KOHELETI 10
10
1KO E fanga lango fakamate ‘oku fakanamukū ‘a e me‘a pani ‘a e fai lolo;
‘Oku nau ngaohi ia ke tupu:
Ko e me‘i vale ‘oku ne mamafa ange ‘i he poto;
‘Oku mamafa ange ‘i he ongoongo.
2Ko e loto ‘o e poto ‘oku ‘alu ki to‘omata‘u;
Ka ko e loto ‘o e sesele ‘oku ‘alu ki to‘ohema.
3Pea na‘a mo ‘ene ‘i hala, ha potu ‘oku ‘alu ai ha vale, ‘oku hā masiva hono ‘atamai, pea ‘oku ne pehē ki he kakai kotoa pē ko e vale ia.
4Kapau ‘e kohu hake ‘a e ‘ita ‘a e pule kiate koe,
‘Oua te ke hiki mei he me‘a ‘oku ke nofo ai:
He ko e anga malū ‘oku ne tuku ta‘efai
‘Ani fu‘u angahala.#10.4 He… angahala; pe He ka ke ka taliangi ki ai, ‘e ala fakamolemole‘i ai ha ngaahi kovi lalahi.
5‘Oku ai ha kovi kuo u mamata ai ‘i he lalo la‘ā
‘Oku hangē ko e fofongavalea ‘a e pule:
6Kuo tuku ‘a e vale ke nofo ‘i he ngaahi potu mā‘olunga lahi,
Kae nofo mā‘ulalo ‘a e koloa‘ia.
7Kuo u sio ki ‘ani tamaio‘eiki ‘oku heka hoosi,
Kae ‘alu ‘a e hou‘eiki ‘i lalo hangē ha tamaio‘eiki.
8Ko ia ‘oku keli ha luo, te ne tō nai ki ai;
Pea ko ia ‘oku holoki ha ‘ā maka ‘e ‘uusi nai ‘e ha ngata.#Saame 7.15; Pal 26.27
9Ko ia ‘oku tā maka, te ne lavea ai nai;
Ko ia ‘oku tā ‘akau, te ne kafo nai mei ai.
10Kapau ‘oku peku ‘a e ukamea,
Pea ‘oku ‘ikai te ne fakamata,
Kuo pau te ne fakalahi ‘a e ivi ‘o ‘ene tā:
Ka ko e tokoni lahi ki he lava me‘a ko e poto.
11Kapau ‘e u‘u ha ngata te‘eki ha‘u ‘a e tangata fakalalata,
Pea tā ‘oku ‘ikai ‘aonga ‘a e tama lea ngongohe.
12Ko e ngaahi lea ‘oku tō mai mei he ngutu ‘o ha poto
Ko e koto faka‘ofo‘ofa;
Ka ko e ongo loungutu ‘o e vale
Te na folofua ia.
13Ko e kamata ‘o e ngaahi lea ‘oku tō mei hono ngutu ko e koto vale, pea ko e faka‘osi ‘o ‘ene lea ko e vale ‘u‘ua fakatu‘utāmaki. 14Ko e vale ‘oku ne fakalahi lau foki; ‘osi, ‘oku ‘ikai ‘ilo ‘e ha tangata pē ko e hā ‘e hoko; pea ko e me‘a ‘e fai hili ‘ene pekia, ko hai ‘e ala fakahā kiate ia?
15Ko e ngāue ‘a e sesele ko e me‘a fakaongosia kiate ia:
Seuke, ‘oku ‘ikai te ne ‘ilo ‘a e hala ki kolo.
16‘Oiauē, si‘i fonua ‘oku tamasi‘i ho tu‘i,
Pea ‘oku kātoanga pongipongi ho hou‘eiki!
17Ha fonua monū‘ia ka ko koe,
‘A ia ko ho tu‘i ko e hako ‘o hou‘eiki,
Pea ‘oku kātoanga ho hou‘eiki ‘i he taimi totonu,
Ko e kau mafi pē, ‘o ‘ikai ko e fa‘ahinga konā.
18‘I he fetu‘ani ‘a e fakapikopiko ‘oku holofa ‘a e fo‘i fale;
Pea ‘i he tāupe noa ‘a e nima ‘oku tutulu ‘a e fale.
19‘Oku nau ngaohi me‘akai–mo e uaine ‘oku ‘omi ke fakafiefia ‘aki ‘a e mo‘ui–koe‘uhi pē ke nau kata. Seuke, ko pa‘anga ‘oku ne tali ‘a e ‘eke kotoa pē.
20Na‘a mo ho loto‘i loto ‘oua te ke talakaa‘i ai ‘a e tu‘i;
Pea na‘a mo ho fale mohe, ‘oua te ke lau kovi ai ki he hou‘eiki:
He ko e manupuna ‘o e ‘atā ‘oku ne ‘ave lea;
Pea ‘e tala ‘a e me‘a ‘e ia ‘oku kapakau.
Currently Selected:
KOHELETI 10: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
