Sioné 8
8
Ko e Fēfine Na‘e Ma‘u Atu ‘Ene Fe‘auaki
1KA ka ‘alu ‘a Sīsū ki he mo‘unga ko ‘Ōlive. 2Pea ne toe uhu ki he Temipale, pea tātānaki mai kiate ia ‘a e kakai kotoa; pea ne nofo hifo ‘o ako kinautolu. 3Pea taki mai ‘e he kau sikalaipe mo e kau Fālesi ha fefine, na‘e mo‘ua ‘ene angahala: pea nau fokotu‘u ia ‘i he ha‘oha‘onga. 4Pea toki lea kiate ia ‘e he kau taula‘eiki, ko ‘enau tauhele ia, hei‘ilo te nau ma‘u ai ha me‘a mōno talatalaaki‘i, ‘o nau pehē, Tangata‘eiki, ko e fefine ni na‘e mātu‘aki puke he‘ene tono tangata. 5Pea ko Mōsese na‘a ne tu‘utu‘uni ‘i he Lao, ke tolomaka‘i ‘a e fa‘ahinga pehē: ka ko e hā ho‘o lau ‘A‘au ki ai?#Lev 20.10; Teu 22.22-24 6Ka ka punou hifo ‘a Sīsū, ‘o ne kamata tohi ‘i he kelekele ‘aki hono tuhu. 7Ka ‘i he‘enau nafui ‘enau fehu‘i, na‘a ne mālanga hake, ‘o ne folofola kiate kinautolu, Ko ia ‘iate kimoutolu ‘oku ‘ata‘atā mei he angahala, ke ‘a‘ana ‘a e fuofua tolo ki he fefine. 8Pea ne toe punou, ‘o tohi ‘i he kelekele ‘aki hono tuhu. 9Ka ka hūhū taha ki tu‘a ‘a ha‘a Siu, ‘o fua fai mei he mātu‘a, kae ‘oua ke nau ‘osi ki tu‘a: pea na‘e toe ‘a Sīsū toko taha, pea mo e fefine na‘e kei tu‘u ‘i he ha‘oha‘onga. 10Pea malanga hake ‘a Sīsū, ‘o ne pehē ki he fefine, Kofa‘ā kinautolu? Kuo ‘ikai ha taha te ne fakamāu‘i koe?
11Pea pehē ange ‘e he fefine, ‘Eiki, ‘oku ‘ikai.
Pea me‘a ‘e ia, Pea ‘e ‘ikai te u fakamāu‘i koe ‘e au: ‘alu ā; hili ‘eni ‘oua te ke toe fai angahala.#8.11 ‘Oku lahi ‘a e ngaahi hiki fuoloa mo e ngaahi liliu motu‘a ‘o Sione ‘oku ‘ikai ke ‘asi ai ‘a e 8.1-11. ‘Oku fakahū ‘i he ngaahi hiki fuoloa ‘e ni‘ihi ‘i he vaha‘a ‘o e 21.24 mo e 21.25; pea ‘i he ni‘ihi ‘i he ‘osi ‘a Luk 21.38; ‘i he hiki fuoloa ‘e taha ‘oku tu‘u ia ‘i he ‘osi ‘a Sioné 7.36.
Ko Sīsuú Ko e Māma‘anga ‘o Māmani
12Pea toe folofola ‘a Sīsū kiate kinautolu, ‘o pehē, Ko au pē ko e Maama ‘o Māmani: ko ia ‘oku ne muimui kiate au, ‘e ‘ikai ‘aupito te ne fononga ‘i he po‘uli, ka te ne ma‘u ‘a e maama ‘o e mo‘ui.#Māt 5.14; Sioné 9.5
13Ko ia na‘e lea ai ‘a e kau Fālesi kiate ia, ‘Oku ke fakamo‘oni koe ‘e koe; ta ko ho‘o fakamo‘oni ‘oku ‘ikai mo‘oni.#Sioné 5.31
14Pea tali ‘e Sīsū ‘o me‘a kiate kinautolu, Neongo ‘oku ou fakamo‘oni au ‘e au, ka ‘oku mo‘oni pē ‘eku fakamo‘oni: koe‘uhi ‘oku ou ‘ilo ‘a e potu na‘a ku ha‘u mei ai, mo e potu ‘oku ou ‘alu ki ai; ka ko kimoutolu, ‘oku ‘ikai te mou ‘ilo pē ‘oku ou ha‘u mei fē, pe ‘alu ki fē. 15‘Oku mou fakaanga fakakakano pē ‘e kimoutolu; ka ko au ‘oku ‘ikai te u anga‘i ha taha. 16Pea neongo foki ‘oku ou fakaanga, ka ‘oku totonu ‘eku fakaanga: koe‘uhi ‘oku ‘ikai te u toko taha, ka ‘oku ma toko ua mo e Tamai na‘a ne fekau mai au. 17Pea kuo tohi foki ‘i ho‘omou lao, kapau ko e fakamo‘oni ‘a ha ongo tangata, pea tā ‘oku mo‘oni.#Teu 19.15 18Ko au pē ha taha ‘oku fakamo‘oni kiate au, pea ‘oku fakamo‘oni kiate au ‘e he Tamai na‘a ne fekau mai au.
