KOHELETI 7

Ko e Fakalaulauloto ki he Anga ‘o e Nofo ko eni

1‘OKU ngangatu ange ‘a e hingoa lelei ‘i he lolo tākai,

Mo e ‘aho ‘o e pekia ‘i he ‘aho ‘o hoto fanau‘i.#Pal 22.1

2‘Oku lelei hake ke ‘alu ki ha fale ‘oku ‘i ai ha tangi, ‘i he ‘alu ki he fale ‘oku fai ai ha inu kava: he ko e me‘a ko ē ko e ngata‘anga ‘o e tangata kotoa pē, pea ko e tangata mo‘ui ‘oku ne ‘ai ia ki hono loto.

3‘Oku lelei hake ‘a e fakamamahi ‘i he kata: he ‘oku ō mo e fofonga mamahi ‘a e loto ‘oku taau.

4Ko e loto ‘o e poto ‘oku lata ki he fale ‘o e tangi, ka ko e loto ‘o e vale ‘oku lata ki he fale ‘o e fiefia.

5‘Oku lelei ange ‘a e fanongo ki he valoki ‘a e poto ‘i ha‘ate fanongo ki ha hiva ‘a ha kau sesele.

6He hangē ko e mumuhu ‘a e ‘akau talatala ‘i he lalo kulo, ‘oku pehē ‘a e kata ‘a e kau sesele. Pea ko e muna mo eni foki.

7Seuke, ko e fakamālohia ‘oku me‘a mo sesele ai ‘a e tangata poto;

Pea ko e tali pa‘anga fufū ‘oku ne maumau‘i ‘a e loto.

8‘Oku lelei ange ‘a e iku‘anga ‘o ha me‘a ‘i hono kamata.

‘Oku lelei ange ‘a e anga mokomoko ‘i he anga fielahi.

9‘Oua na‘a ‘oho ho loto ke ‘ita: he ko e ‘ita ‘oku ne ngaohi hono nofo‘anga ‘i he fatafata ‘o e sesele.#Sēm 1.19

10‘Oua te ke pehē, Ko e hā na‘e lelei ange ai ‘a e ngaahi ‘aho mu‘a‘i he ngaahi ‘aho ko eni? he ‘oku ‘ikai tupu mei he poto ho‘o fehu‘i pehē.

11Ko e me‘a lelei ‘a e poto ‘oku ō mo ha tofi‘a:

Pea ko e me‘a ‘aonga kiate kinautolu ‘oku mamata ki he la‘ā.

12He ko e poto ko e malu‘anga, ko e pa‘anga ko e malu‘anga: ka ‘oku hulu ‘a e ‘ilo, he ‘oku fakahaofi ‘e he poto ‘a e tangata ‘oku ma‘u ia.

13Sio lelei ki he ngāue ‘a ‘Elohimi.

He ‘e lava ‘e hai ke fakatotonu ‘a e me‘a kuo ne ngaohi ke piko?

14‘I ha ‘aho lelei ke ke lelei, pea ‘i ha ‘aho kovi, sio lelei ki ai; kuo ngaohi foki ‘e ‘Elohimi ke fakatoukatea ‘a ē mo ē, koe‘uhiā ke ‘oua na‘a kitea ‘e ha tangata ha me‘a hili ‘ene pekia.#7.14 koe‘uhiā… pekia; ‘Oku fihi. Ko hono hiki ‘e taha ko e: ‘Oku ‘ikai te ke ‘ilo ‘e koe ‘a e me‘a te ke hoko atu ki ai; pe He‘ikai pē ke tonu ha‘o anga‘i ia.

15Ko e anga ‘o e me‘a kehekehe kuo u mamata ki ai ‘i hoku ngaahi ‘aho muna ni: ‘oku ai ha mā‘oni‘oni kuo mole neongo ‘ene mā‘oni‘oni; pea kuo ‘i ai ha faihala kuo tolonga neongo ‘ene faihala.

16‘Oua te ke mā‘oni‘oni fau;

Pea ‘oua na‘a hulu ho‘o fakapotopoto:

Koe‘uma‘ā ho‘o hoko ko e koto maumau?

17‘Oua te ke faihala fau;

Pea ‘oua te ke hoko ko e vale:

Koe‘uma‘ā ho‘o mate te‘eki hoko ho taimi?

18Ko hono lelei ke ke puke ki hē, kae ‘oua foki ‘e hamusi ho nima mei hē: he ko ia ‘oku ‘apasia ki he ‘Otua te ne hao mei ai kotoa.

19‘E malu‘i ha poto ‘e he‘ene poto,

‘O lahi ange ‘i ha hongofulu‘i mafi ‘oku ‘i ha kolo.

20Seuke, ko e me‘a ki he tangata, ‘oku ‘ikai ha mā‘oni‘oni ‘i māmani, ‘a ia ‘oku ne fai lelei, ‘o ‘ikai angahala.

21Ko e me‘a foki ki he ngaahi lea ‘oku fai ‘e he kakai, ‘oua na‘a tokanga ho loto ki ai, na‘a ‘iloange te ke fanongo ki ho‘o tamaio‘eiki ‘oku ne talakaa‘i koe. 22Seuke, ‘oku ‘ilo ‘e ho loto kuo tu‘o lahi ‘a e talakaa‘i ha kakai kehe ‘e koe foki.

23Ko e me‘a ko ia kotoa kuo u sivi ‘aki ‘eku poto. Ne u lau te u a‘usia ‘a e poto: ka na‘e mama‘o pē ia meiate au. 24‘Oku mama‘o atu ‘a e me‘a ‘oku ‘i ai, pea loloto–Loloto? ko hai te ne mahakule? 25Tafoki ai au mo hoku loto ke ‘ilo mo ha‘ao mo kumi ki he poto, mo e ‘uhinga ‘o e ngaahi me‘a, pea ke u ‘ilo ko e angahala ko e fai vale, pea ko e fakasesele ko e vale ‘u‘ua.

26Pea u ‘ilo ‘i he‘eku hakule ‘a e me‘a ni: ‘Oku kona ange ‘i he mate ‘a e fefine: he ‘oku ne hangē ko e ngaahi kupenga, pea ko e koto tauhele ‘a hono loto; ko hono nima ko e me‘a kii‘i; ‘ilonga ha taha ‘oku lelei‘ia ai ‘a ‘Elohimi te ne hao mei ai, ka ko e angahala te ne pō ‘e ia. 27Sio mai ki he me‘a kuo u ma‘u ‘i he‘eku hakule–ko e lea ia ‘a Koheleti–‘i he‘eku fakahoa ‘a ē mo ē ke u ‘ilo ‘a e tefito: 28ko e me‘a kuo u kumi mo kumi ki ai ‘a hoku loto, ka ‘oku ‘ikai te u ma‘u, ‘a ‘eni: Kuo u ma‘u ha tangata ‘e toko taha ‘i he toko afe: ka ko ha fefine ‘i he fu‘u tokolahi pehē na‘e ‘ikai te u ma‘u. 29Sio mai, ko eni pē e me‘a kuo u ma‘u: na‘e ngaohi ‘a e tangata ‘e ‘Elohimi ko e tonusika; ka kuo feinga‘i ‘e he fa‘ahinga ko ia ha fāliunga lahi.

Currently Selected:

KOHELETI 7: TMB

Highlight

Copy