Macitilo 10

Petulo na Koloneliyo

1Ku Kayisaliya kwenze munthu, zina yake Koloneliyo. Uyu enze sentuliyo, mkulu wa asilikali makumi kumi (100) ŵa Ciroma, ŵa mu umba yoyitiwa “Umba ya ku Italiya.” 2Enze munthu wokonkha va malombelo, nipo yeve pamo na banja yake yonse enzoyopa Mulungu. Enzoyavya ngako Ayuda wozingwa, nipo enzolomba kwa Mulungu nsita na nsita. 3Nsiku iyakine, nsita yenze 3 koloko mcingulo#10:3 3 koloko mcingulo keno 15:00 hrs, ewona vinthu mensomphenya. Ewona luweme cendi mngelo wa Mulungu owela kwa yeve nolaŵila kuti, “Koloneliyo!”

4Yeve elolesha ngako mngelo wala, wowa wimukata, nipo emukonsha kuti, “Kuli luweme Asikulu?”

Mngelo wala elaŵila kuti, “Mulungu watemwa nawo malombelo ŵako nipo wakumbuka nchito zako na va lusungu vako. 5Lomba tuma ŵanthu ku Yopa kuti akayite munthu, zina yake Simoni, woyitiwa soti Petulo. 6Onkhala kwa Simoni muyakine, mmisili wa vikumba, ngʼanda yake ili mu mbali mwa cimmana.”

7Mngelo wenzolaŵila naye pecifumapo, Koloneliyo eyita anyanchito ŵake aŵili nipo soti na msilikali. Msilikali wala enze yumo mwa ŵala enzomutumikila, nipo enze munthu wolomba Mulungu. 8Koloneliyo wala peciŵakonkhololela vonse, eŵatuma ku Yopa.

9Mmawa mwake, ŵeve ŵala akali mu njila koma ali pafupi kufwika mu munzi mwala, Petulo ekwela pa mtenje kuyolomba, nsita yenze 12 koloko mzuŵa. 10Pamene apo, ecimvwa njala, nopangwa kulya. Koma ŵanthu penzowamya cakulya, yeve ecita ngani wakomoka. 11Ewona kululu kwavulika, cinthu ciyakine cuselukila pansi cuwoneka ngani cinyula cikulu comangiwa vitwa vake vonse vinayi. 12Mwamene umo mwenze nyama za mitundu–mitundu, na vokalaŵa, nipo soti na tunyoni. 13Lomba Petulo, ecimvwa malizu olaŵila kuti, “Petulo uka, paya, ulye.”

14Koma Petulo elaŵila kuti, “Yayi, pepani Asikulu. Newo nikaliyolyapo cinthu cisali cituŵa keno conyansa.”

15Petulo ecimvwa soti ka ciŵili malizu olaŵila kuti, “Mulungu vawatuŵisha, wewo osati ulaŵile kuti ni vituŵalini.”

16Ivi vicitika katatu, nipo pamene apo cinyula cala citolewa nakuya soti Kululu.

17Petulo etatika kulingilila va tanthauzo ya veciwona. Nsita iyo ŵanthu ŵala ŵecituma Koloneyo, enzokonsha va ngʼanda ya Simoni, nipo lomba ecizopanama pa mulyango. 18Peciyita ekonsha kuti, “Kansi kuli mulwendo kuno, zina yake Simoni, woyitiwa soti Petulo?”

19Pamene apo Petulo enzolingilila veciwona mu mensomphenya mwala, Mzimu Mtuŵa wemuwuzya kuti, “Wewo, ŵanthu atatu okusakila. 20Yima, seluka, ulute nawo osakayika, pakuti naŵatuma ni newo.”

21Pamene apo Petulo eseluka nowuzya ŵanthu ŵala kuti, “Wamusakila ni newo. Kansi ni kuweme?”

22Ŵeve elaŵila kuti, “Mkulu wa asilikali ŵa Ciroma, watituma. Yeve ni munthu wolungama na woyopa Mulungu, nipo Ayuda wonse omutembezya. Mngelo wa Mulungu emuwuzya kuti akuyiteni kuti mulute ku ngʼanda kwake, akamvwe malizu ŵa muli nawo.” 23Pamene apo Petulo eŵaloŵesha mu ngʼanda, noŵasunga luweme.

Mmawa mwake eyima nakuya nawo, nipo enekwawo ayakine ŵa ku Yopa emupelekezya. 24Mmawa mwake efwika ku Kayisaliya. Koloneliyo enzoŵalolela, ewunganisha enekwawo na ayake ŵa pa mtima. 25Petulo peenze kuti aloŵe, Koloneliyo ekumana naye, noziponesha ku mendo ŵake nomuŵelamila mwa mcinzi. 26Koma Petulo emupanamika nolaŵila kuti, “Yayi, panamani. Nane soti nine munthu tyala.”

