Sioné 7

Ko Sīsū mo Hono Fanga tehiná

1PEA hili ia, na‘e fononga fano ‘a Sīsū ‘i Kāleli: he na‘e ‘ikai te ne loto ke ‘alu holo ‘i Siutea, koe‘uhi na‘e feinga ‘a ha‘a Siu ke tāmate‘i ia. 2Pea faifai pea panaki ‘a e kātoanga ‘a ha‘a Siu, ‘a e kātoanga nofo fale lou‘akau.#Lev 23.34; Teu 16.13 3Ko ia na‘e lea ai kiate ia ‘e hono ngaahi tokoua, ‘o pehē, Ke ke hiki mei heni, ‘o mole ki Siutea; koe‘uhi ke mamata ho‘o kau ako foki ki ho‘o ngaahi ngāue na ‘oku ke fai. 4He tala‘ehai ‘oku ai ha taha te ne fai fufū ha me‘a; ‘osi, ‘oku ne feinga ke ato, Kapau leva oku ke fai ‘a e ngaahi me‘a ko ia, pe‘i ‘ai ke ke e‘a ki māmani. 5He na‘a mo hono ngaahi tokoua na‘e ‘ikai te nau tui pīkitai kiate ia.

6Pea lea ai ‘a Sīsū kiate kinautolu, Ko hoku taimi kuo te‘eki hokosia: ka ko homou taimi ‘oku hoko ma‘u pē. 7Tala‘ehai ‘e lava ‘e māmani ke fehi‘a kiate kimoutolu: ko au pē ‘oku ne fehi‘a ki ai, koe‘uhi ko au pē ‘oku ou fakahaa‘ia ‘oku kovi ‘ene ngaahi ngāue. 8Mou ‘alu hake kimoutolu ki he kātoanga: ‘e ‘ikai te u ‘alu leva#7.8 ‘e ‘ikai te u ‘alu leva: Ko hono fakalea ia ‘i he ngaahi hiki fuoloa ‘e ni‘ihi, ka ‘oku ngali tonu ange ‘a e: ‘e ‘ikai te u ‘alu. ki he kātoanga ni; koe‘uhi kuo te‘eki kakato hoku taimi. 9Hili ‘ene lea pehē kiate kinautolu, na‘a ne nofo pē ‘i Kāleli.

Ko Sīsū ‘i he Kātoanga ‘o e Palepalé

10Ka ‘oka hili ‘a e ‘alu ‘a hono kāinga ki he kātoanga, pea toki ‘alu hake mo ia foki; kae ‘ikai fakae‘a, kae hangē ha ‘alu fufū. 11Ko ia na‘e kumi kiate ia ‘e ha‘a Siu ‘i he kātoanga, ‘o nau pehē, Kofa‘ā ‘a e siana ko ia?

12Pea na‘e lahi ‘a e lāutu‘u ‘iate ia ‘a e kakai: na‘e pehē ha ni‘ihi, Ko e tangata lelei ia: ka ka pehē ‘e he ni‘ihi, ‘Oku ‘ikai; ka ‘oku ne takihee‘i ‘a lāuvale. 13Ka tala‘ehai na‘e ai ha taha ‘e lea mālohi ‘iate ia, ko ‘enau manavahē ki ha‘a Siu.

14Pea kuo ‘osi mai hono vaeua ‘o e kātoanga, pea me‘a hake ‘a Sīsū ki he Temipale, ‘o ne faiako ai. 15Pea ofo ai ‘a ha‘a Siu ‘o nau pehē, ‘Oku ma‘u mei fē ‘e he Siana ni ‘ene poto ‘i he ngaahi tohi, he na‘e ‘ikai te ne ‘i ha ako?

16Pea tali ai ‘e Sīsū kiate kinautolu, ‘o pehē, Ko ‘eku tokāteline ‘oku ‘ikai ‘a‘aku, ka ‘oku ‘a‘ana na‘a ne fekau mai au. 17Kapau ko e loto ‘o ha taha ke fai ‘a e finangalo ‘o ‘ene ‘afio, ‘e faifai pea mahino kiate ia ‘eku tokāteline, pe ko e me‘a mei he ‘Otua ia, pe ko au pē ‘oku ou lea ‘iate au. 18Ko ia ‘oku lea meiate ia pē, ‘oku ne tuli pē ki hono ongoongo ‘o‘ona; ka ko ia ‘oku ne tuli ki he ongoongo ‘o ia na‘a ne fekau mai ia, ko e toko taha ko ia ‘oku mo‘oni, pea ‘oku ‘ikai ha ta‘etotonu ‘i ai. 19‘Ikai na‘e ‘atu ‘e Mōsese ‘a e Lao kiate kimoutolu, ka tala‘ehai ‘oku tauhi ‘a e Lao ‘e hamou toko taha? Ko e hā ē, ho‘omou tuli ke tāmate‘i au?

