Sioné 3

Ko Sīsū mo Nikotimasi

1PEA na‘e ai ha tangata ‘i he kau Fālesi, ko Nikotimasi hono hingoa, ko ha taha ia ‘o e hou‘eiki Siu: 2pea ha‘u po‘uli kiate ia ‘a e matāpule ko ia, ‘o ne pehē ki ai, Lāpai, ‘oku mau ‘ilo kuo ke hoko mai mei he ‘Otua ko hamau faiako: he tala‘ehai ‘e lava ‘e ha toko taha ha ngaahi fu‘u mana pehē, hangē ko ia ‘oku ke fai, ka ‘i he kau mo ia ‘a e ‘Otua.

3Pea tali ‘e Sīsū, ‘o ne folofola kiate ia, Ko au ē, ko au ē, ‘oku ou tala atu, ‘Ilonga ‘a ia ‘e ‘ikai fanau‘i fo‘ou mei ‘olunga,#3.3: fanau‘i fo‘ou mei ‘olunga; pe fanau‘i mei ‘olunga, pe fanau‘i fo‘ou. ‘e ‘ikai te ne lava ke mamata ki he Pule‘anga ‘o e ‘Otua.

4Pea lea ‘a Nikotimasi kiate ia, ‘O lava fēfē ke fanau‘i ha tangata ka kuo motu‘a? te ne lava koā ke toe hū ki he manava ‘o ‘ene fa‘ē, ‘o fanau‘i?

5Pea tali ‘e Sīsū, Ko au ē, ko au ē, ‘oku ou tali kiate koe, Kapau ‘e ‘ikai fanau‘i ha taha ‘i he vai mo e Laumālie, ‘e ‘ikai te ne lava ke hū ki he Pule‘anga ‘o e ‘Otua. 6Ko e me‘a kuo fanau‘i mei he kakano ko e kakano ia; pea ko e me‘a kuo fanau‘i mei he Laumālie ko e laumālie ia, 7‘oua te ke ofo ‘i he‘eku pehē atu, Kuo pau ke mou fanau‘i fo‘ou mei ‘olunga.#3.7: fanau‘i fo‘ou mei ‘olunga; pe fanau‘i mei ‘olunga, pe fanau‘i fo‘ou. 8Ko e ma‘ili ‘a e matangi ‘oku fāinoa pē, ko ‘ene fa‘iteliha pē; pea ‘oku ke ongo‘i ‘ene mumuhu, ka ‘oku ‘ikai te ke ‘ilo pē ko e ha‘u mei fē, pe ‘oku ‘alu ki fē: ko e anga ia ‘o ia kotoa pē kuo fanau‘i mei he Laumālie.

9Pea tali ‘e Nikotimasi ‘o ne pehē ki ai, ‘O lava fēfē ‘a e ngaahi me‘a pehē ni?

10Pea tali ‘e Sīsū ‘o ne pehē ki ai, Ko koe ko e Faiako ‘o ‘Isileli, pea ‘oku ‘ikai te ke ‘ilo koā ‘a e ngaahi me‘a ni? 11Ko au ē, ko au ē, ‘oku ou tala atu, ‘Oku mau lea‘aki ‘a e ngaahi me‘a ‘oku mau lāu‘ilo ki ai, pea ‘oku mau fakahā ‘a e ngaahi me‘a kuo mau mamata ki ai; pea oku ‘ikai te mou tali ‘emau fakamatala. 12Kapau kuo u tala kiate kimoutolu ‘a e ngaahi me‘a ‘oku ‘i māmani, ka ‘oku ‘ikai te mou tui, pea mou tui fēfē, ‘o kapau te u tala kiate kimoutolu ‘a e ngaahi me‘a ‘oku ‘i he langi? 13Pea kuo te‘eki ke ‘alu hake ha toko taha ‘o hū ki langi, ngata pē ‘iate ia na‘e ‘alu hifo mei he langi, ko e Fanautama ‘a Tangata.#3.13 ‘Oku hoko atu nai ‘a e folofola ‘a Sīsuú ‘o a‘u ki he ngata‘anga ‘o e veesi 21.

14Pea hangē na‘e hiki ki ‘olunga ‘e Mōsese ‘a e ngata ‘i he toafa, pehē foki kuo pau ke hiki ki ‘olunga ‘a e Fanautama ‘a Tangata;#Nōm 21.9 15koe‘uhi ko ia kotoa pē ‘oku tui ke ne ma‘u ‘iate ia ‘a e mo‘ui ta‘engata. 16He na‘e ‘ofa pehē ‘a e ‘Otua ki māmani, ko ia na‘a ne foaki hono ‘Alo tofu-pē-taha-ne-fakatupu, koe‘uhi ko ia kotoa pē ‘oku tui pīkitai kiate ia ke ‘oua na‘a ‘auha, kae ma‘u ‘a e mo‘ui ta‘engata. 17He tala‘ehai na‘e fekau ‘e he ‘Otua ‘a e ‘Alo ki māmani ke fakamaau? ‘a māmani; ka koe‘uhi ke mo‘ui ‘a māmani ‘iate ia.

