HIVA ‘O E HIVA 5
5
Ko e Ta‘ahiné
1‘OKU OU mohe, kae ‘ā pē hoku loto,
Sī! ko hoku ‘ofa‘anga ‘oku tukituki mai.
Ko e Hiva Hono Fā
Ko e Tamá
2“To‘o kiate au, si‘oku tuofefine;
Si‘oku ‘ofa‘anga, si‘eku lupe, si‘eku ta‘emele:
He ko hoku ‘ulu ni ‘oku hausia,
Pea viku hoku lau ‘i he tulutā ‘o e pō.”
Ko e Ta‘ahiné
3Kuo u to‘o hoku kofu loto; fēfē ha‘aku toe ‘ai?
Kuo u fufulu hoku va‘e, pea ko e pehē ke toe ‘uli‘i?
4Na‘e velo ‘e hoku ‘ofa‘anga hono nima ‘i he ava ‘o e matapā,
Pea na‘e ngaue hoku fatu ki ai.
5Tu‘u au ke fakaava ki hoku ‘ofa‘anga,
Pea na‘e piki hoku nima he mula,
Mo hoku louhi‘i ‘i he mula komi
‘I he ngaahi pukenga ‘o e fakama‘u.
6Ne u fakaava ki hoku ‘ofa‘anga;
Ka ko hoku ‘ofa‘anga kuo tafoki; kuo ‘alu.
‘Ā, ne lele ‘eku mo‘ui ‘i he‘ene lea:
Na‘a ku kumi ia, ka na‘e ‘ikai te u ma‘u;
Na‘a ku ui ia, ka na‘e ‘ikai te ne tali au.
7Na‘e ma‘u au ‘e he kau le‘o ‘oku taka he kolo;
Na‘a nau taa‘i au; na‘a nau faifai ‘o u lavea;
Na‘e ‘ave ‘a e tupenu kuo u pūlou ‘aki
‘E he kau le‘o ‘i he ‘ā.
8Tauange mo kimoutolu, ‘a e kau ta‘ahine Selusalema,
Kapau te mou ‘ilo hoku ‘ofa‘anga–
‘O hā koā ‘a e me‘a te mou tala ki ai?
‘A ‘eni, ko e mahaki manatu au.
Ko e Ta‘ahiné
9‘O hulu fēfē ho ‘ofa‘anga ‘i he ‘ofa‘anga ‘o ha taha kehe,
Si‘i fefine hōihoifua taha?
‘Io, ‘o hulu fēfē ho ‘ofa‘anga ‘i he ‘ofa‘anga ‘o ha taha kehe,
‘A ia ‘oku pehē ho‘o tapou mai kiate kimautolu?
Ko e Ta‘ahiné
10Ko e kili ‘atā ‘a hoku ‘ofa‘anga, mo momoho foki,
Ko e fotu ‘i he toko mano.
11Ko hono ‘ulu ko e koula, ko e koula kuo sivi;
Ko hono lau ‘oku fafasi, ‘o ‘uli‘uli hangē ha lēveni;
12Ko hono ongo fo‘i fofonga koni lupe ‘i he funga vaitafe;
‘Oku kakau ‘i he hu‘akau,
‘Oku nofo lelei ‘i he ‘ainga.#5.12 ‘Oku… ‘aingá; ‘Oku ‘ikai ke mahino hono faka-Hepeluú, ka ‘oku ngali tonu hono hiki ‘o: ‘Oku tu‘u he ve‘e vaitafé.
13Ko hono ongo kou‘ahe koni puke ‘akau kakala,
Koni taua ‘akau manonginongi.
Ko hono loungutu koni lile
‘Oku to‘i mula komi.
14Ko hono nima ko e koto lula koula,
Kuo fonofono kalisolaite;
Ko hono sino ko e ngāue ‘a e tufunga lei,#5.14 ko e… lei; ‘Oku ‘ikai ke mahino hono faka-Hepeluú, ka ‘oku ngali tonu hono hiki ‘o: ‘oku hangē ha lei hamolemolé.
Kuo fungani ‘aki ‘a e felefelei sāfaia.
15Ko hono ongo va‘e ko e pou māpele,
Kuo ‘ai tu‘unga koula haka:
Ko ene fotu ‘oku hangē ko Lepanoni,
Toka‘i hangē ko e pupunga sita.
16Ko hono ‘ao‘ingutu ko e koto melie;
‘Io, ko e ‘ū masani hono kotoa.
Ko eni ia hoku ‘ofa‘anga;
‘Io, ko eni ia hoku kaume‘a,
Si‘i kau ta‘ahine Selusalema.
Currently Selected:
HIVA ‘O E HIVA 5: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
