Sioné 5

Ko e Fakamo‘ui ‘e Sīsū ‘a e Foha ‘o ha Tangata Ngāue Fakapule‘anga

(Māt 8.5-13; Luk 7.1-10)

1Pea faifai pea ai ha kātoanga ‘a ha‘a Siu; pea fononga hake ‘a Sīsū ki Selusalema. 2Pea ko eni ‘oku tu‘u ‘i Selusalema, ‘o ofi ki he Lepa Sipi, ha lepa ‘e taha,#5.2 ‘o ofi… ‘e taha: ‘Oku ngali tonu hono hiki ‘o: ‘o ofi ki he Matapā Sipí ha lepa; pe ‘o ofi ki he Lepa Sipí ha feitu‘u. ‘a ia ko e hingoa ‘e taha ‘oku ‘ai ki ai ‘i he lea faka-Hepelū ko Peteseta;#5.2 Peteseta; ‘Oku pehē ‘i hono ngaahi hiki fuoloa ‘e ni‘ihi: Petesata. ‘oku nima hono fale hala. 3Ko e ngaahi fale hala ko ia na‘e tatoka ai ha fu‘u kakai mahaki, ‘a e kui, ‘a e heke, ‘a e mamatea, ‘o tatali ki he ngaueue ‘a e vai. 4He na‘e ‘alu hifo ha ‘āngelo ‘i ha taimi pau ki he lepa, ‘o ue‘i ‘a e vai; pea ko ia ‘e tomu‘a hopo ki he vai hili hono ue‘i, na‘e fakamo‘ui ia mei hono mahaki kotoa pē.#5.4 ‘Oku ‘ikai ke ‘asi ‘i he ngaahi hiki fuoloa ‘e ni‘ihi ‘a e konga hono ua ‘o e veesi 3 ki he ngata‘anga ‘o e veesi 4 (‘o tatali… kotoa pē). 5Pea na‘e ai tokua ha tangata ‘i he potu ko ia, kuo tolungofulu mā valu ta‘u ‘ene mahaki‘ia. 6Pea ‘i he me‘a ‘a Sīsū ki he toko taha ko ia ‘oku tokoto, mo ne ‘ilo kuo fuoloa ‘e ne pehē, pea ne lea ki ai ‘o pehē, ‘Oku ke loto ke mo‘ui?

7Pea tali ki ai ‘a e mahaki, ‘Eiki, ‘oku ‘ikai te u ma‘u si‘aku taha ke lī au ki he lepa, ‘oka ‘iloange ‘e ue‘i ‘a e vai; pea lolotonga ‘ete ‘alu ‘e kita pē, tā ‘oku laka hifo ha taha, ‘o mu‘omu‘a ‘iate au.

8Pea folofola ki ai ‘e Sīsū, Tu‘u pē, to‘o ho mohenga na, pea hā‘ele. 9Pea mo‘ui leva ‘a e tangata; pea ne to‘o hono mohenga, ‘o ne hā‘ele atu. Pea tā ko e Sāpate ‘a e ‘aho ko ia.

10Ko ia na‘e lea ai ‘a ha‘a Siu ki he tangata kuo fakamo‘ui, ‘ē, ko e Sāpate ‘eni: pea tala‘ehai ‘oku ngofua ho‘o to‘o mohenga.#Nehe 13.19; Sel 17.21

11Ka ka tali ‘e ia kiate kinautolu, Ko ia na‘a ne fakamo‘ui au, ko ia ia na‘a ne pehē mai, To‘o ho mohenga, pea hā‘ele.

12Pea nau fehu‘i kiate ia, Ko hai ‘a e tangata na‘e pehē kiate koe, To‘o ia ‘o hā‘ele?

13Ka ko e tangata kuo faito‘o na‘e ‘ikai te ne ‘ilo pē ko hai ia; he ne laka ange ‘a Sīsū, koe‘uhi na‘e ‘i ai ha fu‘u kakai ‘i he potu ko ia.

14Faifai pea ‘ilo ia ‘e Sīsū ‘i he Temipale, pea ne me‘a ki ai, Ko eni kuo ke mo‘ui: ‘oua te ke toe angahala, na‘a hoko kiate koe ha me‘a ‘oku kovi ange.

