KO ‘AISEA 32
32
Ko ha Tu‘i Fai Totonu
1VAKAI ‘e pule mā‘oni‘oni ha tu‘i; pea ko e me‘a ki he hou‘eiki, te nau fai ‘enau pule ‘o taau mo e konisitūtone. 2Pea ‘ilonga ha ‘eiki, te ne hangē ha fakaū mei he matangi, mo e toitoi‘anga mei he ‘alotāmaki; hangē ko e ngaahi manga‘i vai ‘i ha potu mōmoa, hangē ko e malu ‘o ha makatu‘u kāfakafa ‘i ha fonua puhengia. 3‘E ‘ikai kei pulusi ‘a e mata ‘o e sio, pea ‘e tokanga mai ‘a e telinga ‘o e fanongo. 4Pea ko e loto ‘o e kakai ‘oho ‘e mahino ki ai ‘a e poto, pea ko e ‘elelo ‘o e kau le‘o vale ‘e vave ‘ene lea mahino. 5‘E ‘ikai kei ui ‘a e vale ko e ‘eiki, pea ‘e ‘ikai lau ‘a e nima ma‘u ko e koloa‘ia. 6He ko e vale ‘e vale ‘ene lea, pea ko hono loto ‘e ngāue ki he kovi, ke fai ‘a e angahala fufū, pea ke lau kia Sihova ‘a e me‘a ‘oku hala, ke tuku nge‘esi pē ‘a e holi ‘a e fiekaia, pea ke ta‘ofi ‘a e inu mei he fie inu. 7Pea ko e ouau ‘o e nima ma‘u ‘oku kovi: ‘oku fa‘u hele ha taha pehē ke maumau ‘a e kau tu‘utāmaki ‘aki ‘a e ngaahi lea loi, neongo ‘oku fakahā ‘a e totonu ‘e si‘i masiva. 8He ko e ‘eiki ‘oku ne fakakaukau me‘a faka‘ei‘eiki; pea ko e me‘a faka‘ei‘eiki ‘e tu‘u ma‘u ai ha taha pehē.
9‘a e kau fefine nofo hamumu noa, mou tu‘u, fanongo ki he‘eku lea; ‘a e kau finemui falala noa, mou fokotu‘u telinga mai ki he me‘a ‘oku ou lau. 10Hili ha ta‘u mo ha ngaahi ‘aho te mou tete, ‘a e kau falala noa na: he kuo ‘osi‘osingamālie ‘a e ta‘u kālepi, ‘e ikunoa ‘a e to‘ukai. 11Ngaue, ‘a e kau fefine hamumu noa; tete, ‘a e kau fefine falala kovi: vete kofu, ‘ai ke mou telefua, pea ‘ai ‘a e tauanga‘a ki homou kongaloto. 12Te mou sī huhu koe‘uhi ko e ngaahi ngoue‘anga mamana, koe‘uhi ko e vaine ngafuhifuhi. 13‘E ‘alu hake ‘a e vao talatala ‘i he kelekele ‘o hoku kakai; ‘io, ‘i he fale kotoa na‘e fiefia ‘i he kolo na‘e tome‘e. 14He ko e palasi kuo li‘aki; ko e uōuōtu‘u ‘o e kolo kuo tuku: ko ‘Ōfeli mo e fale le‘o ko e ngaahi ‘ana pē, ‘o talu ai, ko e fiefia‘anga ‘o e ‘asi vao, ko e kaikai‘anga ‘o e ngaahi tākanga.
15Kae‘oua ke mahua mai ‘a e Laumālie mei ‘olunga, pea hoko ‘a e fonua maomaonganoa ko e tokanga ngoue, kae lau ‘a e tokanga ngoue ko e vao pē. 16Pea ‘e ‘apitanga ‘a e fakalao ‘i he fonua maomaonganoa, pea ‘e nofo‘anga ‘a e faitotonu ‘i he tokanga ngoue. 17Pea ‘e hoko ‘a e ngāue ‘a e faitotonu ko e melino; pea ko e fua ‘a e faitotonu ko e nonga mo e falala ‘o ta‘engata. 18Pea ‘e nofo ‘a hoku kakai ‘i ha nofo‘anga fiemālie, pea ‘i ha ngaahi ‘apitanga falala‘anga, pea ki he ngaahi mālōlō‘anga ‘oku lava ai ke hamumu noa. 19Ka ‘e ō ha ‘uha maka mo e hinga ‘a e vao; pea ‘e mātu‘aki tō ki lalo ‘a e kolo. 20Monū‘ia ā ka ko kimoutolu ‘oku tō ta‘u ‘i he ngaahi ve‘e vai kotoa pē, ‘oku veteange ‘a e va‘e ‘o e pulu mo e ‘asi.
Currently Selected:
KO ‘AISEA 32: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
