HIVA ‘O E HIVA 1
1
1KO E hiva ‘o e hiva, ‘a ia ko e me‘a ‘a Solomone.#1.1 ‘a ia… Solomone; pe a ia na‘e fakatāpui kia Solomone. #1 Tu‘i 4.32
Ko e ‘Uluaki Hivá
Ko e Ta‘ahiné
2‘Ē, ke ne toutou ‘uma mai hono fofonga!
Seuke, ‘oku ngangatu ange ho‘o tō‘onga ‘ofa ‘i he uaine!
3‘Oku namu lelei mai ho ngaahi pani:
Ko e tākai kuo mahua ‘a si‘o huafa na:
Tā ne‘ine‘i ‘ofa kiate koe ‘a e kau finemui.
4Toho atu au mu‘a!
Te mau tuli atu.
Kuo fakahū au ‘e he tu‘i ki hono ngaahi loki.
Te mau tome‘e mo fiefia ‘iate koe, fefine;
Te mau fakahīkihiki‘i ‘a e tō‘onga ‘ofa ‘a e ‘afiona,
‘Ene ngangatu ange ‘i he uaine.
Tonuhia ‘enau ‘ofa kiate koe.
5‘Oku ou kili ‘ui ‘apē, kau ta‘ahine Selusalema,
Ka#1.5 Ka; pe pea. ‘oku ou matamatalelei pē;
‘Oku pehē ‘a e ngaahi tēniti ‘o Keta,
‘Oku pehē ‘a e ngaahi puipui ‘o Solomone.
6‘Oua te mou siosiofi au,
Koe‘uhi ko ‘eku kilikiliua,
Koe‘uhi ko e ‘ā mai kiate au ‘a e fine‘eiki ko la‘ā.
Ko e kau tama ‘a ‘eku fa‘ē na‘e ‘itangi au:
Na‘a nau tu‘utu‘uni au ko e tauhi ngoue vaine;
Ko e ngoue vaine ‘a‘aku tonu na‘e ‘ikai te u lava ke tauhi.
7Faka‘ilo mai, ‘a koe ‘oku ‘ofa ki ai ‘eku mo‘ui,
Ko e fe‘ia ho‘o fanga‘anga manu,
Ko e fē ‘a e potu ‘oku ke fakatokoto ai kinautolu ho‘atā:
He koe‘uma‘ā ‘eku taka hangē ha fefine pūlou
‘I he ngaahi tākanga ‘a ho kaunga?#1.7 ‘a ho kaunga; ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: ‘a ho kaungā tauhi sipí.
Ko e Tamá
8“Kapau leva ‘oku ‘ikai te ke ‘ilo,
Si‘i fefine hōihoifua taha,
Pea muia ‘a e topuva‘e ‘o e fanga sipi,
‘O fafanga ho‘o fanga ki‘i kosi
‘O ofi ki he ngaahi tēniti ‘o e kau tauhi.”
9Ko e hoosi ‘i he sāliote ‘a Felo,
Ko ho tuha ia, ‘alā hoku ‘ofa‘anga.
10Faka‘ofo‘ofa si‘o kou‘ahe na ‘i he teu,
Si‘o u‘a na ‘i he ngaahi kahoa.
11Mau ngaohi ma‘au ‘ani teunga koula,
Pea fonofono siliva.
Ko e Ta‘ahiné
12Lolotonga na‘e me‘a ‘a e tu‘i ‘i he ‘alofi,
Ko ‘eku na‘ati na‘e hohofi ma‘u pē.
13Na‘a ku ongo‘i hoku ‘ofa‘anga
Hangē ha tangai mula,
‘Oku ‘aho mo e pō ‘i hoku vaha‘a huhu.
14Na‘a ku ongo‘i hoku ‘ofa‘anga
Hangē ha sisi saipālesi
He ngaahi ngoue vaine ‘a ‘Eniketi.
Ko e Tamá
15Sī ni, ‘oku ke faka‘ofo‘ofa, ‘alā hoku ‘ofa‘anga;
‘Io, ‘oku ke faka‘ofo‘ofa;
Ko e ongo lupe tofu pē ‘a si‘o mata na.
Ko e Ta‘ahiné
16‘Ā, ko e faka‘ofo‘ofa koe, hoku ‘ofa‘anga;
‘Isa, ko e hu‘a valo tofu pē.
Ko hota longa foki ko e fā mui ‘atā.
17Ko e sā ‘o hota ‘ū fale ko e sita,
Ko e paini hota ngaahi pāneli,
Ko ha lose toafa pē au,
Ko e lile ‘o e tele‘a.
Currently Selected:
HIVA ‘O E HIVA 1: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
