KOHELETI 8
8
1KO hai ‘oku tatau mo e tangata poto? Pea ko hai mo ia ‘oku ‘ilo ki he ‘uhinga ‘o ha me‘a? Ko e poto ha tangata ‘oku ne fakaulo hono fofonga, ‘o ne liliu ‘a e feliha‘a ‘o hono fōtunga.
Fakaongoongo ki he Tu‘í
2Ko au ē, ke ke tauhi ‘a e folofola ‘a e tu‘i:#8.2 ke… tu‘i; Ko hono fakalea ia ‘i he ngaahi hiki fuoloa ‘e ni‘ihi, ka ‘oku ‘ikai ke mahino ‘a hono faka-Hepeluú. kae‘uma‘ā telia ‘a e fuakava faka‘otua. 3‘Oua te ke ‘oho ke ‘alu mei he ‘ao ‘o ‘ene ‘afio; ‘oua te ke kau ‘i ha alea kovi: he ‘oku ne lava ke fai ‘a e me‘a kotoa ‘oku ne finangalo ki ai. 4Koe‘uhi ā,
Ko e folofola ‘a e tu‘i ko e me‘a mālohi;
Pea ko hai te ne malea kiate ia,
Ko e hā ‘oku ke fai?
5Ko ia ‘oku tauhi tu‘utu‘uni, ‘e ‘ikai te ne ‘ilo ha alea kovi;#8.5 ‘ilo… kovi; pe ‘ilo ha kovi. he ‘oku ‘ilo ‘e he ‘atamai ‘o e poto ‘oku ai ha ‘aho kotofa mo ha ‘aho fakamaau. 6He ki he feinga kotoa pē ‘oku ai hono ‘aho kotofa mo hono fakamaau, ‘oka lahi fau ki he kakai ‘a e kovi ‘oku nau ‘i ai. 7He ‘oku ‘ikai te ne ‘ilo pe ko e hā ‘e hoko: seuke, ko hai ‘e mafakahā kiate ia ‘a e anga ‘o ‘ene hoko mai? 8‘Oku ‘ikai ha tangata ‘e mapule ki he matangi ke ta‘ofi ‘a e matangi; pea ‘oku ‘ikai ha taha te ne pule ki he ‘aho ‘o e mate; pea ‘oku ‘ikai ha fakangofua nofo ‘i he tau ko ia. Pea ‘oku ‘ikai lava ke fakahaofi ai ha taha ‘e he‘ene anga fīta‘a.
Ko e Kakai Faikoví mo e Kakai Fai Leleí
9Ko e me‘a ko ia kotoa ne u sio ki ai, (‘io, ‘i he‘eku fakatokanga hoku loto ki he ngaahi me‘a kehekehe ‘oku fai ‘i he lalo la‘ā ‘i he taimi na‘e pule ai ha tangata ki he kakai ke nau kovi ai. 10Pea ‘i he pule ko ia, ne u sio ki ha ni‘ihi angahala ‘oku tanu kinautolu kuo nau ‘i nu‘u: kae ‘alu ta‘efie ‘alu mei he Potu Tapu ‘a e faitotonu, pea ngalo kinautolu ‘i he kolo. Ko e muna mo ia foki.#8.10 ‘Oku ‘ikai ke mahino ‘a e faka-Hepelū ‘o e vēsí ni.
11Ko e me‘a ‘i he ‘ikai fakaai vave ‘a e tautea ‘o e ngāue kovi na‘e tala, ko ia ko hono ō ia ‘oku mālohi ai ‘a e loto ‘o e hako‘i tangata ke faikovi. 12Neongo e tu‘o teau ‘a e faikovi ‘a e angahala, pea ‘oku ne tolonga fuoloa ai; ka ‘oku ‘ilo foki ‘e au kuo pau ke lelei ha taha ‘oku ‘apasia kia ‘Elohimi, ‘a kinautolu ‘oku tupu ‘enau ‘apasia ko ‘enau ongo‘i ‘a ‘ene ‘Afio. 13Ka ‘e ‘ikai lelei ki he angahala, pea ‘e ‘ikai tolonga ‘ene mo‘ui faka‘ata; ko e ‘ātunga ‘o e ‘ikai te ne ‘apasia he ongo‘i ‘a e ‘Otua. 14‘Oku ai ha muna ‘oku fai ‘i he funga ‘o māmani, ‘a ‘eni: ‘Oku ai ha faitotonu ‘a ia ‘oku hoko kiate kinautolu ke hoa mo e ngāue ‘a e kau angahala: pea ‘oku ai ha kau angahala ‘a ia ‘oku hoko kiate kinautolu ke hoa mo e ngāue ‘a e faitotonu.
15Pehē ‘e au ko e muna foki mo ia. Pea u fakahīkihiki‘i ‘a e fiefia, tokua ‘oku ‘ikai ha lelei ki he tangata ‘i he lalo la‘ā ka ke te kai mo inu mo fakafiefia; pea ke ō ai pē mo ia ‘i he‘ene ngāue ‘i he ngaahi ‘aho ‘o ‘ene mo‘ui, ‘a ia kuo ‘ange kiate ia ‘e ‘Elohimi ‘i he lalo la‘ā.
16‘I he‘eku tuku hoku loto ke ‘ilo poto, pea ke sio ki he fakaongosia ‘oku fai ‘i he funga ‘o māmani, (he ‘oku ‘ikai foki ke ‘ilo ‘e hono mata ki he mohe ‘i he ‘aho pe ko e po‘uli): 17pea u vakai ‘a e fu‘u ngāue ‘a ‘Elohimi, ‘oku ‘ikai lava ‘a e tangata ke a‘usia ‘a e ngāue ‘oku fai ‘i he lalo la‘ā; neongo pe ko e hā ‘a e fakafitefita‘a ‘a e tangata ke hakule, ka ‘e ‘ikai te ne a‘usia; ‘io, neongo foki ‘e pehē ‘e he poto te ne ‘ilo pē, ka ‘e ‘ikai te ne lava ke tatae ki ai.
Currently Selected:
KOHELETI 8: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
