Luka 8

Anakazi opelekezya Yesu

1Pa vuli pake eluta noyendela mizinda na minzi oŵilizya Malizu Aweme ŵa Ufumu wa Mulungu. Asambili ŵake ŵala kumi na aŵili enze naye. 2Penze anakazi ayakine Yesu ŵecifumya viŵanda noŵapozya matenda ayakine. Anakazi awo ni aŵa: Maliya, woyitiwa Magadalena, (mwa yeve mwifuma viŵanda visanu na viŵili); 3Yohana, mkazi wa Kuza, kapitawo wa Helode; Susana; soti na anakazi ayakine anyinji na ndalama zawo enzoyavya Yesu na asambili ŵake.

Linganizyo ya womwazya mbuto

(Mt 13:1-9; Mk 4:1-9)

4Ŵanthu anyinji ofumila ku minzi yonse ewungana kwamene kwenze Yesu. Tetyo, yeve eŵawuzya linganizyo, elaŵila kuti, 5“Munthu muyakine eluta kuyomwazya mbuto. Penzomwazya tetyo, mbuto ziyakine ziponela mu njila. Zikandiwa, nipo tunyoni twicilya. 6Mbuto ziyakine ziponela pa mwala, zimela, nofota, cikomo cosoŵa munyontho. 7Mbuto ziyakine ziponela pa minga, ikula noceneka tumbuto twala. 8Koma mbuto ziyakine ziponela pa nthaka iweme. Zikula notwala ngako. Ngala iliyonse yenze na nsele makumi kumi.”

Tetyo, Yesu eŵilikizya kuti, “Ali na matu, amvwishishe!”

Colinga ca malinganizyo

(Mt 13:10-17; Mk 4:10-12)

9Asambili ŵa Yesu emukonsha va tanthauzo ya linganizyo yala. 10 Tetyo, yeve elaŵila kuti, “Mwewo Mulungu ekuwululilani vofisika vokumya Ufumu wake. Koma ayakine aŵa omvwila mu myambi tyala,

‘Kuti tetyo aloleshe, koma osawona,

nipo amvwe, koma asamvwishe.’”

Tanthauzo ya linganizyo ya womwazya mbuto

(Mt 13:18-23; Mk 4:13-20)

11“Tanthauzo ya linganizyo iyi, ni iyi: Mbuto zala ni Malizu ŵa Mulungu. 12Mbuto zoponela mu njila zala zutanthauza ŵanthu akumvwa Malizu ŵa Mulungu. Koma Satana owela, nofumya malizu ŵala mu mitima mwawo, kuyopa kuti angacetekele nopulumuka. 13Mbuto zoponela pa mwala ni zala zutanthauza ŵanthu akumvwa Malizu ŵa Mulungu, noŵapokela na cimwemwe. Lomba pakuti aliye mizyu yozama, oyingocetekela pa nsita itontho tyala, mwakuti pa nsita yoyesewa, oleka kucetekela. 14Mbuto zoponela pa minga zala zutanthauza ŵanthu akumvwa Malizu ŵa Mulungu, koma pa vuli pake nkhawa, cuma, nipo votemwesha va moyo uno vuŵalekesha, nipo votwala vawo vutangʼalini. 15Koma mbuto ziponela pa nthaka iweme zala zutanthauza ŵanthu akumvwa Malizu ŵa Mulungu, noŵasunga mu mtima wa vyendi na uweme, nipo okoselela notwala votwala.”

Nyale yovwinikila na nongo

(Mk 4:21-25)

16Paliye munthu oyasha nyale noyivwinikila na nongo keno kuyifisa yayi. Koma oyiyika pa malo powonekela, ŵanthu oloŵa mu ngʼanda awone kuŵala kwake. 17Pala cinthu ciliconse cofisika cizeciwululike, nipo va cisinsi vizeviziŵike nowonekela patuŵa.

18“Ni cikomo cake muwosamala mwamumvwila malizu. Pakuti wala ali na vinthu, akamupelepo viyakine, koma wala aliye kalikonse, akamupoke na katontho kakulingilila kuti ali nako.”

