Ñwaè' Maêk 3

1Jisòs à m ker niŋ mbe ndap rloo. Ŋwɛ̀ mò' à m ba mbo ce li rkoo li m kwe. 2Wowèe a roo à ryɛ enɛ Jisòs be gèe tɛ e ke'se nyʉ̀ mmbomntaa Nyʉ̀ lɛ, tɛ wowèe a bo sa' ye enɛ e bʉ' ncir. 3Jisòs à laa nè ŋwɛ̀ ce rkoo li m kwe ye anà enɛ̂, “Nàti vʉ mbena!” 4E bipshì nè bèe anà enɛ̂, “Yisèe ncir yi byemi enɛ sèe gee ba yuu bòŋboŋ nyʉ̀ mmbomntaa Nyʉ̀ kɛ̀ yuu bebep? Yi byemi enɛ sèe ja' ŋwɛ̀ jà' kɛ̀ sèe yʉ ŋwɛ̀ yʉ?” Wowèe a beesì yuu nè ye ka'. 5Nyor à bep Jisòs à ryɛ njɛ̀ɛ ntèe-tu ca. E fyɛ' wowèe à rshentee, a laa nè ŋwɛ̀ yaŋ cà enɛ̂, “Mà' lo rkoo kùyɛɛ.” E ma', li kʉtì bòŋboŋ. 6Bèe Farìsi a ka' yɛ, a ku fʉʉ, a du a yɛ bèe ŋkʉʉ Hɛròd mò', a wowèe a kɛ' a ce sèesi àmbò a be koo Jisòs yʉ.

7Jisòs a ŋgǎa yɛ'ni yì buu wèe a m lò a du àwǎa rdip rgòr. Bèe magòr a du fa wǎp mbùu. À m ba běe à ŋgǒŋ Galèle ba Jùdiyà, 8ba běe à rla' Jɛ̀rusalɛ̀m, ba běe à ŋgǒŋ Ìdumìyà ba mla' mo' ce mi m ba àŋguu rdip Jodàn, ker ba Tayà ba Sidòn. Wowèe a m vʉ̀ magòr se à ryɛ ye njo' njɛ̀ɛ mfà' ce wowèe a m yu' enɛ e m ce gèe. 9Jisòs à laa nè ŋgǎa yɛ'ni yì buu enɛ a fyɛ' keŋ tɛ e bo niŋ mbo fà dì' ku' bèe anà a bo fate ye ka'. 10E m làa wa'a njobè' e m gèe ŋgǎa byaŋ magòr a ke'se, ŋgǎa byaŋ mo' a ce ghèter à rjòo ye enɛ a bo kè'se foŋ. 11Byʉ' bbebep vi m ce yɛ Jisòs à nfè' wɛɛwɛ ku gweŋger à nshè kùntombì nè ye, ce waani ce laa enɛ, “A wɛ̀ Muu Nyʉ̀.” 12Jisòs à ciisì nè vi enɛ vi fa suŋ ŋwɛ̀ enɛ e yu Muu Nyʉ̀ ka'.

13Jisòs à m ko' mbe rtùu a kɛ' bèe ce e m kòŋ, wowèe a vʉ a yɛ ye. 14Wowèe a ka' vʉ̀, e co' bèe ncòp-baa-à-rrʉ̀ʉ à yi ŋgǎa ntuu tɛ a wowèe a bo ce ba, tɛ e bo ce tuu wowèe, tɛ a du ce fè'shi, 15kèr tʉr ŋger à rjùu byʉ' mnyʉ̌mkà' enjep bèe. 16Bèe ce ncòp-baa-à-rrʉ̀ʉ ca à m ba Saimʉ̀n ce e m too enɛ Pità, 17ba Jɛms ce e m ba muu yì Sɛbɛ̀dî, ba nfʉr yì Jǒn ce Jisòs à m too wowèe enɛ Boanɛrgɛ̀s, ce mbùu efa gho yu enɛ “Boo sa'mbèŋ”, 18Andrù, Felêp, Bàtòlomì, Matìyò, Tomâs, Jɛms ce e m ba muu Alfìyòs, ba Tàdiyòs. Saimʉ̀n ce e m ba mò' efa mʉ̀ bèe Silòt, 19ba Judas Ìskarìyòt ce e m lò a fyeni Jisòs nà.

20Jisòs à m kʉti mbe ndàp. A ka' kʉti, ku' bèe a ker kaarì, a ŋgǎa yɛ'ni yì buu wèe a ke' tʉr njì à rye yuu ka'. 21Yì bèe a ka' yu' wa'a, a du à rkoo ye njobè' wowèe a m ce kwà'shi enɛ tu yi ce kar ye.

22Ŋgǎa ryɛ'ni mncir ce a m vʉ̌ à rla' Jɛ̀rusalɛ̀m a m làa enɛ Bɛsɛbùl yu njep ye, a ker ce làa enɛ e ce fʉr byʉ' mnyʉ̌mkà' à ŋger ŋkʉʉ mnyʉ̌mkà'. 23Jisòs à kɛ' wowèe a laa buu nè wowèe à mŋgàa enɛ̂, “Àde' Satàn fʉr Satàn enjep ŋwɛ̀ à njɛ̌ɛ kɛ? 24Ŋgàpni yi ka' ba à to', àde' to' anà yi tɛɛ ka'. 25Ŋgàpni yi ka' ba mbe ndàp, àde' ndap anà tɛɛ ka'. 26Banɛ Satàn ka' ce rè bkòr a yì nyor, ŋgàpni yi ba, banɛ e be tɛɛ ka', tɛ ba yi wa' wɛɛ.

27“Yi ku ba foŋ enɛ àde' ŋwɛ̀ niŋ mbe ndàp ŋwɛ̀ ŋger, kwɛ' yì buu du àgho ka', ce yi ka' tɛ ba enɛ e kur ŋwɛ̀ ŋger anà ka'. E ka' kur ye wɛɛ, e ka' kwɛ' buu embe yě ndàp. 28M ce suŋ wèe nè mini-ŋwɛ̀ mɛnɛ Nyʉ̀ be kèe fòosi buu bbebep ce bèe a m gèe, ka' buu bbebep ce wowèe a làa. 29Geewa'a, ŋwɛ̀ à ka' bepsi rlii Yʉ' Rara, àde' Nyʉ̀ ke foosi ye ka'. Ŋgàŋ be niŋ à mnsa' njo' yi yuu bebep, nfesè.” 30Jisòs à m làa cena njobè' wee mo' a m ce làa enɛ yʉ' bebep yi yu lɛ njep ye.

31À m ba à nfè' ca ma Jisòs ba bfʉr vi a vʉ a tɛɛte njep ncʉ̀ʉndʉ̀', a ce kɛ' ye. 32Ku' bèe ce a m cute a Jisòs wèe nà, a m làa nè ye enɛ̂, “Yɛ̂, yò ma ba bfʉr gho ba bjar gho a yu njepmbè a ce ròo wɛ̀.” 33E beesì nè wowèe enɛ, “Yà ma a nda? Bfʉr wa à ba wèe kɛ?” 34E m fyɛ' bèe ce a m cute a sir ye mbe mʉ nà, a laa enɛ̂, “Yɛ̂, a yà ma ba bfʉr wa na. 35Ŋwɛ̀ à ka' ce gèe yuu ce Nyʉ̀ ce kòŋ, banɛ ŋgàŋ yu nfʉrà, ba njar yà, ba yà mâ.”

Currently Selected:

Ñwaè' Maêk 3: LNT

Highlight

Copy