Sioné 6

Ko Hono Fafanga ‘o e Toko Nima Afe

(Māt 14.13-21; Ma‘ake 6.30-44; Luk 9.10-17)

1PEA faifai pea ‘alu mei ai ‘a Sīsū ki he kauvai ‘o e Tahi ‘o Kāleli, ‘a ia ko e Tahi ‘o Taipiliō. 2Pea na‘e muimui tu‘u kiate ia ha fu‘u kakai lahi, koe‘uhi ko ‘enau mamata ki he ngaahi mana na‘a ne fai kiate kinautolu na‘e mahaki. 3Pea ‘alu hake ‘a Sīsū ki he mo‘unga, ‘o ne nofo hifo ai mo ‘ene kau ako. 4Pea na‘e panaki ‘a e Pāsova, ko e kātoanga ‘a ha‘a Siu. 5Pea hanga hake ai ‘a Sīsū ‘o ne vakai, tā ko e fu‘u kakai ‘ena ‘oku ha‘u kiate ia; pea ne pehē kia Filipe, Te tau fakatau mei fē ha mā mo kai ‘a e kakai na? 6Ka ko ‘ene lea pehē ko ‘ene ‘ahi‘ahi‘i ia: he na‘e mea‘i ‘e he ‘Ene ‘Afio ‘a e me‘a ‘oku ne ‘amanaki fai.

7Pea tali ‘e Filipe ki ai, Neongo ‘e onongeau‘i tēnali#6.7 tēnali; Ko e tēnalí ko e pa‘anga ia na‘e fe‘unga hono mahu‘ingá mo ha ngāue faama ‘a ha tokotaha ‘i ha ‘aho ‘e taha (vakai kia Māt 20.2). ha mā, ka ‘e ‘ikai fe‘unga ke nau taki taha to‘o ha me‘a si‘i.

8Pea lea kiate ia ha toko taha ‘o ‘ene kau ako, ko ‘Anitelū ko e tokoua ‘o Saimone Pita, ‘o pehē, 9‘Oku ‘i ai ha tamasi‘i ‘i heni, ‘oku ne ma‘u ha fo‘i mā pa‘ale ‘e nima, mo ha mata‘i ika ‘e ua: ka ko e hā ‘a e me‘a ko ia ki ha tokolahi pehē?

10Pea me‘a mai ‘a Sīsū, Fekau ke tākoto ‘a e kakai. Pea na‘e musie‘ia ‘a e potu ko ia. Ko ia na‘e tākoto ai ‘a e kau tangata: na‘e fe‘unga nai hono lau mo e toko nima afe. 11Pea to‘o ai ‘e Sīsū ‘a e ngaahi fo‘i mā; pea ne fai ha fakafeta‘i, ‘o ne toki tufa kiate kinautolu ‘oku tākoto; pea pehē foki mo ‘ene ‘atu mei he ongo ika, ‘o fai pē ki he‘enau tangi. 12Pea kuo nau fu‘u mākona, pea ne pehē ki he‘ene kau ako, Mou tānaki ‘a e ngaahi mapakipaki‘i mā ‘oku toe, ke ‘oua na‘a maumau ha me‘a. 13Ko ia na‘a nau tātānaki, pea nau fakapito ha kato fakahunga ‘e hongofulu mā ua ‘i he ngaahi konga mei he fo‘i mā pa‘ale ‘e nima, ‘a ia na‘e toe ‘iate kinautolu na‘e kai.

14Ko ia ‘i he vakai ‘a e kakai ki he mana kuo ne fai, na‘a nau pehē, Ko eni mo‘oni ia ‘a e palōfita#6.14 ‘a e palōfitá; Vakai ki he 1.21. ka ha‘u ki māmani. 15Ko ia ‘i he mea‘i ‘e Sīsū, ‘oku nau teu ke ha‘u ‘o ‘ave fakamālohi ia, ‘o fakanofo ke tu‘i, pea ne toe ‘alu hake ki he mo‘unga ‘e ia toko taha.

