Luka 6

Yesu okonshewa va nsiku ya Sabata

(Mt 12:1-8; Mk 2:23-28)

1Nsiku iyakine pa Sabata ya Ayuda, Yesu enzopita mu munda wa tiligu. Asambili ŵake enzotyolako ngala–ngala za tiligu nofikisa na manja, nakulya. 2Tetyo, Afalisi ayakine ekonsha kuti, “Cikomo ni cinji mucita cosazomelezyewa pa Sabata?”

3Yesu elaŵila kuti, “Kansi muliyoŵelenge cecicita Davide, pecimvwa njala, yeve na ayake? 4Eloŵa mu Ngʼanda ya Mulungu notola nakulya mkate wotwaliwa kwa Mulungu. Kulingana na Matetulo, ni ansembe ŵeka ozomelezyewa kulya mkate wala, koma Davide ecilya nopako ayake.” 5Tetyo, eŵawuzya kuti, “Mwana wa Munthu ni Asikulu ali na ulamulilo pa va nsiku ya Sabata.”

Yesu opozya munthu wolemala kwanja

(Mt 12:9-14; Mk 3:1-6)

6Pa nsiku iyakine ya Sabata Yesu eloŵa mu kacisi wa Ayuda notatika kusambizya. Mwamene umo mwenze munthu muyakine wolemala kwanja kwendi. 7Asambizyi ŵa Matetulo na Afalisi enzopangwa cikomo comuyopezyela, tetyo enzomulolesha kuti awone keno apozye munthu pa nsiku ya Sabata. 8Koma Yesu eziŵa malingililo ŵawo, nipo ewuzya wala munthu wolemala kwanja kuti, “Wela kuno, uzeupaname pakati.” Yeve eyima nopanama pakati.

9Lomba Yesu ewuzya ŵanthu ŵala kuti, “Kansi ni cozomelezyewa pa Sabata kucita ciweme keno ciyipa, kupulumusha moyo keno kuwuceneka?” 10Eŵalolesha wonse ŵala, nipo ewuzya wala munthu kuti, “Tambulula kwanja yako.” Eyitambulula kwanja yake nipo yenkhala soti luweme. 11Koma ŵala ŵanthu etinkha ngako, notatika kulaŵizyana vatiacite naye Yesu.

Yesu osalula nthumi kumi na ziŵili

(Mt 10:1-4; Mk 3:13-19)

12Masiku ŵala Yesu eluta ku lupili kuyolomba, nipo ecezela usiku wonse kulomba kwa Mulungu. 13Pekwecica eyita asambili ŵake, nosalulapo kumi na aŵili. Eŵayita “nthumi.” 14Ŵanthu ŵake enze aŵa: Simoni weciteya kuti Petulo na mkwawo Andeleya; Yakobe na Yohane; Filipo na Batulumeyo; 15Mateyo na Thomasi; Yakobe mwana wa Alifeyo, na Simoni wa mu cipani ca Zelote; 16Yudasi mwana wa Yakobe na Yudasi Isikaliyoti, ecizomutwala kwa alwani ŵake.

Yesu osambizya nopozya olwala

(Mt 4:23-25)

17Yesu pamo na nthumi zake peciseluka lupili, epanama mu mshambo. Penze umba ikulu ya asambili ŵake na ŵanthu ayakine anyinji wofuma ku citwa conse ca Yudeya na ku Yelusalemu, na ku Tilo na ku Sidoni ku citwa ca ku cimmana. 18Ŵeve ewela kuzokumvwa malizu ŵake, nipo soti kuti yeve aŵapozye. Na ŵanthu enze na viŵanda nawo soti enzopola. 19Ŵanthu wonse awo enzopangwa kumkumya, cikomo ca mphamvu zenzofuma mwa yeve noŵapozya wonse.

Ŵanthu oshukishiwa na ŵanthu anashamu

(Mt 5:1-12)

20Yesu elolesha asambili wake, noŵawuzya kuti,

“Nimwe woshukishiwa, mwewo osauka,

cikomo cakuti Ufumu wa Mulungu ni wanu.

21Nimwe woshukishiwa, mwewo mukumvwa njala lomba

cikomo muzemukute.

Nimwe woshukishiwa, mwewo mulila lomba

cikomo muzemusangalale.

22Nimwe woshukishiwa mwewo ŵanthu keno otinkhana namwe,

keno okusalulani nokucitilani msikila,

nipo keno woyifya zina yanu cikomo ca Mwana wa Munthu.

23Vikayocitika tetyo sangalalani novina na cisangalalo,

cikomo cilambu canu ni cikulu Kululu,

pakuti ni voteti soti makolo ŵawo venzoŵacitila aneneli macezo.

24“Koma muli na shamu, mwewo ŵanthu wolemela,

cikomo mwapokelelatu vomutemweshani.

25Muli na shamu, mwewo mukuta lomba,

cikomo muzamvwe njala.

Muli na shamu, mwewo musangalala lomba

cikomo muzamvwe citinthi nipo muzelile.

