KO ‘AISEA 37
37
Ko e Kole Fale‘i ‘a e Tu‘í kia ‘Aisea
(2 Tu‘i 19.1-7)
1PEA ‘i he fanongo ki ai ‘a Kingi Hesekaia, na‘a ne hae hifo hono kofu, ‘o ne ‘ai tauanga‘a, ‘o ne ‘alu ki he fale ‘o Sihova. 2Pea ne fekau atu ‘a ‘Īlaiakimi ko e pule ‘o e Loto‘ā, mo Sēpina ko e sikalaipe, mo e mātu‘a ‘o ha‘a taula‘eiki, kuo nau ‘ai tauanga‘a kotoa, ki he palōfita ko ‘Aisea foha ‘o ‘Āmosi. 3Pea na‘a nau pehē kiate ia: Ko e folofola eni ‘a Hesekaia, Ko e ‘aho eni ‘o e ‘efihia, mo e tautea, mo e manukia: he kuo a‘u ‘a e tama ki hono taimi, ka ‘oku ‘ikai ma‘u ha mālohi ke fā‘ele‘i. 4Hei‘ilo ‘e ongo‘i ‘e Sihova ko ho ‘Otua ‘a e ngaahi lea ‘a e Lapisake, ‘a ia kuo ne ha‘u mo ia mei hono ‘Eiki ko e Tu‘i ‘Āsilia ke taukae ‘aki ‘a e ‘Otua Mo‘ui, pea te ne tautea nai ‘a e ngaahi lea, ‘a ia kuo ongo kia Sihova ko ho ‘Otua: ko ia ke ke hapai hake ho‘o lotu telia ‘a e toenga ‘oku toe.
5Ko ia, na‘e a‘u ‘a e kau tamaio‘eiki ‘a Hesekaia kia ‘Aisea. 6Pea tali ‘e ‘Aisea kiate kinautolu, Ko eni ‘a e lea te mou fai ki homou ‘eiki, ‘Oku folofola mai ‘a Sihova, ‘o pehē, ‘Oua te ke manavahē ki he ngaahi lea kuo ke fanongo ki ai, ‘a ia kuo talakaa‘i ‘aki au ‘e he kau talavou na ‘a e Tu‘i ‘Āsilia. 7Vakai, te u tuku ha laumālie ke hū kiate ia, pea te ne ongo‘i ha ongoongo, pea te ne foki ki hono fonua; pea te u ‘ai ke ne tō ‘i he heletā ‘i hono fonua ‘o‘ona.
Ko e Toe Fakamanamana mai ‘a e Kakai ‘Āsiliá
(2 Tu‘i 19.8-19)
8Pea foki ‘a e Lapisake, ‘o ne ma‘u ‘a e Tu‘i ‘Āsilia ‘oku ne tau‘i ‘a Līpina: he kuo ne fanongo kuo ne hiki mei Lākisi. 9Pea ne ma‘u ongoongo kia Tīlaka ko e Tu‘i ‘Itiopea,#37.9 ‘Itiopea; Vakai ki he “Ngaahi Huluhulu”. ‘o pehē, Kuo ne hū ki tu‘a ke tau‘i koe. Pea ‘i he‘ene fanongo ki ai, na‘a ne tuku atu ha kau talafekau kia Hesekaia, he‘ene pehē, 10Ko eni ‘a e lea te mou fai kia Hesekaia ko e Tu‘i Siuta; ‘Oua na‘a fakahehema‘i koe ‘e ho ‘Otua ‘oku ke falala ki ai, he‘ene folofola mai, ‘E ‘ikai tuku ‘a Selusalema ki he nima ‘o e Tu‘i ‘Āsilia. 11Kuo pau kuo ke fanongo ki he ngaahi me‘a kuo fai ‘e he ngaahi Tu‘i ‘Āsilia ki he ngaahi fonua kehekehe, he mōifua kinautolu: pea te ke hao koe? 12Ne fakahaofi kinautolu koā ‘e he ngaahi ‘otua ‘o e ngaahi kakai ko ē, ‘a ia na‘e faka‘auha ‘e he‘eku ngaahi kui? ‘a Kōsani, mo Kālana, mo Lēsefi, mo e ha‘a ‘Īteni na‘e nofo ‘i Tēlasa? 13Ko e fē ‘a e Tu‘i Hēmati, mo e Tu‘i ‘Āpati, mo e tu‘i ‘o e kolo ko Sipalavaimi, ‘o Hena mo ‘Iva?
