Macitilo 8

1Nipo Saulo wala enzozomelezyana nawo zopaya kwamene kwala.

Saulo otatika kunzunza Mpingo

Nsiku yamene iyo mpingo wa ku Yelusalemu witatika kunzunziwa ngako, nipo wonse, kufumyapo nthumi zeka, emwazyikila ku vitwa vonse va Yudeya na Samaliya. 2Ŵanthu ayakine otemwa Mulungu eciyoyika malilo ŵa Stefano nomulila ngako.

3Koma Saulo wala enzopasula mpingo. Enzoloŵa mu ngʼanda za ŵanthu, nokata analume na anakazi, noŵapoza mu jele.

Filipo oŵilizya Malizu Aweme ku Samaliya

4Wocetekela ŵala emwazyika, eluta mu calo conse oŵilizya Malizu Aweme. 5Filipo efwika ku mzinda uyakine wa ku Samaliya, noŵilizya ku ŵanthu ŵa kwamene kwala va Kristu, Mpulumushi Wolayizyiwa wala. 6Winji wa ŵanthu wenzomvwila na mtima umo venzolaŵila Filipo. Wonse enzokumvwa malizu ŵake nowona vokanganisha venzocita yeve. 7Pakuti viŵanda venzofuma mu ŵanthu anyinji enze wokatiwa navo, noŵilikizya ngako. Nipo anyinji enze ŵa vizo va kufwa keno wopunduka, enzopola. 8Tetyo, mwenze cisangalalo cikulu mu mzinda mwala.

Simoni wa mayele

9Mu mzinda mwala, mwenze munthu muyakine zina yake Simoni, wamene kale enzocita mayele, nokanganisha ŵanthu wonse ŵa ku Samaliya. Yeve enzozimvwa kuti ni munthu mkulu. 10Ŵanthu wonse, atontho na akulu, enzomumvwila nomukonkha nolaŵila kuti, “Munthu uyu niye mphamvu ya Mulungu yala yakuti, Mphamvu ikulu.” 11Enzomukonkha cikomo pa nsita itali enzoŵakanganisha na mayele ŵake.

12Koma Filipo penzoŵilizya Malizu Aweme olaŵila va Ufumu wa Mulungu, nipo soti va zina ya Yesu Kristu, ŵanthu ecetekela, nipo ebatiziwa, analume na anakazi kumo. 13Simoni naye ecetekela, nipo ebatiziwa, enzonkhala pamo na Filipo. Ekanganishiwa powona viziŵikilo na vokanganisha venzocitika.

14Nthumi zenzonkhala ku Yelusalemu pezicimvwa kuti ŵanthu ŵa ku Samaliya apokela Malizu ŵa Mulungu, zetumizyako Petulo na Yohane. 15Ŵeve pecifwika, etatika kulombela wocetekela ŵala kuti apokele Mzimu Mtuŵa. 16Nsita yamene iyo niye kuti Mzimu Mtuŵa enzeakaliyofwika pa aliyense mwa ŵeve. Wonse eyingobatiziwa mu zina ya Asikulu Yesu. 17Tetyo, Petulo na Yohane eŵayika manja pa mutu nipo epokela Mzimu Mtuŵa.

18Simoni wala peciwona kuti Mzimu Mtuŵa watwaliwa kwa wocetekela peciŵayika manja pa mitu. Tetyo, epangwa kupa ndalama Petulo na Yohane. 19Elaŵila kuti, “Tyani munipeko nane mphamvu iyi, kuti aliyense waningayike manja pa mutu pake akapokele Mzimu Mtuŵa.”

20Petulo emuyasuka kuti, “Ndalama zako izo ukatayike nazo pamo. Wewo ulingilila kuti ungatweshe kupokela cawanzi ca Mulungu potwala ndalama kansi? 21Uliye citwa keno malo pa nchito iyi, pakuti mtima wako ni wosalungama pa menso pa Mulungu. 22Ni cikomo cake, uyaluke mtima, uleke viyipa vako. Senga Asikulu kuti payakine angakulekelele malingililo ŵa mu mtima mwako. 23Pakuti nawona kuti niwe wozula na ndulu yoŵaŵa, nipo soti niwe womangiwa na maunyolo ŵa viyipa.”