26Muli na shamu keno ŵanthu wonse akokutembezyani,

pakuti makolo ŵawo enzocitila aneneli ŵa wenye kale voteti.”

Muwotemwa alwani ŵanu

(Mt 5:38-48; 7:12)

27“Koma mwewo mukumvwa malizu wangu, nukuwuzyani kuti: Mukotemwa alwani ŵanu, mukoŵacitila viweme omutinkhani. 28Mukoŵapangwila mashukisho, okushamikani, mokoŵalombela omusaushani. 29Keno munthu wakunyata ku mbovu umupe na iyakine, nipo munthu akakupoka mkhanjo wako umuzomezye atole soti na malaya ŵako. 30Munthu akakusengani kanthu, momupa. Nipo munthu akatola vinthu vako, usamuzomezye kuti awezye. 31Nipo vamupangwa ŵanthu kukucitilani, acitileni namwe.

32“Keno mutemwa ŵala ŵeka omutemwani, mungalindile kupokela cilambu canji? Pakuti cukanga ŵanthu wocimwa otemwa soti oŵatemwa. 33Keno mucitila viweme ŵala ŵeka omucitilani viweme, mungalindile kupokela cilambu canji? Pala cukanga ŵanthu wocimwa ocita cimozi–mozi. 34Nipo keno mukongolesha ŵala ŵeka ŵamuziŵa kuti azeakuŵezyeleni, mungalolele kupokela cilambu canji? Pakuti cukanga ŵanthu wocimwa, okongolesha ayawo wocimwa, kuti akapokele soti vimene vecikongolesha. 35Yayi, mwewo mukoŵatemwa alwani ŵanu, mukocita viweme, nipo muwokongolesha osalindila kupokelapo kanthu. Mukacita tetyo muzemupokele cilambu cikulu, niye kuti muzaŵe ŵana ŵa Mulungu wa Kululu. Pala yeve ocitila viweme ŵanthu osatembezya na ayipa. 36Ngani Awusu wanu ŵa Kululu ali na mtima uweme, na mwewo soti muŵe na mtima uweme.”

Vopingula

(Mt 7:1-5)

37“Osapingula, nipo mupinguliwelini. Osapa ayanu mlandu, nipo mupewelini mlandu. Muwolekelela ayanu, nipo muzelekelelewe. 38nipo muzelekelelewe; azeamupileni mu thumba mwanu muyeso uweme, wosindizya, wocukumuka na wosefukila. Cikomo muyeso wamuseŵenzesha kupingula ayanu, Mulungu akawuseŵenzeshe kupingula mwewo.”

39Yesu eŵawuzya soti linganizyo, elaŵila kuti, “Kansi mphofu ingatangulile mphofu iyake? Kansi wonse aŵili angaponelelini mu cisengu? 40Msambili opulalini msambizyi wake, koma aliyense wasilizya masambilo wake, azealingane na msambizyi wake.

41“Uwonela vinji kaswaswa kali mu linso mwa muyako, koma ulingililakolini cimuti cili mu linso mwako? 42Ungamuwuzye tyani mkwanu kuti, ‘Mkwasu, panama nikufumye kaswaswa kali mu linso mwako,’ koma uciwonalini cimuti cili mu linso mwako? Wewo wolipazya, tatika wafumya cimuti cili mu linso mwako, pamene apo uzeuwone luweme nofumya kaswaswa mu linso mwa mkwanu.”

Cimuti na vitwalo vake

(Mt 7:17-20; 12:34-35)

43“Cimuti ciweme cingatwalelini vitwalo viyipa, keno cimuti ciyipa kutwala vitwalo viweme. 44Cimuti ciliconse cuziŵika na nsembe zake. Otyolalini nkhuyu keno mphesa pa minga. 45Munthu muweme owonesha viweme vili mu mtima mwake. Naye soti munthu muyipa owonesha viyipa vili mu mtima mwake. Pakuti pa kamwa polaŵila vozula mu mtima.”

Ŵanthu aŵili omanga ngʼanda

(Mt 7:24-27)

46“Cikomo ni cinji muyingokuti, ‘Asikulu, Asikulu,’ koma mucitalini vanukuwuzyani? 47Nikuwonesheni mwacilili kwa ŵala owela kwa newo, nakumvwa malizu ŵangu noŵaseŵenzesha. 48Olingana na munthu omanga ngʼanda, wamene ekumba ngako pansi, noyika maziko pa mwala. Tetyo, manzi pecisefukila egunda ngʼanda koma iliyosungʼuzyike cikomo cakuti eyimanga luweme. 49Koma munthu akumvwa malizu ŵangu, osaŵaseŵenzesha, olingana na munthu wamene omanga ngʼanda palulu pa nthaka, osakumba maziko. Manzi pecisefukila ngʼanda yala, yepona nipo kucenekeka kwake kwenze kosilikizyilatu.”

Currently Selected:

Luka 6: GMN

Highlight

Copy