Anyina na enekwawo ŵa Yesu

(Mt 12:46-50; Mk 3:31-35)

19Anyina na enekwawo ewela kwa Yesu, koma cikomo ca winji wa ŵanthu, ekangiwa kufwika peenze yeve. 20Tetyo, munthu muyakine ewuzya Yesu kuti, “Anyina wanu na enekwanu ali panja apa, opangwa kukuwonani.”

21Koma Yesu elaŵila kuti, “Newo amama na enekwasu ni ŵanthu akumvwa Malizu ŵa Mulungu, nocita vakulaŵila malizu.”

Yesu osilizya cinkhuka

(Mt 8:23-27)

22Nsiku iyakine Yesu eloŵa mu wato pamo na asambili ŵake. Eŵawuzya kuti, “Tiyeni titawukile, ku silya iyakine ya cimmana.” Nipo eyima cendi. 23Penzotauka Yesu elala tulo. Nipo kwitatika cinkhuka pa cimmana, mpaka wato wala witatika kuzula na manzi ŵeve enze mu matamano.

24Pamene apo asambili ŵala ewela kwa Yesu nomuwusha, elaŵila kuti, “Asikulu, Asikulu, tumbila!”

Yeve ewuka, nocimula mphepo iyo na matambazi ŵa mphamvu. Vileka cendi nipo penkhala celele. 25Tetyo, Yesu eŵakonsha kuti, “Kansi cicetekelo canu cili kuni?”

Koma ŵeve ekatiwa na wowa nokanganishiwa, nokonshana kuti, “Kansi wamene uyu ni munthu wotyani? Wakuti oyingolamulila mphepo na manzi vumvwila cendi.”

Yesu opozya munthu wokatiwa na ciŵanda

(Mt 8:28-34; Mk 5:1-20)

26Ŵeve efwika ku citwa ca Agelegesa, cenzololeshana na Galileya. 27Yesu pecifwika pa silya, munthu muyakine ofumila kwamene uko, ecizokumana naye. Munthu wala enze na ciŵanda, nipo kutatikila macezo enzovwalalini zovwala. Enzonkhalalini mu ngʼanda, koma ku vipilala. 28Peciwona Yesu, eŵilikizya nozipoza pa mendo pake, nipo eŵilikizya kuti, “Kansi nakuyifyilani cinji mwewo Yesu, Mwana wa Mulungu wa Kululu? Nukusengani musanisaushe.” 29Ecita tetyo cikomo Yesu elamula ciŵanda kuti cifume mwa munthu wala. (Niye kanyinji–kanyinji cikamukata, ŵanthu enzomumanga manja na maunyolo, nomumanga soti mendo na zisulo kuti amukate luweme. Koma yeve enzofwaya vomangila vala, nipo ciŵanda cala cenzomutwala ku cipululu.)

30Tetyo, Yesu emukonsha munthu wala kuti, “Zina yako niwe ŵani?”

Yeve eyasuka kuti, “Zina yangu nine Ciwumba#8:30 Ciwumba Pa Cigiliki malizu aŵa olaŵila kuti “Legion” otanthauza kuti winji wa asilikali myanda isano na umo (6,000). .” Cikomo viŵanda venzemo vinyinji. 31Viŵanda vala vesenga Yesu kuti, asavilamule kuti vikaloŵe mu cisengu ca pa nyansi ngako.

32Pafupi pamene apo penzokulya umba ya nkhumba mu nyansi mwa lupili. Tetyo, viŵanda vesenga Yesu kuti avizomezye viloŵe mu nkhumba zala. Yesu evizomezya. 33Viŵanda vala vifuma, nakuyoloŵa mu nkhumba zala. Pamene apo umba yonse yala yeguduka noselukila msenga wala mowutuka, nolipoza mu cimmana mpaka kufwa mu manzi.

34Enzoŵetela nkhumba zala peciwona ivi, ewutuka, nakuyowuzya ŵanthu ŵa mu munzi na minda. 35Ŵanthu ŵala efuma kuti akawone vicitika. Pecifwika kwenze Yesu, efwana munthu wecifumyamo viŵanda wala, ali nkhezi pansi ku mendo ŵa Yesu, pecivwala, kusiluka kwala kwisila. Ŵanthu ŵala ekatiwa na wowa. 36Ayawo ewona vonse vucitika eŵawuzya mwecimpozyela wala munthu wa viŵanda. 37Tetyo, ŵanthu wonse ŵa ku malo ozungulila Gelegesa emusenga Yesu kuti afumeko kwamene kwala, cikomo ŵeve enze na wowa ngako. Tetyo, Yesu eloŵa mu wato, nowelela ku silya.

