KO ‘AISEA 33
33
Ko ha Lotu Kole Tokoni
1‘OIAUĒ ‘a koe ‘oku fai fakamālohi, ka na‘e ‘ikai fai fakamālohi kiate koe; pea ‘oku ke kākā, ka na‘e ‘ikai fai ha kākā kiate koe! Ka ‘osi ho‘o fai fakamālohi, ‘e fakamālohia koe; ka kakato ho‘o fai kākā, te nau fai kākā kiate koe.
2‘E Sihova, ke ke ‘ofa mai; ko koe kuo mau tatali ki ai: ke ke hoko ko honau nima he pongipongi kotoa pē, ‘io, ke ke hoko ko homau fakahaofi ‘i he taimi faingata‘a. 3‘I he ongoonga‘a mai ha fu‘ufu‘unga me‘a, na‘e hola ‘a e ngaahi kakai; ‘i ho‘o mahiki hake ke tu‘u, na‘e movete ‘a e ngaahi pule‘anga. 4Pea ‘e tufi ho‘omou vete hangē ko e tufi ‘e he ‘unufe: ‘o hangē ko e lele ‘a e fanga he‘e, ‘oku pehē ‘a e lele ki ai.
5‘Oku fotu ‘a Sihova; he neongo ‘ene ‘afio ‘i taukakapa ‘oku ne fakafonu ‘a Saione ‘i he fakalao mo e faitotonu. 6Pea ‘e ai ha tu‘u ma‘u ho ngaahi taimi, ha fokotu‘unga fakamo‘ui, mo e poto, mo e ‘ilo: ko e ‘apasia kia Sihova ko ia ia ‘ene koloa.
7Vakai, ko e kau loto fakalaione#33.7 ko e kau loto fakalaione; pe ko e ngaahi laione ‘a e ‘Otuá; pe ko e kau helo. ‘oku nau tangi fakapō ‘i tu‘a: ‘oku tangi mamahi ‘a kinautolu na‘e ‘alu ke alea melino. 8‘Oku lala ‘a e ngaahi hala pule‘anga, kuo tuku ‘a e fononga: kuo ne maumau fuakava, kuo ne luki ki he ngaahi kolo, ‘oku ‘ikai te ne momo‘i toka‘i ‘a e kakai. 9‘Oku tangilāulau ‘a e fonua; ‘oku vaivai; ‘oku laea ‘a Lepanoni, ‘oku mae: ko Sāloni ‘oku hangē ko ‘Alapā; pea ko Pēsani mo Kāmeli ‘oku lulu hona lau.
10Kuo taimi te u tu‘u–ko e folofola ia ‘a Sihova–kuo taimi te u mālanga ki ‘olunga; kuo taimi te u mahiki hake. 11Ko e musie mōmoa ‘oku mou feitama ai, te mou fā‘ele‘i ‘a e veve: ko ho‘omou mānava ko e afi ia te ne keina kimoutolu.#33.11 ko ho‘omou… kimoutolu; Ko hono faka-Hepeluú ia, ka ‘oku pehē ‘i he hiki fuoloa ‘e taha: ko hoku laumālié, ‘oku hangē ia ha afi te mou ‘auha ai. 12Pea ‘e hoko ‘a e ngaahi kakai ‘o hangē ko e ngaahi ‘umu lahe: ko e ngaahi fokotu‘unga talatala ‘e tutu ‘aki ‘a e afi. 13Fanongo, ‘a e kau mama‘o, ki he me‘a kuo u fai; pea ‘ilo hoku ngū, ‘a kimoutolu ‘oku ofi.
14‘Oku manavahē ‘a e kau angahala ‘i Saione; ‘oku puke ‘i he tete ‘a e kau angahala fufū. “Ko hai ‘iate kitautolu ‘e lava ke nonofo mo e afi faka‘auha? ko hai ‘iate kitautolu ‘e lava ke nonofo mo e vela ta‘engata?” 15Ko ia ‘oku ne foua ‘a e mā‘oni‘oni, pea ko ‘ene lea ko e totonu matematē; ko ia ‘oku ne fehi‘a ki he koloa ma‘u ‘i he fakamālohi, ko ia ‘oku ne hamusi hono nima mei he tali pa‘anga fufū; ko ia ‘oku tāpuni hono telinga mei he lau fakapō, pea ‘oku ne kui hono mata ke ‘oua te ne sio ki he kovi; 16ko e taha pehē te ne nofo ‘i taukakapa: te ne ma‘u ‘a e ngaahi makatu‘u talitau‘anga mōno taua: ‘e ‘ange ma‘u pē ‘ene me‘akai; ko hono vai ‘e pau.
Ko ha Kaha‘u Lāngilangi‘ia
17‘E māta‘i ‘e ho mata ‘a e Tu‘i kuo ‘ai hono lāngilangi: te na māta‘i ha fonua ‘oku mama‘o hono ngaahi kau‘ā. 18Ko ho loto ena ‘oku fakamanatu ki he taimi ilifia: “Kofa‘ā ‘a e tama na‘e tohi ‘a e tukuhau? kofa‘ā ‘a e tama na‘e fua tautau ia? kofa‘ā ‘a e tama na‘e lau ‘a e ngaahi taua?” 19Ko e kakai fefeka na ‘oku ‘ikai te ke kei sio ki ai, ‘a e kakai lea mei he monga, ongo‘ingata‘a, ko e ‘elelo le‘o vale ta‘emahino. 20Sio ki Saione, ko ‘etau kolo kātoanga: ‘e sio ho mata ki Selusalema ko e nofo‘anga malu, ko e tēniti ‘oku ‘ikai ke hiki holo, ‘oku ‘ikai ke ta‘aki hono pine ha taimi, pea ‘oku ‘ikai ke motu ha taha ‘o hono ngaahi afo. 21Kaekehe ‘oku ‘i ai ‘a Sihova ko hotau lāngilangi‘anga, ko hotau potu vaitafe‘ia, manga‘ivai‘ia, laulahi ki hē mo ē, ta‘e‘alu ai hani vaka ‘a‘alo, pea ‘e ‘ikai hū ki ai ‘ani vaka tapu.#33.21 ‘Oku ‘ikai ke mahino ‘a e faka-Hepelū ‘o e vēsí ni. 22He ko Sihova ko hotau fakamaau, ko Sihova ko hatau faifono, ko Sihova ko hotau tu‘i; ko ia ia te ne fakahaofi kitautolu. 23‘Oku malūlū ho ngaahi maea; ‘oku ‘ikai te nau ta‘ofi ke totonu honau fanā, na‘e ‘ikai mafola ke a‘u ‘a e lā faka‘ilonga: ka ‘i he taimi ko ena ‘oku tufa ke lahi ‘a e vete; na‘a mo e heke te ne puke ha vete. 24Pea ‘oku ‘ikai ha nofo ai te ne pehē, ‘Oku ou mahaki: ko e kakai ‘oku nofo ai ‘e fakamolemole ‘enau angahala.
Currently Selected:
KO ‘AISEA 33: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