24Simoni wala elaŵila kuti, “Munisengele ŵamene mwewo kwa Asikulu kuti vamwalaŵila ivi osati vikaniponele.”

25Petulo na Yohane pecisilizya kutwala umboni wawo noŵilizya malizu ŵa Asikulu, ewelela ku Yelusalemu. Enzokuya oŵilizya Malizu Aweme mu minzi inyinji ya Asamaliya.

Filipo na nduna ya ku Etiopiya

26Mngelo wa Asikulu ewuzya Filipo kuti, “Yima, nkhoya ca ku mcingulo, wokonkha mseu wakuya ku Gaza kufumila ku Yelusalemu; mseu wopitila mu cipululu.” 27Filipo eyima cendi nakuya. Nipo munthu wa ku Etiopiya eluta ku Yelusalemu kuyolomba. Yeve enze nduna ikulu ya Mfumukazi Kandeke wa ku Etiopiya, nipo soti wololesha pa cuma cake conse. 28Nsita iyo enzowelela kwawo. Enze pa galeta woŵelenga buku ya Mneneli Yesaya. 29Tetyo, Mzimu Mtuŵa ewuzya Filipo kuti, “Nkhoya, ufwendele pafupi na galeta.”

30Filipo ewutukila nduna yala, nipo eyimvwa yuŵelenga buku ya Mneneli Yesaya. Lomba eyikonsha kuti, “Mwepo, kansi mukumvwa vamuŵelenga?”

31Yeve elaŵila kuti, “Ha, ningamvwishe tyani paliye wonimangululila?” Motetyo, eyita Filipo kuti akakwele nonkhala naye pa galeta apo.

32 Malizu ŵa mu Malembo ŵala ŵenzoŵelenga ni aŵa:

“Yeve enze ngani mbelele yoyitanguzya pakuyopaya,

ngani mwana wa mbelele ali tyala celele pomumeta.

Aliyolaŵilepo kanthu.

33Emupepusha, pa mlandu wake aliyomcitile cilungamo.

Paliye angatweshe kulaŵila va azukulu ŵake,

pakuti moyo wake wafumyiwa pa calo ca pansi.”

34Pamene apo nduna yala yelaŵila kuti, “Pepani, niwuzyeni, kansi venzolaŵila mneneli wala ni va ŵani – va yeve mwine, keno va muyakine?” 35Apo Filipo etatika kuŵilizya va Malizu Aweme ŵa Yesu kutatikila pa Malembo ŵamene aŵa.

36Nipo penzopita mu mseu mwala, efwika payakine penze manzi. Nduna yala yelaŵila kuti, “Manzi ni aŵa. Kansi pali colesha kuti nibatiziwe?”

[37Filipo elaŵila kuti, “Mungatweshe kubatiziwa keno mucetekela na mtima wanu wonse.”

Yeve eyasuka kuti, “Nucetekela kuti Yesu Kristu ni Mwana wa Mulungu.”] 38Pamene apo nduna yala ilamulila kuti galeta yala ipaname. Aŵili wonse, Filipo na nduna yala, eselukila ku manzi, Filipo nomubatiza.

39Pecifuma mu manzi mwala, Mzimu wa Asikulu emufumyapo Filipo wala. Nduna yala iliyomuwone soti, koma ipitilila ulwendo wake mosangalala. 40Tetyo, Filipo efwana kuti ali ku Azoto. Epita mu calo conse oŵilizya Malizu Aweme mu mizinda yonse, mpaka peciyofwika ku Kayisaliya.

Currently Selected:

Macitilo 8: GMN

Highlight

Copy