20Pea tali ‘a e kakai, ‘Oku ‘iate koe ha tēvolo: ko hai ‘oku tuli ke tāmate‘i koe?

21Pea tali ‘e Sīsū, ‘o ne pehē kiate kinautolu, Ko e fo‘i ngāue e ne u fai, pea mou ofo ai kotoa pē. 22Ko hono ‘uhinga ia na‘e tuku ‘e Mōsese kiate kimoutolu ‘a e kamu; (ka tala‘ehai ko e me‘a ‘a Mōsese ia, ka ko e me‘a mei he‘enau ngaahi kui) pea neongo ko e Sāpate, ka ‘oku mou kamu pē ha tangata.#Sēn 17.10; Lev 12.3 23Pea kapau ā ‘oku fai ‘a e kamu ki ha tangata ‘i he ‘aho Sāpate, koe‘uhi ke ‘oua na‘a maumau ‘a e Lao ‘a Mōsese; pea ‘oku mou ‘ita koā kiate au, koe‘uhi ko ‘eku ngaohi ha tangata ke mo‘ui haohaoa ‘i he ‘aho Sāpate?#Sioné 5.9 24‘Oua na‘a mou fakaanga ‘o fai ki he me‘a ‘oku ha kitu‘a; ka mou fakaanga ke totonu.

Ko e Mīsaiá Nai ‘a Sīsū?

25Ko ia na‘e lea ha ni‘ihi mei he kakai ‘o Selusalema, ‘Ikai ko eni ia ‘oku nau tuli ke tāmate‘i? 26Pea vakai, ‘oku ne lea mālohi, pea ‘oku ‘ikai te nau momo‘i fai ha lau ki ai. Kuo ha mo‘oni koā ki he hou‘eiki ko e Mīsaia ‘eni, ‘o? 27Ka ko e me‘a ki he siana ni, ‘oku tau lāu‘ilo ‘a e potu ‘oku ne ha‘u mei ai: ka ‘oka hoko mai ‘a e Mīsaia, tala‘ehai ‘e ‘ilo ‘e ha taha, pe ‘oku ne mei fē.

28Ko ia na‘e kalanga ‘a Sīsū ‘i hē, Temipale ‘i he‘ene fai ako, ‘o ne pehē, ‘Oku mo‘oni ‘oku mou ‘ilo au, pea ‘oku mou ‘ilo ‘a e potu ‘oku ou ha‘u mei ai: pea tala‘ehai kuo u ha‘u ‘iate au pē, ka ‘oku ‘i ai ha toko taha, ko e mo‘oni, na‘a ne fekau mai au, ‘a ia ‘oku ‘ikai te mou ‘ilo‘i ‘e kimoutolu. 29‘Oku ou ‘ilo ia ‘e au: he ‘oku ou meiate ia, pea ko ia ia na‘a ne fekau mai au.

30Ko ia na‘a nau feinga ke puke ia: ka na‘e ‘ikai ala mālohi kiate ia ‘e ha taha, koe‘uhi kuo te‘eki hokosia hono taimi. 31Pea na‘e tui pīkitai kiate ia ha tokolahi ‘o lāuvale, ‘o nau pehē, Neongo ‘e ha‘u ‘a e Mīsaia, ‘e lahi koā ‘ene mana te ne fai ‘i he fai ‘a e tangata ni?

Ko Hono Fekau ke Puke ‘a Sīsū

32Pea fanongo ‘a e kau Fālesi ki he mumuhu pehē ‘a e kakai kiate ia; pea fekau ‘e he hou‘eiki taula‘eiki mo e kau Fālesi ha kau ‘ōfisa ke puke ia. 33Ko ia na‘e folofola ai ‘a Sīsū, ‘o pehē, ‘Oku toe si‘i pē ‘eku ‘iate kimoutolu, pea u ‘alu kiate ia na‘a ne fekau mai au. 34Te mou kumi au, ka ‘e ‘ikai te mou ‘ilo au: pea ko e potu ‘oku ou ‘i ai ‘e ‘ikai te mou fa‘a a‘u ki ai.

35Ko ia na‘e fealēlea‘aki ai ‘a ha‘a Siu, Ko e teu ‘alu ki fē ‘a e siana ni, ‘a ia ‘e ‘ikai te mau ‘ilo ai ia? he ‘oku ne teu ‘alu koā ki he koto movete na ko e kau Kalisi, ke ako ‘a e kau Kalisi? 36Ko e hā ‘ene lea ko eni ‘oku ne pehē, Te mou kumi au, ka ‘e ‘ikai te mou ‘ilo au; pea ko e potu ‘oku ou ‘i ai, ‘e ‘ikai te mou fa‘a a‘u ki ai?