19Ko ia na‘a nau pehē kiate ia, Kofa‘ā ia ho‘o tamai na?
Pea tali ‘e Sīsū, ‘Oku ‘ikai te mou ‘ilo au, pea ‘oku ‘ikai te mou ‘ilo ‘eku Tamai: ka ne mou ‘ilo au, pehē ne mou ‘ilo mo ‘eku Tamai foki.
20Ko e ngaahi lea ko ia na‘a ne fai ‘i he potu ‘o e seifi, ‘i he‘ene faiako ‘i he Temipale: pea na‘e ‘ikai puke ia ‘e ha taha; koe‘uhi kuo te‘eki hokosia hono taimi.
Ko e Teu Māvae ‘a Sīsū mo ‘Ene Kau Akó
21Pea na‘a ne toe me‘a kiate kinautolu, ‘Oku ou ‘alu au, pea te mou kumi au, pea te mou mate ‘i ho‘omou angahala: ko e potu ‘oku ou ‘alu ki ai, ‘e ‘ikai te mou lava ke a‘u ki ai ‘e kimoutolu.
22Ko ia na‘e lea ai ‘a ha‘a Siu He te ne tāmate‘i ‘e ia ia, ‘a ia, ‘oku ne pehē ai, Ko e potu ‘oku ou ‘alu ki ai, ‘e ‘ikai te mou lava ke a‘u ki ai ‘e kimoutolu?
23Pea ne pehē kiate kinautolu, Ko kimoutolu ‘oku mou mei lalo: ko au ‘oku ou mei ‘olunga: ko kimoutolu ‘oku mou ‘o e maama ko eni: ‘oku ‘ikai te u ‘o e maama ko eni au. 24Ko ia na‘a ku pehē ai kiate kimoutolu, Te mou mate ‘i ho‘omou ngaahi angahala: he kapau ‘e ‘ikai te mou tui ko au ia, te mou mate ‘i ho‘omou ngaahi angahala.
25Ko ia na‘a nau pehē ai kiate ia, Ko hai tū koe? Pea folofola ‘a Sīsū kiate kinautolu, ‘Ā, ko e hā ‘oku ou momo‘i talanoa ai mo kimoutolu?#8.25 ‘Ā… kimoutolu?; pe ‘A ia na‘á ku tala atu mei he kamata‘angá pē.
26‘Oku lahi pē ‘eku me‘a ke lea ki ai, mo ‘eku fakaanga ke fai ‘iate kimoutolu–ka neongo ia, ka ‘oku mo‘oni ‘a ia ne fekau mai au; pea ko e ngaahi me‘a kuo u fanongo meiate ia, ‘oku ou tala ia ki māmani.
27Na‘e ‘ikai mahino kiate kinautolu, ko ‘ene lea kiate kinautolu ‘i he Tamai. 28Ko ia na‘e folofola ai ‘a Sīsū, ‘Oka mou ka hiki ki ‘olunga ‘a e Fanautama ‘a Tangata, ‘e toki mahino kiate kimoutolu, ko au ia, mo e ‘ikai te u momo‘i fai ha me‘a ‘iate au; kae hangē tofu pē hoku ako ‘e he Tamai, ‘oku pehē ‘eku tala ‘a e ngaahi me‘a ko eni. 29Pea ko ia na‘a ne fekau mai au ‘oku ne ‘iate au: na‘e ‘ikai te ne tuku au ke tuēnoa; koe‘uhi ‘oku ou fai ma‘u ai pē ‘a e ngaahi me‘a ‘oku ne hōhō‘ia ai.
30‘I he‘ene lea pehē, na‘e ai ha tokolahi na‘e tui pīkitai kiate ia.