Ko e Laka Atu ‘a Sīsū he Fukahi Vaí

(Māt 14.22-33; Ma‘ake 6.45-52)

16Pea kuo efiafi, na‘e ‘alu hifo ‘ene kau ako ki tahi, 17pea nau heka ki ha vaka, ‘o nau kamata ‘alu ki he kauvai ki Kāpaneume. Pea ko eni kuo po‘uli, pea kuo te‘eki a‘u mai kiate kinautolu ‘a Sīsū. 18Na‘e hou foki ‘a e tahi, ko e me‘a ‘i he fu‘u matangi kuo tō. 19Pea kuo nau ‘a‘alo ‘i he maile ‘e tolu pē fā, pea nau vakai ‘a Sīsū ‘oku ne hā‘ele ‘i he fukahi tahi, pea ‘oku ne fakaofiofi mai ki he vaka: pea nau manavahē. 20Ka ka lea ia kiate kinautolu, ‘o ne pehē, Ko au pē: ‘oua ‘e manavahē. 21Pea nau loto leva ke ma‘u ia ki he vaka: pea ‘iloange ne tau leva ‘a e vaka ki he fonua ‘oku nau ‘alu ki ai.

Ko Mā ‘oku Ma‘u ai ‘a e Mo‘uí

22Pongipongi hake, ko e kakai na‘e tutu‘u ‘i he kauvai na‘a nau vakai ‘oku taha tofu pē ‘a e ki‘i vaka ‘i he potu ko ia, pea na‘e ‘ikai heka vaka ‘a Sīsū mo ‘ene kau ako, ka na‘e ‘alu ‘a e kau ako pē: 23(Ka na‘e ‘i ai ha fanga ki‘i vaka na‘e omi mei Taipiliō, ‘o nau tau ofi ki he potu na‘a nau kai ai ‘a e mā hili hono fakafeta‘ia ‘e he ‘Eiki) 24Ko ia ‘i he ‘ilo ‘e he kakai, tā ‘oku ‘ikai ‘i he feitu‘u ko ia ‘a Sīsū, pe ko ‘ene kau ako, na‘a nau heka foki kinautolu ki he ngaahi ki‘i vaka, ‘o nau ‘alu ki Kāpaneume, ko e kumi ‘o Sīsū.

Ko Sīsū ko e Mā ‘o e Mo‘ui

25Pea ‘i he‘enau ‘ilo ia ‘i he kauvai, na‘a nau pehē ki ai, Lāpai, na‘a ke ha‘u fakakū ki heni?

26Pea tali ‘a Sīsū, ‘o ne folofola kiate kinautolu, Ko au ē, ko au ē, ‘oku ou tala atu, Ko ho‘omou kumi kiate au, ‘oku ‘ikai koe‘uhi ne mou sio faka‘ilonga, ka koe‘uhi na‘a mou kai ‘i he ngaahi fo‘i mā, ‘o mou mākona ai. 27Mou ngāue, kae ‘ikai ki he kai ‘oku mole, ka ki he kai ‘oku tolonga, ‘o iku ki he mo‘ui ta‘engata, ‘a ia ‘e ‘atu kiate kimoutolu ‘e he Fanautama ‘a Tangata: he ko e toko taha ko ia kuo sila‘i ‘e he Tamai, ‘e he ‘Otua.

28Pea nau pehē ai kiate ia, Ko e hā tū te mau fai, ka mau feia ‘a e ngaahi ngāue mei he ‘Otua?

29Pea tali ‘e Sīsū ‘o ne pehē kiate kinautolu, Ko eni ia ‘a e ngāue mei he ‘Otua, ke mou tui pīkitai kiate ia ne fekau mai ‘e he ‘Ene ‘Afio.

30Pea nau pehē ai kiate ia, Pea ko e hā ia ha me‘a ‘oku ke fai mo‘o faka‘ilonga, ke mau mamata ki ai ‘o tui kiate koe? ko e hā ho‘o ngāue ‘oku fai? 31Ko ‘etau ngaahi kui na‘a nau kai ‘a e mana ‘i he Toafa: ‘o hangē ko ia kuo tohi, Na‘a ne foaki kiate kinautolu ke kai, ha mā mei he langi.#‘Eki 16.4,15; Saame 78.24

32Pea folofola ai ‘a Sīsū kiate kinautolu, Ko au ē, ko au ē, ‘oku ou tala atu, Na‘e ‘ikai ko Mōsese na‘a ne foaki kiate kimoutolu ‘a e mā mei he langi;#6.32 Na‘e ‘ikai… langi; pe Ko e me‘a na‘e ‘oatu ‘e Mōsesé na‘e ‘ikai ko e mā mei he langí. ka ko ‘eku Tamai ‘oku ne foaki kiate kimoutolu ‘a e mā mei he langi, ‘a e mā mo‘onia. 33He ko e mā ‘a e ‘Otua, ko ia ia ‘oku ‘alu hifo mei he langi, ‘o ne foaki mo‘ui ki māmani.

34Ko ia na‘a nau pehē ai kiate ia, ‘Eiki, foaki mai kiate kimautolu ‘a e mā ko ia ma‘u ai pē.

