Luké 11

Ko e Lotu ‘a e ‘Eikí

(Māt 6.9-13; 7.7-11)

1PEA ko e taimi ‘e taha na‘a ne ‘i ha potu ‘o fai ‘ene lotu; pea ‘i he‘ene tuku na‘e lea ange ha toko taha‘i he‘ene kau ako, ‘o pehē, ‘Eiki, ke ke ako kimautolu ke fai ha lotu, ‘o hangē foki na‘e ako ‘e Sione ‘a e kau ako ‘a‘ana.

2Pea pehē ‘e ia kiate kinautolu, Ka mou ka lotu, mou pehē, ‘e Tamai, ke tāpuhā ho Huafa, ke hoko ho‘o Pule. 3Ke ke foaki mai ha‘amau me‘akai ki he ‘anai, ‘o hokohoko ‘aho pē.#11.3 me‘akai… ‘anai; pe me‘akai ki ‘apongipongi. 4Pea fakamolemole ‘emau ngaahi angahala, he ko kimautolu foki ‘oku mau fakamolemole ‘a ia fua pē ‘oku mo‘ua mai, pea ‘oua na‘a ke fakahū kimautolu ki he ‘ahi‘ahi.

5Na‘a ne pehē foki kiate kinautolu, Tau lau ko hamou toko taha ‘oku ai hono kaume‘a; pea ne ‘alu kiate ia ‘i he tu‘uapō, ‘o lea ange, ‘Alā, ke ke tuku mai ha fo‘i mā ‘e tolu: 6he ko e kāinga ‘o‘oku kuo afe mai kiate au, pea ‘oku ‘ikai ha‘aku me‘a mōno tali.

7Pea tali ‘e ia mei fale, ‘Oua te ke fakafiu mai; kuo songo ‘a e matapā, pea ko ‘eku fānau ‘oku mau ‘i he mohenga mo au; ‘oku ‘ikai te u lava ke tu‘u ke ‘atu.

8Tala atu, ‘e ‘ikai te ne tu‘u ‘o ‘atu koe‘uhi ko hona kaume‘a; ka koe‘uhi ko ‘ene ta‘emangoi te ne tu‘u hake ‘o ‘ange ‘a e me‘a kotoa pē te ne fiema‘u. 9Tala atu foki, Kole, pea ‘e foaki kiate kimoutolu; kumi, pea te mou ‘ilo; tukituki, pea ‘e to‘o kiate kimoutolu. 10He ‘ilonga ‘a ia ‘oku ne kole, ‘oku ne ma‘u; pea ko ia ‘oku kumi, ‘oku ne ‘ilo; pea ko ia ‘oku tukituki ‘e to‘o kiate ia. 11Pea tau lau ko ha taha ‘iate kimoutolu ‘oku ma‘u fānau, pea kole ki ai ‘e hono foha ha fo‘i mā, te ne ‘ange koā ha fo‘i maka? Pea ka ko ha ika, te ne ‘ange koā ha ngata ko e fetongi ‘o e ika? 12Pea kapau te ne kole ha fo‘i moa, te ne ‘ange koā ha sikapio? 13Pea kapau ‘oku mou ‘ilo ke foaki me‘a‘ofa lelei ki ho‘omou fānau, neongo ko e fa‘ahinga kovi kimoutolu: huanoa ‘a e Tamai ‘i he langi ‘ene foaki ‘a e Laumālie Mā‘oni‘oni kiate kinautolu ‘oku kole kiate ia.

