Luke 17
17
Vitumahana Ka Paisewa
(Mateu 18:6‐7, 21‐22; Marika 9:42)
1Ka aitam auyewa wayahina Iesu tauna a tau vi‑muni‑waiwai vonei, ivona,
“Tuta tuta pai vito‑nubu bagibagina ivin'‑omo‑nananena tomotau wayahia, ka pai vito‑nubu‑naia iana‑dibidibiei, e dewa goyona idedewei. Ka aituhu koiaka pai vito‑nubu nau‑vevewanei, e mani tomotau dewa goyona idedewei, vona ahiahina, onoto‑nana a dewa‑yaiyai potepotei. 2Wayahina, aituhu koiaka vi‑tau vi‑peuna, onoto‑nana vidoha aituhu naona yaiana hanu ananina itana‑ipwe otona wayahina, e bebega ihapone na‑opu gavivina deina. Iuna aituhu koiaka aitam tevana yaheyahe taina wayahia deina na‑vo‑vi‑peui, e tevanana dewa goyona dewei, apaina onoto‑nana a dewa‑yaiyai ananina vaniahei Yaubada wayahina. 3Wayahina, udune‑vivinimi!
Ka aituhu vaneim wayahima goyona dewei, nau‑wawanim edewa‑dadani evo‑vi‑tunuhi. Ka aituhu vaneim yam vona nononi, ka aituhu nua‑vinana, nau‑wawanim enua‑piahi.#Mat 18:15. 4Ka aituhu vaneimna goyona ai yau 7 dedewei wayahima auyewa aitamoata nihenina, ka aituhu tuta aitamoata aitamoata wayahina tauna vin'‑omo wayahima, e viamem, na‑vona, ‘Wayahima anua‑vinana, ka aviamem yau goyona wayahima enua‑piahi,’ akanai wamke nau‑wawanim ya goyona habuhabuna enua‑piahi.”
5Wayahina, Iesu a tau hae‑naia ivonei, ivona, “Kauvea, yama vitumahana evo‑vi‑bagibagia.”
6Ka Kauvea vona‑nau‑patei, ivona,
“Aituhu yami vitumahana mata‑sinisinina utuna deina, itomi ami pata ai taina ananina uveimeyei una‑vona, ‘Esi‑apum ka ena‑ne hawana nihenina, ka tenoke ebagunim,’ e ai‑nana yami vona‑naia na‑dewei deinake.#Mat 17:20; 21:21.
7Ka aituhu aitam wayahimia evi‑tau kaikaiwabo, wamke yam dewa medeina? Aituhu yam tau paisewa‑kavokavovo ya paisewa baguna nau‑yehai, o kadi aituhu tauna yam sipiV dune‑vi‑avini‑yehai, ka avaha mavina yam manua wayahina, kaiwadi, nau‑wawanim evonei, ena‑vona, ‘Kaiwa ananina, en'‑omoi, emanuena, kadue en'‑am‑kai.’ Eha‑ohota. 8Nau‑wawanim naona eveimeyei, ena‑vona, ‘En'‑omoi ka au ma' evo‑vi‑aiaia, eveneu, an'‑am kadue ana‑nim. Na‑iakwa, akanai en'‑am ka ena‑nim.’ 9Ka medeina? Aituhu yam tau paisewa‑nana yam veimea vi‑muniei ka dewei, apaina nau‑wawanim enau‑kaiwe ananina ya dewaia wayahina? Eha. Iuna tauna yam tau paisewa‑kavokavovo. 10Ka taua taumi deinake. Wayahina, avi tuta yami paisewa habuhabuna aveimeyemi unau‑yehai, eha nau‑wawanimi uvona‑vanevane. Kate itomi nau‑wawanimi una‑vona, ‘Eha nau‑wawaniai en'‑apa‑vidovidoheai. Iuna avi dewa anau‑yehai, vona ahiahina, dewaia vivane ama nau‑wawana ai heta.’”
Tau Lepero Ai Yau 10
11Ka Iesu avaha Ierusalem wayahina vanevane, ka papani Samaria ka papani Galili niwania vin'‑omo. 12Ka eha ani‑hoina aitam meagai wayahina na‑nu, ka tau lepero ai yau 10 ivaniahei. Ka taui tupwana bana mamanaina wayahina imimini, ipotepotei, 13ka movi ananina wayahina ivivi‑hone, ivona, “Kauvea Iesu, eate‑nuanuaieai.”#Lev 13:45-46.
14Wayahina, magigino, e vonei, ivona, “Una‑ne, e tau vi‑nomu wayahia uviwavenemi.” Ka taui ivi‑putu ineine, ka etawana ai lepero iakwa.#Lev 14:2-3; Mat 8:3-4.
15Ka aitam wayahia, tauna Samaria onotona, dueyei vivane avaha vidoha. Wayahina ya nau‑kaiwa nui mavi‑havine, ka tauna movina ananina wayahina Yaubada awa‑vidovidohei. 16E tauna omo Iesu aena ipeu, vi‑kabubu, e nau‑kaiwei.
17Wayahina, Iesu vi‑tanai, ivona, “Ia! Onoto ai yau 10 habuhabui avo‑vi‑aiai‑neiei, a? Kaiwadi, mani ononotoi ai yau 9 aveta? 18Aviani iuna aitamoata wayahia, vivane Samaria onotona taina, ana heta mavina, e Yaubada awa‑davedavei?” 19Ka Iesu Samaria onotona vonei, ivona, “Emini, ena‑ne. Yam vidoha evaniahei iuna yam vitumahana mamaei.”
