Luké 12

Ko e Ngaahi Fakatokanga

(Māt 10.26,27)

1LOLOTONGA ia kuo fakataha ange mo ha fu‘u kakai laui mano, pea kamata ta‘omia ha ni‘ihi; pea hanga ‘e ia ‘o lea, ‘o fua fai ki he‘ene kau ako, ‘o pehē, Mou lamasi kimoutolu, telia ‘a e lēvani ‘a e kau Fālesi, ‘a ia ko e koto fakamatamatalelei pē.#Māt 16.6; Ma‘ake 8.15 2Ka ‘oku ‘ikai ha me‘a, neongo kuo fufū ‘aupito, ka ‘e fakahā; pe lilo ka ‘e ‘iloa.#Ma‘ake 4.22; Luk 8.17 3Ko ia, ‘ilonga ha me‘a ‘oku mou tala po‘uli, ‘e ongona ‘aho; pea ko e me‘a kuo mou fanafana‘aki ki he telinga ‘i he loki, ‘e fanongonongo mei he tu‘a fale.

Ko e Toko taha ke Mou Manavahē ki Aí

(Māt 10.28-31)

4Pea‘oku ou lea atu kiate kimoutolu, si‘oku tākanga, ‘oua te mou momo‘i manavahē kiate kinautolu ‘oku tāmate‘i ‘a e sino pē, kae hili ia ‘oku ‘ikai te nau toe lava mo ha me‘a. 5Ka te u hīnoi‘i kimoutolu ki he toko taha te mou manavahēa: mou manavahē kiate ia, ‘a ia ‘e hili ‘ene tāmate‘i ‘a e sino pea ne mafai ke lī ki Heli; ‘io, ‘oku ou tala atu, mou manavahē ki he Toko Taha ko ia.

6‘Ikai ‘oku fakatau ha fanga ki‘i misi ‘e toko nima ki ha konga sēniti ‘e ua? Pea ‘oku ‘ikai tuku ta‘emanatu hanau toko taha ‘i he ‘afio ‘a e ‘Otua. 7Ka na‘a mo e ngaahi tu‘oni lou‘ulu ‘omoutolu kuo ‘osi lau fakalāutelau. ‘oua te mou manavahē: ‘oku mou mahu‘inga ‘i ha fanga misi tokolahi.

Ko e Fakamo‘oni Kia Kalaisi

(Māt 10.32,33; 12.32; 10.19,20)

8Pea ‘oku ou tala atu, ‘ilonga ‘a ia te ne fakahaa‘i he ‘ao ‘o e kakai ‘ene kau kiate au, ‘e fakahā foki ‘e he Fanautama ‘a Tangata ‘ene kau kiate ia ‘i he ‘ao ‘o e kau ‘āngelo ‘a e ‘Otua: 9ka ko ia kuo ne fakafisinga au ‘i he ‘ao ‘o e kakai, ‘e mātu‘aki fakafisinga‘i ia ‘i he ‘ao ‘o e kau ‘āngelo ‘a e ‘Otua.

10Pea ‘ilonga ‘a ia te ne talakā ki he Fanautama ‘a Tangata, ‘e fakamolemole pē ia: ka ko ia kuo laukovi ki he Laumālie Mā‘oni‘oni ‘e ‘ikai fakamolemole.#Māt 12.32; Ma‘ake 3.29

11Pea ka nau ka ‘ave kimoutolu ki he fakataha fakasiasi, mo e hou‘eiki, mo e kau pule, pea ‘oua te mou lotomo‘ua pe ‘e fēfē ha‘amou fakamatala, pe ko e hā ha me‘a te mou lea‘aki:#Māt 10.19-20; Ma‘ake 13.11; Luk 21.14-15 12he ko e Laumālie Mā‘oni‘oni te ne ako kiate kimoutolu ‘i he taimi ko ia ‘a e lea ‘oku totonu ke fai.

Ko ha Tangata Tu‘umālie Na‘e Fakavalevale

13Pea na‘e lea mai ha toko taha mei he kakai, ‘o pehē, Tangata‘eiki, ke ke tala ki hoku tokoua, ke ne vaeua mo au ‘a e tofi‘a.