Ko Sīsū mo e Taki ‘o e Fanga Fa‘ahikehé

(Māt 12.22-30; Ma‘ake 3.20-27)

14Pea ko e ‘aho ‘e taha na‘a ne kapusi ha tēvolo fakanoa. Pea ‘i he mahu‘i atu ‘a e tēvolo na‘e toki lea ‘a e noa; pea ofo ‘a e kakai. 15Ka na‘e pehē ‘e honau ni‘ihi, ‘Oku ne fai ‘ene kapusi tēvolo ‘ia Pelisipupe ko e ‘eiki ‘o e kau tēvolo.#Māt 9.34; 10.25

16Pea ko e ni‘ihi kehe na‘a nau tangi ke ne ‘omi ha faka‘ilonga mei langi, ko ‘enau ‘ahi‘ahi‘i ia.#Māt 12.38; 16.1; Ma‘ake 8.11 17Ka ka mea‘i ‘e ia ‘enau fakakaukau, ‘o ne pehē kiate kinautolu, ‘ilonga ha pule‘anga ‘oku mavahevahe mo fetu‘usi, ‘e lusa; pea ‘ilonga ha fāmili ‘oku mavahevahe mo fetu‘usi, ‘e tō ki lalo. 18Pea ko Sētane foki, kapau te ne mavahevahe ‘o fetu‘usi mo ia, pea tu‘u fēfē hono pule‘anga? he ‘oku mou pehē, ko Pelisipupe ‘oku ou fai ‘ai ‘eku kapusi tēvolo. 19Pea ko eni, kapau ‘oku ou fai ‘eku kapusi tēvolo ‘ia Pelisipupe, pea ‘oku fai ‘ia hai ‘e ho‘omou kau tama? Ko ia ko kinautolu te mou halaia mei ai. 20Ka ‘o kapau ko e māfimafi ‘o e ‘Otua ‘oku ou fai ai ‘eku kapusi tēvolo, pea tā kuo a‘u mai kiate kimoutolu ‘a e Pule‘anga ‘o e ‘Otua.

21Ka ‘ai mahafu ‘e ha to‘a, ‘o le‘ohi hono loto‘ā, ‘e malu ‘ene ngaahi me‘a: 22ka ‘oka ‘iloange ‘e ha‘u ha toko taha ‘oku to‘a ange, ‘o ikuna ia, pea ne ‘ave ‘a e mahafu kotoa, ‘a ia na‘a ne falala ki ai, pea te ne toki tufa ‘ene vete.

23Ko ia ‘oku ‘ikai kau mo au, ‘oku ne tu‘u kiate au: pea ko ia ‘oku ‘ikai te ne kau mo au ‘i he fakatahataha, ‘oku ne fakamovetevete.#Ma‘ake 9.40

Ko e Foki Mai ‘a e Fa‘ahikehé

(Māt 12.43-45)

24Ka ‘alu atu ‘a e fa‘ahikehe mei he tangata, ‘oku ne ‘osiki ‘a e ngaahi potu mamate ‘ene ‘alu, ko e ha‘ao ha mālōlō‘anga; pea ‘i he ‘ikai te ne ‘ilo, ‘oku ne pehē, Ka u foki mu‘a ki hoku fale, ‘a ia na‘a ku ‘alu mei ai. 25Pea ‘i he‘ene a‘u mai, ‘oku ne ‘ilo ia kuo tafi mo teuteu. 26Toki ‘alu ia ‘o ma‘u mai mo ha fa‘ahikehe ‘e fitu, ko ha fa‘ahinga ‘e taha ‘oku kovi ange ‘iate ia; pea nau hū mai ‘o nofo ai; pea hoko ai ki he tangata ko ia ‘o lahi ‘ene kovi kimui ‘i he kovi mu‘a.

Ko e Monū‘ia Mo‘oní

27Pea lolotonga ‘ene lea pehē, na‘e kalanga mai ha fefine mei he kakai, ‘o ne pehē kiate ia, Monū‘ia ā ka ko e mānava na‘a ke tokoto ai, mo e ongo huhu na‘a ke huhu ai!

28Ka ka tali ‘e ia, ‘ā, ‘oku Monū‘ia pē ‘a kinautolu ‘oku ma‘u ‘a e folofola ‘a e ‘Otua, ‘o tauhi ki ai.

