KO ‘AISEA 34
34
‘E Tautea ‘e he ‘Otuá ‘a hono ngaahi Filí
1‘UNU‘UNU mai ‘a e ngaahi pule‘anga ke fanongo; pea tokanga, ‘a kimoutolu ‘a e ngaahi fa‘ahinga: ke fanongo ‘a māmani mo hono fonu ‘o‘ona; ‘a e fonua nofo‘anga, mo ia kotoa ‘oku tupu ai. 2He ‘oku ai ha houhau ‘a Sihova ke tō ki he pule‘anga kotoa, ‘io, ko e ‘ita kakaha ke tō ki honau hōsitē kotoa: kuo ne mōifua kinautolu, kuo ne tuku kinautolu ki he tāmate. 3Pea ‘e lī ki tu‘a ‘enau pekia, pea ko honau ngaahi ‘anga‘anga ‘e ‘alu hake honau ‘elo, pea ‘e vai ‘o mole ‘a e ngaahi mo‘unga ‘i honau toto. 4Pea ‘oku ‘auhia ‘a e hōsitē kotoa ‘o e ngaahi langi, pea ‘oku takai ‘a e ngaahi langi ‘o hangē ha takainga tohi: pea ko honau hōsitē kotoa ‘e mae, hangē ko e mae ‘a e lau ‘o e vaine, ‘io, hangē ko e ngangana mei ha fu‘u fiki ‘a e lau ‘oku mae.#Māt 24.29; Ma‘ake 13.25; Luk 21.26; Fkhā 6.13-14
5He ko ‘eku heletā kuo inu fakaputa ‘i he langi: vakai ‘oku ‘alu hifo ki ‘Ītomi, ‘io, ki he kakai kuo u mōifua ki he tautea.#‘Ais 63.1-6; Sel 49.7-22; ‘Isi 25.12-14; 35.1-15; ‘Ēmosi 1.11-12; ‘Opa 1-14; Mal 1.2-5 6Ko e heletā ‘a Sihova ‘oku ne inu toto ke fonu, ‘oku hoko ‘o nge‘enge‘e ‘i he ngako, ‘i he toto ‘o e fanga lami mo e fanga kosi tangata, ‘aki ‘a e ngako kofuua ‘o e fanga sipi tangata He ‘oku ai ha feilaulau ‘a Sihova ‘i Pōsila, ‘io, ko e fu‘u tāmate ‘i he fonua ‘o ‘Ītomi. 7Pea ‘e ‘alu hifo mo kinautolu ki he mate ‘a e fanga pufaloe ‘o e vao, mo e fanga pulu talavou, fakataha mo e motu‘a pulu; pea ‘e inu fakaputa honau fonua ‘i he toto, pea ‘e kakano honau efu ‘i he ngako. 8He ‘oku ‘i ai ha ‘aho sauni ‘a Sihova, ha ta‘u ‘eke ‘o e totongi na‘e tu‘utu‘uni ma‘a Saione.
9Pea ko e ngaahi vaitafe ‘o ē kuo liliu ko e tā, pea liliu hono efu ko e sūlifa, pea hoko hono fonua ko e tā vela pē. 10‘E ‘ikai tāmate‘i po‘uli pe ‘aho; ‘oku ‘alu hake ‘a e kohu ‘o ē ‘o ta‘engata: ‘oku tuku lala mei he to‘utangata ki he to‘utangata; ‘oku ‘ikai ‘alu ai ha taha ‘o ta‘engata pea ta‘engata.#Fkhā 14.11; 19.3 11Pea ‘e tofi‘a ‘aki ia ‘a e pelikani mo e lupe ‘o e lala; pea ‘e nofo‘anga ki ai ‘a e lulu lahi mo e lēveni: pea te ne ‘ai ki ai ‘a e kafa ‘a Tohu, pea mo e fuavai ‘o Pohu.#34.11 Tohu… ohu; Ko mo Pohú na‘e ngāue‘aki ‘i he mu‘aki kuonga ‘o māmani ke fakahā ‘a e anganoá. Ka ai ha‘ana faikehekehe, ko e taha ko e anganoa, ko e taha ko e nge‘esi. 12Ko hono kau nōpele–ka ‘oku ‘ikai kei ‘i he potu ko ia ha pule‘anga ke nau fili ha taha ki ai; pea ko hono hou‘eiki kātoa kuo ikunoa.#34.12 ‘Oku kamata‘aki ‘a e vēsí ni ‘a e fo‘i le‘a ‘oku ‘ikai ke mahino ‘a hono uhingá. 13Kuo vao talatala ‘a e ngaahi palasi ‘o ē, ‘e tupu ‘a e ngaahi fa‘ahinga talatala ‘i hono ngaahi talitau‘anga: pea ‘e hoko ko e nofo‘anga ‘o e fanga siakali, ko e kaikai‘anga ‘o e fanga ‘ositalesi. 14Pea ‘e fetaulaki ai ‘a e manu ‘o e lala mo e manu ‘o e matāfonua, pea ‘oku feui‘aki ai ‘a ha‘a Sātulō: ‘io, ‘oku manofo ai ‘a Lilisi,#34.14 Lilisi; Ko Lilisí ko e fa‘ahikehe taka po‘uli na‘e tui ‘a e kakai ‘o ono‘ahó ‘oku nofo he ngaahi feitu‘u maomaonganoa. ‘o ne ‘ilo ai ha mālōlō‘anga. 15Ko e potu ko ia ‘oku ngaohi ai ‘e he ngata hopo hono falenga, ‘o ne fakatō fua mo fofoa‘i, ‘o ne tata‘o ‘i he malu ‘o ē: ‘io, ‘oku fakataha ‘i he potu ko ia ‘a e fanga vulitua takitaha mo hono hoa.
16Mou kumi ‘i he tohi ‘a Sihova, ‘o lau:
‘Oku ‘ikai ha taha ‘i he ngaahi me‘a ko ia ‘oku hala,
‘Oku ‘ikai ha taha ‘oku ta‘efaihoa:
He ko hoku ngutu ko ia ia kuo ne fai tu‘utu‘uni,
Pea ko e laumālie ‘o ‘ene ‘Afio
Ko ia ia kuo ne tānaki ‘a e ngaahi me‘a ko ē.
17Pea ko ia ia kuo ne fai ‘a e talotalo ma‘anautolu, pea ko hono nima kuo vahe ‘a e fonua kiate kinautolu ‘aki ‘a e kafa: te nau tofi‘a ‘aki ‘o ta‘engata, te nau nofo ai mei he to‘utangata ki he to‘utangata.
Currently Selected:
KO ‘AISEA 34: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