Ko e Ngaahi Tafenga Vai Fakamo‘ui

37Pea ko eni, ‘i he ‘aho faka‘osi ‘o e kātoanga, hono ‘aho lahi, na‘e hanga ‘a Sīsū ‘o tu‘u, ‘o ne kalanga ‘o pehē, Ka ai ha taha ‘oku fie inua, ke ne ha‘u kiate au ‘o inu.#Lev 23.36 38‘Ilonga ‘a ia ‘oku tui pīkitai kiate au, pea hangē ko e lau ‘a e Tohitapu, ‘e tafe atu mei hono manava ha ngaahi vaitafe ‘o e vai mo‘ui.#7.38 ‘Oku ngali tonu hono hiki ‘o: ‘Ilonga ‘a ia ‘oku tui kiate au, ke ne inu. Hangē ko e lau ‘a e Tohitapú, “‘E tafe atu ha vaitafe ‘o e vai fakamo‘ui mei hono kapa‘i keté.” Ka Ko hono hiki ‘e taha ‘o e ngaahi lea ‘a Sīsū ‘i he veesi 37-38 ko e: ‘Ilonga ‘a ia ‘oku fieinua, ke ne ha‘u kiate au ‘o inu. Hangē ko e lau ‘a e Tohitapú, ‘e tafe atu mei he manava ‘o ha taha pē ‘e tui kiate au ha ngaahi vaitafe ‘o e vai mo‘ui. 39(Ka na‘e kau ‘ene lea ko ia ki he Laumālie, ‘a ia ka ma‘u ‘e kinautolu na‘e tui pīkitai kiate ia: he kuo te‘eki ai ‘a e Laumālie, koe‘uhi kuo te‘eki fakalāngilangi‘i ‘a Sīsū.)#‘Isi 47.1; Sāk 14.8

Ko e Fakafa‘afa‘ahi ‘a e Kakaí

40Pea ko e ni‘ihi ‘o lāuvale, ‘i he‘enau fanongo ki he ngaahi lea ko ia, na‘a nau pehē, Tā ko e mo‘oni, ko eni ia ‘a e Palōfita.#7.40 ‘a e Palōfitá; Vakai ki he 1.21.

41Pea pehē ‘e he ni‘ihi, Ko eni ia ‘a e Mīsaia. Ka ka pehē ‘e ha ni‘ihi, He ‘oku ha‘u koā ‘a e Mīsaia mei Kāleli, ‘o?

42‘Ikai ‘oku lau ‘e he Tohitapu, ‘e tupu ‘a e Mīsaia mei he hako ‘o Tēvita, pea te ne ha‘u mei Pētelihema, ko e vilisi na‘e ‘i ai ‘a Tēvita?#2 Sām 7.12; Maiká 5.2 43Ko ia na‘e hoko ha mavahevahe ‘i he kakai koe‘uhi ko ia. 44Pea na‘e loto honau ni‘ihi ke puke ia; ka tala‘ehai na‘e ‘i ai hanau taha ‘e ala fakamālohi ki ai.

Ko Hono Fakasītu‘a‘i ‘o Sīsū ‘e he Kau taki ‘o e Kakai Siú

45Pea omi ai ‘a e kau ‘ōfisa ki he hou‘eiki taula‘eiki mo e Fālesi; pea me‘a kiate kinautolu ‘a e hou‘eiki ko ia, Ko e hā kuo ‘ikai ai te mou taki mai ia?

46Pea tali ‘a e kau ‘ōfisa, ‘Ā, Te‘eki ha tangata ‘e lea hangē ko ia.

47Pea tali ‘a e kau Fālesi ki ai, Kuo taki hē mo kimoutolu foki, ‘o? 48Hono ai ha taha ‘i he hou‘eiki kuo tui kiate ia, pe ha taha ‘o e kau Fālesi? 49Ka ko lāuvale na ta‘e‘ilo ki he Lao, ko e koto mala‘ia kinautolu.

50Pea pehē ‘a Nikotimasi kiate kinautolu, (‘a ia na‘e ha‘u kiate ia ‘i mu‘a, ko e toko taha foki ia ‘iate kinautolu),#Sioné 3.1-2 51He ko e anga ‘o ‘etau lao ke fakamaau ha tangata, ‘i he te‘eki ke fanongo ki ha‘ane fakamatala, pe mahino ‘a e me‘a kuo ne fai?

52Pea nau tali ‘o pehē ki ai, He ko e Kāleli foki mo koe? Hākule mu‘a ‘o ‘ilo, ‘oku ‘ikai ha palōfita ‘e tupu#7.52 ‘oku ‘ikai… tupu; ‘Oku pehē ‘i hono hiki fuoloa ‘e taha: ‘e ‘ikai tupu ‘a e Palōfitá ‘i Kāleli. mei Kāleli. 53Pea nau ‘alu takitaha ki hono ‘api.

Currently Selected:

Sioné 7: TMB

Highlight

Copy