27Nipo penzolaŵila naye, eloŵa nofwana ŵanthu anyinji awungana. 28Pamene apo Petulo eŵawuzya kuti, “Na mwewo kumo muziŵa kuti Muyuda ozomelezyewalini kumvwana na munthu wa mtundu uyakine, cukanga kuloŵa mu ngʼanda mwake. Koma Mulungu waniziŵisha kuti nisatomole munthu aliyense kuti ni mtuŵalini keno ni wonyansa. 29Ni cikomo cake, nawela mosadandaula pemwiniyita. Lomba nupangwa kuziŵa camwaniyitila.”

30Koloneliyo elaŵila kuti, “Mazo iyo, nenzolomba mu ngʼanda mwangu, nsita ngani ino ya 3 koloko. Movundumukizya, ku nthangu kwangu uku kwipanama munthu wovwala vovwala vonyezimila. 31Eniwuzya kuti, ‘Koloneliyo, Mulungu wamvwa lombelo yako, nipo wakumbuka nchito zako za lusungu. 32Tetyo, tuma ŵanthu ku Yopa akayite Petulo, mmisili wa vikumba, ngʼanda yake ili mbali mwa cimmana.’ 33Ni cikomo cake, nikutumilani ŵanthu mmangu, nipo mwacita luweme kuti mwawela. Lomba tonse tili pano pa menso pa Mulungu kuti timvwe vonse Asikulu vakulamulilani kuti mulaŵile.”

Malizu ŵa Petulo mu ngʼanda ya Koloneliyo

34Petulo etatika kulaŵila kuti, “Ni vyendi naziŵa lomba kuti Mulungu aliye msalulo. 35Opokela luweme munthu wa mtundu uliwonse omuyopa nocita cilungamo. 36Muziŵa kuti etumizya Aisilayeli na malizu ŵake noŵawuzya Malizu Aweme ŵa mtendele kupitila mwa Yesu Kristu, ali Asikulu wa ŵanthu wonse. 37Muziŵa vicitika ku Yudeya konse, kutatikila ku Galileya pa vuli pa nsita yenzoŵilizya va ubatizo wake Yohane. 38Muziŵa va Yesu wa ku Nazaleti, kuti Mulungu emuzoza na Mzimu Mtuŵa nomupa mphamvu. Tetyo, pakuti Mulungu ali naye, eluta paliponse nocita nchito ziweme nopozya wonse onzunziwa na Satana. Sewo tonse nise mboni za vonse vecicita yeve mu Yelusalemu na mu calo conse ca Ayuda.

39“Ŵeve emupaya pomupanyika pa mtanda. 40Koma pepepita masiku atatu Mulungu emuwukisha kwa akufwa, nozomezya kuti awonekele patuŵa. 41Aliyowonekele kwa ŵanthu wonse yayi, koma kwa mboni zecisalulilatu Mulungu. Niye kuti ewonekela kwa sewo, tenzokulya na kumwa naye pamo peciwuka kwa akufwa. 42Nipo etilamulila kuti tikaŵilizye ku ŵanthu wonse nocita umboni kuti yeve niye wecisalula Mulungu kuŵa wopingula ŵanthu ŵa moyo na akufwa. 43Aneneli wonse emucitila umboni, nolaŵila kuti cikomo ca zina yake, Mulungu azealekelele macimo ŵa munthu aliyense wocetekela yeve.”

Ŵanthu asali Ayuda opokela Mzimu Mtuŵa

44Petulo penzeakaliyolaŵila, Mzimu Mtuŵa wiŵaponela ŵanthu wonse enzokumvwa malizu ŵala. 45Nipo wocetekela ŵa Ciyuda enzopelekezya Petulo ekanganishiwa kuti Mulungu etwala cawanzi ca Mzimu Mtuŵa na ku ŵanthu ŵa kunja kumo. 46Pakuti eŵamvwa olaŵila malulimi wosaziŵika notembezya ukulu wa Mulungu.

Tetyo, Petulo elaŵila kuti, 47“Aŵa ŵanthu apokela Mzimu Mtuŵa ngani sewo. Kansi alipo angaŵaleshe kubatiziwa na manzi?” 48Motetyo, elamula kuti abatiziwe mu zina ya Yesu Kristu. Nipo ŵanthu ŵala emusenga kuti ankhale nawo masiku atontho.

Currently Selected:

Macitilo 10: GMN

Highlight

Copy