35Pea folofola ‘a Sīsū kiate kinautolu, Ko au pē ko e Mā ‘o e Mo‘ui: ko ia ‘oku ha‘u kiate au ‘e ‘ikai ‘aupito te ne fiekaia; pea ko ia ‘oku tui pīkitai kiate au, ‘e ‘ikai ‘aupito te ne fie inua ha taimi. 36Ka na‘a ku tala kiate kimoutolu, Kuo mou mamata foki kiate au, kae ‘ikai tui. 37Ko e koto me‘a kātoa ‘oku foaki ‘e he Tamai kiate au ‘e ha‘u kiate au; pea ko ia ‘oku fotu mai kiate au, ‘e ‘ikai ‘aupito te u kapusi. 38Koe‘uhi kuo u ‘alu hifo mei he langi, ‘o ‘ikai ke u fai ‘a e loto ‘o‘oku, ka ko e finangalo ‘o ia na‘a ne fekau mai au. 39Pea ko eni ia ‘a e finangalo ‘o ia na‘a ne fekau mai au, koe‘uhi ko e me‘a kātoa kuo ne foaki mai, ke ‘oua na‘a ku tuku ke mole hano me‘a ‘e taha, kaekehe ke u fokotu‘u ia ‘i he ‘aho fakamui. 40He ko eni ia ‘a e finangalo ‘a ‘eku Tamai, ke ‘ilonga ‘a ia ‘oku ne siofia ‘a e ‘Alo, mo tui pīkitai kiate ia, ke ne ma‘u ‘a e mo‘ui ta‘engata; ka u fokotu‘u ia ‘e au ‘i he ‘aho fakamui.

41Ko ia na‘e lāutu‘u ai ‘a ha‘a Siu kiate ia, koe‘uhi ko ‘ene pehē, Ko au pē ko e mā na‘e ‘alu hifo mei he langi. 42Pea nau pehē, ‘Ikai ko Sīsū ‘eni, ko e foha ‘o Siosifa, ‘a ia ‘oku tau lāu‘ilo ‘ene tamai mo ‘ene fa‘ē? pea fēfē ai ‘ene lea ni, ‘o pehē, Kuo u ‘alu hifo mei he langi?

43Pea tali ‘e Sīsū ‘o ne pehē kiate kinautolu, ‘Oua te mou felāutu‘u‘aki. 44‘Oku ‘ikai lava ‘e ha taha ke ha‘u kiate au, ka ‘i he tohoaki ia ‘e he Tamai na‘a ne fekau mai au: pea ko au te u fokotu‘u ‘a e toko taha ko ia ‘i he ‘aho fakamui. 45Kuo tohi ‘i he Tohi palōfita, Pea te nau hoko kotoa pē ko e kau akonekina ‘e he ‘Otua. ‘Ilonga ‘a ia kuo fanongo mei he Tamai, pea kuo akonekina, ‘oku ne ha‘u kiate au.#‘Ais 54.13 46‘Oku ‘ikai ko e pehē kuo mātā ‘a e Tamai ‘e ha taha, ngata pē ‘i he toko taha ko ia ‘oku mei he ‘Otua: kuo mātā ‘a e Tamai ‘e he toko taha ko ia. 47Ko au ē, ko au ē, ‘oku ou tala atu, Ko ia ‘oku tui ‘oku ne ma‘u ‘a e mo‘ui ta‘engata. 48Ko au pē ko e mā ‘o e mo‘ui. 49Ko ‘amou ngaahi kui na‘a nau kai ‘i he Toafa ‘a e mana, pea nau mate pē. 50Ko eni ia ‘a e mā ‘oku ‘alu hifo mei he langi, ‘a ia ‘oku ha‘u ke kai ai ha taha ‘o ‘oua ‘e mate. 51Ko au pē ko e Mā ‘oku Mo‘ui, ‘a ia ne ‘alu hifo mei he langi: kapau ‘e kai ‘e ha taha mei he mā ko eni te ne mo‘ui pē ‘o ta‘engata: pea ko e mā foki te u ‘atu ko hoku kakano ia, koe‘uhiā ko e mo‘ui ‘a māmani.

52Ko ia na‘e fekīhiaki ai ‘a ha‘a Siu, ‘o pehē, ‘O lava fēfē ‘a e siana ni ke tuku mai hono kakano ke kai?

