HIVA ‘O E HIVA 2
2
1HANGĒ ha lile ‘oku huluni he talatala,
‘Oku pehē hoku ‘ofa‘anga ‘i he kau ta‘ahine.
Ko e Tamá
2Hangē ha fu‘u ‘āpele ‘i he ngaahi ‘akau ‘o e vao,
‘Oku pehē ‘a e huluni ‘a hoku ‘ofa‘anga ‘i he kau talavou.
Ko e Ta‘ahiné
3Ko hono malu ne u holi ki ai, pea kuo u nofo hifo ai;
Pea ko hono fua ‘oku ifoifomelie kiate au.
4Kuo ne ‘omi au ki hono fale kava,
Pea ko ‘ene fuka ‘oku fakamalumalu au ko e ‘ofa.
5Vave ‘aki mai ha keke ke u tokoni hake;
‘Omi ha ‘āpele ke u vai kau‘aki,
He ‘oku hangē ka u pongia he ‘ofa.
6Ko hono nima to‘ohema ē ‘oku ‘i hoku lalo ‘ulu,
Pea ko hono to‘omata‘u ‘oku ne fā‘ofua au.
7Tauange mo kimoutolu, kau ta‘ahine Selusalema,
Ke mou manatu ki he fanga kaseli mo hainiti vao,
‘O ‘oua ‘e ue‘i, pe fafangu ‘a ‘ofa;
Kae fai ‘ene fa‘iteliha.
Ko Hiva Hono Ua
Ko e Ta‘ahiné
8Sī! ko hoku ‘ofa‘anga!
Ko ena ia ‘oku ha‘u.
‘Oku ne puna he ngaahi mo‘unga,
‘Oku ne hopo he ngaahi mā‘olunga.
9Si‘ene hangē ha kaseli ‘a hoku ‘ofa‘anga,
Pe ko e tama ‘a ha hainiti!
Vakai, ko ‘ena ia ‘oku tu‘u mei he tu‘a lulu;
‘Ene fakasio he ngaahi avaava,
‘Ene ‘asi he ngaahi tupa vangavanga.
10Lea hake ‘a hoku ‘ofa‘anga,
Ko e Tamá
“Tu‘u ‘alā,
Hoku ‘ofa‘anga, si‘eku māna‘ia,
Pea, ‘alā, ke ke ha‘u mu‘a.
11He vakai ko e uinitā kuo ‘osi;
Ko e ‘uha kuo ngalo atu, kuo mama‘o;
12‘Oku fisi ‘a e ‘akau ‘o e fonua;
Kuo kamata ‘a e hiva ‘a e manupuna,
Pea ‘oku ongoonga‘a ‘a e le‘o ‘o e kulukulu ‘i hota fonua;
13‘Oku ‘ile‘ila mai ‘a e fua ‘o e fiki,
Pea ‘oku lūpū ‘a e vaine–
Si‘enau ‘alaha mai ē!
Tu‘u, ‘alā,
Hoku ‘ofa‘anga, si‘eku māna‘ia,
Pea ha‘u ange, ‘inē?
14Si‘eku lupe ni nofo ava‘i makatu‘u,
Si‘i toi mei he taukakapa,
Hā mai mu‘a si‘o mata na,
Ongo mai si‘o le‘o na;
He ko ho le‘o ‘oku mālie,
Pea ko ho mata ‘oku hōihoifua.”
15“Puke mai ‘a e fanga fōkisi,
‘A e fanga fōkisi iiki,
Mo e maumau vaine ‘i he toutu‘u;
He ko ‘etau vaine ‘oku lūpū.”
Ko e Ta‘ahiné
16‘Oku ‘o‘oku hoku ‘ofa‘anga, pea ‘o‘ona au:
Ko hono fanga‘anga manu ko e potu lile‘ia.
17Foki atu, ‘alā,
Kae‘oua ke mokomoko ‘a e ‘aho,
Mo ngalo atu ‘a e ngaahi ‘ata.
Hopo fakakaseli, pea hangē ha tama ‘a ha hainiti,
Ki he ngaahi mo‘unga fakamāvae.#2.17 mo‘unga fakamāvae; pe mo‘unga mato‘ia; pe mo‘unga ‘o Pētela.
Currently Selected:
HIVA ‘O E HIVA 2: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
