Luke 16

Tau Dune‑vi‑avina Sinasinapuna

1Iesu kadu vona tana‑minikuna taina a tau vi‑muni‑waiwai vonei, ivona,

“Aitam tau kaikaiwabo mamaei, ka tauna tau aimwane aitam. Ka ya tau paisewa aitamoata ya paisewa kadu yana kina habuhabuna veimeyei kadu dune‑vi‑avini. Ka aitam tuta wayahina tupwai tomotau vane iomanei tau kaikaiwabo‑nana wayahina, ivona, ‘Bada, yam tau dune‑vi‑avina‑nana yam guguaia wayahia dewa‑kavokavovoei.’

2Wayahina, tau kaikaiwabo‑nana ya tau dune‑vi‑avina honei ka vonei, ivona, ‘Avaha dewa goyona wayahim anononi. Ka yau nuanua aviani ededewei yau kina aitamoata aitamoata wayahina an'‑anamanei. Wayahina, nau‑wawanim yam dewa eginumi eveneu adueyei. Na‑iakwa, ena‑opu. Iuna yam paisewa wayahiu avaha iakwa.’

3Akaka tau dune‑vi‑avina‑nana nuanua, ka ana heta wayahina ivona, ‘Aioi! Ataina medeina adewe avidoha? Iuna yau kauvea avaha vihahaieu. Eha yau bagibagi, wayahina eha memeanina wayahiu abagubaguna. Ka aituhu ana‑omo tomotau wayahia, e aniani aviame, ini‑yauyau avaniahe deinake. 4Avaha anamanei! Taina deina adewei, e apaina avi tuta eha yau paisewa, akanai yaiau habuhabui avaniahai ina‑ivaiteu.’

5Wayahina, tau dune‑vi‑avina‑nana ya kauvea a tau vi‑aga habuhabui honei, e aitamoata aitamoata wayahia vin'‑omo wayahina. Ka tauna onoto naona vi‑tanaiei, ivona, ‘Ai vi‑am am aga yau kauvea wayahina?’

6Ka onotona vona‑nau‑patei, ivona, ‘Au aga vivane gam bunama wayahina ai yau 100 aepei.’

Wayahina, tau dune‑vi‑avina‑nana ivona, ‘Buki taina nihenina am aga‑nana evo‑vinei, ai yau 50 ana heta eginumi.’

7Ka onoto v'‑inuana inui, e tau dune‑vi‑avina‑nana vi‑tanaiei, ivona, ‘Ka wamke medeina, ai vi‑am am aga yau kauvea wayahina?’

Ka v'‑inuana nau‑patei, ivona, ‘Au aga vivane tegana ananina palaua wayahina ai yau 100 aepei.’

Wayahina, tau dune‑vi‑avina‑nana kadue ivona, ‘Buki taina nihenina am aga‑nana evo‑vinei, ai yau 80 ana heta eginumi.’

Ka tauna ya kauvea a tau vi‑aga habuhabui ai aga bou‑opuei deinake.

8Ka munina kauvea‑nana ya dewana vaneana nononi, e awa‑vidovidohei, ivona, ‘O! Tauna ya nua‑uya ananina, wayahina dewei deinake.’”

Ka vona tana‑minikuna tanoi iakwa, e Iesu vo‑vi‑mahetei, ivona,

“Tau vi‑tanopi yai nua‑uya nui ibagibagi, idedewei ai heta wayahia deinake, kate Yaubada yana yoko eha yai nua‑uya nui deina. 9Wayahina avonemi, itomi nau‑wawanimi tanopi a gugua un'‑am‑veneneyei, ka tomotau una‑ivaitei, e ivi‑yaianemi deina. Iuna apaina auyewa pai nau‑yehata omomoi, ka auyewana wayahina tanopi a gugua na‑iakwa. Ka auyewana wayahina Yaubada na‑nau‑kaiwemi, e pai ma'‑vavaha nihenina una‑nu, e umamaei.”