Ko e Mo‘oní mo e Tau‘atāiná
31Pea lea ai ‘a Sīsū kiate kinautolu ‘o ha‘a Siu kuo tui kiate ia, Kapau te mou nofo ma‘u ‘i he‘eku akonaki, ko ‘eku kau ako mo‘oni kimoutolu; 32pea ‘e faifai pea mahino kiate kimoutolu ‘a e mo‘oni, pea ‘e fakatau‘atāina ‘a kimoutolu ‘e he mo‘oni.
33Pea nau tali ai kiate ia, Ko e hako ‘o ‘Epalahame kimautolu, pea kuo te‘eki ke mau pōpula ki ha taha ‘i ha taimi: pea fēfē ai ho‘o lau na, ‘o pehē, ‘e faifai pea mou tau‘atāina?#Māt 3.9; Luk 3.8
34Pea tali ‘e Sīsū kiate kinautolu, Ko au ē, ko au ē, ‘oku ou tala atu, ‘Ilonga ‘a ia ‘oku fai angahala, ko e pōpula ia ‘a angahala. 35Pea ko e pōpula ‘oku ‘ikai te ne nofo ‘i he fale ‘o ta‘engata: ko e ‘Alo pē ‘oku nofo ‘o ta‘engata. 36Ko ia kapau ‘e fakatau‘atāina kimoutolu ‘e he ‘Alo, te mou toki tau‘atāina mo‘oni. 37‘Oku ou ‘ilo pē ko e hako ‘o ‘Epalahame kimoutolu; ka neongo ia, ka ‘oku mou feinga ke tāmate‘i au, koe‘uhi ‘oku ‘ikai ke lalaka atu ‘a ‘eku akonaki ‘i homou loto. 38Ko au ‘oku ou tala atu ‘a e ngaahi me‘a kuo u mamata ki ai ‘i he‘eku ‘i he Tamai: ko ia foki mou fai ‘e kimoutolu ‘a e ngaahi me‘a ne mou fanongo mei he Tamai.
39Pea nau tali ‘o pehē ki ai, Ko ‘emau tamai ko ‘Epalahame ia. Pea lea ‘a Sīsū kiate kinautolu, Kapau ko e fānau ‘a ‘Epalahame kimoutolu, pe‘i mou fai#8.39 Kapau… pe‘i mou fai; ‘Oku pehē ‘i hono ngaahi hiki fuoloa ‘e ni‘ihi: Ka ne mo‘oni ko e fānau kimoutolu ‘a ‘Epalahame, ne mou fai. ‘a e ngaahi ngāue ‘a ‘Epalahame.
40Ka vakai, ‘oku mou feinga ke tāmate‘i au, ‘a au ko e tangata kuo u tala kiate kimoutolu ‘a e mo‘oni, ‘a ia na‘a ku fanongo ki ai mei he ‘Otua: tala‘ehai ne fai ‘e ‘Epalahame ha me‘a pehē. 41Ka ko kimoutolu ‘oku mou fai tu‘u ‘a e ngaahi ngāue ‘a ho‘omou Tamai.
Pea nau pehē ki ai, Tala‘ehai kuo mau tupu fe‘auaki kimautolu; ‘oku taha pē ‘emau tamai, ko e ‘Otua.
42Pea folofola ‘a Sīsū kiate kinautolu, Ka ne ko ho‘omou tamai ‘a e ‘Otua, pehē te mou ‘ofa kiate au: he ko e ‘Otua na‘a ku ha‘u mei ai, pea ‘oku ou ‘i heni ai; ‘io, ko ‘eku ha‘u foki na‘e ‘ikai ‘iate au, ka na‘e fekau mai au ‘e he ‘Ene ‘Afio. 43Ko e hā ‘oku ‘ikai ai te mou ‘ilo hoku le‘o? koe‘uhiā ‘oku ‘ikai te mou fa‘a tali ‘eku akonaki. 44Ko e tamai kuo mou tupu mei ai ko e Tēvolo, pea ko e ngaahi manako ‘o ho‘omou tamai ‘oku mou loto ke fai, Ko e toko taha ko ia ko e tāmate-tangata mei he kamata‘anga, pea na‘e ‘ikai te ne tu‘unga ki he mo‘oni, koe‘uhiā ‘oku ‘ikai ha mo‘oni ‘iate ia. ‘oka lea loi hamou toko taha, ko ‘ene lea‘aki mei hono fa‘ahinga: he ko e loi ia, pea pehē mo ‘ene tamai. 45Ka koe‘uhi ko ‘eku lea‘aki ‘a e mo‘oni, ko ia ai ‘oku ‘ikai te mou tui kiate au. 46Ko hai ‘iate kimoutolu ‘oku ne mafakamo‘oni ha‘aku momo‘i angahala pea kapau ‘oku ou lea mo‘oni, ko e hā ‘oku ‘ikai ai te mou tui kiate au? 47Ko ia kuo ‘o e ‘Otua, ‘oku ne tali ‘a e ngaahi folofola ‘a e ‘Otua: ko hono ‘uhinga ē ‘oku ‘ikai ai te mou tali, koe‘uhi ‘oku ‘ikai ‘o e ‘Otua ‘a kimoutolu.
