KO E SAAME 50
50
Ko e Lotu Mo‘oni ki he ‘Otuá
(Ko e Saame ‘a ‘Ēsafe)
1KO ‘ELA ‘Elohimi Sihova kuo ne folofola,
Pea kuo ne ui ‘a māmani mei he hopo‘anga la‘ā ‘o a‘u ki hono tō‘anga.
2Mei Saione, ko e fungani ‘i he faka‘ofo‘ofa,
Kuo malama mai ‘a e ‘Otua.
3‘Oku hā‘ele mai hotau ‘Otua ē,
Pea tala‘ehai te ne fakalongo pē:
‘Oku mu‘omu‘a ‘iate ia ha afi faka‘auha,
Pea takatakai ki ai ha fu‘u afā.
4‘Oku ne ui mai ‘a e ngaahi langi mei ‘olunga, pea mo māmani,
Ki he fakamaau ‘o hono kakai.
5“Mou fakataha mai, hoku ‘ofa‘anga, kiate au;
Ha‘a fai kovinānite mo au ‘i he funga ‘o e feilaulau.”
6(‘Io, kuo toka tala ‘e he langi hono pau ke totonu;
He ko ‘Elohimi ia ‘e fai ‘a e fakamaau.) (Sila)
7Fanongo mai ka u lea, ‘e hoku kakai;
‘Isileli ē, ka u fai ha talatalaaki:
Ko ho ‘Otua au, ‘a ‘Elohimi.
8‘Oku ‘ikai ko ho‘omou ngaahi feilaulau ‘oku ou hopo ai mo koe;
Seuke, ko ho‘o ngaahi feilaulau-mōifua ‘oku ‘i hoku ‘ao ma‘u pē.
9Tala‘ehai ‘oku ou fie to‘o ha pulu mei ho ‘api na,
Pe ha ngaahi kosi tangata mei ho ngaahi loto‘ā.
10He ko e manu ‘o e vao ‘oku ‘a‘aku kotoa pē,
‘A e manu ‘oku kaikai ‘i he mo‘unga laui afe.
11‘Oku ou ‘ilo ‘a e manupuna kotoa ‘o e ngaahi mo‘unga,
Pea ‘oku ‘iate au ‘a e me‘a ‘oku ngāue ‘i he toafa.
12Ka ne u fiekaia ‘e ‘ikai te u tala atu:
He ‘oku ‘a‘aku ‘a māmani mo hono mahu.
13He te u kai koā ‘a e kakano ‘oni pulu kāfakafa,
Pe inu ‘a e toto ‘oni kosi tangata?
14Feilaulau kia ‘Elohimi ‘aki ‘a e fakafeta‘i;#50.14 Feilaulau… fakafeta‘i; pe ‘Oatu ha‘o feilaulau fakafeta‘i ki he ‘Otuá.
Pea fakaai kia ‘Elioni ho‘o ngaahi tukumo‘ui:
15Pea ‘i he ‘aho faingata‘a tautapa kiate au;
Te u hamusi koe, pea te ke fakalāngilangi‘i au.
16Ka ki he angahala ‘oku folofola mai ‘a ‘Elohimi,
Ko e hā ‘au ‘oku ke lau fola ai ‘eku ngaahi tu‘utu‘uni,
Pea ko ‘eku kovinānite ‘oku ke ngutu ‘aki?
17‘Osi, ‘oku ke fehi‘a koe ki he akonekina,
Pea ko ‘eku ngaahi lea ‘oku ke sī ki ho tu‘a.
18Ko ho‘o sio leva ki ha kaiha‘a pea mo felātani,
Pea ke me‘a taha mo e kau fe‘auaki.
19Kuo ke tukuange ho ngutu ke taka he kovi,
Pea ko ho ‘elelo ‘oku ne fatu loi.
20‘Oku ke nofo ni ‘o lau‘i ho tokoua ē,
Pea ke ‘ai tūkia‘anga ki he tama ‘a ho‘o fa‘ē.
21Ko e ngaahi me‘a pehē na‘a ke fai, pea u fakalongo pē,
Na‘a ke lau ‘oku ou tatau mātē mo koe:
Ka u valoki koe mu‘a,
‘O ‘ai hokohoko ke ke mātā.
22‘a e kau fakangalo‘i ‘Otua, fakakaukau mu‘a ki he me‘a ni,
Na‘a ku hae kimoutolu, ‘o ‘ikai ha taha ‘e haofaki:
23Ko ia ‘oku ne feilaulau ‘aki ‘a e fakafeta‘i,
‘Oku ne fai mo‘oni hoku fakalāngilangi‘i,
Pea ‘oku ne tofa ‘a e hala ke u fakahā ki ai,
‘A e fakamo‘ui ‘a ‘Elohimi.
Currently Selected:
KO E SAAME 50: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