15Pea ‘alu mei ai ‘a e tangata, ‘o ne fakahā ki ha‘a Siu, ko Sīsū ia ‘a e toko taha na‘e fakamo‘ui ia. 16Pea ko hono ‘uhinga e ‘o e fakatanga‘i ‘o Sīsū ‘e ha‘a Siu, ko ‘ene fai pehē ‘i he ‘aho Sāpate. 17Ka ka tali ‘e Sīsū kiate kinautolu, Kuo ngāue ‘a ‘eku Tamai ‘o a‘u ki he taimi ni, pea ‘oku ou ngāue mo au foki.

18Pea ko hono ‘uhinga e na‘e ‘āsili feinga ai ‘e ha‘a Siu ke tāmate‘i ia, koe‘uhi na‘e ‘ikai ngata ‘i he‘ene maumau Sāpate, ka kuo ne lau foki ‘a e ‘Otua ko ‘ene Tamai mo‘oni, ‘o ne fakatatau ai ia ki he ‘Otua. 19Ko ia na‘e tali ‘a Sīsū, ‘o ne folofola kiate kinautolu, Ko au ē, ko au ē, ‘oku ou tala atu, ‘Oku ‘ikai lava ‘e he ‘Alo ke fai ‘iate ia ha momo‘i me‘a, ngata pē ‘i he me‘a ‘oku ne vakai ‘oku fai ‘e he Tamai: he ‘ilonga ha me‘a ‘oku fai ‘e he ‘ene ‘Afio, ‘oku pehē pē mo e fai ‘e he ‘Alo ‘a e ngaahi me‘a ko ia. 20He ‘oku ‘ofa ‘a e Tamai ki he ‘Alo, pea ‘oku ne fakahā ki ai ‘a e ngaahi me‘a kotoa pē ‘oku fai ‘e he ‘Ene ‘Afio: pea te ne fakahā ki ai ha ngaahi ngāue ‘oku hulu atu ‘i he ngaahi me‘a ni, koe‘uhi ke mou ofo. 21He hangē ā ‘oku fokotu‘u ‘e he Tamai ‘a e kau pekia, mo ne ngaohi ke mo‘ui; pehē foki mo e ‘Alo, ‘oku ne ngaohi ke mo‘ui ‘a kinautolu ‘oku ne loto ki ai. 22Kae‘uma‘ā ‘oku ‘ikai ke fakamaau ‘e he Tamai ha toko taha, ka kuo ne tuku ‘a e fakamaau kotoa pē ki he ‘Alo: 23koe‘uhi ke ‘apasia ‘a e kakai kotoa pē ki he ‘Alo, ‘o hangē ko ‘enau ‘apasia ki he Tamai. Ko ia ‘oku ‘ikai ke ‘apasia ki he ‘Alo, ‘oku ‘ikai te ne ‘apasia ki he Tamai na‘a ne fekau mai ia.

24Ko au ē, ko au ē, ‘oku ou tala atu, Ko ia ‘oku ne fanongo ki he‘eku lea, pea tui kiate ia na‘a ne fekau mai au, ‘oku ne ma‘u ‘a e mo‘ui ta‘engata, pea ‘oku ‘ikai te ne a‘u ki he fakamaau; ka kuo ne hiki mei he mate ki he mo‘ui. 25Ko au ē, ko au ē, ‘oku ou tala atu, ‘Oku ‘unu mai ha taimi–‘io, kuo hoko ni–‘a ia ‘e fanongo ‘e he kau mate ki he le‘o ‘o e ‘Alo ‘o e ‘Otua: pea ko kinautolu kuo fanongo ki ai te nau mo‘ui. 26He hangē ā ‘oku mo‘ui ‘a e Tamai ‘iate ia pē; pehē foki ‘a ‘ene tuku ki he ‘Alo ke mo‘ui ‘iate ia pē; 27pea kuo ne tuku ke ‘a‘ana ‘a e fai fakamaau, koe‘uhi ko ha fānau tama ‘a tangata ia. 28‘Oua te mou ofo ‘i he me‘a ko ia; he ‘oku ‘unu mai ha taimi, ‘a ia ‘e fanongo ai ki hono le‘o ‘e he kakai kotoa pē 29‘Oku ‘i he ngaahi fa‘itoka, pea te nau ‘alu atu mei ai; ko kinautolu na‘e ngāue lelei, ki he toetu‘u ke mo‘ui, ko kinautolu na‘e fai kovi, ki he toetu‘u ke fakamaau.#Tān 12.2

Ko e ngaahi Fakamo‘oni kia Sīsū

30Tala‘ehai ‘oku ou lava ke fai ha momo‘i me‘a ‘iate au pē: ‘oku ou fakamaau ‘o hangē ko ‘eku fanongo: pea ko e fakamaau ‘a‘aku ‘oku totonu; koe‘uhi ‘oku ‘ikai te u tuli ki he loto ‘o‘oku, ka ki he finangalo ‘o ia na‘a ne fekau mai au.

