Luka 7

Mkulu wa asilikali wa Ciroma

(Mt 8:5-13; Yh 4:43-54)

1Yesu pecisilizya kulaŵila vonse ivi ku ŵanthu ŵala eluta ku Kapilinamu. 2Penze sentuliyo, mkulu wa asilikali wa Ciroma, enze na nyanchito wenzotemwa ngako. Nyanchito wala enzolwala, nipo enze pafupi nakufwa. 3Mkulu wala pecimvwa va Yesu, etuma akulu ŵa yakine ŵa Ayuda kwa yeve kuyomusenga kuti azeapozye nyanchito wake wala. 4Pecifwika kwa Yesu, emusenga mwa mphamvu nomuwuzya kuti, “Wamene uyu ni wowamila kuti mumucitile voteti, 5cikomo owutemwa mtundu wasu, mwakuti etimangila kacisi yasu.” 6Tetyo, Yesu eluta nawo.

Yeve pecifwika kufupi na ngʼanda yake mkulu wa asilikali wala etuma ayake kwa Yesu kuyomuwuzya kuti, “Asikulu, musatamane pakuti nililini wowamila kuti mwewo muloŵe mu ngʼanda mwangu. 7Ni cikomo cake nuwamilalini soti kuwela kwanu. Koma muyingolaŵila tyala malizu ŵeka kuti nyanchito wangu apole. 8Newo nane nine munthu woyikiwa pansi pa ulamulilo. Koma soti nili na asilikali ŵanulamulila. Nikuti nikawuzya muyakine kuti, ‘Nkhoya,’ akuya cendi. Nikawuzya soti muyakine kuti, ‘Wela,’ owela cendi. Nipo nikawuzya nyanchito wangu kuti, ‘Cita cakuti,’ ocicita cendi.”

9Yesu pecimvwa ivi, ekanganishiwa naye. Ecewuka nowuzya umba ya ŵanthu ŵala yenzomukonkha kuti, “Ni cendi, cukanga pakati pa Aisilayeli niliyofwane cicetekelo coteti.” 10Nthumi yala yewelela ku ngʼanda, nofwana nyanchito wapola.

Yesu owusha mwana ku Nayini

11Pa vuli pake Yesu eluta ku munzi uyakine, zina yake Nayini. Asambili ŵake pamo na ŵanthu ayakine anyinji ekonkhana naye. 12Yesu pecifwika pafupi poloŵela mu munzi wala, ekumana na ŵanthu alutakule malilo ŵa mwana mwanalume wa nyankufwilwa. Mwana wake enze yeve yeka. Ŵanthu anyinji ŵa mu munzi mwala enze naye. 13Asikulu pecimuwona, ecimvwa lusungu, emuwuzya kuti, “Osalila.”

14Tetyo, efwika pafupi nokumya citanda cala, ŵanthu etakula malilo ŵala epanama, nipo Yesu elaŵila kuti, “Wewo mulumbwana, nukuwuzya kuti, ‘Uka.’” 15Pamene apo wala wakufwa enkhazikika notatika kulaŵila. Yesu emutwala kwa anyina.

16Ŵanthu wonse ecita wowa, notatika kutembezya Mulungu. Elaŵila kuti, “Mneneli mkulu wawoneka pakati pasu.” Elaŵila soti kuti, “Mulungu wazoyavya ŵanthu ŵake.” 17Mu calo conse ca Yudeya, na ku citwa conse cozungulila, ŵanthu enzolaŵila va nkhani iyi.

Yohane Mbatizi otuma asambili ŵake kwa Yesu

(Mt 11:2-19)

18-19Asambili ŵa Yohane emuwuzya vonse Yohane. Tetyo, yeve eyita asambili ayakine aŵili, noŵatuma kwa Asikulu kuyoŵakonsha kuti, “Kansi ni mwewo mukuza, keno tilindile muyakine?”

20Ŵeve pecifwika kwa Yesu, emuwuzya kuti, “Yohane Mbatizi watituma kwanu kuti tizetikukonsheni kuti, ‘Kansi mwewo nimwe wala wakuti akawele, keno tilindile muyakine?’”

21Nsita iyo Yesu enzopozya malwele wosiyana–siyana wa ŵanthu anyinji. Enzofumya viŵanda, nopanga ŵanthu anyinji wosawona kuwona. 22Nipo yeve eyasuka kuti, “Nkhoyani mukawuzye Yohane vamwawona na vamwamvwa. Mphofu zuwona, olemala oyenda, ŵa mambombo osukiwa, asimvwa akumvwa, akufwa owukishiwa, nipo osauka akumvwa Malizu Aweme. 23Ni woshukishiwa munthu asataya cicetekelo cikomo ca newo.”

24Atumiki ŵa Yohane ŵala pecifumapo, Yesu etatika kukonsha winji wa ŵanthu va Yohane kuti, “Kansi pemwiluta ku cipululu, mweciyowona vinji? Tete yosungʼuzyika na mphepo kansi? 25Nga mwenze kuti mukuyowona vinji? Munthu wovwala vovwala vofewa kansi? Yayi, ŵanthu wovwala vakaso na otemwa malyelelo onkhala mu ngʼanda za mafumu. 26Laŵililantoni, mwelaŵila kuti mukuyowona vinji? Mneneli kansi? Ni vyendi, nulaŵilisha kuti mweciyowona wopula mneneli. 27 Wamene uyu niye wala Malembo olaŵila va yeve kuti,

‘Nutuma mtumiki wangu,

numutuma pa nthangu pako,

kuti akawamyiletu njila yakuzopitilamo wewo.’