14Ka ka tali ‘e ia ki ai, Siana, ko hai na‘a ne fakanofo au ke fai fakamaau ‘iate kimoutolu, pe ke tufa? 15Pea ne lea kiate kinautolu ‘o pehē, Mou ‘ā, ‘o le‘ohi kimoutolu telia ‘a e ngaahi mānumanu: he neongo ‘oku fu‘u lahi ‘a e koloa ‘a ha taha, ka ‘oku ‘ikai hoko ai ‘o tautau ‘ene mo‘ui ki he‘ene nga‘oto‘ota.

16Pea ne lea‘aki ha fakatātā kiate kinautolu, ‘o pehē, Tokua na‘e ‘i ai ha tangata koloa‘ia, ne fua lahi ‘ene ngoue: 17pea ne fifili ‘i hono loto, ‘o pehē, Ko e hā ‘aku ai ‘e fai, he ‘oku ‘ikai haku kei fale ke tānaki ki ai ‘eku ngaahi fua? 18Pea ne pehē, ‘ā, ko eni pē ‘a e me‘a te u fai: Te u veteki hoku ngaahi feleoko pea langa ke lalahi; pea u toki tānaki kātoa ki ai ‘eku koloa tupu mo, ‘eku ngaahi me‘a lelei. 19Pea te u pehē ki hoku laumālie, Si‘i Laumālie, kuo lahi ‘eni ho‘o ngaahi me‘a lelei kuo tuku, ‘o fe‘unga mo ha ngaahi ta‘u lahi; mālōlō ā, kai, inu, mo nēkeneka. 20Ka ka folofola kiate ia ‘e he ‘Otua, ‘o pehē, ‘A e ta‘eloto! ko e pō ni pē te nau tala ke ke tuku mai ho laumālie: pea ‘e ‘a hai koā ‘a e ngaahi me‘a na‘a ke tokonaki?

21Ko e anga ‘eni ‘o ia ‘oku fokotu‘u koloa ma‘ana, ka ‘oku ‘ikai te ne fakatupu koloa ki he ‘Otua.

Ko e Loto Mo‘uá

(Māt 6.25-34)

22Pea lea ia ki he‘ene kau ako, Ko e me‘a ‘i he‘ene pehē, ko ia ‘oku ou tala ai kiate kimoutolu, ‘oua te mou lotomo‘ua koe‘uhi ko ho‘omou mo‘ui, ki ha me‘a te mou kai; ‘uma‘ā homou sino, ki ha me‘a te mou ‘ai ki ai. 23He ‘oku lahi ‘a e mo‘ui ‘i he me‘akai, mo e sino ‘i hono kofu. 24Mou vakai ‘a e fanga lēveni: he ‘oku nau tūtuu‘i pe tu‘usi, pe ai hanau loki pe feleoko? ka ‘oku fafanga kinautolu ‘e he ‘Otua; hono ‘ikai mahu‘inga noa pē kimoutolu ‘i he fanga manupuna! 25Pea neongo ho‘omou lotomo‘ua, tala‘ehai ‘e lava ‘e ha taha ke tolo‘i atu hono ta‘u ko ha fo‘i hanga.#12.25 ke… ko ha; pe ‘ai ke ne lōloa ange ‘aki. 26‘Io, pea kapau ‘oku ‘ikai te mou lava ha ki‘i momo‘i me‘a pehē, koe‘uma‘ā ho‘omou lotomo‘ua ki ha ngaahi me‘a ange. 27Vakai ‘a e ngaahi lile, pe kuo fēfē ‘enau tupu: he ‘oku nau fiu‘a ngāue, pe ‘oku nau filo? ka ‘oku ou tala atu, Na‘a mo Solomone, ‘i he‘ene ‘ai hono nāunau kotoa, na‘e ‘ikai ke vaha‘ateunga‘ia ai ha taha ‘o e ngaahi lile na.#1 Tu‘i 10.4-7; 2 Kal 9.3-6 28Pea kapau ‘oku kofu fakatafu‘ufu‘u pehē ‘e he ‘Otua ‘a e mohuku, ‘a ia ‘oku ‘i he kelekele he ‘aho ni, kae tafu ‘aki ‘a e ‘ōvani ‘apongipongi; huanoa ‘a kimoutolu, ‘a e kau tui vaivai!