Ko Sīsū mo ‘Ēpalahame
48Pea tali ‘e ha‘a Siu, ‘o nau pehē ki ai, Hono ‘ikai mo‘oni ‘a e lea ‘oku mau fai, ‘o pehē, Ko e Samēlia koe, mo e ‘iate koe ha tēvolo?
49Pea tali ‘a Sīsū, Ko au ‘oku ‘ikai te u tēvoloa; kaekehe, ‘oku ou faka‘apa‘apa‘ia ‘eku Tamai, pea ko kimoutolu pē ‘oku mou fakalielia‘i au. 50Ka ko au ‘oku ‘ikai te u feinga‘i ‘a e ongoongo ‘o‘oku: ‘oku ‘i ai ha toko taha ‘oku ne feinga‘i ia, pea ‘oku ne fakamaau ‘a e me‘a. 51Ko au ē, ko au ē, ‘oku ou tala atu, Kapau kuo tauhi ‘eku lea ‘e ha taha, ‘e ‘ikai ‘aupito te ne mamata ki he mate ‘o ta‘engata.
52Pea lea ai kiate ia ‘a ha‘a Siu, ‘āua; kuo mau ‘ilo ‘eni ‘oku ‘iate koe ha tēvolo. Ko ‘Epalahame na‘a ne pekia, pea mo e kau Palōfita; pea ko eni ‘oku ke pehē ‘e koe, Kapau kuo tauhi ‘eku lea ‘e ha taha, ‘e ‘ikai ‘aupito te ne kamata ‘a e mate, ‘o ta‘engata. 53He ‘oku ke lahi koā ‘i he‘etau tamai ko ‘Epalahame? ka kuo pekia ia, pea kuo pekia mo e kau Palōfita: ‘oku ke lau ko hai koe?
54Pea tali ‘e Sīsū, Kapau te u fakahīkihiki‘i au ‘e au, ko e launoa hoku ongoongo; ko ‘eku Tamai ia ‘oku ne fakahīkihiki‘i au, ‘a ‘Ene ‘Afio ‘a ia ‘oku mou pehē, ko homou ‘Otua ia: 55ka tala‘ehai kuo mou ‘ilo‘i ia; ka ko au ‘oku ou lāu‘ilo ia; ‘io, kapau te u pehē ‘oku ‘ikai te u ‘ilo ia, tā te u tatau mo kimoutolu, ko e loi: ka ‘oku ou lāu‘ilo pē ‘a ‘Ene ‘afio, pea ‘oku ou tauhi ‘ene folofola. 56Ko ‘Epalahame ko ho‘omou tamai, na‘a ne hākailangitau ‘i he‘ene ‘ilo te ne mamata ki hoku ‘aho: pea na‘a ne mamata ki ai, ‘o ne fiefia.
57Pea lea ‘e ha‘a Siu, ‘Ā, kuo te‘eki ke ke nimangofulu ta‘u, pea kuo ke mamata koā kia ‘Epalahame?#8.57 kuó ke… ‘Epalahame? ‘Oku pehē ‘i hono ngaahi hiki fuoloa ‘e ni‘ihi: kuo mamata koā ‘a ‘Epalahame kia koe?
58Pea folofola ‘a Sīsū kiate kinautolu, Ko au ē, ko au ē, ‘oku ou tala atu, Te‘eki ke fanau‘i ‘a ‘Epalahame, ‘oku ou ‘i ai pē.
59Pea nau to‘o maka ai ke pe‘ehi kiate ia: ka fufū pē ‘e Sīsū ia, ‘o ne ‘alu atu mei he Temipale.
Currently Selected:
Sioné 8: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