Ko ha Faka‘ilonga mei he ‘Otuá

(Māt 12.38-42; Ma‘ake 8.12)

29Pea ‘i he fe‘ohofi mai ‘a e ngaahi kakai, na‘a ne hanga ‘o lea, ‘o pehē, Ko e to‘utangata ko eni ko e to‘utangata faikovi; ‘oku ne fiema‘u ha faka‘ilonga; ka ‘oku ‘ikai ha faka‘ilonga ‘e ‘ange, ngata pē ‘i he faka‘ilonga ‘o Siona.#Māt 16.4; Ma‘ake 8.12 30He ‘oku hangē na‘e hoko ‘a Siona ko e faka‘ilonga ki he kau Ninive, ‘e pehē foki ‘a e Fanautama ‘a Tangata ki he to‘utangata ko eni.#Sioná 3.4 31‘E tutu‘u ‘i he fakamaau ‘a e Kuini ‘o e Feitu‘u Tonga pea mo e kau tangata ‘o e kuonga ni, pea ne fakahalaia kinautolu: he na‘a ne ha‘u mei he ngata‘anga ‘o māmani ke fanongo ki he poto ‘a Solomone; kae vakai, ‘oku ‘i heni ha me‘a ‘oku lahi ‘ia Solomone.#1 Tu‘i 10.1-10; 2 Kal 9.1-12 32‘E hopo mo e to‘utangata ni ‘i he Fakamaau ‘a e kakai Ninive, pea te nau fakahalaia ia: he na‘e fakatomala ‘e kinautolu ‘i he malanga ‘a Siona; kae vakai, ‘oku ‘i heni ha me‘a ‘oku lahi ‘ia Siona.#Sioná 3.5

Ko e Māmá

(Māt 5.15; 6.22,23)

33Tala‘ehai ‘e tutu ‘e ha taha ha maama pea ‘ai ki ha ‘ana, ‘uma‘ā ki he loto puha fua:#11.33 ‘uma‘ā… fua: ‘Oku ‘ikai ke ‘asi ‘a e kupu‘i leá ni ‘i he ngaahi hiki fuoloa ‘e ni‘ihi. ka ‘oku ne ‘ai ki he tu‘unga maama, koe‘uhi ke sio ki hono maama ‘a kinautolu ‘oku hū mai.#Māt 5.15; Ma‘ake 4.21; Luk 8.16 34Ko e māma‘anga ‘o e sino ko ho mata: ‘oka hu‘ufataha ‘a e sio ‘a ho mata pea maama ho sino kotoa; ka ‘oka ‘iloange ‘e kovi ho mata, pea ‘oku fakapo‘uli ho sino. 35Ko ia, ke ke vakavakai na‘a ko e koto po‘uli ia, ‘a e me‘a ‘iate koe na‘e ngaohi ke fakaemaama. 36Pea kapau ‘oku maama ho sino kotoa, ‘o ‘ikai hano feitu‘u ‘e fakapo‘uli, pea ‘e toki māmangia hono kotoa, ‘o hangē ko ho hulu‘ia ‘i ha maama ‘oku fu‘u ulo.

Ko e Valoki ‘e Sīsū e kau Fālesímo e Kau Faiako Laó

(Māt 23.1-36; Ma‘ake 12.38-40; Luk 20.45-47)

37Pea lolotonga ‘ene lea mo e tala ‘e ha motu‘a Fālesi, ke ne ‘alu ange ‘o pelekifasi mo ia: pea ne hū leva, ‘o tokoto hifo ke kai. 38Ka ko e Fālesi ‘i he‘ene sio ki ai, na‘a ne ofo ‘i he ‘ikai te ne tomu‘a papitaiso, pea toki kai. 39Ka ka me‘a ‘e he ‘Eiki kiate ia, Vakai ā kimoutolu Fālesi; ‘oku mou fufulu ‘a e tu‘a ipu mo e peleti; ka ko e loto ‘omoutolu ‘oku fokotu‘uniu ai ‘a e fakamālohi mo e fai kovi. 40‘a e kau ta‘eloto! ko ia na‘a ne ngaohi ‘a tu‘a, ‘ikai na‘a ne ngaohi ‘a loto foki? 41Ka ke mou me‘a‘ofa ‘aki ‘a e ngaahi me‘a ‘o loto, pea kuo ma‘a leva ‘a e ngaahi me‘a kotoa pē kiate kimoutolu.

