KO E SAAME 52
52
Ko e Fakamaau ‘a e ‘Otuá mo ‘Ene ‘Ofá
(Ki he Pule ‘o e Hiva. Ko e Hiva-ako ‘a Tēvita: ‘i he ha‘u ‘a e ‘Ītomi ko Toeki, ‘o fakahā kia Saula, ‘o pehē, “Ne ha‘u ‘a Tēvita ki he fale ‘o ‘Ahimeleki.”)
1KO E hā ‘oku ke pōlepole ai ‘i he kovi kuo fai–‘a e to‘a!
Ko e ‘ofa ‘a ‘Ela ‘oku tolonga.
2‘a e manako kākā, ko ho ‘elelo ‘oku fakakaukau fakapō,
‘O hangē ha tele kuo faka‘alo.
3‘Oku ke ‘ofa lahi ki he kovi ‘i he lelei;
Pea ki he loi ‘i he lea mā‘oni‘oni. (Sila)
4‘a e ‘elelo kākā,
Ko ho‘o manako ai pē ‘a e lau faka‘auha.
5Ko ‘Ela foki te ne laiki koe ‘o ta‘ehili;
Te ne puke koe ‘o hamusi mei ho tēniti,
Pea te ne ta‘aki fu‘u mei he fonua ‘o e mo‘ui. (Sila)
6Pea ‘e sio ki ai ‘a e kau angatonu, pea te nau ‘apasia,
Pea te nau kata manuki ki he toko taha ko ia.
7“‘Āua! tā ko e to‘a ia na‘e ‘ikai hūfanga ‘aki ‘a e ‘Otua,
Ka ne falala ki he lahi ‘o ‘ene koloa,
‘O ne ta‘emangoi ‘i he fai ‘ene havala.”
8Ka ko au te u ‘i he fale ‘o e ‘Otua,
‘O hangē ha fu‘u ‘ōlive laumata.
Te u falala ki he ‘ofa ‘a e ‘Otua,
‘O lauikuonga pea tuputupu‘a.
9Te u fakafeta‘i kiate koe ‘o ta‘engata,
Koe‘uhi ko ho‘o fai ‘a e me‘a ko ia:
Pea te u tatali ki ho huafa he ‘oku lelei ia,
‘I he ‘ao ‘o ho kau ‘ofeina.
Currently Selected:
KO E SAAME 52: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
