Luké 13

Ko e Foki Mai ki he ‘Otuá

1PEA na‘e ha‘u ha tu‘unga me‘a ‘i he taimi ko ia, ‘o nau ongoongoa kia Sīsū ‘a e kau Kāleli ni‘ihi, ‘a ia na‘e felingiaki honau toto ‘e Pailato fakataha mo ‘enau ngaahi feilaulau. 2Pea tali ‘e ia ‘o ne pehē kiate kinautolu, ‘oku mou mahalo koā ne angahala ange ‘a e kau Kāleli ko ia ‘i he kakai Kāleli kehe, ko e pehē honau fakamamahi‘i? 3Tala atu, na‘e ‘ikai; kaekehe, te mou tu‘utāmaki pehē kotoa pē, ‘o kapau ‘e ‘ikai te mou fakatomala. 4Pea ko e toko hongofulu mā valu ko ia na‘e ta‘omia ‘o mate ‘i he holo ‘a e taua ‘i Sailoame, ‘oku mou mahalo koā na‘e lahi honau mo‘ua ‘i he kakai kotoa pē na‘e nofo ‘i Selusalema? 5Tala atu, na‘e ‘ikai: kaekehe, te mou tu‘utāmaki kotoa pē hangē ko ia, ‘o kapau ‘e ‘ikai te mou fei mo fakatomala.

Ko e Talanoa ki he Fu‘u Fikí

6Na‘a ne lea‘aki foki ‘a e fakatātā ko eni: Tokua na‘e ai ha toko taha na‘e ‘i ai ‘ene fu‘u fiki kuo tō ‘i he‘ene ngoue vaine; pea ha‘u ia ko e kumi ha fua ai, kae ‘ikai ‘ilo. 7Pea pehē ‘e ia ki he tauhi ‘o e ngoue vaine, Vakai, ko hono tolu mālō ‘eni ‘o e ta‘u mo ‘eku ha‘u ko e kumi ha fua ‘i he fu‘u fiki ni, ‘o ‘ikai ma‘u: tā ia, mo e maumau kelekele. 8Ka ka tali ‘e ia, ‘o ne pehē ki ai, ‘Eiki, tuku ai pē ‘i he ta‘u ni foki, kae‘oua ke u keli takai mo taufetuku ki ai. 9Hei‘ilo ‘e faifai pea fua: pea ka ‘ikai, pea ke toki tā.

Ko e Fakamo‘ui ‘e Sīsū ha Fefine he Sāpate

10Pea ko e Sāpate ‘e taha na‘a ne fai ‘ene ako ‘i ha falelotu. 11Pea na‘e ‘i ai tokua ha fefine kuo hongofulu mā valu ta‘u ‘a e ‘iate ia ha fa‘ahikehe fakavaivai sino, pea kuo mo‘u pīkoua ia, ‘o ‘ikai te ne lava ke tu‘u totonu ‘aupito. 12Pea ‘i he vakai ‘e Sīsū kiate ia, na‘a ne kalanga ‘o pehē ki ai, Fefine, kuo vete koe mei ho vavai‘anga. 13Pea ne ‘ai hono ongo nima ki ai, pea kēvekeva tonu leva ia, ‘o ne fakamālō‘ia ‘a e ‘Otua.

14Ka ko e pule ‘o e falelotu na‘a ne ‘ita, koe‘uhi kuo fai ‘e Sīsū ‘ene faito‘o ‘i he Sāpate, pea ne hanga ‘o lea ki he kakai, ‘oku ‘i ai ‘a e ‘aho ‘e ono, ‘a ia ‘oku ngofua ai ke tau ngāue; ko ia mou omi ‘i he ngaahi ‘aho ko ia ke faito‘o, ‘o ‘oua ‘i he ‘aho Sāpate.#‘Eki 20.9-10; Teu 5.13-14

15Ka ka tali ‘e he ‘Eiki ki ai, ‘o ne pehē, ‘A e kau mā‘oni‘oni loi! ‘ikai ‘oku mou takitaha vete ange mei he fale manu ‘i he Sāpate ‘a ‘ene pulu pe ko ‘ene ‘asi, ‘o taki ke fakainu? 16Ka ko e fefine ni ko e hako totonu ‘o ‘Epalahame, pea kuo no‘otaki ia ‘e Sētane, ‘io ‘o hongofulu mā valu ta‘u, pea na‘e ‘ikai koā ngofua ke vete ia mei hono no‘otekina, neongo ko e ‘aho Sāpate? 17Pea ‘i he‘ene lea pehē; pea ‘ilonga hono ngaahi fili, na‘e mā: ka ka fiefia ‘a e fu‘u fakataha kotoa ‘i he ngaahi me‘a fungani na‘a ne fai.

Ko e Tenga‘i Mūsita mo e Lēvani

(Māt 13.31-33; Ma‘ake 4.30-32)

18Ko ia na‘a ne hanga ‘o lea ‘o pehē, ‘oku hangē nai ko e hā ‘a e Pule‘anga ‘o e ‘Otua? ‘io te u fakatatau nai ia ki he hā? 19‘Oku tatau mo ha tenga‘i mūsita, ‘a ia na‘e to‘o ‘e ha tangata, ‘o tō ‘i he‘ene ngoue tapu; pea ne tupu, ‘o hoko ko e fu‘u ‘akau; pea nofo‘ia hono ngaahi va‘a ‘e he fanga manupuna ‘o e ‘atā.

