HIVA ‘O E HIVA 3
3
1‘I HOKU mohenga ‘i he ngaahi pō
Na‘a ku ha‘ao ia,
‘A e taha ‘oku ‘ofa ki ai ‘eku mo‘ui;
Na‘a ku ha‘ao ia, ka na‘e ‘ikai te u ma‘u.
2Ka u tu‘u mu‘a, ‘o ‘alu fano ‘i he kolo,
‘I he ngaahi hala mo e ngaahi mala‘e,
Ka u kumi ki he taha ‘oku ‘ofa ki ai ‘eku mo‘ui:
Na‘a ku ha‘ao ia,
Ka na‘e ‘ikai te u ma‘u.
3Na‘e ma‘u au ‘e he kau le‘o ‘oku taka he kolo:
“Kuo mou sio koā kiate ia ‘oku ‘ofa ki ai ‘eku mo‘ui?”
4Kuo u ki‘i laka atu ‘iate kinautolu,
Pea u ‘ilo ‘a e taha ‘oku ‘ofa ki ai ‘eku mo‘ui:
Na‘a ku puke ia, ‘o ‘ikai te u tukuange,
Kae‘oua ke u ‘omi ia ki he fale ‘o ‘eku fa‘ē,
‘O fakahū ki he loki ‘o ia na‘a ne fā‘ele‘i au.
5Tauange mo kimoutolu, kau ta‘ahine Selusalema,
Ke mou manatu ki he fanga kaseli mo hainiti vao;
‘O ‘oua ‘e ue‘i, pe fafangu ‘a ‘ofa,
Kae fai ‘ene fa‘iteliha.
Ko e Hiva Hono Tolu
Ko e Ta‘ahiné
6Ko hai ena ‘oku hake mai mei he toafa?
Hangē koni pou kohu,
Kuo faka‘inisēnisi ‘aki ‘a e mula mo e laipeno,
Mo e fa‘ahinga ahi kotoa ‘oku ‘omi ‘e he kau fakatau.
7Vakai, ko hono fata ē, ko e me‘a ‘a Solomone;
‘Oku kāpui ‘e he onongofulu‘i mafi
Mei he kau helo ‘o ‘Isileli,
8Ko e kau fakaheletā kotoa,
Ko e fa‘ahinga kuo ako tau;
Kuo nau takitaha tau ‘ene heletā ‘i hono tu‘a tenga,
Telia ‘a e ngaahi nānunga ‘o e pō.
9Na‘e ngaohi ‘e Kingi Solomone ha fale ha‘amo mo‘ona
‘Aki ‘a e ‘akau Lepanoni.
10Ko hono ngaahi pou na‘e ngaohi siliva,
Ko hono fakamalu na‘e koula,
Ko hono fakamolū ko e kula po‘upo‘uli,
Ko hono ‘aofi na‘e pule‘i ‘ofa,
Ko e me‘a mei he kau ta‘ahine Selusalema.
11‘Alu atu, kau ta‘ahine Saione,
‘O mamata kia Kingi Solomone,
Kuo ‘ai ‘a e kalauni na‘e fakapale ‘aki ‘e he‘ene fa‘ē
‘I he ‘aho ‘o ‘ene mali,
‘Io, ‘a e ‘aho ‘o ‘ene loto fiefia.
Currently Selected:
HIVA ‘O E HIVA 3: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
