KO ‘AISEA 36
36
Ko e Fakamanamana ‘a e Kakai ‘Āsiliá ki Selusalema
(2 Tu‘i 18.13-27; 2 Kal 32.1-19)
1PEA ko eni ‘i he hongofulu mā fā ta‘u ‘o Kingi Hesekaia, na‘e ‘alu hake ‘a Senakalipe ko e Tu‘i ‘Āsilia ke tau‘i ‘a e ngaahi kolo Siuta na‘e ‘aa‘i, ‘o ne puke ia. 2Pea fekau atu ‘e he Tu‘i ‘Āsilia ‘a e Lapisake mei Lākisi ki Selusalema kia Kingi Hesekaia mo ha fu‘u tau. Pea ne tu‘u ‘i he takingavai ‘o e lepa ‘olunga, ‘i he hala tanu ‘oku ‘alu ki he ‘api ‘o e fō kofu. 3Pea ‘alu atu kiate ia ‘a ‘Īlaiakimi foha ‘o Hilikaia, ‘a ia na‘e pule ki he Loto‘ā, mo Sēpina ko e sikalaipe, mo ‘Ioa foha ‘o ‘Ēsafe na‘e ‘a‘ana ‘a e tohi Kalonikali. 4Pea lea kiate kinautolu ‘a e Lapisake, Mou lea mu‘a kia Hesekaia, Ko e folofola eni ‘a e Tu‘i Lahi, ‘a e Tu‘i ‘Āsilia, Ko e hā ‘a e falala ko eni ‘oku ke fai? 5Tala atu, ko e koto launoa pē ‘a e pehē ‘oku ai ha‘o fakakaukau mo hao ivi ki he fai ‘o e tau: ka ko hai ena ‘oku ke falala ki ai, ho‘o tu‘u kiate au? 6Tā ‘oku ke falala ki ho‘o tokotoko ‘aki ‘a e kaho mafesi na, ‘a ‘Isipite; ‘a ia ka falala ki ai taha, ‘e hūkia ai hono nima, ‘o ne lavea: ‘oku pehē ‘a Felo ko e Tu‘i ‘Isipite kiate kinautolu ‘oku falala kiate ia.#‘Isi 29.6-7
7Pea kapau te ke pehē mai, ‘Oku mau falala kia Sihova ko homau ‘Otua: ‘ikai ko ena ia kuo holoki ‘e Hesekaia hono ngaahi ‘esi mo hono ngaahi ‘ōlita, pea kuo ne pehē ki Siuta mo Selusalema, Ko e ‘ōlita pē ko eni te mou fai ai ho‘omou hū? 8Pea ko eni, ta fepauaki mu‘a, ‘a koe mo hoku ‘Eiki ko e Tu‘i ‘Āsilia, pea te u ‘atu ha uaafe‘i hoosi, ‘o kapau te ke lava ‘e koe ke fakatotofu hono heka‘i. 9Pea kapau ‘oku ‘ikai te ke lava ke teke‘i ha taha ‘o e ngaahi kapiteni si‘i ‘oku nofo ki hoku ‘Eiki, pea ‘oku ke falala koā ki ‘Isipite ke ‘omi ha uta sāliote mo ha tau hoosi? 10He ‘oku ta‘ekau ‘a Sihova ‘i he‘eku a‘u hake ke tau‘i ‘a e fonua ni, mo faka‘auha? Na‘e folofola mai ‘a Sihova kiate au, ‘Alu hake ki he fonua ko ia, ‘o faka‘auha.
11Pea lea ange ki he Lapisake ‘a ‘Īlaiakimi mo Sēpina mo ‘Ioa, ‘o nau pehē, Lea mu‘a ki ho‘o kau tamaio‘eiki ko kimautolu ‘i he lea faka-‘Ālamea; he ‘oku mau ‘ilo ia: kae ‘oua na‘a ke lea kiate kimautolu ‘i he lea faka-Siu, kae fanongo ‘a e kakai ‘i he funga ‘ā.
12Ka ka pehē ‘a e Lapisake: He kuo fekau au ‘e hoku ‘eiki ke fai ‘eku lea ni ki ho ‘eiki pē, pe kiate koe? ‘ikai kuo ne fekau au ki he tu‘unga me‘a ‘oku nofo ‘i he funga ‘ā na, he te nau kau mo kimoutolu ‘i he kai ‘enau tu‘u mama‘o, mo inu ‘enau tu‘utata?
13Pea tu‘u atu ‘a e Lapisake, ‘o ne kalanga le‘o lahi ‘i he lea faka-Siu, ‘o ne lau ‘o pehē: Mou fanongo mai ki he tala ‘a e Tu‘i Lahi, ko e Tu‘i ‘Āsilia. 14Ko e folofola eni ‘a ‘ene ‘afio, ‘Oua na‘a fakahehema‘i kimoutolu ‘e Hesekaia; he tala‘ehai te ne lava ke fakahaofi kimoutolu: 15pea ke ‘oua na‘a fakafalala kimoutolu ‘e Hesekaia kia Sihova, he‘ene pehē, Kuo pau ke fakahaofi kitautolu ‘e Sihova, ‘e ‘ikai tuku ‘a e kolo ni ki he nima ‘o e Tu‘i ‘Āsilia. 16‘Oua ‘e tokanga kia Hesekaia: he ko eni ‘a e folofola ‘a e Tu‘i ‘Āsilia, ‘Omi holo kiate au, pea mou hū ki tu‘a kiate au; ka mou kai takitaha mei hono vaine pea mei hono fiki, pea mou inu takitaha mei hono lepa ‘o‘ona: 17kae‘oua ke u ha‘u, ‘o ‘ave kimoutolu ki ha fonua ‘oku hangē ko homou fonua ni, ko e fonua uite‘ia, mo kava‘ia, ko e fonua me‘akai‘ia mo ngoue vaine‘ia. 18Vakai na‘a lōtaki kimoutolu ‘e Hesekaia, ‘o pehē, ‘E fakahaofi kitautolu ‘e Sihova, He kuo fakahaofi ‘e ha taha ‘o e ngaahi ‘otua ‘o e kakai ko ē hano fonua mei he nima ‘o e Tu‘i ‘Āsilia? 19Ko e fē ‘a e ngaahi ‘otua ‘o Hēmati, mo ‘Apati? ko e fē ‘a e ngaahi ‘otua ‘o Sipalavaimi? he kuo nau fakahaofi ‘a Samēlia mei hoku nima? 20Ko hai ‘o e ngaahi ‘otua ‘o e ngaahi fonua ko ē kuo fakahaofi hono fonua mei hoku nima, ke ngali lava ai ‘e Sihova ke fakahaofi ‘a Selusalema mei hoku nima?
21Ka ka fakalongo pē ‘a kinautolu, ‘o ‘ikai te nau tali ha momo‘i lea: he ko e tu‘utu‘uni ‘a e tu‘i ia, ‘Oua te mou tali ia. 22Pea toki ha‘u ‘a ‘Īlaiakimi foha ‘o Hilikaia, ko e pule ‘o e Loto‘ā, mo Sēpina ko e sikalaipe, mo ‘Ioa foha ‘o ‘Ēsafe na‘e ‘a‘ana ‘a e tohi Kalonikali–na‘a nau omi kia Hesekaia kuo hae hifo honau kofu, pea na‘a nau fakahā ki ai ‘a e ngaahi lea ‘a e Lapisake.
Currently Selected:
KO ‘AISEA 36: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