31Ka ne ko au ‘oku fakamo‘oni kiate au, tā ‘oku ‘ikai mo‘oni ‘eku fakamo‘oni. 32Ko e taha kehe ia ‘oku fakamo‘oni kiate au, pea ‘oku ou ‘ilo ‘oku mo‘oni ‘a e fakamo‘oni ‘oku ne fai kiate au. 33Ko kimoutolu na‘a mou fekau atu kia Sione, pea na‘a ne fakamo‘oni ki he mo‘oni.#Sioné 1.19-27; 3.27-30 34Ka ko au ‘oku ‘ikai te u tali ha fakamo‘oni mei ha tangata: ka neongo ia, ka ‘oku ou lea pehē, koe‘uhi ke mou mo‘ui. 35Ko e toko taha ko ia ko e maama kuo tutu pea ulo: pea ko kimoutolu na‘a mou loto ke hākahaka ‘i hono maama, ‘o fuoloa si‘i. 36Ka ko ‘eku fakamo‘oni ‘a‘aku ko e toko taha ‘oku lahi ‘ia Sione: he ko e ngaahi ngāue na‘e tuku mai ‘e he Tamai ke u lava, ‘io, ‘a e ngaahi ngāue pē ko ē ‘a ia ‘oku ou fai, ‘oku nau fakamo‘oni kiate au, kuo fekau mai au ‘e he Tamai. 37‘Io, ko e Tamai, ‘a ia na‘a ne fekau mai au, kuo fakamo‘oni kiate au ‘e he ‘Ene ‘Afio: ka tala‘ehai kuo ongo hano le‘o kiate kimoutolu ‘i ha taimi, pea tala‘ehai kuo mou mamata ki hano ‘ata.#Māt 3.17; Ma‘ake 1.11; Luk 3.22 38Pea na‘a mo ‘ene folofola, tala‘ehai ‘oku mou ma‘u ia ke nofo ma‘u ‘i homou loto: he ko ia na‘e fekau mai ‘e he ‘Ene ‘Afio, ko e toko taha ia ‘oku ‘ikai te mou tui ki ai. 39‘Oku mou hakule ‘a e Tohitapu; koe‘uhi ‘oku mou mahalo ‘oku tu‘u ai ho‘omou ma‘u ‘a e mo‘ui ta‘engata: pea ko ia ia ‘oku fakamo‘oni kiate au. 40Ka tala‘ehai ‘oku mou loto ke ha‘u kiate au ke mou ma‘u mo‘ui.

41Ko e fakahīkihiki‘i ‘e he tangata ‘oku ‘ikai te u tali. 42Ka kuo u ‘ilo‘i kimoutolu, tā ‘oku ‘ikai ‘iate kimoutolu ‘a e ‘ofa ki he ‘Otua. 43Ko au na‘a ku ha‘u ‘i he huafa ‘o ‘eku Tamai; ka tala‘ehai ‘oku mou tali au: kapau ‘e ha‘u ha taha kehe ‘i hono hingoa ‘o‘ona, te mou tali ‘a e toko taha ko ia. 44Te mou lava fēfē ke tui, ‘a kimoutolu ‘oku mou tali ‘a e fakahīkihiki‘i ‘oku mou fefai‘aki, ‘o ‘ikai te mou kumi ‘a e fakahīkihiki‘i ‘e he ‘Otua Taha-tofu-pē. 45‘Oua te mou pehē, ko au te u talatalaaki‘i kimoutolu ki he Tamai: ‘oku ‘i ai ha toko taha ‘oku ne talatalaaki‘i kimoutolu, ‘a Mōsese, ‘a ‘ia kuo tu‘u ki ai ho‘omou falala. 46He ka ne ‘oku mou tui kia Mōsese, pehē ‘oku mou tui kiate au: he ko e tohi ‘a e toko taha ko ia, ko e tohi kiate au. 47Ka ‘o kapau ‘oku ‘ikai te mou tui ki he‘ene ngaahi tohi, pea fēfē ai ha‘amou tui ki he‘eku ngaahi lea?

Currently Selected:

Sioné 5: TMB

Highlight

Copy