28Nukuwuzya kuti mwa ŵanthu wonse evyalika pano pansi, paliye cukanga yumo wopula Yohane. Koma cukanga wamene ali mtontho ngako mu Ufumu wa Mulungu omupula.”

(29Pecimvwa malizu ŵa Yohane, ŵanthu wonse na wosonkhesha msonkho, ezomela kuti Mulungu ni wolungama. Tetyo, ebatiziwa na Yohane. 30Koma Afalisi na Asambizyi ŵa Matetulo, pokana kubatiziwa na yeve ekana ŵeka vamene Mulungu epangwa kuŵacitila.)

31Yesu epitilizya kulaŵila, “Kaya ŵanthu ŵa luko ino ningaŵalinganizye na cinji? Ali ngani ni cinji? 32Ali ngani ŵana wokangana pa msika, noyitana na ayawo ku ayakine okonsha ayawo kuti,

‘Tikulizyilani ngʼoma ya ukwati,

ni cikomo canji mwewo muliyovine?

Tiyimba nzimbo za malilo,

ni cikomo canji mwewo muliyolile?’

33“Pala Yohane Mbatizi peciwela, enzolilesha kulya nipo enzokumwalini vinyu. Mwewo mukuti, ‘Ekatiwa na ciŵanda.’ 34Mwana wa Munthu wawela, akulya na kumwa nipo mukuti, ‘Muwoneni, uyu munthu ni walyela cakolwa, nipo ni muyawo wa ŵanthu wosonkhesha msonkho na wosasamala Matetulo.’ 35Koma nzelu ya Mulungu yuwama pakapita nsita.”

Mwanakazi wocimwa ozoza mendo ŵa Yesu

36Muyakine wa mu cipani ca Afalisi eyita Yesu kuti akalye kwawo. Yesu eluta noloŵa mu ngʼanda ya Mfalisi wala noyayamila polyela#7:36 noyayamila polyela Mwambo wa Ayuda onkhalalini pakulya, koma enzoyayamila polyela noyika kwanja ya manzyele pansi, noseŵenzesha kwanja kwendi kulyela.. 37Mwala mu munzi mwenze mwanakazi wocimwa. Yeve ecimvwa kuti Yesu akulya mu ngʼanda ya Mfalisi wala, ewela na nsupa ya mafuta onunkhila. 38Eciyofukama ku vuli kwa mendo ŵa Yesu olila, notatika kuponesha misozi pa mendo ŵa Yesu, nopitilizya kuŵapukuta na sisi yake. Soti enzomfyomfyona mendo ŵake, noŵazoza na mafuta ŵala.

39Koma Mfalisi wala eyita Yesu peciwona ivi, etatika kulingilila kuti, “Uyu munthu kuti enze mneneli cendi, sembe wamziŵa mwanakazi uyu omukumya kuti ni wocimwa.”

40Apo Yesu elaŵila kuti, “Simoni, nupangwa kukuwuzya cinthu.”

Yeve elaŵila kuti, “Asambizyi, laŵilani.”

41Yesu elaŵila kuti, “Kwenze ŵanthu aŵili ekongola ndalama ku munthu okongolesha. Muyakine ekongola ndalama makumi asanu, muyakine ndalama zisanu#7:41 ndalama makumi asanu… ndalama zisanu Mu Cigiliki olaŵila kuti, “Madenalius makumi kumi asanu (500)… madenalius makumi asanu (50).” (Denalius ni malipilo ŵa nsiku imo ku munthu wa ganyu.). 42Pakuti enzeve cowezyela, eŵalekelela nkhongole wonse aŵili. Lomba wewo ulingilila kuti pa aŵa aŵili ni ŵani angatemwe ngako wokongolesha uyu?”

43Simoni elaŵila kuti, “Nuyesa kuti welekelelewa vinyinji.”

Yesu emuwuzya kuti “Wayasuka luweme.”

44Pecitetyo, Yesu ecewukila ku mwanakazi wala, nowuzya Simoni kuti, “Umuwona mwanakazi uyu? Newo naloŵa mu ngʼanda mwako muno, wewo uliyonipe manzi wosukila mendo ŵangu. Koma yeve waŵa otila misozi pa mendo ŵangu, noŵapukuta na sisi yake. 45Wewo uliyonipe moni nonimfyomfyona, koma yeve mwanaloŵela, wankhala omfyomfyona mendo ŵangu osalekezya. 46Wewo uliyonizoleke ku mutu kwangu na mafuta masiku wonse, koma yeve wazoleka mendo ŵangu na mafuta ŵa mtengo ngako na onunkhila. 47Kulaŵila vyendi, cinthemwa cikulu cawawonesha yeve, cusimikizya kuti Mulungu wamulekelela macimo ŵake anyinji. Koma munthu walekelelewa patontho otemwa patontho.”

48Tetyo, Yesu ewuzya mwanakazi wala kuti “Macimo ŵako alekelelewa.”

49Ŵala ŵenzokulya nawo etatika kulikonsha mu mitima mwawo kuti, “Kansi ni ŵani uyu olekelela macimo woteti?”

50Koma Yesu ewuzya mwanakazi wala kuti, “Cicetekelo cako cakupulumusha. Nkhoya na mtendele.”

Currently Selected:

Luka 7: GMN

Highlight

Copy