wala munda ewuzyamikisha, yeve eciya pa ulwendo utali ku calo ciyakine. 2Nsita yowezya vitwalo peyifwika, wala munthu etuma nyanchito wake kwa ŵala ŵecizyamika munda, kuti akatoleko vitwalo va mu munda wala. 3Koma ŵala emukata nyanchito nomunyata, nomuwezya cimanja–manja. 4Munthu wala etuma soti nyanchito muyakine, koma ŵala ŵecizyamika munda emutema nomutamanisha. 5Koma wala munthu etuma soti nyanchito muyakine koma yeve niye wecingopayilatu. Ecita cimozi–mozi na anyanchito anyinji, ayakine eŵanyata noŵapayilatu.

6“Munthu wala esala na munthu yumo tyala, mwana wake wa pa mtima, wotemweka cendi. Niye kuti pa vuli pake atume mwana wake, elaŵila kuti, ‘Mwana wangu akamupe mcinzi.’

7“Koma ŵala ezyamika munda etatika kuwuzyana kuti, ‘Uyu niye watiakasiyile cuma. Tiyeni timupaye kuti cuma cizeciŵe casu.’ 8Tetyo, emukata, nomupaya nomutayila kunja kwa munda wa mphesa.

9“Kansi mwine wa munda wa mphesa akacite nawo vinji? Ni cendi azeaŵapaye ŵala ŵecizyamika munda, na munda wala akawuzyamike kwa ayakine. 10Muliyoŵelenge Malembo ŵala olaŵila kuti,

‘Mwala wecikana amisili omanga ngʼanda,

wayaluka mwala wa pa ngondya,

wopangwika ngako.

11 Leza niye ecita ivo,

nipo vetikanganisha ngako.’”

12Akulu ŵa Ayuda peciwona kuti linganizyo yenzolaŵila va ŵeve, epangwisha ngako kuti amukate, koma enzoyopa na umba ya ŵanthu. Tetyo, eyingomuleka nofumapo.

Kusonkha msonkho kwa Kayisala

(Mt 22:15-22; Lk 20:20-26)

13Ŵanthu ayakine ŵa mu cipani ca Afalisi, na ayakine ŵa mu cipani ca Helode, etumiwa kuti akatape Yesu mu kamwa. 14Pecifwika elaŵila kuti, “Asambizyi tuziŵa kuti mwewo mulaŵila vyendi nipo muyopalini munthu aliyense. Muloleshalini kuti uyu ni ŵani koma musambizya Matetulo ŵa Mulungu mu vyendi. Ngani lomba Matetulo ŵa Mulungu ozomezya kuti tiwosonkha msonkho kwa Kayisala mfumu ya ku Roma, keno yayi? 15Kansi tiwosonkha keno osasonkha?”

Koma Yesu poziŵa kuti malingililo ŵawo ni ŵa wenye, elaŵila kuti, “Cikomo ni cinji muniyesela lona? Nipeni ndalama niyiwone.” 16Ŵeve emupa ndalama. Lomba yeve aŵakonsha kuti, “Kansi cinso cili apa ni ca ŵani? Nga zina ni ya ŵani?”

Ŵeve elaŵila kuti, “Vonse ni va Kayisala, mfumu ikulu ya ku Roma.”

17Pamene apo Yesu eŵawuzya kuti, “Tetyo, mutwale ku mfumu va ufumu wake, na kwa Mulungu va Umulungu wake.”

Pecimvwa tetyo ŵala ŵanthu esila nzelu.

Konsho pa zowuka kwa akufwa

(Mt 23:33; Lk 20:27-40)

18Pa vuli pake, ŵanthu ayakine ŵa mu cipani ca Asaduki ayakine ewela kwa Yesu. Ŵeve olaŵila kuti akufwa akawukelini. Emukonsha elaŵila kuti, 19 “Asambizyi, Mose etilembela tetulo yakuti, ‘Keno munthu wamwalila, nosiya mkazi wake, koma aliye ŵana, mkwawo wa uyo wamwalila aloŵe cokolo, kuti amuvyalilemo ŵana mkwawo.’ 20Tetyo, penze ŵanthu asanu na aŵili pokŵaŵo. Wotatika elungula mwanakazi wala, yeve nomwalila aliye mwana. 21Wa ciŵili emulungula wala mwanakazi naye emwalila osasiyamo mwana. Wa citatu naye ecita cimozi–mozi. 22Kufwikila asanu na aŵili emwalila osasiyamo mwana. Posilizyila mwanakazi wala emwalila. 23Lomba pa nsiku yakuzowuka kwa akufwa, mwine wa mwanakazi azeaŵe ŵani? Powona kuti enekwawo wonse asanu na aŵili ŵala emulungulapo.”

