Macitilo 9

Saulo oyaluka mtima

1Saulo wala enzoyofya asambili ŵa Asikulu, nopangwa kuŵapaya. Eluta kwa Mkulu wa Ansembe wonse 2kuyomusenga makalata akuya nawo ku makacisi ŵa Ayuda ŵa ku Damasiko. Enzopangwa kuti keno akafwaneko okonkha Njila ya Asikulu, keno analume keno anakazi, akaŵamange nakuza nawo ku Yelusalemu.

3Ali pa ulwendo wake wala, efwika pafupi na mzinda wa Damasiko. Movundumukizya, kuŵala kofuma Kululu kwimuzinga. 4Saulo epona pansi, nipo ecimvwa malizu olaŵila kuti, “Saulo, Saulo, unitamanishilanji newo?”

5Yeve ekonsha kuti, “Nimwe ŵani, Asikulu?”

Ŵeve elaŵila kuti, “Nine Yesu, wauzingwisha. 6Lomba, uka, loŵa mu mzinda umu, nipo akuwuzye vocita.”

7Ŵanthu enze naye pa ulwendo wala epanama, eciŵa celele. Lizu yala enzoyimvwa, koma osawona kanthu. 8Tetyo, ayake ŵala emukata pa kwanja noloŵa naye mu Damasiko. 9Saulo esila masiku atatu wosalola, nipo soti osalya keno kumwa kanthu.

10Ku Damasiko kwala kwenze msambili, zina yake Ananiya. Yeve wala ewona mensomphenya Asikulu omuyita kuti, “Ananiya!”

Yeve elaŵila kuti, “Eee, Asikulu.”

11Asikulu emuwuzya kuti, “Yima, ulute ku mseu wa mu mzinda umu wakuti, ‘Njila yolungama.’ Nipo ku ngʼanda ya Yudasi ukasakile munthu wa ku Talisi, zina yake Saulo. Lomba teti olomba, 12nipo wawona mensomphenya munthu zina yake Ananiya, oloŵa nomuyika manja pa mutu kuti awone soti.”

13Pecimvwa ivo Ananiya elaŵila kuti, “Asikulu, ŵanthu anyinji aniwuzya va munthu uyo, kuti eŵacitila viyipa vinyinji ŵanthu ŵanu ku Yelusalemu. 14Nipo wawela kuno na ulamulilo wa Akulu ŵa Ansembe kuti azemange wonse olombela mu zina yanu.”

15Koma Asikulu emuwuzya kuti, “Nkhoya, pakuti uyo ni mtumiki wangu wenisalula kuti akaŵilizye zina yangu ku ŵanthu ŵa mitundu iyakine, ku mafumu, nipo soti ku Aisilayeli. 16Newo nizemuwoneshe voŵaŵa vonse vakuwamila kumvwa kuti malizu ŵangu aŵilizyike.”

17Pamene apo Ananiya eyima nakuyoloŵa mu ngʼanda mwala. Eyika manja pa mutu pa Saulo wala nolaŵila kuti, “Mkwasu Saulo, Asikulu Yesu, ekuwonekela pa njila yewelelako iyi, wanituma. Opangwa kuti uwone soti, na kuti uzuzyiwe na Mzimu Mtuŵa.” 18Pamene apo mu menso mwake mwifuma vinthu ngani mamba asaŵi, nipo etatika soti kulolesha. Epanama, nobatiziwa, 19nipo pecisilizya cakulya efwana soti mphamvu.

Saulo otatika kuŵilizya ku Damasiko

Saulo enkhala masiku atontho pamo na asambili ŵa ku Damasiko. 20Nipo posataya nsita etatika kuŵilizya mu kacisi wa Ayuda kuti Yesu ni Mwana wa Mulungu.

21Ŵanthu wonse ecimvwa malizu ŵake ŵala ekanganishiwa, nokonshana kuti, “Kansi uyu ni walalini enzopaya ŵanthu otembezya zina ya Yesu ku Yelusalemu? Kansi aliyowele kuno kuti aŵamange woteti nakuŵatwala kwa Akulu ŵa Ansembe?” 22Tetyo, mphamvu za Saulo zenzokulila–kulila, nipo esilizya nzelu Ayuda onkhala ku Damasiko poŵasimikizyila kuti Yesu ni wamene cendi Mpulumushi Wolayizyiwa wala.