14Pea to‘o ‘e Hesekaia ‘a e tohi mei he nima ‘o e tu‘unga talafekau, ‘o ne lau: ‘o ne ‘alu hake ki he fale ‘o Sihova, ‘o ne folahi ia ‘i he ‘ao ‘o Sihova. 15Pea lotu ‘a Hesekaia kia Sihova, ‘o ne pehē, 16‘E Sihova Sāpaoti, ‘Otua ‘o ‘Isileli, ‘oku ke ‘afioa ‘a e ongo Selupimi, ko koe ‘a e ‘Otua, ko koe toko taha pē ‘i he ngaahi pule‘anga kotoa pē ‘o māmani; ko koe na‘a ke ngaohi ‘a e langi mo māmani.#‘Eki 25.22 17Ofe‘i ho fofonga, ‘Eiki, ‘o ongo‘i; ‘ā, ‘Eiki, ho fofonga, ‘o ke ‘afio‘i: pea ke tokanga ki he ngaahi fu‘u lea ‘a Senakalipe, ‘a ‘ene fekau mai ‘e ia ke taukae‘i ‘a e ‘Otua Mo‘ui. 18Mo‘oni, ‘Eiki, kuo fakaeve ‘e he ngaahi Tu‘i ‘Āsilia ‘a e ngaahi fonua ko ē, mo honau kelekele, 19pea kuo nau lī honau ngaahi ‘otua ki he afi; he tala‘ehai ko e ngaahi ‘otua ia, ka ko e ngāue ‘a e nima ‘o e tangata, ko e ‘akau mo e maka; pea ne‘ine‘i ‘enau ‘auha. 20Pea ko eni, ‘e Sihova ko homau ‘Otua, fakahaofi mu‘a kimautolu mei hono nima, kae ‘ilo ‘e he ngaahi pule‘anga kotoa pē ‘o māmani ko koe pē ‘a Sihova, ko koe toko taha pē.
Ko e Fakahā meia ‘Aisea ki he Tu‘í
(2 Tu‘i 19.20-37)
21Pea fekau atu ‘e ‘Aisea foha ‘o ‘Āmosi kia Hesekaia ke fakahā, Ko e folofola eni ‘a Sihova ko e ‘Otua ‘o ‘Isileli, Ko e me‘a ki ho‘o hū kiate au telia ‘a Senakalipe ko e Tu‘i ‘Āsilia, 22ko eni ‘a e folofola kuo fai ‘e Sihova ‘i he toko taha ko ia: Kei tāupo‘ou ‘a e ta‘ahine ko Saione ‘oku ne va‘inga‘aki koe, mo kata kakae atu; ‘oku kalokalo hono ‘ulu ‘i ho‘o sītu‘a atu ‘e he ta‘ahine ko Selusalema. 23Ko hai kuo ke taukae‘i mo talakaa‘i? pea ko hai kuo ke lea fakapuhopuha‘a pea ke matahihiki ki ai? Ki he Tāpuhā ‘o ‘Isileli, 24‘I ho‘o kau tamaio‘eiki na kuo ke taukae‘i ‘a ‘Ātonai, pea kuo ke pehē, Kuo u a‘u hake ki he tumutumu ‘o e ngaahi mo‘unga mo ‘eku fu‘u tau sāliote, ‘a Lepanoni mama‘o; pea te u tā hono ngaahi sita mā‘olunga, mo hono ngaahi paini mahu‘inga: pea te u hū ki hono tumutumu taupotu, ki hono vao tokanga. 25Kuo u keli mo inu vai, pea te u fakamātu‘u ‘aki hoku ‘aofiva‘e ‘a e ngaahi halanga vai ‘o ‘Isipite.