53Ko ia na‘e me‘a ai ‘a Sīsū kiate kinautolu, Ko au ē, ko au ē, ‘oku ou tala atu, Kapau kuo ‘ikai te mou kai ‘a e kakano ‘o e Fanautama ‘a Tangata, mo inu hono ta‘ata‘a, ‘oku ‘ikai te mou ma‘u mo‘ui ‘iate kimoutolu. 54Ko ia ‘oku ne keina hoku kakano, mo inu hoku toto, ‘oku ne ma‘u ‘a e mo‘ui ta‘engata; pea te u fokotu‘u ia ‘i he ‘aho fakamui. 55He ko hoku kakano ko ha kai mo‘oni ia, pea ko hoku toto ko ha inu mo‘oni. 56Ko ia ‘oku ne keina hoku kakano, mo inu hoku toto, ‘oku ne nofo ma‘u ‘iate au, mo au ‘iate ia. 57Hangē ā ne fekau au ‘e he Tamai ‘oku mo‘ui, mo ‘eku mo‘ui ‘a‘aku koe‘uhi ko e Tamai: pehē, ko ia ‘oku ne keina au, ‘e mo‘ui foki ‘a e toko taha ko ia koe‘uhi ko au. 58Ko eni ia ‘a e mā ne ‘alu hifo mei langi: tala‘ehai ‘oku hangē ko e kai ‘amou ngaahi kui, pea nau mate pē. ko ia ‘oku ne keina ‘a e mā ko eni te ne mo‘ui ‘o ta‘engata.

59Ko e ngaahi lea ko ia na‘a ne fai ‘i ha‘ane faiako ‘i ha falelotu ‘i Kāpaneume.

Ko e Lea ‘a Sīsū ko e Mo‘ui Ta‘engatá ia

60Pea ‘i he fanongo ki ai ha tokolahi ‘o ‘ene kau ako, na‘a nau pehē, Ko e lea fefeka ‘eni; ko hai ‘e kātaki ke fanongo kiate ia?

61Pea ‘i he mea‘i ‘e Sīsū ‘i hono finangalo ‘oku hanu ‘e he‘ene kau ako ‘i he me‘a ko ia, na‘a ne pehē kiate kinautolu, ‘Oku mou tūkia ‘i he me‘a ni koā? 62Huanoa ‘oka mou ka siofia ‘a e Fanautama ‘a Tangata ‘oku ne ‘alu hake ki he potu na‘a ne ‘i ai mu‘a. 63Ko e laumālie pē ‘oku ne ngaohi ke mo‘ui; ko e me‘a ki he kakano ‘oku ‘ikai momo‘i ‘aonga ia: ko e ngaahi lea kuo u fai ‘e au kiate kimoutolu, ko e koto laumālie ia, pea ko e koto mo‘ui. 64Ka ‘oku ‘i ai homou ni‘ihi ‘oku ‘ikai ke tui. He na‘e toka mea‘i ‘e Sīsū mei he kamata‘anga ‘a kinautolu ‘oku ‘ikai tui, pea mo ia te ne lavaki‘i ia. 65Pea ne pehē, Ko hono ‘uhinga ia na‘a ku lea ai kiate kimoutolu, ‘o pehē, ‘Oku ‘ikai lava ‘e ha taha ke ha‘u kiate au, ka ‘i hono foaki kiate ia ‘e he Tamai.

66Pea ‘i he me‘a ko ia na‘e foki ha tokolahi ‘o ‘ene kau ako, ‘o ‘ikai te nau kei ō fano mo ia. 67Ko ia na‘e pehē ai ‘a Sīsū ki he kau Hongofulu-mā-ua, Ka ‘e ‘ikai te mou fie ō mo kimoutolu, ‘o?

68Pea tali ki ai ‘e Saimone Pita, ‘Eiki, te mau ‘alu kia hai? ‘oku ‘iate koe ‘a e ngaahi lea ‘o e mo‘ui ta‘engata.#Māt 16.16; Ma‘ake 8.29; Luk 9.20 69Pea kuo loa ‘emau tui, ‘o mau ‘ilo, ko koe ia ‘a e Toko Taha Tapu ‘o e ‘Otua.

70Pea tali ‘e Sīsū kiate kinautolu, ‘Ikai kuo u fili ‘e au ‘a kimoutolu, ‘a e kau Hongofulu-mā-ua? Pea na‘a mo kimoutolu ko homou toko taha ko e tēvolo? 71Ko ‘ene lea pē kia Siutasi, ko e foha ‘o Saimone ‘Isikāliote: he ko ia te ne lavaki‘i ia–ha toko taha ‘o e kau Hongofulu-mā-ua.

Currently Selected:

Sioné 6: TMB

Highlight

Copy