KO E SAAME 49
49
Ko e Fakavalevale ‘a e Falala he koloa
(Ki he Pule ‘o e Hiva. Ko e me‘a ‘a ha‘a Kola. Ko e Saame.)
1FANONGO ki he me‘a ni, ‘a e ngaahi kakai;
Fokotu‘u telinga mai, ‘a e nofo taimi:
2‘A ha‘a mā‘ulalo mo ha‘a mā‘olunga fakatou‘osi.
‘A e koloa‘ia mo e masiva foki.
3‘E ‘a‘au ‘e hoku ngutu ha koto poto;
Pea ko e koto maama ‘a ‘eku fakalaulauloto.
4Te u tuku atu hoku telinga ke ma‘u ha paloveepi:
Te u fakamatala ‘i he ha‘ape ‘eku misiteli.
5‘I he ngaahi ‘aho ‘o e kovi koe‘uma‘ā ‘eku manavahē,
‘Oka kāpui au ‘e he kākā ‘o hoku kau hakiva‘e?
6Ko e fa‘ahinga ‘oku falala ki he‘enau koloa,
Mo pole ‘i he lahi ‘o ‘enau nga‘oto‘ota;
7Tala‘ehai ‘oku lava ‘e ha taha ke huhu‘i ha taha,
Pe ke ‘ange kia ‘Elohimi hano tatala:
8(‘Io, ko e huhu‘i honau laumālie ‘oku fu‘u mamafa,
Pea kuo pau ke tuku ai pē ‘o ta‘engata)
9Ko e pehē ke ne mo‘ui atu ‘o lauikuonga,
‘O ‘oua te ne sio ki fa‘itoka.
10He kuo pau ke ne sio
He mate ‘a e kau poto,
Te nau ‘auha fakataha mo e vale mo e anga fakamanu,
‘O li‘aki ‘enau koloa ke ma‘u ha ni‘ihi atu.
11‘Oku nau tui loto ‘e tu‘u honau ngaahi fale ‘o ta‘engata,#49.11 ‘Oku… ta‘engata; ‘Oku ngali tonu ange ‘a hono hiki mei he faka-Hepeluú ‘o pehē: Ko e ngaahi fakakaukau ‘a honau loto‘i lotó, ko honau nofo‘anga ia ‘o ta‘engata. Ka ‘oku pehē ‘i he ngaahi hiki fuoloa ‘e ni‘ihi: Ko honau ngaahi fa‘itoká, ko honau nofo‘anga ia ‘o ta‘engata.
‘A honau ngaahi nofo‘anga ki he to‘utangata mo e to‘utangata;
‘Oku nau ui honau ngaahi ‘api ‘aki honau huafa.
12Ka na‘a mo e tangata lāngilangi‘ia ‘oku ‘ikai kakato hono fo‘i pō,
Ka ‘oku na tatau mo e fanga manu ‘oku mate longo.#49.12 Ka… longo. Ko e hiki ‘e taha: Ka ko e tangata lāngilangi‘ia ‘oku ‘ikai ke tolonga, ‘Oku ne hangē ko e fanga manu ‘oku tāmate‘i noa.
13Ko hono ‘alunga ē ‘o e ha‘a falala kia kita,
Neongo ‘e mālie‘ia ‘a e kakai ‘i he‘enau lea hili ‘enau pekia.#49.13 Neongo… pekia: ‘Oku fihi, ka ‘oku ngali tonu ange hono hiki mei he faka-Hepeluú ‘o pehē: ‘i he tu‘a ‘o kinautolu ‘oku nau fiemālie pē ‘i he‘enau koloá. ‘Oku pehē ‘i he hiki fuoloa ‘e taha: ‘a e iku‘anga ‘o kinautolu ‘oku fiemālie pē ‘i he‘enau koloá. (Sila)
14Hangē ha fanga sipi ‘e fakahū ki Hētesi;
Ko Mate honau tauhi:
‘E fakaehaua kinautolu ‘e he angatonu ‘i he hoko ‘a e pongipongi;
Pea ko honau ‘īmisi ‘e tuku ke keina ‘e Hētesi,
Kae‘oua ke ‘ikai toe ha me‘a ke ne fale ai.#49.14 Kae‘oua… fale ai; ‘Oku ‘ikai ke mahino ‘a hono faka-Hepeluú. Ko hono hiki ‘e taha ‘oku pehē: ‘i he fonua ‘o e kakai maté, pea mama‘o mei honau ngaahi ‘apí.
15Ka ko e ‘Otua te ne huhu‘i hoku laumālie ni mei he nima ‘o Hētesi:
He te ne ‘ave au. (Sila)
16Ka faka‘a‘au ‘o koloa‘ia ha taha, ‘oua ‘e manavahē,
‘I he hulu ‘a e nāunau‘ia hono fale:
17He tala‘ehai te ne ‘ave ha me‘a ‘i he‘ene pekia;
Tala‘ehai ‘e hifo mo ia ‘ene nāunau‘ia.
18Ka ko hono laumālie–neongo na‘a ne lau monū ki ai ‘i he‘ene mo‘ui
Pea ‘i ho‘o fai lelei ma‘au kuo pau ho sani ‘e he kakai–
19Te ne ‘alu ki he to‘utangata ‘o hono tupu‘anga;
‘A ia ‘oku ‘ikai te nau sio ki he maama ‘o ta‘engata.
20Ko e tangata ‘oku lāngilangi‘ia kae ‘ikai poto,
‘Oku hangē ko e fanga manu ‘oku mate longo.
Currently Selected:
KO E SAAME 49: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
