Sioné 4
4
1PEA ko ia, ‘i he mea‘i leva ‘e he ‘Eiki kuo fanongo ‘e he kau Fālesi, Tokua ‘oku fakaului mo papitaiso ‘e Sīsū ha kau ako, ‘o hulu atu ‘i ha‘a Sione; 2(Ka tala‘ehai na‘e fai papitaiso ‘e Sīsū ‘e ia, ka ko ‘ene kau ako pē) 3Ko ia na‘a ne tuku pē ‘a Siutea, ‘o ne toe ‘alu mei ai ki Kāleli.
Ko Sīsū mo e Fefine Samēlia
4Pea na‘e pau ke ne ‘asi atu ‘i loto Samēlia.
5Pea ne hoko ai ki ha kolo ‘o Samēlia, ‘a ia na‘e ui ko Saika, ‘o ofi ki he potu fonua na‘e foaki ‘e Sēkope kia Siosifa ko hono foha.#Sēn 33.19; Sios 24.32 6Pea na‘e tu‘u ‘i he potu ko ia ha vai, ko e vaikeli ‘o Sēkope. Pea ko eni, kuo hela ‘a Sīsū ‘i he fononga, pea ne ta‘utu leva ki he ngutu vai; ko hono taimi na‘e fe‘unga nai mo e ono.
7‘Iloange na‘e ha‘u ha fefine, ko e Samēlia, ke ‘utu vai: pea pehē ‘e Sīsū ki ai, ‘ē, mai si‘aku inu: 8(He ko ‘ene kau ako kuo ‘alu ange ki he kolo ke fakatau me‘akai.)
9Pea lea ai ‘a e fefine Samēlia kiate ia, Ko e toe tala inu hā e kiate au, ka ko e Siu koe, pea ko e fefine Samēlia kita? he tala‘ehai ‘oku ‘uhi ha Siu ki ha Samēlia.#4.9 tala‘ehai ‘oku ‘uhi ha Siu ki ha Samēlia; pe ‘Oku ‘ikai ke ipu taha ‘a e kakai Siú mo e kakai Senitailé.
#
‘Ēsela 4.1-5; Nehe 4.1-2 10Pea tali ‘e Sīsū ‘o ne me‘a ki ai, Ka ne ke ‘ilo ‘a e me‘a‘ofa ‘a e ‘Otua, pea ka ne ke ‘ilo pe ko hai ia ‘oku ne pehē atu, ‘Omi haku inu; pehē ko koe ne ke fai ‘a e kole kiate ia, pea kuo ne ‘atu ha vai mo‘ui.
11Pea lea ai ‘a e fefine kiate ia, ‘Eiki, ‘oku ‘ikai ha‘o me‘a ke ‘utu ‘aki, pea ‘oku loloto ‘a e luo; pea mei fē ai ho‘o ma‘u ‘a e vai mo‘ui na? 12He ko e lahi koā koe ‘i he‘etau kui ko Sēkope, ‘a ia na‘a ne tuku mai kiate kimautolu ‘a e vai ni, pea na‘e inu mei ai ‘e ia, mo hono ngaahi foha, pea mo ‘ene fanga manu?
13Pea tali ‘e Sīsū, ‘o ne me‘a kiate ia, ‘Ā, ko ia kotoa pē ‘oku inu mei he vai ko ena te ne toe fie inua: 14ka ‘ilonga ‘a ia te ne inu mei he vai te u ‘atu ‘e au, ‘e ‘ikai ‘aupito te ne toe fie inua ‘o ta‘engata; ka ko e vai te u ‘atu kiate ia ‘e au te ne tupu ‘i loto ‘i he toko taha ko ia, ko e matavai mapunopuna hake, ‘o iku ki he mo‘ui ta‘engata.
15Pea lea ‘a e fefine kiate ia, ‘Eiki, foaki mai ‘a e vai ko ia kiate au, koe‘uhi ke ‘oua na‘a ku fie inua, pe ongosia mai ki heni ke ‘utu.
16Pea me‘a ‘e ia ki ai, ‘Alu ‘o ui mai ho husepāniti, pea ha‘u ki heni.
17Pea tali ‘a e fefine ‘o pehē, ‘Oku ‘ikai si‘aku husepāniti.
18Pea pehē ange ‘e Sīsū, ‘Oku mo‘oni pē ho‘o lea na, ‘Oku ‘ikai te u ma‘u husepāniti: he na‘a ke ma‘u ha husepāniti ‘e toko nima; pea ko e tangata ‘oku ke ma‘u ni ‘oku ‘ikai ko ho husepāniti: ko e mo‘oni ho‘o lau ko ia.
