HIVA ‘O E HIVA 4
4
Ko e Tangatá
1SIINI, ‘oku ke faka‘ofo‘ofa, ‘alā hoku ‘ofa‘anga,
‘Io, ‘oku ke faka‘ofo‘ofa.
Ko e ongo lupe tofu pē ‘a si‘o mata
Mei he loto veili;
Ko ho lau ‘oku hangē ha tākanga kosi
‘Oku makalava mei Mo‘unga Kiliati.
2Ko ho nifo na ‘oku hangē ha tākanga sipi kuo kosi,
‘A ia kuo hake mei he kaukau
Ko e kau māhanga kotoa pē,
‘O ‘ikai ha ‘ulutefua ai.
3Ko si‘o ongo loungutu na ‘oku hangē ha filo kula ‘aho‘aho,
Pea faka‘ofo‘ofa ‘a e mafa‘a ‘o ho ngutu.
Hangē ha ‘io‘i pomikānite ho manifinifihanga
‘Ene hā mei he loto veili.
4Ko si‘o u‘a na ‘oku hangē ko e taua ‘o Tēvita,
‘Oku langa ko e ngaahi langi,#4.4 ‘Oku… langi; ‘Oku ‘ikai ke mahino hono faka-Hepeluú, ka ‘oku ngali ngali ko hono hiki totonú ko e: fōlelei mo lūpū.
‘A ia ‘oku tautau ai ‘a e afe‘i pā,
Ko e mahafu kotoa ‘a e kau helo.
5Ko si‘o ongo huhu na ko e ua‘i manu mui tofu pē;
Ko e māhanga‘i kaseli,
‘Oku kaikai he potu lile‘ia.
6Ka u ‘alu mu‘a au ki mo‘unga mula,
Pea ki sia laipeno,
Kae ‘oua ke mokomoko ‘a e ‘aho.
Mo ngalo atu ‘a e ngaahi ‘ata.
7‘Oku ke fufuli ‘aupito, ‘alā hoku ‘ofa‘anga,
Pea ‘oku ‘ikai hao mele.
8Si‘oku polo‘i, ta ō mo au ki he mātanga ‘o Lepanoni;
‘Io, ta tu‘u mo au, ‘o sio hifo mei Lepanoni,
Mei he tumutumu ‘o ‘Āmana,
Mei he tumutumu ‘o Sēnili mo Heamoni,
Mei he ngaahi ‘ana laione,
Mei he ngaahi mo‘unga lēpati‘ia.
9Sī‘oku tuofefine-uaifi,
Kuo ke ‘ai ke u moalo‘oa;
Kuo ke puke hoku loto ‘aki ha‘o fo‘i hila,
‘Aki ha fo‘i kahoa ‘i ho u‘a na.
10Hono ‘ikai tu‘utai ho‘o ngaahi tō‘onga ‘ofa,
‘Alā, ko si‘oku tuofefine-uaifi!
Hono ‘ikai ngutuhua ange ho‘o ‘ofa ‘i he uaine,
Mo e nanamu ho ngaahi pani ‘i he me‘a namu kakala fua pē!
11Ko ho loungutu na ‘oku to‘i honi,
Si‘oku polo‘i,
Ko e honi mo e hu‘akau ‘oku ‘i ho lalo ‘elelo,
Pea ko e nanamu ho ngaahi kofu ‘oku hangē ko e nanamu ‘o Lepanoni.
12Ko e ngouetapu kei loka‘i
‘A si‘oku tuofefine-uaifi:
Ko e fauniteni kei loka‘i,
Ko e matavai sila‘i.
13Ko ho‘o ngaahi ‘akau ko e ‘ā pomikānite,
‘O fio ai mo e ngaahi fua mahu‘inga;
Koni saipālesi, fio ai ‘a e fa‘ahinga na‘ati.
14Ko e na‘ati mo e ango,
Ko e kaho namu kakala mo e sinamoni,
Fio ai ‘a e fa‘ahinga laipeno kehekehe:
Ko e mula mo e ‘ālosi,
Fio ai ‘a e ngaahi fungani ‘akau namu kakala.
15Ko e matavai fakaviviku ngoue,
Ko e vaikeli ‘o e vai mo‘ui,
Koni vai ‘oho mei Lepanoni.
Ko e Ta‘ahiné
16‘Ā mai tokelau; pea ha‘u mo e tonga;
Fakahavilivili ‘a e ngouetapu ni ‘a‘aku;
Fakataufa atu hono ngaahi namu kakala:
Kae ha‘u ‘a hoku ‘ofa‘anga ki he‘ene ngouetapu ni,
‘O kai ‘a e ngaahi fua ‘oku ne mahu‘inga‘ia ai.
Ko e Tamá
17Kuo u hū ki he‘eku ngouetapu, ‘alā,
Ko si‘oku tuofefine-uaifi;
Kuo u toli ‘eku mula mo e fa‘ahinga me‘a namu kakala,
Kuo u kai ‘eku honi mo e nge‘esi,
Kuo u inu ‘eku uaine fakataha mo ‘eku hu‘akau.
Ko e Ta‘ahiné
18Kai ā, ongo me‘a;
Inu, ‘io, inu ‘ofa ke hulu!
Currently Selected:
HIVA ‘O E HIVA 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