29Ka ko kimoutolu, ‘oua te mou fepōkaki ki ha‘amou kai, pe ko hamou inu, pea ‘oua te mou loto tāla‘a. 30He ko e alā me‘a pehē ia ‘oku hehenga ki ai ‘a e ngaahi kakai ‘o māmani: pea ko ho‘omou Tamai ‘oku ne mea‘i ‘oku taau mo kimoutolu ‘a e ngaahi me‘a ko ia. 31Kehe pē ke mou kumi ‘a e pule‘anga ‘o‘ona; pea ‘e ‘atu mo ia foki ‘a e ngaahi me‘a ko ia.

Ko e Koloa Fakalangí

(Māt 6.19-21)

32Na‘i fanga sipi toko si‘i, ‘oua ‘e manavahē; he kuo finangalo ‘e ho‘omou Tamai ke ‘atu kiate kimoutolu ‘a e pule‘anga. 33Fakatau atu ho‘omou nga‘oto‘ota, pea fai foaki ‘aki hono totongi; ngaohi ma‘amoutolu ‘a e ngaahi ‘angapa‘anga ‘e ‘ikai ‘osi‘osi, mo ha koloa ta‘e‘unu ‘i Hēvani; ko e potu ‘oku ‘ikai ke ofi ai ha kaiha‘a, ‘uma‘ā ha maumau ‘e ha ane, 34he ko e potu ‘oku ‘i ai ho‘omou koloa ‘e ‘i ai foki mo homou loto.

Ko e Tamaio‘eiki Fai Totonú

(Māt 24.45-51)

35Ko kimoutolu ke ma‘u huke homou kofu, pea tutu ai pē ho‘omou maama;#Māt 25.1-13 36pea mou tatau mo ha kau tangata ‘oku talitali ho‘onautolu ‘eiki, ha‘ane foki mei he ta‘ane; koe‘uhi ka a‘u mai ia, ‘o tukituki, pea nau to‘o leva ki ai.#Ma‘ake 13.34-36 37Monū‘ia ā ka ko e kau tamaio‘eiki ko ia, ‘a ia ‘e ‘iloa kinautolu ‘e he ‘eiki ‘i he‘ene hā‘ele mai ‘oku nau le‘o pē: ko au ē, ‘oku ou tala atu, te ne hanga ‘o huke hono kofu ‘o‘ona, mo ne fakatākoto kinautolu ki he kai, ka ne tu‘u atu ‘o teu kai ma‘anautolu. 38Pea kapau ko hono ua ‘o e uasi ‘oku ne ha‘u ai, pe ko hono tolu, ka ‘oku ne ‘ilo kinautolu ‘oku nau pehē pē, pea monū‘ia ā ka ko kinautolu. 39Pea ko e me‘a ko eni ‘oku mou lāu‘ilo ki ai, ‘oka ne toka mea‘i ‘e he tangata‘eiki pe ko e fē ‘a e taimi ‘e ha‘u ai ‘a e kaiha‘a, pehē ne le‘o, ‘o ‘ikai tuku hono fale ke haea.#Māt 24.43-44 40Ko kimoutolu foki ke mou toka teuteu: he ko e hoko mai ‘a e Fanautama ‘a Tangata ‘e fai ‘i ha taimi ‘oku ‘ikai te mou ‘amanaki ai kiate ia.

41Pea lea ‘a Pita ki ai ‘o ne pehē, ‘Eiki, ko ho‘o fai ‘a e fakatātā ni kiate kimautolu pē, pe ‘oku kau ai mo e kakai kotoa?

42Pea folofola ‘e he ‘Eiki, ‘Io, ko hai nai ‘a e matāpule lototō mo fai fakapotopoto, ‘a ia ‘e fakanofo ‘e he ‘Eiki ke pule‘i hono kau nofo‘anga, mo ‘ange ‘a e me‘akai kuo tu‘utu‘uni ‘i hono taimi totonu? 43Monū‘ia ā ka ko e tamaio‘eiki ko ia, ‘a ia ‘e ‘iloa ‘e he‘ene ‘eiki ‘i he‘ene ha‘u ‘oku ne fai pehē. 44Seuke, ‘oku ou tala atu, te ne fakanofo ia ke ne pule ki he‘ene ngaahi me‘a kotoa. 45Ka ‘oka ka pehē ‘e he tamaio‘eiki ko ia ‘i hono loto, ‘Oku fakatotoka ‘e he‘eku ‘eiki ‘ene ha‘u; pea ne hanga ai ‘o haha ‘a e kau tamaio‘eiki mo e kau kaunanga, mo ne kai mo inu mo konā; 46‘e toki ha‘u ‘a e ‘eiki ‘a e tamaio‘eiki ko ia ‘i ha ‘aho ‘oku ‘ikai te ne ‘amanekina ia, pea mo ha houa ‘oku ‘ikai te ne ‘ilo ki ai, pea te ne fahi ua ia,#12.46 fahi ua ia; pe lī ia ki tu‘a. pea tu‘utu‘uni ke ‘inasi fakataha ia mo e kau angatu‘u.