10Ka Iesu ya vo‑vi‑maheta neine, ivona,

“Aituhu aviyaivia yai dewa tunutunuhina gugua aitonuata wayahina, apaina taui yai dewa kadu tunutunuhina gugua habuhabuna wayahina. Kadu aituhu aviyaivia ivitupu gugua aitonuata wayahina, apaina taui kadu ivitupu gugua habuhabuna wayahina.#Luk 19:17-26. 11Wayahina, aituhu Yaubada tanopi a gugua venemi uveimeyei tanopia, kadue aituhu yami veimea eha tunutunuhina gugua‑naia wayahina, vona ahiahina, eha Yaubada ya nuanua wahuma a gugua na‑vo‑patami. 12Ka aituhu eha tauna ya gugua uveimeye ahiahina, vona ahiahina, apaina eha tauna ya nuanua itomi yami gugua na‑venemi, e ami heta uveimeye. Eha‑ohota.

13Vona ahiahina, tau paisewa eha ana pata vi‑tau paisewa kauvea ainua wayahia. Kaiwadi, apaina tauna kauvea naona vihahaiei, ka kauvea v'‑inuana dune‑nuanuaiei, o kadi kauvea naona vi‑ateteyei, ka kauvea v'‑inuana nau‑nikonikoiei. Wayahina, eha ami pata tuta aitamoata nihenina uvi‑tau paisewa Yaubada wayahina, kadu uvi‑tau paisewa kina wayahina. Nau‑wawanimi aitam uvi‑nua‑dadani, ka aitam uni‑tawanei.”#Mat 6:24.

Iesu Parisi Yai Nuanua Kadu Yai Dewa Apa‑goyogoyoei

(Mateu 11:12‐13; 5:31‐32; Marika 10:11‐12)

14Ka tutana Parisi‑naia imimini nepena yana vona habuhabuna tanoi inononi, ivi‑putu Iesu ivi‑waipoei. Iuna taui kina nuanuai ananina. 15Wayahina, Iesu Parisi‑naia vonei, ivona,

“Itomi yami nuanua ananina yami dewa ana dune vivane ahiahina mani tomotau mataia. Kate Yaubada avaha yami dewa goyona ka maimaiovina nihenimia imamaei anamane‑yehai. Vona ahiahina, aviani tomotau nuai iepepei kadu iapa‑vidovidohei ananina, iuna ana dune ahiahina mataia, vona ahiahina, Yaubada dewaia nau‑nikonikoiei.#Mat 23:28; Luk 18:9-14.

16Tuta nonova a itoava Ioni Tau Bapitaiso yana tuta wayahina, Mosese ya veimea kadu tau apa‑taputapu yai iginuma yawaika iveimeyei. Ka Ioni Tau Bapitaiso yana tuta wayahina a itoava tuta ataina wayahina vane ahiahina Yaubada ya pai veimea wayahina anaunau‑wahei wayahimia, ka aituhu aviyaivia yai bagibagi, taui Yaubada ya pai veimea nihenina inu‑dadani.#Mat 11:12-13.

17Mosese ya veimea a bagibagi mamaei, kadu avonevonemi, veimeana habuhabuna vivane vona tunutunuhina, ka tuta tepakaia wayahina veimeana a bagibagi eha na‑ihanua. Ika, tuta tepakaia wayahina memeanina wahuma ka tanopi ina‑iakwa, ka Mosese ya veimea a iginuma aitamoata aitamoata eha ina‑iakwa.#Mat 5:18. 18Wayahina, aituhu koiaka awana vaiobuei, e tavine‑tamana mani vavine wayahina, tauna avaha vi‑tau kenekenene, ka kadu aituhu koiaka vavine vaivaiobuna tavine, onoto‑nana kadue avaha vi‑tau kenekenene.”

