KO ‘AISEA 35
35
Ko e Hala Tapu
1‘E fiefia ‘a e lala mo e fonua mamate; pea ‘e tome‘e ‘a e ‘Alapā, ‘o fisi hangē ko e lose. 2Te ne mātu‘aki fisi mo tome‘e, ‘io, tome‘e mo mavava; ‘e ‘ange ki ai ‘a e lāngilangi ‘o Lepanoni, ‘a e teunga ‘o Kāmeli mo Sāloni: ko e fa‘ahinga ko ia te nau mamata ki he lāngilangi ‘o Sihova, ko e teunga‘ia ‘o hotau ‘Otua. 3Poupou ‘a e ngaahi nima ‘oku vaivai,#Hep 12.12 pea pukepuke ‘a e ngaahi tui ‘oku tete; 4lea ki he kakai ‘oku tateme honau loto, Mou fakama‘u hifo, ‘oua ‘e manavahē: vakai, ko homou ‘Otua ena ‘oku ha‘u ko e sauni, ‘oku ne ha‘u mo e totongi faka-‘Otua; ‘e ha‘u ‘e ia, ‘o fakamo‘ui kimoutolu. 5‘E toki fakaava ‘a e mata ‘o e kui,#Māt 11.5; Luk 7.22 pea to‘o ‘a e telinga ‘o e tuli. 6Toki hopo ‘a e heke hangē ha tia, pea hiki mavava ‘a e ‘elelo ‘o e noa; he pā mai ‘a e ngaahi vai ‘i he lala, mo e ngaahi vaitafe ‘i ‘Alapā. 7Pea ‘e hoko ‘a e vakaloa ko e vai mo‘oni, pea ko e fonua pakukā ko e ngaahi vai mapunopuna: ‘i he nofo‘anga ‘o e fanga siakali ‘i honau tokoto‘anga ‘oku ai ha pitenga ‘o e kaho mo e pepailo. 8Pea ‘e tu‘u ‘i he potu ko ia ha tanu, pea mo ha hala, pea ‘e ui ia Ko e Hala Tapu; ‘e ‘ikai laka ai ha ta‘ema‘a; kae tuku pē ki he fa‘ahinga ko ē: pea ko e kau fononga ‘i he hala ko ia, neongo ko e vale, ‘e ‘ikai te nau hē.#35.8 pea… hē. ‘Oku ‘ikai ke mahino ‘a hono faka-Hepeluú, ka ‘oku ngali tonu hono hiki ‘o: ‘e ‘ikai ke takihee‘i ‘e ha vale ha taha ‘e fononga ai. 9‘E ‘ikai ai ha Saione, pea na‘a mo e fungani manu fekai ‘e ‘ikai te ne lava ke ‘alu hake ki ai, ‘e ‘ikai ‘ilo ha me‘a pehē ‘i ai: ka ‘e laka ai ‘a e kakai kuo huhu‘i: 10pea ko e kau veteange ‘a Sihova te nau foki, ‘o ha‘u ki Saione mo e mavava; pea ko e fiefia ta‘engata ko e pale ‘i honau ‘ulu: te nau a‘usia ‘a e fiefia mo e nēkeneka, pea ko e mamahi mo e māpuhoi ‘oku moulu atu.
Currently Selected:
KO ‘AISEA 35: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