Saulo owutuka Ayuda

23Pepepita masiku anyinji, Ayuda epangana kuti apaye Saulo, 24koma ŵanthu ayakine emuwuzyako va cizondo cala. Ŵanthu ŵa cizondo cala enzolindila pa milyango ya linga ya mzinda mzuŵa na usiku kuti amupaye. 25Koma asambili ŵake emutola usiku, nomufumyila kunja kwa linga yala mu citundu.

Saulo ku Yelusalemu

26Saulo pecifwika ku Yelusalemu, eyesa kuloŵa mu umba ya asambili ŵala. Koma wonse ecita naye wowa, osacetekela kuti naye soti ni msambili. 27Pamene apo munthu muyakine, zina yake Banabasi, emutola nakuya naye kwa atumiki. Yeve eŵakonkhololela va Saulo mweciwonela Asikulu pa njila pala, nipo na kuti Asikulu elaŵila naye. Eŵawuzya soti va Saulo ku Damasiko mwecilaŵilila motangʼa mtima mu zina ya Yesu. 28Tetyo, Saulo eciŵa nawo, noyendela Yelusalemu yonse oŵilizya motangʼa mtima mu zina ya Asikulu. 29Enzolaŵila soti nosushana na Ayuda olaŵila Cigiliki, koma ŵeve enzopangwa kumupaya. 30Enekwawo pecimvwa ivi, eluta naye ku Kayisaliya nomutuma ku Taliso.

31Pamene apo mpingo wa ku Yudeya konse, ku Galileya na ku Samaliya wenze pa mtendele. Wenkhazikika, nipo ŵanthu anyinji eloŵamo cikomo ŵanthu ŵake enzoyenda moyopa Asikulu, nipo Mzimu Mtuŵa wenzoŵakosesha.

Petulo opozya Eneya

32Petulo penzoyendela ŵanthu ŵa Mulungu uku na uku, efwika kwenzonkhala ayakine ocetekelela ku Lida. 33Kwamene uko efwanako munthu muyakine, zina yake Eneya, enze lele pa mphasa vyaka visanu na vitatu, wakufwa vizo. 34Tetyo, Petulo emuwuzya kuti, “Eneya, Yesu Kristu okupozya; uka, takula mphasa yako.” Pamene apo ewuka cendi. 35Ŵanthu wonse onkhala ku Lida na ku Saloni pecimuwona, eyalukila kwa Asikulu.

Petulo owusha Tabita wakufwa

36Ku Yopa kwenze msambili mwanakazi, zina yake Tabita (pa Cigiliki olaŵila kuti Dolika). Yeve uyu enzocita viweme noyavya wozingwa. 37Masiku ŵala mwanakazi wala elwala nakufwa. Ŵanthu esambika citanda, nocilalika mu cipinda ca palulu. 38Ku Yopa kwenze kufupi na ku Lida, tetyo asambili pecimvwa kuti Petulo enze ku Lida, etuma ŵanthu aŵili kuti akamuwuzye kuti, “Mwepo, muwele kuno kwasu mmangu.”

39Petulo eyima nakuya nawo. Yeve pecifwika, emutwala ku cipinda cala ca palulu. Anakazi wonse ŵa nchete epanama pafupi mu mbali mwake, olila, nowonesha malaya na vovwala viyakine venzoŵila Tabita peenze akali nawo pamo.

40Petulo eŵasenga wonse kuti afume, nipo efukama pansi nolomba. Nipo pecicungulukila ku citanda cala elaŵila kuti, “Tabita, uka!” Pamene apo Tabita etunama, nipo peciwona Petulo, ewuka nonkhazikika.

41Petulo emukata kwanja nomupanamika. Nipo eyita ŵanthu ŵa Mulungu na anyankufwilwa ŵala nomutwala kwa ŵeve ali moyo. 42Ŵanthu wonse ŵa ku Yopa ecimvwa ivi, nipo anyinji ecetekela Asikulu. 43Tetyo, Petulo enkhala ku Yopa masiku anyinji kwa munthu muyakine, zina yake Simoni, mmisili wa vikumba.

Currently Selected:

Macitilo 9: GMN

Highlight

Copy