24Yesu eŵayasuka kuti, “Niye pamupumvya, cikomo cosaziŵa Malembo na mphamvu ya Mulungu? 25Pakuti powuka kwa akufwa kukaŵeve kulungula keno kulunguliwa, akaŵe ngani angelo Kululu. 26 Tetyo, vakuti ŵanthu azeawuke kwa akufwa kansi muliyoŵelenge mu buku ya Mose, pala pakulaŵila va kamuti koyaka? Ni palalini Mulungu pecimuwuzya Mose kuti ‘Newo nine Mulungu wa Abulahamu nine Mulungu wa Isaki, nine Mulungu wa Yakobo?’ 27Niye kuti ni Mulungulini wa ŵanthu akufwa koma wa ŵanthu ŵa moyo. Mwewo nimwe opumvyika ngako.”

Tetulo ikulu

(Mt 22:34-40; Lk 10:25-28)

28Msambizyi muyakine wa Matetulo eŵamvwa kuti osushana. Peciwona kuti Yesu eŵayasuka luweme Asaduki ŵala, ewela pafupi, nomukonsha kuti, “Kansi pa Matetulo wonse aŵa ikulu ni yotyani?”

29Yesu emuyasuka elaŵila kuti, “Tetulo ikulu ni iyi, ‘Mvwani mwewo Aisilayeli, Leza, Mulungu wasu, yeve yeka niye Mulungu. 30 Tetyo, uwotemwa Leza, Mulungu wako, na mtima wako wonse, na moyo wako wonse, na nzelu zako zonse, na mphamvu zako zonse.’ 31 Nipo tetulo ya ciŵili ni iyi, ‘Uwotemwa muyako ngani mwaulitemwela wemwine.’ Paliye tetulo ikulu iyakine yopula Matetulo ŵamene aŵa.”

32Msambizyi wa Matetulo wala elaŵila kuti, “Yayi Asambizyi, mwayasuka luweme. Ngani mwamwalaŵilila ni vyendi kuti Mulungu ni yumo, nipo paliye muyakine koma yeve yeka. 33Mwalaŵila luweme kuti cinthu copulamo nikumutemwa Mulungu na mtima wonse, na mphamvu zonse, soti kutemwa muyako ngani mwaulitemwela wemwine. Kucita tetyo kupula kutwala nsembe zoshoka keno nsembe ziyakine zonse.”

34Yesu ewona kuti wala munthu wayasuka mwa nzelu. Tetyo, emuwuzya kuti, “Wewo ulilini kutali na Ufumu wa Mulungu.” Kutatikila pamene apo penzeve muyakine eyezya kumukonsha kanthu kalikonse.

Mesiya ni mwana wa ŵani?

(Mt 22:41-46; Lk 20:41-44)

35Yesu penzosambizya ŵanthu mu Ngʼanda ya Mulungu, eŵakonsha kuti, “Kansi ni cinji Asambizyi ŵa Matetulo olaŵila kuti Mpulumushi Wolayizyiwa ni mwana wa Davide? 36 Pala Davide, na nzelu zofuma ku Mzimu Mtuŵa, elaŵila kuti,

‘Leza ewuzya Asikulu kuti,

“Nkhala ku kwanja kwangu kwendi,

mpaka nikayalushe alwani ŵako

kuti aŵe ngani cokandapo mendo ŵako.”’

37Davide mwine olaŵila Mpulumushi Wolayizyiwa wala kuti ni Asikulu ŵake. Lomba angaŵe tyani soti mwana wake?”

Yesu ocenjezya ŵanthu va Asambizyi ŵa Matetulo

(Mt 23:1-36; Lk 20:45-47)

Ŵanthu anyinji ŵala ekondwela ngako pakumvwa malizu ŵake. 38Yesu penzoŵasambizya elaŵila kuti, “Ŵani menso nawo Asambizyi ŵa Matetulo. Otemwa kuyenda–yenda aluvwale mikhanjo itali, kuti ŵanthu okoŵapokelela mwa mcinzi pa misika. 39Otemwa mipando ya mcinzi ngako mu kacisi wa Ayuda, na mu malo mwa mcinzi pa malyelelo. 40Soti oŵalyela cuma cawo anyankufwilwa nolombela malombelo atali–atali mwa wenye. Ŵanthu woteti akalangiwe ngako.”

Cotwala ca nyankufwilwa

(Lk 21:1-4)

41Nsiku iyakine Yesu enkhala pansi mololesha thumba ya zotwala ku Ngʼanda ya Mulungu, kulolesha ŵanthu mwenzopozelamo ndalama zawo zinyinji. 42Koma pecifwika nyankufwilwa muyakine wozingwa eyingopozamo tundalama tuŵili.

43Tetyo, Yesu eyita asambili ŵake noŵawuzya kuti, “Nukuwuzyani vyendi kuti nyankufwilwa wozingwa, wapozamo kupula ŵanthu wonse aŵa ayakine ayikamo mu thumba umu. 44Cikomo aŵa ayingoyikamo vatapamo mu vinyinji va ali navo. Koma mwanakazi uyu mukuzingwa kwake wapozamo zonse zenze nazo, zakuti angasitile cakulya.”

Currently Selected:

Mako 12: GMN

Highlight

Copy