Ko e Mafai ‘o e Fohá
19Pea lea ki ai ‘a e fefine, ‘Eiki, tā ‘oku ou vakai ko e palōfita koe. 20Ko ‘emau ngaahi kui na‘a nau fai ‘enau lotu ‘i he mo‘unga ni; ka ko kimoutolu ‘oku mou pehē, ko Selusalema pē ‘a e potu ‘oku totonu ke fai ai ‘a e lotu.
21Pea lea ki ai ‘a Sīsū, ‘e fefine, tui mai kiate au, ‘oku ‘unu mai ha taimi, ‘a ia ‘e ‘ikai te mou fai ‘i he mo‘unga ni, pe ‘i Selusalema, ho‘omou lotu ki he Tamai. 22Ko kimoutolu ‘oku mou lotu ki he me‘a ‘oku ‘ikai te mou ‘ilo ki ai: ‘oku mau lotu kimautolu ki he me‘a ‘oku mau lāu‘ilo‘i: he ‘oku mei he kakai Siu ‘a e fakamo‘ui. 23Ka ne ongo ia, ka ‘oku ‘unu mai ha taimi–‘io, kuo hoko ni–‘a ia ko e kakai ‘oku lotu mo‘oni te nau fai ‘i laumālie mo fai ‘i mo‘oni ‘enau lotu ki he Tamai: he ko e Tamai foki ‘oku ne kumi ‘a e fa‘ahinga ko ia, ‘a kinautolu ‘oku mātu‘aki lotu kiate ia. 24Ko e ‘Otua ko e laumālie: pea ko kinautolu ‘e hū kiate ia, kuo pau ke nau fai ‘i laumālie pea fai ‘i mo‘oni ‘enau hū.
25Pea lea ‘a e fefine ki ai, ‘Oku ou ‘ilo ‘oku ha‘u ‘a e Mīsaia; (‘a ia ‘oku ui ko Kalaisi) ka toki ha‘u ‘a e toko taha ko ia te ne fakahā kiate kimautolu ‘a e me‘a kotoa pē kotoa pē.
26Pea folofola ai ‘a Sīsū kiate ia, Ko au ia ‘oku lea kiate koe.
27Pea fe‘unga mo ia mo e omi ‘ene kau ako, ‘o nau ofo ‘i he‘ene talanoa mo ha fefine; kae molekemama‘o hanau taha te ne pehē, Ko e hā ‘a e me‘a ‘oku ke fiema‘u? pē, Ko e hā ‘oku ke talanoa ai mo e fefine?
28Pea tuku ai ‘e he fefine ‘ene ‘angavai, ‘o ne ‘alu mei ai ki he kolo, ‘o ne pehē ki he kakai, 29Omi ange, ‘o mamata ki he tangata kuo ne tala mai ‘a e me‘a kotoa kuo u fai: ‘oku ‘ikai nai ko e Mīsaia ‘eni, ‘e? 30Pea nau ‘alu atu mei he kolo, ‘o nau kamata laka mai kiate ia.
31Lolotonga ia na‘e kole kiate ia ‘e he kau ako, ‘o pehē, Lāpai, ke ke tokoni mu‘a.
32Ka ka pehē ‘e ia kiate kinautolu, ‘Oku ai ‘eku kai ‘oku ‘ikai te mou ‘ilo ki ai.
33Pea fepehē‘aki ai ‘a e kau ako, Ka tala‘ehai kuo ‘omi ‘e ha taha ha‘ane me‘akai, ‘inē?
34Pea pehē ‘e Sīsū kiate kinautolu, Ko ‘eku me‘akai ē, ko e tuli ke fai ‘a e finangalo ‘o ia na‘a ne fekau mai au, pea ke faka‘osi ha‘ana ngāue. 35‘Ikai ‘oku mou lau, ‘Oku toe fā ‘a e māhina, pea hoko ‘a e ututa‘u. ‘Ā, ka u tala atu Mou hanga hake mu‘a ki he ngaahi ngoue na: vakai, kuo fisi hina ia ki he ututa‘u. 36Pea na‘a mo e taimi ni ‘oku ma‘u totongi ‘e ia ‘oku utu, kae‘uma‘ā ‘oku ne tānaki fua ki he mo‘ui ta‘engata: koe‘uhi ke fiefia fakataha, ‘e ia na‘e tō, mo ia na‘e utu. 37He ko ‘ene toki mo‘oni ‘i he me‘a ko eni ‘a e lea ko ē, ‘Oku tō ‘a e tō, kae utu ‘a e utu. 38Na‘a ku fekau atu kimoutolu ‘e au ke utu ‘a e me‘a na‘e ‘ikai te mou fakaongosia ai kimoutolu: ko e kakai kehe na‘a nau fakaongosia ai, pea kuo mou ma‘u ‘e kimoutolu honau kakava.