26‘Ā, ‘ikai kuo ke fanongo, kuo talu mei tuai ‘eku ngāue ki ai, kuo talu ‘a e ngaahi ‘aho mu‘a mo ‘eku ngaohi ke pehē? Ko eni kuo u fakahoko ke ke ‘i ai, ke fulihi ‘a e ngaahi kolo ‘aa‘i, ‘o ngaohi ko e ngaahi tu‘unga veve. 27Ko hono ‘uhinga ia na‘e ivi si‘i ai honau kau nofo, na‘a nau ilifia mo puputu‘u; na‘a nau hangē ko e musie ‘o e vao, mo e me‘a lanumata, hangē ko e mohuku he tu‘a fale, hangē ha ngoue koane te‘eki tupu.#37.27 hangē… tupu; pe ‘oka angi mālohi mai ki ai ‘a e matangi vela mei hahaké ‘i he te‘eki ke tutupu lalahi haké.
28Ka ‘oku ou ‘ilo pē ho‘o nofo hifo, mo ho‘o hū ki tu‘a, mo ho‘o hū mai, mo ho‘o lili kiate au. 29Ko e me‘a ‘i ho‘o lili na kiate au, mo e a‘u mai ho‘o fielahi na ki hoku telinga, ko ia te u ‘ai ‘eku mama ki ho ihu, mo ‘eku leta ki ho loungutu, pea te u fakafoki koe ‘i he hala na‘a ke ha‘u ai.
30Pea ko eni ‘a e faka‘ilonga kiate koe: ko e ta‘u ni ‘e kai ‘a e fetui, pea ko e ta‘u kaha‘u ‘e kai ‘a e ohi; pea ko e ta‘u ko hono tolu, mou tō, ‘o utu, ‘o tō ngoue vaine, ‘o kai hono fua. 31Pea ko e hao ‘o e fale ‘o Siuta ‘oku toe te nau toe aka hifo, pea fai fua ki ‘olunga. 32He ‘alu atu mei Selusalema ha toenga, pea ‘e ‘alu atu mei Mo‘unga Saione ha hao: ko e fua‘a ‘a Sihova Sāpaoti te ne fakaai ‘a e me‘a ko ia.
33Ko ia ‘oku pehē ‘a e folofola ‘a Sihova ‘i he Tu‘i ‘Āsilia, ‘E ‘ikai te ne a‘u ki he kolo ni, ‘e ‘ikai te ne fana ha ngahau ki ai, pea ‘e ‘ikai te ne hiki ha fakaū ki ai, pea ‘e ‘ikai te ne tanu ha puke ki ai. 34Ko e hala na‘a ne ha‘u ai ko ia pē te ne foki atu ai, ka ko e kolo ni ‘e ‘ikai te ne a‘u ki ai–ko e tala ia ‘a Sihova mei he Ta‘ehāmai. 35He te u malu‘i ‘a e kolo ni ke fakamo‘ui koe‘uhi ko au, pea koe‘uhi ko ‘eku sevāniti ko Tēvita.
36Pea na‘e ‘alu atu ‘a e ‘āngelo ‘a Sihova, ‘o ne taa‘i ‘i he ‘apitanga ‘o ‘Āsilia ha toko taha kilu mā valu mano mā nima afe: pea ‘i he‘enau tu‘u hake hengihengi ‘i he ‘apongipongi, uoke! ko e tu‘unga ‘anga‘anga pē ena. 37Ko ia, na‘e hiki ‘a Senakalipe ko e Tu‘i ‘Āsilia, ‘o ne fononga, ‘o foki, ‘o nofo ‘i Ninive. 38Pea faifai, pea lolotonga ‘ene lotu ‘i he fale ‘o hono fa‘ahikehe ko Nisiloki, na‘e taa‘i ‘aki ia ‘a e heletā ‘e ‘Ātalameleki mo Sālesa ko hono ongo foha: ka na hola kinaua ki he fonua ko ‘Alalate. Pea na‘e fetongi ia ‘i he pule ‘e hono foha ko ‘Esa-‘ātoni.
Currently Selected:
KO ‘AISEA 37: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