47Pea ko e tamaio‘eiki ko ia na‘a ne ‘ilo ki he finangalo ‘o ‘ene ‘eiki, kae ‘ikai toka teuteu, pe fai ki he‘ene tu‘utu‘uni, ‘e lahi ‘a e fo‘i tā ‘i hono haha. 48Ka ko ia na‘e ‘ikai te ne ‘ilo ki ai, ka ne fai pē ‘a e ngaahi me‘a ‘oku taau mo ha tautea, ‘e si‘i pē ‘a e fo‘i tā ‘e ‘ai. Pea ko ia kuo foaki ki ai ha me‘a lahi, ‘e fiema‘u mei ai ha me‘a lahi: pehē foki, ka tuku ‘e he kakai ha fu‘u me‘a ki ha taha ke tauhi, pea hulu atu mo e me‘a ‘e ‘eke kiate ia.

Ko e Fepaki mo e Faingata‘á

(Māt 10.34-36)

49Kuo u ha‘u ke laku ha afi ki māmani; pea ko e hā hoku loto? taumaiā kuo tutu! 50Ka ‘oku ‘i ai haku papitaiso ke u papitaiso ai; pea hono ‘ikai ‘oku ou kukuta tu‘u kae‘oua ke lava!#Ma‘ake 10.38 51‘Oku mou mahalo koā kuo u ‘i heni ke tuku ha melino ki māmani? Tala atu, ‘oku ‘ikai; ka ko e mavahevahe. 52Seuke, hili ‘eni, tokaange ha toko nima ‘i ha ‘api pē taha te nau mavahevahe, ‘o fetu‘usi ‘a e toko tolu mo e tokoua, ‘a e tokoua mo e toko tolu; 53‘a e motu‘a mo hono foha, mo e foha mo ‘ene motu‘a; ‘a e fefine mo ‘ene ta‘ahine, mo e ta‘ahine mo ‘ene fa‘ē; ‘a e finemotu‘a mo e uaifi ‘o ‘ene tama, mo e ta‘ahine mo e fa‘ē ‘a hono husepāniti.#Maiká 7.6

Ko e ‘Ilo‘i ‘a e Ngaahi ‘Ahó

(Māt 16.2-3)

54Pea ne lea foki he kakai ‘o pehē, Ka mou ka sio ki ha loa ‘oku tu‘u hake ‘i lulunga, ‘oku mou pehē leva, ‘E ‘uha; pea ‘oku hoko ‘o pehē. 55Pea ‘oka mou ka vakai ‘oku angi mei he tonga ‘a e matangi, ‘oku mou pehē, ‘E faka‘a‘afu; pea ‘oku hoko. 56‘a e kau ‘afungi; ‘oku mou vavanga koā ki he mata ‘o e fonua mo e langi, pea fēfē ai ho‘omou ta‘evavanga ki he kuonga ni?

Fakalelei mo ho Filí

(Māt 5.25,26)

57Pea ko e hā ai ‘oku ‘ikai te mou ‘ilo foki ‘a e totonu ‘iate kimoutolu pē? 58He ko eni ‘oku ke lolotonga ō pē mo e faka‘ilo ki he pule; ‘ē, ke ke fai feinga ke ke fakahaofi koe meiate ia lolotonga ho‘omo ‘i he hala; na‘a ‘iloange te ne toho koe ki he fakamaau, pea ‘oatu ‘e he fakamaau ki he polisi, pea ‘e lī koe ‘e he polisi ki he pilīsone. 59Tala atu, ‘e ‘ikai te ke ‘alu mei ai kae‘oua ke ‘osi ha‘o totongi, ‘o a‘u ki he konga fāteni.

Currently Selected:

Luké 12: TMB

Highlight

Copy