Lasarusi Ka Tau Nua‑tania

19Ka Iesu kadu aitam vona tana‑minikuna vonei, ivona,

“Aitam tuta aitam tau kaikaiwabo ka aitam onoto ana wava Lasarusi ainua imamaei. Ka tau kaikaiwabo‑nana ana kwama lineniV ahihi‑vainei, ka kadue ana ma' habuhabuna ahiahina. Wayahina, auyewa aitamoata aitamoata nihenina tauna dewa‑haiawa. 20Ka Lasarusi payapayaya ka gonigoniana. Wayahina, yaiana iomanei, e tau kaikaiwabo ya manua mataetana iboui, e mamaei. 21Ka avi tuta Lasarusi tau kaikaiwabo‑nana ana ma' kamukamumuna tupwana vaniahei, akanai tauna amam, e dewa‑haiawa. Ka tuta habuhabuna kedewa ivin'‑omo, e Lasarusi a gonia itaumi‑neiei.

22Ka aitam auyewa Lasarusi yana tuta iakwa, ka anelose ivin'‑omo itaini iomanei Abaraham nepena iboui, vivane tau tunutunuhina yai papani wayahina.

Ka munia, tau kaikaiwabo‑nana kadue aniga, e unuvovoa iboui. Ka apaina tauna iopu tau goyogoyona yai papani wayahina. 23Ka tenoke papani HadesiV nihenina a dewa‑yaiyai vaniahei vivane viha‑vainena. Ka dune‑vane, e bana mamanaina wayahina Abaraham dueyei, ka Lasarusi nui imamaei. 24Wayahina, tau kaikaiwabo‑nana vi‑hone ananina ka viama, ivona, ‘Aioi! Amau, Abaraham! Kaiwa ananina, en'‑ate‑nuanuaieu, e Lasarusi evi‑tunei na‑opu wayahiua, e nima‑tabona wayahina daudau tutumina bunuva wayahina meau vi‑bigei. Iuna papani taina wayahina ai yabeyabena nihenina viha‑vainena avaniahei.’

25Akaka Abaraham vona‑nau‑patei, ivona, ‘Eha. Natu, enuani. Nonova tanopia yawaim habuhabuna dewa‑haiawa ana noe, ka Lasarusi eha aitam pai dewa‑haiawa ta‑vaniahe, ka tauna viviha. Ka ataina tuta tauna ya dewa‑haiawa vaniahei, mamaei, ka wamke eviviha. 26Kadue niwanikaia bebega ito‑niuna mamaei, ka tana‑vewanika. Wayahina, eha ama pata wayahimia aubo‑tamana, kadue eha ami pata wayahiaia uaubo‑tamana. Akanai kamamaei deinake.’

27Ka tau kaikaiwabo‑nana viama‑havine, ivona, ‘O, amau, aituhu deina, aviamem Lasarusi evi‑tunei na‑omo yau yoko wayahia. 28Iuna vavaneiu ai yau 5 imamaei, ka yau nuanua Lasarusi mataedai nau‑vi‑avini. Aituhu tauna nau‑vi‑avini deina, apaina taui eha kadu in'‑omo baina viha‑vainena a papani wayahina.’

29Ka Abaraham vona‑nau‑patei, ivona, ‘Tuta habuhabuna taui Iginuma inononi, ka Mosese, ka kadu tau apa‑taputapu habuhabui inau‑vi‑avini viha‑vainena a papani wayahina. Vavaneim nau‑wawani vonaia inononi.’

30Kate tau kaikaiwabo‑nana ivona, ‘Amau Abaraham, Iginuma ana vona ana heta eha ana pata. Kate aituhu aitam koiaka anigea mini‑havine, ka aituhu tauna na‑omo wayahia, avaha tauna idueyei, dewana ana pata inua‑vinana ahiahina yai dewa goyona wayahina.’

31Ka Abaraham vona‑nau‑patei, ivona, ‘Eha. Aituhu Mosese yana vona ivihahaiei, ka aituhu tau apa‑taputapu yai vona ivihahaiei, taui eha ai pata inua‑vinana. Kadue aituhu aitam koiaka anigea mini‑havine na‑omo wayahia, e nau‑vi‑avini, taui kadue tauna ivihahaiei aitamoata deinake.’”

Currently Selected:

Luke 16: MVN

Highlight

Copy