KO E SAAME 51
51
Ko e Lotu Kole Fakamolemole
(Ki he Pule ‘o e Hiva. Ko e Saame ‘a Tēvita ‘i he ‘alu kiate ia ‘a e palōfita ko Nētane, hili ‘ene ‘alu kia Pātisepa.)
1KE KE meesi kiate au, ‘e ‘Otua,
He ko ho tau ‘a e manava‘ofa.
Ke ke tāmate‘i ‘eku ngaahi angahala
Ke hoa mo e lahi ‘o ho‘o ‘alo‘ofa.
2Ke ke mātu‘aki fō au mei he‘eku hia,
Pea ‘ai ke u ma‘a mei he‘eku angahala.
3He ‘oku ou ‘ilo‘i ‘eku talangata‘a,
Pea ‘oku ma fe‘ao ma‘u pē mo ‘eku angahala.
4Ko koe–ko koe pē kuo u angahala ki ai:#Lom 3.4
Pea Kuo u fai ‘a e me‘a ‘oku kovi ‘i ho‘o vakai:
Koe‘uhi ke hā ho‘o tonuhia ‘oka ke ka lea,
Pea ke ‘ata‘atā ‘oka ke ka fakamaau?.
5Vakai, na‘e fanau‘i au mo e hia;
‘Io, na‘e tu‘itu‘ia ‘eku fa‘ē ‘iate au ko e me‘a angahala.
6Vakai, ‘oku ke manako ki he fai mo‘oni ‘i he feitu‘u lotoloto;
Pea ‘i he potu fufū te ke ngaohi au ke u ‘ilo ‘a e poto.
7Ke ke fakama‘a‘i ‘īsope au, pea te u ma‘a:
Fō au, pea te u hinehina ange he sinou.
8Tuku ke u fanongo ki he fakafiefia mo e mavava,
Kae me‘e ‘a e ngaahi hui kuo ke fakavolu.
9Hanga kehe mei he‘eku ngaahi angahala,
Pea tāmate‘i ‘eku hia kotoa.
10Fakatupu ‘iate au ha loto ma‘a, ‘e ‘Otua
‘O toe langa‘i ‘i loto ha laumālie totonua.
11‘Oua ‘e kapusi au mei he fe‘ao mo koe;
Pea ko ho laumālie tapu ‘oua te ke ‘ave.
12Ko e fiefia ‘o ho‘o fakamo‘ui ke ke fakafoki kia kita.
Kae poupou au ‘e ha laumālie tau‘atāina.
13Te u toki ako ho ngaahi hala ki he kau talangata‘a;
Pea ‘e foki kiate koe ‘ani kau angahala.
14Fakahaofi au mei he halaia toto,#51.14 Fakahaofi… toto; pe Tuku pē ke u mo‘ui, ‘e ‘Otua, fakahaofi au.
‘E ‘Elohimi ko hoku ‘Otua fakamo‘ui‘anga,
Kae fakahīkihiki‘i ‘e hoku ‘elelo ho‘o fakatonuhia.
15‘Ātonai ‘e ko hoku loungutu ke ke to‘o,
Kae ‘a‘au ‘e hoku ngutu ho fakamālō.
16He ‘oku ‘ikai te ke tangi ki he feilaulau,
Ka ne pehē te u ‘atu:
Na‘a mo e feilaulau-mōifua
‘Oku ‘ikai te ke manakoa.
17Ko e feilaulau ki he ‘Otua ko e laumālie lavea:
Ko e loto lavea mo mafesifesi ‘e ‘ikai ta‘etoka‘i ‘e he ‘Afiona.
18Ke ke finangalo ke fai lelei ki Saione:
Langa ‘a e ngaahi ‘ā ‘o Selusalema ē.
19Te ke toki fiema‘u ‘a e feilaulau fakatonuhia,
‘Ani feilaulau-tutu mo mōifua:
Te nau toki feia pulu ‘i ho ‘ōlita.
Currently Selected:
KO E SAAME 51: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