Ko e Lēvani

(Māt 13.33)

20Pea ne toe lea, Ko e hā nai ha me‘a te u fakatatau ki ai ‘a e Pule‘anga ‘o e ‘Otua? 21‘Oku tatau ia mo ha lēvani, ‘a ia na‘e to‘o ‘e ha fefine, ‘o tuku fufū ‘i ha tatanga mahoa‘a ‘e tolu, kae‘oua ke fai lēvani hono kotoa.

Ko e Matapā Fāsi‘í

(Māt 7.13,14,21-23)

22Pea ne fononga atu ‘i he ngaahi kolo, mo e ngaahi vilisi, ‘o ne fai ako ai, ko ‘ene faka‘a‘au atu ki Selusalema. 23Pea lea ange ‘e ha taha ki ai, ‘Eiki, ‘oku toko si‘i koā ‘a e kakai ‘e fakamo‘ui? Pea lea ‘a Sīsū kiate kinautolu.

24Mo u tōtōivi ke hū ‘i he matapā fāsi‘i: he ‘oku ou tala atu, ‘oku ai ha tokolahi te nau feinga ke hū, kae ‘ikai te nau lava. 25Ka toki tu‘u ‘a e tangata‘eiki, ‘o tāpuni ‘a e matapā, pea mou hanga ‘o tutu‘u ‘i tu‘a mo tukituki ‘i he matapā, ‘o mou pehē, ‘Eiki ke ke to‘o kiate kimautolu; pea te ne tali ‘o lea atu, ‘oku ‘ikai te u ‘ilo kimoutolu pe ko e kakai mei fē. 26Toki kamata fakamatala ‘e kimoutolu, ‘ē, na‘a mau fa‘a kai mo inu mo koe pea na‘a ke faiako‘i homau ngaahi mala‘e.

27Ka te ne pehē, ‘Oku ou tala atu, ‘oku ‘ikai te u ‘ilo pe ko e kakai mei fē kimoutolu; tu‘u atu meiate au, ‘a kimoutolu kotoa pē ‘a e kau ngāue ‘a Ta‘etotonu.#Saame 6.8 28Ko e potu ia ‘e toki hoko ai ‘a e tangi mo e fengai‘itaki ‘o e nifo, ‘oka mou ka sio kia ‘Epalahame, mo ‘Aisake, mo Sēkope, mo e kau Palōfita kotoa pē, ‘oku nau ‘i he Pule‘anga ‘o e ‘Otua, ka ko kimoutolu kuo kapusi kitua‘ā.#Māt 22.13; 25.30 #Māt 8.11-12 29Pea ‘e ha‘u ha kakai mei Hangahake, mo Hangahifo, mo e Tokelau, mo e Tonga, pea te nau keinanga ‘i he Pule‘anga ‘o e ‘Otua. 30Pea ko eni, ‘oku ‘i ai ‘a e ni‘ihi muimui te nau mu‘omu‘a, pea ‘oku ‘i ai ‘a e ni‘ihi mu‘omu‘a te nau muimui.#Māt 19.30; 20.16; Ma‘ake 10.31

Ko Sīsū mo Hēlota

31‘I he taimi ko ia na‘e ‘unu‘unu mai ha ni‘ihi ‘i he kau Fālesi, ‘o nau pehē kiate ia, Ke ke hiki mei he potu ni, ‘o fononga: he ‘oku me‘a ‘a Hēlota ke tāmate‘i koe.

32Pea folofola ‘e ia kiate kinautolu, Mou ‘alu ‘o tala ki he fōkisi ko ia, Ko eni, ko e ‘aho ni mo e ‘apongipongi te u fai ai ‘eku kapusi tēvolo, mo faka‘osi ‘eku faito‘o, pea ‘i hono ‘aho tolu pea u ‘osi. 33Ka kuo pau ke u fai fononga he ‘aho ni, mo e ‘apongipongi, mo e ‘aho ‘oku hoko: he ‘anefē ia ha tu‘utāmaki ha palōfita ‘o mama‘o mo Selusalema?

34‘A Selusalema! ‘a Selusalema1 ‘a e kolo ‘oku fakapoongi ‘a e kau palōfita, mo tolongi ‘a e kakai ‘oku talafekau ki ai! hono tu‘o taha ‘eku loto ke tānaki ho‘o fānau, ‘o hangē ko e tānaki ‘e he motu‘a moa hono fānganga ‘o‘ona ki hono lalo kapakau, ka na‘e ‘ikai te mou loto ki ai! 35Ko eni kuo motuhi atu kiate kimoutolu ‘a homou fale: pea ‘oku ou tala atu, ‘e ‘ikai ‘aupito te mou toe sio kiate au, kae‘oua ke mou pehē, Hoto ‘ofa kiate ia ‘oku hoko mai ‘i he huafa ‘o e ‘Eiki.#Saame 118.26; Sel 22.5

Currently Selected:

Luké 13: TMB

Highlight

Copy