42Ka ‘oiauē kimoutolu Fālesi! he ‘oku mou ‘atu ki he siasi ‘a e vahehongofulu ‘o ho‘omou minite mo e pēkano mo e fa‘ahinga mohuku kai kehekehe; ka mou laka ‘i he fakamaau totonu mo e ‘ofa faka-‘Otua: na‘e totonu ke fai ‘eni, pea ‘oua na‘a li‘aki ‘ena.#Lev 27.30

43‘Oiauē kimoutolu Fālesi! he ‘oku mou manako ke nofo ki mu‘a ‘i he falelotu, mo e faka‘apa‘apa‘ia ‘i he mala‘e fakatau. 44‘Oiauē kimoutolu! he ‘oku mou hangē ko e ngaahi fonualoto ‘oku ‘ikai hā, pea ‘oku mala ai ‘a e kakai ‘o ‘ikai te nau ‘ilo.

45Pea tali ‘e ha toko taha ‘o e kau tufunga lao, ‘o ne pehē ki ai, Tangata‘eiki, ‘i ho‘o lea pehē ‘oku ke tautea kimautolu foki.

46Pea folofola ‘e ia, ‘Io, ‘oiauē kimoutolu, ‘a e kau tufunga lao! he ‘oku mou fakauta ki he kakai ha ngaahi kavenga fuangata‘a; ka ‘oku ‘ikai te mou ala ‘e kimoutolu ki he ngaahi kavenga ko ia ‘aki ha fo‘i tuhu. 47‘Oiauē kimoutolu! he ‘oku mou langafale‘i ‘a e ngaahi fonualoto ‘o e kau palōfita, pea ko ho‘omou ngaahi kui ia na‘e tāmate‘i kinautolu. 48Tā ‘oku mou fakamo‘oni ki he ngaahi ngāue ‘a ho‘omou ngaahi kui, mo fakahā ho‘omou lotolelei ki ai: he na‘e ‘anautolu honau tāmate‘i, pea ‘oku ‘amoutolu honau langafale‘i. 49Ko hono ō ia foki ‘o e folofola mai ‘e he poto ‘a e ‘Otua, ‘o pehē, Te u fekau atu kiate kinautolu ha kau palōfita mo ha kau ‘aposetolo, pea te nau tāmate‘i honau ni‘ihi mo fakafe‘ātungia: 50koe‘uhi ke ‘eke tāupau ki he to‘utangata ni ‘a e toto kotoa ‘o e kau palōfita, ‘a ia kuo lilingi talu ‘e tanu pou ‘o māmani; 51mei he toto ‘o ‘ēpeli, ‘o a‘u ki he toto ‘o Sākalaia, ‘a ia na‘e tāmate‘i ‘i he vaha‘a ‘o e ‘ōlita mo e Fale Tapu: ‘Io, ‘oku ou tala atu, ‘e ‘eke tāupau ia ki he to‘utangata ko eni.#Sēn 4.8; 2 Kal 24.20-21

52‘Oiauē kimoutolu, ‘a e kau tufunga lao! he kuo mou ‘ave ‘a e kī ‘o e poto: kuo ‘ikai te mou hū ki ai kimoutolu, pea mou ta‘ofi ‘a kinautolu na‘e mei hū.

53Pea ‘i he‘ene ‘alu atu mei he potu ko ia, na‘e hanga leva ‘a e kau sikalaipe mo e kau Fālesi, ‘o feta‘omi mai, ko e me‘a faka‘ulia, mo nau ‘ulufehu‘ia ia ‘i he ngaahi me‘a lahi; 54ko ‘enau tokamalumu kiate ia ke pō ha me‘a mei hono fofonga.

Currently Selected:

Luké 11: TMB

Highlight

Copy