KO ‘AISEA 38
38
Ko e Puluhi pea Toe Lākoifie Lelei ‘a e Tu‘i ko Hesekaia
(2 Tu‘i 20.1-11; 2 Kal 32.24-26)
1‘I HE taimi ko ia na‘e toka ‘a Hesekaia, ‘o ne vaivai. Pea ha‘u kiate ia ‘a e palōfita ko ‘Aisea foha ‘o ‘Āmosi, ‘o ne pehē ki ai, Ko e folofola eni ‘a Sihova, Fai tu‘utu‘uni ki ho fāmili; he te ke pekia, kae ‘ikai mo‘ui.
2Pea tafoki ‘a Hesekaia, ‘o hanga ki he lulu, ‘o fai ‘ene lotu kia Sihova. 3Pea ne pehē, Tauange mo koe, ‘Eiki, ke ke manatua ‘eku fakafeangai ki he ‘Afiona ‘i he mo‘oni mo e loto haohaoa, mo ‘eku fai ‘a e me‘a ‘oku hoa mo ho finangalo. Pea tangi ‘a Hesekaia, ko e tangi ka ko ha tangi.
4Pea hoko ha folofola ‘a Sihova kia ‘Aisea, ‘o pehē, 5‘Alu, ‘o lea kia Hesekaia, Ko e folofola eni ‘a Sihova ko e ‘Otua ‘o ho‘o kui ko Tēvita, Kuo u ongo‘i ho‘o hū, kuo u sio ki ho lo‘imata: ko au ē te u fakatolonga ho‘o mo‘ui ko e ta‘u ‘e hongofulu mā nima. 6Pea te u fakahaofi koe mei he nima ‘o e Tu‘i ‘Āsilia: pea mo e kolo ni; ‘io, te u taukapo‘i ‘a e kolo ni. 7Pea ko eni ‘a e faka‘ilonga ma‘au meia Sihova te ne fakaai ‘a e folofola ni kuo ne fai: 8vakai te u fakafoki ‘a e ata ‘i he ngaahi tu‘unga (‘a ia kuo ‘alu hifo ‘i he uasi la‘ā ‘a ‘Āhasi ko e me‘a ‘i he la‘ā) ko e tu‘unga ‘e hongofulu. Ko ia, na‘e foki ‘a e la‘ā ko e tu‘unga ‘e hongofulu, ‘a ia kuo ‘alu hifo ai.
9Ko e me‘a na‘e tohi ‘e Hesekaia ko e Tu‘i Siuta ‘i he‘ene mahaki, ka kuo ne mo‘ui hake.
10Ne u lau ‘e au, Tā te u hū kei ho‘atā ki he matapā ‘o Hētesi:
Ko e toe ‘o hoku ngaahi ta‘u ‘e kaniseli.
11Na‘a ku pehē, Tā ko IAA ‘e ‘ikai te u māta‘i,
‘A IAA ‘i he fonua ‘o e mo‘ui:
‘E ‘ikai te u toe sio ki ha tangata
He‘eku fakataha mo e nofo mālōlō‘anga.
12Ko hoku nofo‘anga ni ‘oku ta‘aki, ‘o vete meiate au,
‘O hangē ko e tēniti ‘o e tauhi-manu.
Na‘a ku takai hangē ha lalanga ‘a e mo‘ui ‘a‘aku;
‘Ene tu‘usi au mei he fatu:
Po‘uli ‘a e ‘aho kuo ke faka‘osi au.#38.12 Po‘uli… au; ‘Oku ‘ikai ke mahino ‘a hono faka-Hepeluú.
13Ne ‘aho mo ‘eku ‘oiauē,
‘Ene fesifesi hoku hui kotoa hangē ha laione:
Po‘uli… au ē.#38.13 Po‘uli ‘a e ‘aho kuo ke faka‘osi au; ‘Oku ‘ikai ke mahino ‘a hono faka-Hepeluú.
14Hangē ha sualo ‘eku kaila ē,
Ko ‘eku ngū ko e kaleini pē,
Hangē ha lupe ‘eku tauto‘e:
‘Oku vaivai hoku mata ‘i he hanga hake,
‘Eiki, ‘oku fai fakamālohi kiate au:
Ke ke fepauaki ma‘aku.
15Ko e hā ha‘aku lea ‘e fai?
Na‘a ne tala‘ofa mai, pea kuo ne fakaai:
Ko hono kotoa hoku ngaahi ta‘u ko ia te u ‘alu fakama‘uma‘u
‘I he funga ‘o e mamahi kuo hā ni kiate au.
16Ko e ngaahi me‘a pehē, ‘e ‘Ātonai
‘Oku tefito ki ai ‘a e mo‘ui ‘a e kakai;
Pea ko e mo‘ui ‘a hoku laumālie
‘Oku ‘i ai ma‘u pē:
Ko ia, te ke fakaake au,
‘O ngaohi ke u mo‘ui ai.#38.16 ‘Oku ‘ikai ke mahino ‘a hono faka-Hepelū ‘o e veesi 15-16.
17Ne hoko kiate au ha kona ka ko ha kona:
Tā koe‘uhi pē ke u haohaoa;
Pea ko koe foki kuo ke ta‘ofi#38.17 ta‘ofi; Ko hono fakalea ia ‘i he ngaahi hiki fuoloa ‘e ni‘ihi, ka ‘oku pehē ‘i he faka-Hepeluú: ‘ofa‘i. ‘eku mo‘ui mei he luo tō ko e ‘auha;
He ko ‘eku ngaahi hia kotoa kuo ke tuku ki ho tu‘a.
18He ‘oku ‘ikai ke fai ha fakamālō atu ‘e Hētesi;
‘Oku ‘ikai ke hiva‘aki ‘e he mate ho fakafeta‘i:
Ko e hifo ki fa‘itoka ‘oku ‘ikai te nau ‘amanaki ki ho‘o fakamo‘oni tala‘ofa.
19Ko e mo‘ui, ko e mo‘ui pē ia ‘e fai fakamālō atu,
‘O hangē ko au he ‘aho ni:
Ko e tamai te ne fakahā ki he fānau
‘A ho‘o fai mo‘oni.
20‘Oku nofo mai ‘a Sihova ke fakamo‘ui kita;
Ko ia, ‘e ‘osi ‘etau mo‘ui ‘i he tā mo e hiva
‘a e ngaahi ta‘anga ‘a‘ata ‘i he fale ‘o Sihova.
21Pea kuo fekau ‘e ‘Aisea ke nau ‘omi ha takaonga fiki, ‘o ‘oposi ‘aki ‘a e hangatāmaki, pea te ne mo‘ui. 22Kuo pehē foki ‘e Hesekaia, Ko e hā ‘a e faka‘ilonga te u ‘alu hake ki he fale ‘o Sihova?#38.21,22 Ko e ongo veesi ko ení ‘oku fa‘a fokotu‘u he vaha‘a ‘o e veesi 6 mo e 7 ‘i he ngaahi hiki ‘e ni‘ihi ‘i onopooni, he ‘oku hoko lelei ange ia ai.
Currently Selected:
KO ‘AISEA 38: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