38Munthu wala wecifumya viŵanda esenga Yesu kuti alute naye. Koma Yesu emuzyosha nomuwuzya kuti, 39“Yayi, wewo welela kwanu, ukaŵakonkhololele vikulu vawakucitila Mulungu.” Munthu wala ewelela cendi kwawo na kuyowonesha mu minzi monse vikulu vecimucitila Yesu.

Yesu opozya mwana wa Yailo na mwanakazi muyakine

(Mt 9:18-26; Mk 5:21-43)

40Yesu pecifwika ku silya, ŵanthu anyinji emucinguzyila, pakuti wonse enzomulindila. 41Nipo kwiwela munthu muyakine, zina yake Yailo, enze yumo wa akulu ŵa mpingo, yeve eliponesha pa mendo ŵa Yesu, notatika kumdandaulila kuti alute ku ngʼanda yake, 42cikomo mwana wake mwanakazi enze pafupi kufwa. Enze na vyaka kumi na viŵili, nipo mwana enze wamene uyo.

Yesu penzokuya kwala, ŵanthu ŵala enzompatikizya. 43Penze mwanakazi muyakine eciŵa ovutika na matenda ŵa mlopa#8:43 matenda ŵa mlopa Mwanakazi wa matenda aŵa enzozomelezyewalini nawo kuya ku Ngʼanda ya Mulungu na kacisi ya Ayuda keno kuŵa na ŵanthu. vyaka kumi na viŵili. [Etaya cuma cake conse kulipila ngʼanga,] koma penzeve cukanga yumo womupozya. 44Yeve efwika ca ku vuli kwa Yesu, nokumya msono wa covwala cake, nipo nsita yamene iyo ulwele wa mlopa weleka.

45Pamene apo Yesu ekonsha kuti, “Ni ŵani wanikumya?”

Wonse elaŵila kuti, “Kaya.”

Petulo elaŵila kuti, “Asambizyi, ŵanthu wonse aŵa okuzungulilani nipo okupatikizyani.”

46Koma Yesu elaŵila kuti, “Yayi, muyakine wanikumya cendi. Naziŵa kuti mphamvu ziyakine zafuma mwa newo.”

47Mwanakazi wala peciwona kuti angalifiselini soti, ewela motutumila nolipoza pa mendo pa Yesu. Elaŵila pa menso pa ŵanthu wonse ŵala cikomo cecikumyila Yesu, nipo soti mwamene mwecicilila nsita yamene iyo. 48Apo Yesu emuwuzya kuti, “Wewo mwana wangu, cicetekelo cako cakupozya. Nkhoya mu mtendele.”

49Yesu akalulaŵila kwiwela munthu muyakine kufumila ku ngʼanda kwa mkulu wa mpingo wala. Emuwuzya mkulu wala kuti, “Mwana wala wasilizyika. Osaŵavuta soti Asambizyi.”

50Yesu pecimvwa malizu ŵala ewuzya Yailo kuti, “Osayopa yayi. Mwewo muyingocetekela, mwana wala aŵe luweme.”

51Yesu pecifwika ku ngʼanda kwala, aliyozomelezye kuti aloŵe naye koma Petulo, Yohane na Yakobe, nipo awisi ŵa mwana wala na anyina ŵake. 52Ŵanthu wonse enzolila nomimila, koma Yesu elaŵila kuti, “Musalile mwana uyu aliyowufwe ali tyala mtulo.”

53Pamene apo ŵanthu etatika kumuseka nomunyamvula, pakuti eziŵa kuti mwana wala wamwalila kale. 54Yesu ekata mwana wala pa kwanja noŵilikizya kuti, “Mwanawe uka!” 55Pamene apo, moyo wake wiwelelamo, yeve ewuka. Nipo Yesu eŵawuzya kuti amupe cakulya msimbi wala. 56Avyazi ŵake ekanganishiwa ngako, koma Yesu eŵawuzya kuti kosati awuzye aliyense vacitika.

Currently Selected:

Luka 8: GMN

Highlight

Copy