Yaubada Ya Pai Veimea
(Mateu 24:23‐28, 37‐41)
20Ka Parisi tupwai iomo Iesu wayahina ka ivi‑tanaiei, “Avi tuta Yaubada ya pai veimea na‑omo, kadueyei?” Ka Iesu yai vi‑tanai‑nana nau‑patei deina, ivona, “Tomotau eha ai pata taui mataia Yaubada ya pai veimea a vin'‑omana idueye. Ka aituhu udune‑vi‑anai wayahina, eha ami pata udueye. 21Ka kadue eha ana pata una‑vona, ‘Udueyei! Baina avaha vi‑putu,’ o ‘Tenoke papani‑nana wayahina avaha vi‑putu.’ Eha ami pata uvonavona deina, iuna Yaubada ya pai veimea vivane nihenimia mamaei.”
22Ka munia, Iesu tauna a tau vi‑muni‑waiwai wayahia ivona,
“Apaina ani‑tawanemi, ka tuta tepakaia wayahina nuanuami ananina yauke, Tauna Vi‑tomotau, nui kamamae auyewa aitamoata ana heta wayahina, kate eha ana pata ududueyeu. 23Ka aituhu tomotau ivonemi, ina‑vona, ‘Tauna Vi‑tomotau tanoi mamaei,’ o aituhu ina‑vona, ‘Baina mamaei!’ eha nau‑wawanimi yai vona uvitumahane, kadu eha yai vonaia deina uvi‑munie.#Mar 13:21; Luk 21:8. 24Ka aitam auyewa tuta tepakaia wayahina amavina wayahimia, ka auyewana wayahina eha uva‑hamwahamwana wayahiu. Iuna auyewana wayahina un'‑anamaneu ahiahina, ka yau vin'‑omana ana dune vivane vonaina ana dune deinake, ka wahuma papanina wayahina a itoava papani‑nana wayahina venavenau. 25Ka munia, dewaia ivin'‑omoi, ka naona tuta taina a tomotau yauke, Tauna Vi‑tomotau, ivihahaieu, ka dewa hidahida habuhabuna avaniahei tomotau taina wayahia.
26Tau ma' tanopi yai dewa yau mavi‑havine ana tuta wayahina vivane tau ma' tanopi yai dewa Noa yana tuta wayahina deina. 27Iuna nonova Noa ya tutea tomotau iamam ka inimnim, ka kadue ononotoi ka vaivinei itavitavine, kadue natunatui iawaehei itavitavine deina a itoava auyewana Noa ya waea igenu wayahina. Ka auyewana wayahina diwaya ananina vin'‑omo, e tomotau‑naia habuhabui vita‑vovoni. Ka tuta tepakaia wayahina yau vin'‑omana an' auyewa wayahina tomotau yai dewa aitamoata tomotau‑naia yai dewa deinake.
28Ka kadue tau ma' tanopi yai dewa deinake Lota yana tuta nihenina. Iuna nonova Lota ya tutea tomotau iamam ka inimnim, ka ivi‑maiena ka iaimwaneyei, kadue ibagubaguna ka iyonayona.#Nao 18:20; 19:25. 29Ka idedewei deinake a itoava Lota meagai Sodom ni‑tawanei wayahina. Ka auyewana wayahina ai yabeyabena hanu weweavina nui wahuma wayahina atuatuna, wei deina, ka ai‑nana tomotau‑naia habuhabui vita‑vovoni.
30Ka yau vin'‑omana an' auyewa taina deina. 31Auyewana wayahina aituhu aviyaivia manua hetana nau‑peuna imamaei, ka aituhu yau vin'‑omana idueyei, eha nau‑wawani yai manua ina‑nui, e yai gugua in'‑epe. O aituhu aviyaivia baguna ipaipaisewa, eha nau‑wawani megeia imavina yai gugua wayahi.#Mat 24:17-18. 32Ka nau‑wawanimi Lota awana yai dewa unua‑vi‑avini!#Nao 19:17, 26. 33Aituhu aviyaivia yai nuanua taui ai heta yawai iveimeyei, taui yawai itutu‑haini. Kate aituhu aviyaivia iawaeheu yawai aveimeyei, taui yawai‑vavaha ivaniahei deina.#Luk 9:24. 34Vona ahiahina, ioyomana nihenina tomotau ainua pai dauva aitamoata wayahina idaudauva, ka aitam avi‑nua‑dadanei, an'‑epei, ka aitam avihahaiei, mamaei. 35Ka kadu deinake vaivine ainua iam‑gidoma, ka aitam avi‑nua‑dadanei, an'‑epei, ka aitam avihahaiei, imamaei.” 36#17:36 Taui yai nua‑uya ananina voneka vivane mataina 36 eha Luke ya iginuma, kate tuta munia mani tomotau vi‑nuia. Wayahina, ataina vo‑vina habuhabuna matainana ivo‑haini. Matainana ivona, “Tomotau ainua baguna, aitam avi‑nua‑dadanei an'‑epei, ka aitam avihahaiei mamaei.”
37Wayahina, a tau vi‑muni‑waiwai ivi‑tanaiei, ivona, “Kauvea dewaia tanoi aveta ivin'‑omo?”
Ka Iesu ya vona‑nau‑pata vivane aitam vona tana‑minikuna, ivona,
“‘Aveta baina waga aninigai imamae,
anai wayahina bwayobwayo inau‑hohona.’
Kadu aveta baina iaiayaia ududueyei, un'‑anamanei dewaia ivin'‑omo.”
Currently Selected:
Luke 17: MVN
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