18Ko ia ‘oku tui pīkitai kiate ia ‘oku ‘ikai ke fakamaau? ia; ka ko ia ‘oku ‘ikai ke tui, kuo ‘osi fakamaau? ia; koe‘uhi kuo ‘ikai te ne tui ki he huafa ‘o e ‘Alo tofu-pē-taha-na‘e-fakatupu ‘e he ‘Otua. 19Pea ko eni ia ‘a e fakamaau: kuo hoko mai ‘a e maama ki māmani, pea ‘ofa ‘a e kakai ki he po‘uli ‘o ‘ikai ki he maama; he ko ‘enau ngaahi ngāue na‘e kovi. 20He ‘ilonga ‘a ia ‘oku ngāue kovi ‘oku ne fehi‘a ki he maama, pea ‘oku ‘ikai te ne ha‘u ki he maama, na‘a ‘ilonga ‘ene ngaahi ngāue. 21Ka ko ia ‘oku ne feia ‘a e mo‘oni ‘oku ne ha‘u ki he maama, koe‘uhi ke e‘a ‘ene ngaahi ngāue, he kuo fai ia ‘i he ‘Otua.

Ko Sīsū mo Sione Papitaiso

22Hili ia na‘e ha‘u ‘a Sīsū mo ‘ene kau ako ki he fonua ko Siutea, pea ne nofo ai mo kinautolu, ‘o fai papitaiso. 23Pea na‘e ‘i ai foki ‘a Sione, ‘oku ne fai papitaiso ‘i ‘Ēnoni ‘o ofi ki Sēlemi, koe‘uhi na‘e lahi ‘a e ngaahi vai ‘i he potu ko ia; pea na‘e ‘alu ange ‘a e kakai, ‘o nau papitaiso ai, 24he kuo te‘eki lī ‘a Sione ki he pilīsone.#Māt 14.3; Ma‘ake 6.17; Luk 3.19-20

25Ko ia na‘e tupu ai ha fakakikihi ‘a e kau ako ‘a Sione pea mo ha motu‘a faka-Siu,#3.25 ha motu‘a faka-Siu (pe motu‘a Siu): ‘Oku pehē ‘i hono ngaahi hiki fuoloa ‘e ni‘ihi: ha kau Siu ‘e ni‘ihi. ‘o kau ki he fai fakama‘a. 26Pea nau omi kia Sione, ‘o nau pehē ki ai, Lāpai, ko e toko taha ko ia na‘e ‘iate koe ‘i Tu‘a-Soatani, ‘a ia kuo ke fakahaa‘ia, ‘ē, ‘oku fai papitaiso ia, pea ‘oku tafe taha ‘a e kakai kiate ia.

27Pea tali ‘a Sione ‘o ne pehē, Tala‘ehai ‘oku ala ma‘u ha me‘a ‘e ha tangata, ka ‘i hono foaki kiate ia mei langi. 28Ko kimoutolu foki te mou fakamo‘oni ki he‘eku pehē, ‘Oku ‘ikai ko au ia ‘a e Mīsaia, ka kuo fekau mai au ke mu‘omu‘a ki he toko taha ko ena.#Sioné 1.20 29Ko ia ‘oku ne ma‘u ‘a e ta‘ahine, ko ia ia ‘a e ‘eikita‘ane; ka ko e moa‘uli ‘a e ‘eikita‘ane, ‘a ia ‘oku ne tu‘u ‘o fakaongo kiate ia, ‘oku ne fiefia–ka ko ha fiefia–‘i he ongo mai ‘a e le‘o ‘o e ‘eiki ta‘ane: ‘āua, ko e fiefia pē ‘ena ‘oku ‘a‘aku, pea tā kuo kakato. 30Kuo pau ke faka‘a‘au ia ki mu‘a, ka u faka‘a‘au au ki mui.

Ko e Toko taha Na‘e ‘Alu Hifo mei Hēvani

31Ko ia ‘oku ne hoko mai mei ‘olunga ‘oku ne mā‘olunga ‘i he me‘a kotoa pē: ko ia ‘oku tupu mei he māmani ‘oku fakaemāmani ia, pea ‘oku fakaemāmani mo ‘ene lea. 32Ko ia ‘oku hoko mai mei he langi ‘oku ne fakahā ‘a e me‘a kuo ne mātā, mo ia na‘a ne fanongo ki ai: ka hono tali ‘e ha taha ‘ene fakamatala? 33‘Ilonga ‘a ia kuo tali ‘ene fakamatala, kuo ne sila‘i ‘ene fakamo‘oni, ‘Oku mo‘oni ‘a e ‘Otua. 34He ko ia ne fekau mai ‘e he ‘Otua, ko e ngaahi folofola ‘a e ‘Otua ia ‘oku ne lea‘aki: he tala‘ehai ‘oku ne fakafuofua ‘ene foaki ‘a e Laumālie ki ai. 35‘Oku ‘ofa ‘a e Tamai ki he ‘Alo, pea kuo ne tuku ‘a e me‘a kotoa pē ki he‘ene fa‘iteliha.#Māt 11.27; Luk 10.22 36Ko ia ‘oku ne tui pīkitai ki he ‘Alo ‘oku ne ma‘u ‘a e mo‘ui ta‘engata: ka ko ia ‘oku ‘ikai te ne talangofua ki he ‘Alo ‘e ‘ikai te ne mamata ia ki he mo‘ui; ka ‘oku nofo ma‘u kiate ia ‘e he houhau ‘a e ‘Otua.

Currently Selected:

Sioné 3: TMB

Highlight

Copy