39Pea ko eni, na‘e ai ha tokolahi mei ha kolo ko ia na‘a nau tui pīkitai kiate ia, ‘a e kakai Samēlia, ko e me‘a ‘i he lea ‘a e fefine, he‘ene fakahā, Kuo ne tala mai ‘a e me‘a kotoa pē ne u fai. 40Ko ia ‘i he a‘u ange ‘a e kau Samēlia, na‘a nau kole kiate ia ke ne nofo hifo mo kinautolu; pea ne nofo ‘i he potu ko ia ‘o ‘aho ua.
41Pea tokolahi ange noa pē ‘a e kakai na‘e tui ko e me‘a ‘i he‘ene folofola ‘a‘ana; 42pea nau pehē ki he fefine, ‘Oku ‘ikai te mau kei tui koe‘uhi pē ko ho‘o talanoa na‘e fai; he kuo mau fanongo tonu ki ai ‘e kimautolu, pea ‘oku mau ‘ilo, ko eni mo‘oni ia ‘a e Fakamo‘ui ‘o māmani.
Ko e Fakamo‘ui ‘e Sīsū ‘a e Foha ‘o ha Tangata Ngāue Fakapule‘anga
(Māt 8.5-13; Luk 7.1-10)
43Pea hili ‘a e ‘aho ko ia ‘e ua na‘a ne hiki mei he potu ko ia ki Kāleli. 44He ko Sīsū na‘a ne tala ‘e ia, ‘oku ‘ikai faka‘apa‘apa‘ia ha palōfita ‘i hono fonua ‘o‘ona.#Māt 13.57; Ma‘ake 6.4; Luk 4.24 45Ko ia ‘i he‘ene hoko ki Kāleli, na‘e tali ia ‘e he kakai Kāleli; he kuo nau mamata ki he ngaahi fu‘u me‘a ne ne fai ‘i Selusalema ‘i he kātoanga: he ko kinautolu foki na‘a nau ‘alu ki he kātoanga.#Sioné 2.23
46Pea ne toe ha‘u ai ki Kena ‘i Kāleli, ‘a e potu na‘a ne liliu ai ‘a e vai ke uaine. Pea na‘e ai ha mu‘a ‘a e Tu‘i, ‘a ia kuo puke si‘ono foha ‘i Kāpaneume.#Sioné 2.1-11 47Pea ‘i he fanongo ‘a e matāpule ko ia, tā kuo ha‘u ‘a Sīsū mei Siutea ki Kāleli, pea ne ‘alu ange ki ai, ‘o ne kole ke ne me‘a hifo ‘o faito‘o si‘ono foha: he ‘oku ne fakatau ke pekia. 48Pea me‘a ai ‘a Sīsū kiate ia, ‘Ā, kapau ‘e ‘ikai te mou mamata ki he ngaahi faka‘ilonga, mo e ngaahi me‘a fakaofo, tā ‘e ‘ikai si‘i te mou tui.
49Pea lea kiate ia ‘e he mu‘a ‘a e Tu‘i, ‘Eiki, ke ke me‘a hifo mu‘a, na‘a pekia si‘oku ‘uhiki.
50Pea folofola ‘a Sīsū ki ai, ‘alu pē; kuo mo‘ui ho foha. Pea tui ‘a e matāpule ki he folofola kuo fai ‘e Sīsū, pea ne ‘alu.
51Pea lolotonga ‘ene kei fononga hifo, mo e fakafetaulaki mai ‘e he‘ene kau tamaio‘eiki, ‘o nau pehē, tokua kuo mo‘ui ‘ene tamasi‘i.
52Pea ne fehu‘i ai kiate kinautolu ki he houa na‘a ne kamata lelei ai. Pea nau tali kiate ia, Na‘e mahu‘i ‘a e mofi meiate ia ‘i he fitu ‘aneafi. 53Pea ‘ilo leva ‘e he tamai, tā na‘e ‘i he houa pē ko ia, ‘a ia na‘e folofola ai ‘a Sīsū kiate ia ‘o pehē, Kuo mo‘ui ho foha: pea ne lotu, ‘e ia mo hono fāmili kātoa.
54Ko e toe fai mana ‘eni ‘e Sīsū ko hono tu‘o ua, ‘i he‘ene ha‘u mei Siutea ki Kāleli.
Currently Selected:
Sioné 4: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
